រដ្ឋាភិបាលប្រទេសកូរ៉េ កាលពីថ្ងៃព្រហស្បតិ៍ បានអះអាងថា ខ្លួនបានដាក់ទណ្ឌកម្មលើបុគ្គលចំនួន១៥រូប និងជាង១០០ស្ថាប័នផ្សេងទៀត នៅទូទាំងអាស៊ីអាគ្នេយ៍ ដែលជាការឆ្លើយតបទៅនឹងការកើនឡើងនៃឧក្រិដ្ឋកម្មឆបោកតាមអ៊ិនធើណិត ពាក់ព័ន្ធទៅនឹងការល្បួងនិងបង្ខាំងជនជាតិខ្លួននៅប្រទេសកម្ពុជា។
ដឹខូរៀថាម(The Korea Times) បានចេញផ្សាយនៅថ្ងៃទី២៧ ខែវិច្ឆិកា ឆ្នាំ២០២៥នេះថា វិធានការបោសសម្អាតផ្តោតលើបុគ្គលចំនួន ១៥នាក់ និងអង្គភាពចំនួន ១៣២ ដែលគេជឿជាក់ថាបានជាប់ទាក់ទងដោយផ្ទាល់ឬដោយប្រយោលក្នុងការឆបោកតាមប្រព័ន្ធអ៊ីនធើណិត នៅក្នុងការល្បួងនិងបង្ខាំងជនជាតិកូរ៉េនៅប្រទេសកម្ពុជា។
យោងតាមក្រសួងការបរទេស ការដាក់ទណ្ឌកម្ម រួមមានក្រុមហ៊ុនព្រីនស៍គ្រុប(Prince Group) មានមូលដ្ឋាននៅប្រទេសកម្ពុជា និងប្រធានក្រុមហ៊ុន លោក ចេន ហ្ស៊ី(Chen Zhi) មើលការខុសត្រូវលើប្រតិបត្តិការណ៍នៃបរិវេណឆបោកទ្រង់ទ្រាយធំ ដូចជា ថៃជឺ(Taizi) និងមេនហ្គូ(Mango) ដែលជាកន្លែងជនជាតិកូរ៉េជាច្រើនត្រូវបានឃុំខ្លួន។
ប្រភពបន្តថា ការដាក់ទណ្ឌកម្ម ក៏ត្រូវបានដាក់លើប្រធានក្រុមឆបោកដែលសកម្មនៅក្នុងតំបន់បូហៃ(Bohai) ប្រទេសកម្ពុជា និងសមាជិកក្មេងទំនើងម្នាក់ ដែលត្រូវបានកំណត់ថាជាជនសង្ស័យសំខាន់ ក្នុងការយាយីវាយដំ ការបង្ខាំងមនុស្ស និងការស្លាប់របស់និស្សិតសកលវិទ្យាល័យកូរ៉េនៅក្នុងខែសីហា។
ព្រីនស៍គ្រុប(Prince Group) ត្រូវបានដាក់នៅក្នុងបញ្ជីខ្មៅដោយសហរដ្ឋអាមេរិក និងអង់គ្លេស កាលពីខែមុន ខណៈដែលហ៊ុយយានគ្រុប(Huiyuan Group) ដែលមានមូលដ្ឋាននៅប្រទេសចិន ក៏បញ្ចូលនៅក្នុងបញ្ជីទណ្ឌកម្មរបស់កូរ៉េផងដែរ ដែលត្រូវបានកំណត់ថា ជា‘‘ការព្រួយបារម្ភពីការលាងលុយកង្វក់’’ ដោយអាជ្ញាធរសហរដ្ឋអាមេរិក។
នៅក្រោមវិធានការនេះ អង្គភាពនិងបុគ្គលដែលប្រឈមមុខនឹងត្រូវបង្កកទ្រព្យសម្បត្តិ រួមទាំងទ្រព្យសកម្មនិមិត្តដែលរឹតបណ្តឹងលើប្រតិបត្តិការណ៍ហិរញ្ញវត្ថុក្នុងប្រទេសកូរ៉េ។
ក្រសួងបាននិយាយថា កាសម្រេចនេះ គឺដាក់ទណ្ឌកម្មដោយឯករាជ្យជាលើកដំបូងរបស់ប្រទេសកូរ៉េ ដែលផ្តោតទៅលើឧក្រិដ្ឋកម្មឆ្លងដែននៅក្នុងអាស៊ីអាគ្នេយ៍ និងជាកញ្ចប់ដ៏ធំបំផុតមិនធ្លាប់មាន ដោយគូសបញ្ជាក់អំពីការប្តេជ្ញាចិត្តរបស់រដ្ឋាភិបាល ក្នុងការបង្ក្រាបបណ្តាញឧក្រិដ្ឋកម្មដែលបណ្តាលឱ្យមានគ្រោះថ្នាក់ធ្ងន់ធ្ងរ នៅខាងក្នុងប្រទេសនិងក្រៅប្រទេស។
ប្រភពបន្ថែមថា ក្រសួងបានចេញសេចក្តីថ្លែងការណ៍មួយថា ‘‘យើងនឹងបន្តអនុវត្តវិធីសាស្រ្តរបស់រដ្ឋាភិបាល និងពង្រឹងកិច្ចសហប្រតិបត្តិការណ៍អន្តរជាតិ ប្រយុទ្ធប្រឆាំងឧក្រិដ្ឋកម្មឆ្លងដែន និងការពារប្រទេសកូរ៉េ ពីការប្រើប្រាស់ជាមជ្ឈមណ្ឌលសម្រាប់ការលាក់បាំង និងការលាងលុយកង្វក់។
ការដាក់ទណ្ឌកម្មនេះ កើតឡើងខណៈក្រុងសេអ៊ូលបានបង្កើនកិច្ចខំប្រឹងប្រែង ក្នុងការដោះស្រាយឧក្រិដ្ឋកម្មដែលមានមូលដ្ឋាននៅប្រទេសកម្ពុជា ត្រូវបានចោទប្រកាន់ថា រៀបចំការងារឆបោក និងការចាប់ជំរិតដែលបានចាប់ជនជាតិកូរ៉េរាប់សិបនាក់នៅក្នុងប្រទេសអាស៊ីអាគ្នេយ៍៕
