ក្រសួងអំពាវនាវឱ្យប្រុងប្រយ័ត្នគ្រោះថ្នាក់ពីកត្តាប្រែប្រួលអាកាសធាតុ ដោយសំអាងថា រយៈជិត១០ថ្ងៃ ពោលគឺចាប់ពីថ្ងៃទី២២ខែវិច្ឆិកានេះទៅ កម្ពុជានឹងរងឥទ្ធិពលខ្យល់បក់ពីសមុទ្រចិនខាងត្បូង បង្កឱ្យអាកាសធាតុចុះត្រជាក់ កន្លែងខ្លះដល់១៦អង្សាសេ រីឯរលកសមុទ្រវិញមានកម្ពស់ដល់១ម៉ែត្រកន្លះជាដើម។
ក្រសួងធនធានទឹក និងឧតុនិយម បាននិយាយក្នុងលិខិតចុះថ្ងៃទី២១ខែវិច្ឆិកានេះថា ស្ថានភាពធាតុអាកាសនឹងចុះត្រជាក់ ចាប់ពីថ្ងៃទី២២ ដល់ថ្ងៃទី៣០ ខែវិច្ឆិកា ឆ្នាំ២០២៥។
បើតាមក្រសួង កត្តាប្រែប្រួលនេះ មកពីរបបខ្យល់មូសុងឦសាន មានឥទ្ធិពលខ្លាំងបក់ពីសមុទ្រចិនខាងត្បូង គ្របដណ្តប់អាងទន្លេមេគង្គ និងសមុទ្រកម្ពុជា។
ស្ថានភាពបែបនេះ ធ្វើតំបន់វាលទំនាប ដូចជា ខេត្តបន្ទាយមានជ័យ បាត់ដំបង ពោធិ៍សាត់ កំពង់ឆ្នាំង សៀមរាប កំពង់ធំ កំពង់ចាម ត្បូងឃ្មុំ ព្រៃវែង កណ្តាល តាកែវ ស្វាយរៀង និងរាជធានីភ្នំពេញ អាចមានធាតុអាកាសចុះត្រជាក់ និងមានសីតុណ្ហភាពមធ្យមអប្បបរមា២០°C និងសីតុណ្ហភាពមធ្យមអតិបរមា២៩°C។
ខេត្តកំពង់ស្ពឺ ប៉ៃលិន ឧត្តរមានជ័យ ព្រះវិហារ ក្រចេះ ស្ទឹងត្រែង រតនគិរី មណ្ឌលគិរី អាចមានធាតុអាកាស ចុះត្រជាក់ និងមានសីតុណ្ហភាពមធ្យមអប្បបរមា១៨°C និងសីតុណ្ហភាពមធ្យមអតិបរមា២៨°C ហើយខ្យល់បក់មកពីទិសឦសាន និងទិសបូព៌ា ក្នុងល្បឿនមធ្យម ៤ម៉ែត្រក្នុងមួយវិនាទី។
រីឯតំបន់មាត់សមុទ្រ មានខេត្តកោះកុង ព្រះសីហនុ កំពត និងកែប អាចមានធាតុអាកាសចុះត្រជាក់ និងមានសីតុណ្ហភាពមធ្យម អប្បបរមា២១°C និងសីតុណ្ហភាពមធ្យមអតិបរមា៣១°C ហើយខ្យល់បក់មកពីទិសនិរតី និងទិសអាគ្នេយ៍ ក្នុងល្បឿនមធ្យម ៤ម៉ែត្រក្នុង១វិនាទី។ រលកសមុទ្រមានកម្ពស់មធ្យមអប្បបរមា ០,៥០ម៉ែត្រ និងកម្ពស់មធ្យមអតិបរមា ១,៥០ម៉ែត្រ។
ជួរភ្នំដងរែក ជួរភ្នំក្រវាញ និងជួរភ្នំបូកគោ អាចមានធាតុអាកាសចុះត្រជាក់ និងមានសីតុណ្ហភាពមធ្យម អប្បបរមា១៦°C និងសីតុណ្ហភាពមធ្យមអតិបរមា២៧°C ហើយខ្យល់បក់មកពីទិសឦសាន និងទិសបូព៌ាក្នុងល្បឿនមធ្យម ៦ម៉ែត្រក្នុង១វិនាទី។
ជុំវិញឥទ្ធិពលនេះ ក្រសួងអំពាវនាវឱ្យសាធារណជន និងអាជ្ញាធរដែនដី យកចិត្តទុកដាក់ប្រុងប្រយ័ត្នខ្ពស់ អំពីអាកាសធាតុចុះត្រជាក់នេះ ដើម្បីជៀសវាងពីគ្រោះថ្នាក់ផ្សេងៗដែលអាចកើតមានជាយថាហេតុ។
យ៉ាងណា ក្រសួងធនធានទឹក និងងឧតុនិយម គូសបញ្ជាក់ថា ខ្លួននឹងបន្តធ្វើការតាមដាន និងវិភាគអំពីស្ថានភាពធាតុអាកាសនេះ ដើម្បីជម្រាបជូនជាបន្តបន្ទាប់ ក្នុងករណីមានការប្រែប្រួល៕
