ប៉ូលីសកូរ៉េ បានទម្លាយថា មនុស្ស២០នាក់ត្រូវបានចាប់ខ្លួន សង្ស័យថាផ្គត់ផ្គង់គណនីធនាគារក្លែងដល់អង្គការក្លែងបន្លំមានមូលដ្ឋាននៅក្រៅប្រទេស រួមទាំងប្រទេសកម្ពុជា ពាក់ព័ន្ធបទល្មើសលាងលុយឧក្រិដ្ឋកម្មដែលមានទឹកប្រាក់ចំនួន២៣ពាន់លានដុល្លារ ត្រូវបានប៉ូលីសចាប់ខ្លួន។
សារព័ត៌មាន ដឹ ឆូស៊ុន ដេលី(The Chosun Daily)របស់កូរ៉េខាងត្បូង បានផ្សាយនៅថ្ងៃទី១៨ ខែវិច្ឆិកា ឆ្នាំ២០២៥នេះថា ប៉ុស្តិ៍ប៉ូលីសប៊ូសានចុងបូ(Busan Jungbu) បាននិយាយនៅថ្ងៃពុធនេះថា ពួកគេបានបញ្ជូនបុគ្គលចំនួន២០នាក់ រួមទាំងបុរស អេ អាយុ ៤០ឆ្នាំ ដែលជាមេក្លោងនៃការលាងលុយទៅកាន់អយ្យការលើការចោទប្រកាន់ រួមមានច្បាប់ស្តីអំពីការជួយសងសំណងដល់ជនរងគ្រោះ ពីការក្លែងបន្លំទំនាក់ទំនង ច្បាប់ស្តីអំពីបទបញ្ញត្តិនៃការលាក់បាំងលុយឧក្រិដ្ឋកម្ម និងការបោកប្រាស់។
បន្ថែមពីនេះ សមាជិកអង្គការចំនួន៦៤នាក់ ត្រូវបានបញ្ជូនដោយគ្មានការឃុំឃាំងលើការចោទប្រកាន់ដូចគ្នាហើយប៉ូលីសស្នើសុំឱ្យលិខិតឆ្លងដែនផុតសុពលភាព និងបានស្នើអាំងទែប៉ូល(Interpol)ឱ្យចេញនិវេទន៍ក្រហមចំពោះសមាជិក៣រូបទៀត ដែលបច្ចុប្បន្នកំពុងរត់គេចពីការចាប់ខ្លួន។
ប្រភពបន្តថា យោងតាមប៉ូលីស លោក អេ និងអ្នកផ្សេងទៀត ដែលត្រូវបានសង្ស័យថាផ្គត់ផ្គង់លើគណនីជាង១០០ទៅអង្គការក្លែងបន្លំដែលមានមូលដ្ឋាននៅក្រៅប្រទេស រួមទាំងប្រទេសកម្ពុជា និងប្រទេសហ្វីលីពីន ពីខែកញ្ញាឆ្នាំមុនដល់ខែកុម្ភៈឆ្នាំនេះ។ ពួកគេក៏ត្រូវបានចោទប្រកាន់ពីការលាងលុយ ២២.៩ពាន់លានវ៉ុន ជាលុយឧក្រិដ្ឋកម្មដោយបង្កើតក្រុមហ៊ុនអំណោយវិញ្ញាបនប័ត្រក្លែងក្លាយក្នុងក្រុងសេអ៊ូល(Seoul) និងតំបន់យ៉ុងជី(Gyeonggi) និងប្រឌិតប្រតិបត្តិការបន្ទាប់មកផ្ទេរប្រាក់ទៅអង្គការក្លែងបន្លំ។
ប៉ូលីសបានពន្យល់ថា អង្គការក្លែងបន្លំដែលក្រុមរបស់លោក អេ លាងលុយឧក្រិដ្ឋកម្ម បានចូលទៅជិតជនរងគ្រោះក្នុងស្រុកចំនួន២២២នាក់ តាមរយៈកម្មវិធីខាខាវថក(KakaoTalk) ឬអ៊ីនស្តាក្រាម(Instagram) ហើយបោកប្រាស់ទឹកប្រាក់ចំនួន ២២.៩ពាន់លានវ៉ុន ដោយល្បួងពួកគេទៅនឹងការវិនិយោគភាគហ៊ុន។
ប្រធានប៉ុស្តិ៍ប៉ូលីសប៊ូសានចុងបូ(Busan Jungbu) លោក ស៊ីម ថេហាន់ (Shim Tae-hwan) បាននិយាយថា‘‘យើងនឹងបន្តតាមបង្រ្កាបជនសង្ស័យទាំងអស់ ដែលបានភៀសខ្លួនទៅក្រៅប្រទេស’’ និងជំរុញ‘‘ការស្នើសុំវិនិយោគលើប្រាក់ចំណូលខ្ពស់ តាមរយៈ SNS ឬ YouTube ទំនងជាការបោកប្រាស់ប្រភេទថ្មី ដូច្នេះការវិនិយោគអនឡាញគួរតែត្រូវប្រុងប្រយ័ត្ន៕
