ក្រុមអ្នកសង្កេតការណ៍អាស៊ាន (AOT) សម្រេចផ្អាកសកម្មភាពការចុះពិនិត្យតំបន់អនុវត្តបទឈប់បាញ់នៅតាមព្រំដែនកម្ពុជា-ថៃ នៅច្រកច១ ឃុំថ្មដា ស្រុកវាលវែង ខេត្តពោធិ៍សាត់ ភ្លាមៗបន្ទាប់ពីមានការផ្ទុះអាវុធពីខាងភាគីថៃ អំឡុងពេលនៃការចុះពិនិត្យនោះ ។
នេះបើតាមសេចក្ដីប្រកាសព័ត៌មានរបស់ក្រសួងការពារជាតិ ចេញផ្សាយនៅព្រឹកថ្ងៃទី១៩ ខែវិច្ឆិកា ឆ្នាំ២០២៥។ ក្រសួងបញ្ជាក់ថា នៅព្រឹកថ្ងៃទី១៩ ខែវិច្ឆិកា ឆ្នាំ២០២៥ នៅវេលាម៉ោង១១:០៨នាទីព្រឹក ក្រុមអ្នកសង្កេតការណ៍អាស៊ាន (AOT) ក្រោមការសម្របសម្រួលរបស់ក្រសួងការពារជាតិកម្ពុជា បានចុះទៅពិនិត្យ និងផ្ទៀងផ្ទាត់ការអនុវត្តបទឈប់បាញ់នៅច្រកច១ ឃុំថ្មដា ស្រុកវាលវែង ខេត្តពោធិ៍សាត់។
ប៉ុន្តែថា នៅអំឡុងពេលចុះពិនិត្យនោះ មានការផ្ទុះអាវុធនៅខាងភាគីថៃ ហើយថា ដើម្បីសុវត្ថិភាព ក្រុមអ្នកសង្កេតការណ៍អាស៊ានសម្រេចផ្អាកការចុះផ្ទៀងផ្ទាត់នៅតំបន់នោះ និងដកថយត្រឡប់វិញ។ យ៉ាងណាកម្ពុជាបញ្ជាក់ថា គិតមកដល់ម៉ោងនេះស្ថានភាពមានភាពស្ងប់ស្ងាត់វិញហើយ។
ក្រោយពីមានសេចក្តីប្រកាសព័ត៌មានពីភាគីកម្ពុជា មេបញ្ជាការកងយោធពល(ម៉ារីន)ប្រចាំខេត្តត្រាត ថាមណុន វណ្ណា បានចេញមកបដិសេធការចោទរបស់កម្ពុជា ដោយបានអះអាងថា កម្ពុជាបាននាំក្រុមអ្នកសង្កេតការណ៍អាស៊ាន AOT ក្លែងក្លាយ មកកាន់តំបន់នោះ។
ហើយថាភាគីកម្ពុជាដុតផាវដោយខ្លួនឯង បង្កសំឡេងផ្ទុះខ្លាំងៗ បន្ទាប់មកចោទប្រកាន់មកលើថៃ ហើយ ផ្តល់ព័ត៌មានថាទាហានថៃ បានគប់គ្រាប់បែកដៃមកលើពួកគេ។ នេះបើតាមសារព័ត៌មានថៃ Khaosod English បានចុះផ្សាយនៅថ្ងៃទី១៩ ខែវិច្ឆិកា ឆ្នាំ២០២៥ ។
យ៉ាងណា បើតាម លោក ថាមណុន វណ្ណា អំឡុងពេលនោះលោកកំពុងត្រួតពិនិត្យតំបន់នោះ ដើម្បីផ្តល់សន្តិសុខសម្រាប់ប្រតិបត្តិការបោសសម្អាតមីននៅខេត្តត្រាត។
ជុំវិញបញ្ហានេះ តំណាងរាស្រ្តគណបក្សប្រឆាំង លោក អ៊ុំ សំអាន ហៅទង្វើរបស់យោធាថៃ បញ្ជាក់ច្បាស់ថា ថៃមិនខ្លាចឥទ្ធិពលរបស់ក្រុមអ្នកសង្កេតការណ៍អាស៊ាន (AOT) ឡើយ ។
មួយវិញទៀត លោកថា មូលហេតុដែលថៃបង្ហាញសកម្មភាពបាញ់គម្រាមបែបនេះ ព្រោះថៃមិនចង់ក្រុមអ្នកសង្កេតការណ៍អាស៊ាន (AOT) ចុះទៅដល់ទីតាំងដែលខ្លួនកំពុងសម្រុកធ្វើផ្លូវចូលមកក្នុងដីខ្មែរ នៅចំនុចអូរភ្លុកដំរី ឃុំថ្មដា ខេត្តពោធិ៍សាត់ ។
លោកថា៖ «ថៃមិនខ្លាចចំពោះអ្នកសង្កេតការណ៍អាស៊ាននោះទេ ដោយថាអ្នកសង្កេតការណ៍អាស៊ានហ្នឹងមិនមានឥទ្ធិពលទៅលើថៃនោះទេ ព្រោះយើងឃើញថាកន្លងមកនេះ ទោះថៃឈ្លានពានទឹកដីកម្ពុជាក៏មិនដែលឃើញអ្នកសង្កេតការណ៍រិះគន់ថៃ ឬថ្កោលទោសថៃនោះទេ ទោះបីថៃបាញ់សម្លាប់ប្រជាពលរដ្ឋខ្មែរម្នាក់ហើយធ្វើឲ្យរបួស ៣នាក់ ក៏មិនឃើញអ្នកសង្កេតការណ៍អាស៊ានហ៊ានរិះគន់ថ្កោលទោសថៃនោះទេ ដូច្នេះថៃនឹងលែងខ្លាចអ្នកសង្កេតការណ៍អន្តរជាតិ អាហ្នឹងឈ្លានពានទឹកដីខ្មែរយើងនឹងបន្តទៀត ហើយថៃមិនចង់ឲ្យអ្នកសង្កេតការណ៍អាស៊ានទៅមើលតំបន់ហ្នឹង ព្រោះទៅមកទៅខ្លាចឃើញថៃឈ្លានពានកម្ពុជាអ៊ីចឹងក៏បាញ់បន្លាច»។
ទោះជាយ៉ាងណាក្ដី លោក អ៊ុំ សំអាន បង្ហាញការព្រួយបារម្ភថា ប្រសិនបើមេដឹកនាំកម្ពុជានៅបន្តឱ្យថៃធ្វើអ្វីតាមតែចិត្ត ដោយចូលមកបំពានកម្ពុជាម្ដងហើយទៀត នោះកម្ពុជាអាចនឹងបាត់ដែនអធិបតេយ្យខ្លួនឱ្យទៅថៃជាបន្តទៀតជាមិនខាន ខណៈថៃនៅតែចិញ្ចឹមចិត្តទាមទារប្រាសាទ និងតំបន់មួយចំនួនដែលថៃគិតថាជារបស់ខ្លួន។
ជាមួយគ្នានេះ លោកជំរុញឱ្យរដ្ឋាភិបាលកម្ពុជាដាច់ខាតមិនគួរនៅស្ងៀមស្ងាត់ទៀតឡើយ កម្ពុជាត្រូវតែប្រើសិទ្ធិស្វ័យការពារខ្លួន និងពន្លឿនពាក្យបណ្ដឹងនៅតុលាការយុត្តិធម៌(ICJ)។
គួររំឭកថា ក្រោយប៉ះទង្គិចគ្នាដោយអាវុធទ្រង់ទ្រាយធំ កាលពីថ្ងៃទី២៤ ខែកក្កដា ឆ្នាំ២០២៥ និងមានបទឈប់បាញ់នៅថ្ងៃទី២៨ ខែកក្កដានោះ ថៃមិនបានគោរពបទឈប់បាញ់ទេ ថៃបានចល័តទ័ពចូលមករាយបន្លាលួសយកដីខ្មែរជាបន្តបន្ទាប់ ដូចជា នៅប្រាសាទតាមាន់ធំ ស្ថិតក្នុងខេត្តឧត្តរមានជ័យ តំបន់អានសេះ ក្នុងខេត្តព្រះវិហារ ភូមិព្រៃចាន់ និងភូមិជោគជ័យ ក្នុងស្រុកអូរជ្រៅ ខេត្តបន្ទាយមានជ័យ និងគំរាមច្បាមយក១៧ទីតាំងទៀត នៅខេត្តពោធិ៍សាត់ និងខេត្តកោះកុង តាមផែនទីដែលថៃគូដោយឯកតោភាគី ដែលមេដឹកនាំកម្ពុជាលោក ហ៊ុន សែន ហៅថា ជាផែនទីចោរ។
លើសពីនេះនៅថ្ងៃទី១២ខែវិច្ឆិកានេះ យោធាថៃបានបើកការបាញ់ប្រហារលើពលរដ្ឋខ្មែរនៅភូមិព្រៃចាន់ ស្រុកអូរជ្រៅ ខេត្តបន្ទាយមានជ័យ បណ្តាយឱ្យម្នាក់ស្លាប់ និង៣នាក់រងរបួស តែភាគីកម្ពុជា ដែលដឹកនាំដោយគ្រួសារហ៊ុន នៅតែរក្សាភាពស្ងៀមស្ងាត់មិនតបត ដោយសំអាងថា ខ្លួនចង់បានការវិលត្រឡប់មកវិញនៅសន្តិភាពរវាងប្រទេសទាំងពីរ ។
យ៉ាងនេះក្តី ត្រង់ចំនុចនេះ អ្នកច្បាប់និងអ្នកវិភាគឯករាជ្យ លោក វ៉ន ចាន់ឡូត លើងឡើងក្រោយថៃបើកការប្រហារនេះថា រដ្ឋាភិបាលកម្ពុជាចាំបាច់ត្រូវតែប្រឆាំងតបនឹងទង្វើឧក្រិដ្ឋ និងការឈ្លានពានរបស់ថៃ។
សម្រាប់លោក ចាន់ឡូត ការប្រឆាំងនឹងថៃ រដ្ឋាភិបាលកម្ពុជាត្រូវប្ដឹងទៅតុលាការព្រហ្មទណ្ឌអន្តរជាតិ (ICC) ដើម្បីបង្ហាញមុខអ្នកទទួលខុសត្រូវ និងជាការផ្ដល់យុត្តិធម៌ជូនជនរងគ្រោះ និងត្រូវប្រើកម្លាំងឆ្លើយតប មិនអាចឈរមើលជីវិតទ័ព និងពលរដ្ឋស្លាប់ដូចសត្វធាតុនោះទេ។
លោកសង្កត់ធ្ងន់ថា បើរដ្ឋាភិបាលកម្ពុជាមិនឆ្លើយតបដោយជម្រើសណាមួយសោះមានន័យថា រដ្ឋាភិបាលស្នើនឹងទទួលយកការឈ្លានពាន និងអំពើឧក្រិដ្ឋពីសំណាក់រដ្ឋាភិបាល និងយោធាថៃ៕
