ក្រុមហ៊ុនព្រីនស៍គ្រុប ដែលមានមូលដ្ឋាននៅប្រទេសកម្ពុជា ស្ថិតនៅក្នុងបញ្ជីទណ្ឌកម្មរបស់សហរដ្ឋអាមេរិក ពាក់ព័ន្ធការបោកប្រាស់ និងការជួញដូរមនុស្សលំដាប់អន្តរជាតិនោះ ត្រូវបានគេទម្លាយថា មានក្រុមហ៊ុន៣ទៀតកំពុងដំណើរការនៅប្រទេសជប៉ុន ចាប់តាំងពីឆ្នាំ២០២២មក។
សារព័ត៌មាន ដឹ ស្ត្រេត ថាមស៍(the straits times) បានរាយការណ៍នៅថ្ងៃទី១៧ ខែវិច្ឆិកា ឆ្នាំ២០២៥នេះថា ទោះបីជាក្រុមហ៊ុនមានទំនាក់ទំនងជាមួយព្រីនស៍ហូលឌីងគ្រុប(Prince Holding Group) ចុះបញ្ជីការលក់អចលនទ្រព្យ និងសកម្មភាពស្រដៀងគ្នាជាអាជីវកម្មប្រតិបត្តិការក៏ដោយ ក៏ពួកគេអាចត្រូវបានគេប្រើប្រាស់ដើម្បីលាងលុយដែលរកបានពីសកម្មភាពឧក្រិដ្ឋកម្ម។
យោងតាមរបាយការណ៍ប្រព័ន្ធផ្សព្វផ្សាយនៅក្រៅប្រទេស សាខាក្រុមហ៊ុននៅក្រៅស្រុករបស់ក្រុមឆ្លងដែននៅក្នុងប្រទេសកូរ៉េខាងត្បូង និងតៃវ៉ាន់ ត្រូវបានភ្ជាប់ជាមួយការទិញអចលនទ្រព្យ និងគណនីធនាគារដែលមានប្រាក់យ៉ាងច្រើន។
ប្រភពបានបន្តថា ការរកឃើញនេះបង្ហាញថា ក្រុមនេះដែលក្រសួងរតនាគារអាមេរិក ចាត់ទុកជាអង្គការឧក្រិដ្ឋកម្មធំជាងគេបំផុតនៅអាស៊ី ក៏កំពុងតែប្រតិបត្តិការនៅប្រទេសជប៉ុនផងដែរ។
ក្នុងរយៈពេលប៉ុន្មានឆ្នាំចុងក្រោយនេះ ការខាតបង់ដោយសារតែការបោកប្រាស់តាមអនឡាញ និងឧក្រិដ្ឋកម្មដែលពាក់ព័ន្ធ ឈានដល់ទឹកប្រាក់ ១៦.៦ពាន់លានដុល្លារអាមេរិក (២១.៦ពាន់លានសិង្ហបុរី) នៅសហរដ្ឋអាមេរិក។
ក្រុមហ៊ុនដែលពាក់ព័ន្ធនៅក្នុងប្រទេសជប៉ុន រួមមាន ក្រុមហ៊ុនប្រឹក្សាយោបល់ព្រីនស៍ជើភែន(Prince Japan)ដែលបង្កើតនៅឆ្នាំ២០២៣ នៅហ្សិប៊ូយ៉ាវ៉ាដ(Shibuya Ward) ក្នុងទីក្រុងតូក្យូ(Tokyo) និងក្រុមហ៊ុនអចលនទ្រព្យ ខែនណូភី ស៊ែន ឌីវែលឡបមែន ជើភែន (Canopy Sands Development Japan) បង្កើតឡើងនៅក្នុងឆ្នាំ២០២៤ នៅឈីយ៉ូដាវ៉ាដទីក្រុងតូក្យូ(Tokyo)។
ប្រភពបន្ថែមថា នៅថ្ងៃទី១៤ ខែតុលា សហរដ្ឋអាមេរិក បានបញ្ចូលព្រីនស៍ហូលឌីងគ្រុប និងប្រធានរបស់ព្រីនស៍ហូលឌីងគ្រុប គឺ លោក ចេន ហ្ស៊ី(Chen Zhi) ដែលជាជនជាតិខ្មែរដើមកំណើតចិន ទៅក្នុងបញ្ជីជាតិកំណត់ពិសេស និងបុគ្គលដែលត្រូវបានហាមឃាត់។
យោងតាមក្រសួងរតនាគារសហរដ្ឋអាមេរិក បានឱ្យដឹងថា ជនបរទេសដែលត្រូវបានល្បួងដោយការប្រកាសការងារក្លែងក្លាយដែលសន្យាថានឹងទទួលបានការងារដែលមានប្រាក់ខែខ្ពស់ ត្រូវបានបង្ខំឱ្យចូលរួមក្នុងការបោកប្រាស់អនឡាញ ហើយល្បែងអនឡាញខុសច្បាប់ និងសកម្មភាពឧក្រិដ្ឋកម្មផ្សេងទៀត។
ប្រភពថា នៅក្នុងខែមិថុនា ឆ្នាំ២០២៣ នៅពេលដែលដាក់ពាក្យសុំចូលជាសមាជិកសមាគមរួមរបស់ជប៉ុន ព្រីនស៍ជើភែន(Prince Japan) បានបង្ហាញនៅក្នុងអ៊ីម៉ែលថា ជាសាខាក្រុមហ៊ុនព្រីនស៍ហូលឌីងគ្រុប(Prince Holding Group)។
ជាមួយគ្នានេះ តាមការបង្ហោះហ្វេសប៊ុកក្នុងខែវិច្ឆិកា ឆ្នាំ២០២៤ ដោយស្ថានទូតកម្ពុជាប្រចាំនៅប្រទេសជប៉ុនបានណែនាំខែនណូភី ស៊ែន ឌីវែលឡបមែន ជើភែន (Canopy Sands Development Japan) ជាកម្មសិទ្ធិរបស់ព្រីនស៍គ្រុប(Prince group) នេះបើយោងតាមប្រភពសារព័ត៌មានក្យូដូ៕
