មេដឹកនាំគណបក្សប្រជាជនកម្ពុជា លោក ហ៊ុន សែន រងការរិះគន់ថា ការគំរាមដកសញ្ជាតិពលរដ្ឋខ្មែរពីកំណើត ឆ្លុះបញ្ចាំងថា មេដឹកនាំរូបនេះ កំពុងព្យាយាមលាក់បាំងកំហុសកាត់ដីឱ្យបរទេស ដើម្បីតែចង់ផ្ទេរអំណាចតពូជ ក្រោមចំណងវៀតណាម។
អ្នកឃ្លាំមើលថា ការចង់បិទបាំងទង្វើកាត់ទឹកដីឱ្យបរទេសនេះ ផ្ទុយពីរដ្ឋធម្មនុញ្ញ និងប្រឈមនឹងទោសក្បត់ជាតិតាមមាត្រា៤៤០នៃក្រមព្រហ្មទណ្ឌកម្ពុជា។
ការរិះគន់របស់អ្នកតាមដាន ចំពេលយោធាថៃ ពង្រីកការឈ្លានពានច្រើនខែទៅនេះ រហូតទាហានថៃ បើកការបាញ់ប្រហារមកលើពលរដ្ឋខ្មែរ នៅភូមិព្រៃចាន់ កាលពីថ្ងៃទី១២ ខែវិច្ឆិកា បណ្តាលឱ្យម្នាក់ស្លាប់ និង៣នាក់ទៀតរងរបួស តែមេដឹកនាំរូបនេះ នៅតែអះអាងពីភាពចាំបាច់មិនត្រូវតបត ក្រោមហេតុផលថា ចង់នាំត្រឡប់មកវិញនូវសន្តិភាព សម្រាប់ប្រជាជន នៃប្រទេសទាំងពីរ។
លើសពីនេះ មេដឹកនាំរូបនោះ ក៏បានព្រមានដកសញ្ជាតិផងដែរ ទៅលើពលរដ្ឋទាំងឡាយណា សូម្បីតែព្រះសង្ឃ បើហ៊ានបញ្ចេញមតិ បន្ទរតាមអ្នកឃ្លាំមើលថា រដ្ឋាភិបាលកាត់ដីឱ្យសត្រូវឈ្លានពាន ដើម្បីរក្សាអំណាច ជ្រកក្រោមពាក្យសន្តិភាព។
លោក ហ៊ុន សែន នៅថ្ងៃទី១៧ ខែវិច្ឆិកា ក្នុងពីធីមួយនៅរាជធានីភ្នំពេញ បានគំរាមដកសញ្ជាតិពលរដ្ឋខ្មែររួមទាំងព្រះសង្ឃផង បើហ៊ានបញ្ចេញមតិលើបណ្តាញសង្គមចោទរដ្ឋាភិបាលថាបានកាត់ដីឱ្យបរទេសដើម្បីដោះដូរយកសន្តិភាព។
លោកថា៖ «ផ្ដាំផ្ញើទៅម៉ងមិនថាព្រះសង្ឃ ឬក្រហស្តទេ សុំកុំរពិសដៃចូលទៅComment ហើយតិចថាទាល់Page របស់ ហ៊ុន សែន បានស្រាវជ្រាវអត់ទេ! Page ណាក៏ដោយដែលបង្ហោះហើយឯងចូលទៅcomment នៅក្រៅស្រុក រួចខ្លួន! នៅក្នុងស្រុកអត់រួចខ្លួនទេ ប្រាប់ឱ្យហើយទៅ។ នេះមិនមែនជាអំពើផ្ដាច់ការទេ ព្រោះអ្នកឯងចូលមកជេរ អ្នកឯងចូលមកបំបាក់ទឹកចិត្តកងទ័ព អ៊ីចឹងអំពើញុះញង់អំពើខ្លះជាអំពើក្បត់ជាតិតែម្តង[…] នៅលើពិភពលោកមានប្រទេសច្រើនណាស់ ស្ទើរតែ៨០%នៃប្រទេសដែលមានច្បាប់ដកសញ្ជាតិដល់ម៉ោងនេះ យើងអត់ទាន់មានដកសញ្ជាតិអ្នកណាមួយទេ តែវានឹងឈានដល់ប្រសិនបើគេប្រព្រឹត្តដល់កម្រិតនោះ»។
ជុំវិញសាររបស់លោក ហ៊ុន សែន នេះ តំណាងរាស្រ្តគណបក្សសង្រ្គោះជាតិ លោក អ៊ុំ សំអាន ស្តីបន្ទោសថា លោក ហ៊ុន សែន ជាមេដឹកនាំអសមត្ថភាព គិតតែពីរក្សាអំណាច មិនខ្វល់ខ្វាយពីការការពារទឹកដី និងអាយុជីវិតខ្មែរស្លូតត្រង់នោះទេ។
លោកយល់ថា លោក ហ៊ុន សែន កំពុងយកយុទ្ធសាស្រ្តចាស់ដូចដែលធ្លាប់ធ្វើជាមួយវៀតណាម ដើម្បីរក្សាអំណាច និងដោះដូរសន្តិភាព តាមរយៈការតាមកំទេចខ្មែរគ្នាឯងដោយមិនដកដៃធ្វើឱ្យជាតិខ្មែរបែកបាក់កាន់តែធ្ងន់ធ្ងរ។
លោកថា៖ «គួរតែខ្លាំងជាមួយថៃ កុំខ្លាំងបានតែជាមួយខ្មែរនោះ! ជាមួយខ្មែរគឺងើបមួយវ៉ៃមួយជាមួយថៃអត់ធ្មត់និងចាស់ទុំ។ ឲ្យថៃរាយបន្លាលួសយកដីខ្មែរយើងស្រេចចិត្ត នៅភូមិជោគជ័យ ភូមិព្រៃចាន់ ប្រាសាទតាមាន់ធំអីជាដើម ច្រកអានសេះអីជាដើម។ ពេលដែលថៃបានបាញ់សម្លាប់ប្រជាពលរដ្ឋខ្មែរបាញ់ឲ្យពលរដ្ឋខ្មែររបួសហ្នឹង គឺអត់មានចំណាត់ការអី ដើម្បីការពារប្រជាពលរដ្ឋ អត់មានប្រើសិទ្ធិស្វ័យការពារប្រជាពលរដ្ឋ ផ្ទុយទៅវិញ បែរជាមកធ្វើទុក្ខបុកម្នេញចំពោះប្រជាពលរដ្ឋខ្មែរទៅវិញ អាហ្នឹងវាជារឿងមួយមិនត្រឹមត្រូវទេ គួរតែខ្លាំងជាមួយថៃកុំខ្លាំងបានតែជាមួយខ្មែរគ្នាឯងនោះ»។
សម្រាប់ លោក សំអាន ពលរដ្ឋរិះគន់រឿងទឹកដីគឺជាអ្នកស្នេហាជាតិ ហើយអ្នកដែលកាត់ទឹកដីឱ្យបរទេស ដូចដែលលោក ហ៊ុន សែន ស្ងៀមស្ងាត់ឱ្យថៃបាញ់សម្លាប់ពលរដ្ឋខ្មែរតាមទំនើងចិត្ត និងរាយបន្លាលួសព័ទ្ធយកដីខ្មែរនៅតាមព្រំដែន ទើបជាជនក្បត់ជាតិ។
បន្ថែមលើនេះ លោកថា ការដឹកនាំរបស់ លោក ហ៊ុន សែន មិនត្រឹមតែធ្វើឱ្យបាត់បង់ទឹកដីទៅប្រទេសថៃទេ ថែមទាំងធ្វើឱ្យដីខ្មែរត្រូវបានវៀតណាមច្បាមយកជាច្រើនទីតាំងថែមទៀត។
លោកថា៖ «លោក សែន ដែលបានកាត់កោះត្រល់ កាត់កោះក្រចកសេះទៅឲ្យវៀតណាមដែនសមុទ្រខ្មែរយើងហ្នឹង កាត់ទៅឲ្យវៀតណាម៣០ពាន់គីឡូម៉ែត្រការ៉េ ដាក់តំបន់ទឹកប្រវត្តិសាស្ត្រដែលជាដែនសមុទ្រខ្មែរ រួមជាមួយវៀតណាមចំនួន១០ពាន់គីឡូម៉ែត្រការ៉េ កាលពីឆ្នាំ១៩៨២ គឺសន្ធិសញ្ញាស្ដីពីតំបន់ទឹកប្រវត្តិសាស្ត្រ! អាហ្នឹងបានជាទង្វើក្បត់ជាតិ! បានឲ្យលោក សុខ អាន កាត់កោះគុតឱ្យថៃតាមអនុស្សរណៈនៃការយោគយល់គ្នាឆ្នាំ២០០១! អាហ្នឹងបានជាទង្វើក្បត់ជាតិ។ អ្នកដែលជាជនក្បត់ជាតិ គឺលោក ហ៊ុន សែន ទៅវិញទេមិនមែនប្រជាពលរដ្ឋគ្រាន់តែសម្ដែងមតិហ្នឹង! ចោទប្រជាពលរដ្ឋថាជាជនក្បត់ជាតិ ដែលត្រូវដកសញ្ជាតិនោះទេដូច្នេះចង់ដកសញ្ជាតិត្រូវដកសញ្ជាតិ លោក ហ៊ុន សែន មុនគេ ព្រោះ លោក ហ៊ុន សែន គាត់គប់គិតកាត់ទឹកដីទៅឱ្យវៀតណាម តាមរយៈសន្ធិសញ្ញាបំពេញបន្ថែមឆ្នាំ២០០៥ និងសន្ធិសញ្ញានាទសវត្សរ៍ទី៨០ សម័យវៀតណាមត្រួតត្រាកម្ពុជា ដូចជា សន្ធិសញ្ញាឆ្នាំ៨២ ៨៣ និង៨៥»។
សម្រាប់ ប្រធានក្រុមប្រឹក្សាឃ្លាំមើលកម្ពុជា លោក ម៉ែន ណាត ទោសក្បត់ជាតិ មិនមែនពលរដ្ឋខ្មែរ ឬមន្រ្តីបក្សប្រឆាំងដែលរិះគន់រឿងព្រំដែនជាអ្នកទទួលនោះទេ តែជនដែលប្រឈមទោសក្បត់ជាតិ គឺលោក ហ៊ុន សែន ដែលធ្វើឱ្យទឹកដីខ្មែរបាត់បង់ច្រើនកន្លែងទៅប្រទេសថៃ និងវៀតណាម។
លោកថា៖ «អ្នកដឹកនាំដែលចុះហត្ថលេខា ចុះកិច្ចសន្យាជាមួយបរទេសប្រគល់ដីមួយផ្នែក ឬទាំងស្រុងឲ្យបរទេសណា អាហ្នឹងនៅក្នុងក្រមព្រហ្មទណ្ឌមានសរសេរច្បាស់លាស់តើ! មានប្រជាពលរដ្ឋសាមញ្ញគណបក្សប្រឆាំងមានឱកាសទៅធ្វើក្បត់ជាតិកើតទេ។ អ្នកដែលក្បត់ជាតិគឺអ្នកនៅក្នុងអំណាចហ្នឹងឯង។ យើងឆ្លុះបញ្ចាំងមើលទៅរបប លោក ហ៊ុន សែន ដឹកនាំពី៧៩មកដល់បច្ចុប្បន្នហ្នឹង លោក ហ៊ុន សែន បានធ្វើស្អីខ្លះចុះហត្ថលេខាស្អីខ្លះជាមួយបរទេសជិតខាងទាំងខាងលិចខាងកើតហ្នឹង គឺលោក ហ៊ុន សែន ធ្វើជាហូរហែមិនដែលខ្វល់រឿងទឹកចិត្តប្រជាពលរដ្ឋគិតយ៉ាងម៉េច! មិនដែលខ្វល់រឿងបាត់បង់ទឹកដីប្រមាណចំណែក។ បើតាមមតិពលរដ្ឋគឺថាអ្នកដែលត្រូវដកសញ្ជាតិមុនគេ គឺមេដឹកនាំ លោក ហ៊ុន សែន! ដែលគាត់ពាក់ព័ន្ធនឹងសន្ធិសញ្ញាខុសច្បាប់ច្រើនណាស់ ជាមួយវៀតណាម រួមទាំងជាមួយថៃកន្លងទៅផង»។
ក្រោយផ្ទុះអាវុធដាក់គ្នារយៈពេល៥ថ្ងៃ រវាងយោធាថៃនិងកម្ពុជា ចាប់ពីថ្ងៃទី២៤ ខែកក្កដា ឆ្នាំ២០២៥ រហូតមានបទឈប់បាញ់នៅថ្ងៃទី២៨ខែកក្កដា ថៃមិនគោរពបទឈប់បាញ់ទេ ហើយថែមទាំងធ្វើផ្លូវ និងរាយបន្លាលួសព័ទ្ធយកដីខ្មែរច្រើនកន្លែង គ្មានការរារាំងពីរដ្ឋាភិបាលកម្ពុជា ដោយមេដឹកនាំអះអាងថា គោរពបទឈប់បាញ់។
រហូតថ្ងៃទី១២ខែវិច្ឆិកា យោធាថៃបានបើកការបាញ់ប្រហារមកលើពលរដ្ឋខ្មែរនៅភូមិព្រៃចាន់ បណ្តាលឱ្យម្នាក់ស្លាប់ និង៣នាក់រងរបួស ក៏កម្ពុជាមិនតបតដែរ ដោយគ្រាន់តែចេញលិខិតថ្កោលទោស ដោយចាត់ទុកថាជាទង្វើឃោរឃៅ ។
ជ្រុងមួយទៀតនៃរឿងព្រំដែននេះដែរ ការបោះបង្គោលព្រំដែនជាមួយវៀតណាម នាសម័យលោក ហ៊ុន សែន គ្រប់គ្រងបានធ្វើឡើងចាប់ពីដើមឆ្នាំ២០០៦ ពោលគឺតាមសន្ធិសញ្ញាបំពេញបន្ថែមឆ្នាំ២០០៥លេចជារូបរាង។
ចាប់ពីពេលនោះ លោក ហ៊ុន សែន រងការរិះគន់ថា ធ្វើឱ្យរបូតចង្កោមកោះក្រចកសេះ កោះត្រល់ រួមទាំងដែនដីគោកច្រើនទៀតតាមព្រំដែន ធ្លាក់ក្នុងដៃវៀតណាមគ្រប់គ្រង តាមរយៈសន្ធិសញ្ញាព្រំដែនខុសច្បាប់ឆ្នាំ២០០៥នេះ ។
ការធ្វើបាត់បង់ទឹកដីទៅប្រទេសជិតខាង ហាក់រំលោភរដ្ឋធម្មនុញ្ញ កម្ពុជាដែលជាច្បាប់កំពូលរដ្ឋជាតិ ដែលបានចងកាតព្វកិច្ចរបស់អ្នកដឹកនាំ អំពីការប្តេជ្ញាចិត្តការពារបូរណភាពទឹកដី និងបង្រួបបង្រួមជាតិ ដើម្បីការឯកភាពជាតិ។
មាត្រា៥២នៃរដ្ឋធម្មនុញ្ញ ចែងថា រាជរដ្ឋាភិបាលកម្ពុជា ប្តេជ្ញារក្សាការពារឯករាជ្យ អធិបតេយ្យ បូរណភាពទឹកដី អនុវត្តនយោបាយបង្រួបបង្រួមជាតិ ដើម្បីការឯកភាពជាតិ។
ក្រមព្រហ្មទណ្ឌមាត្រា៤៤០ ចែងថា «អំពើប្រគល់ឱ្យរដ្ឋបរទេស ឬភ្នាក់ងារបរទេស នូវដែនដីជាតិទាំងស្រុង ឬមួយផ្នែក ជាអំពើក្បត់ជាតិ ត្រូវផ្តន្ទាទោសដាក់ពន្ធនាគារអស់មួយជីវិត»៕
