សំណុំរឿងដ៏ចម្រូងចម្រាសរបស់ លោក កឹម សុខា ប្រធានមេដឹកនាំគណបក្សសង្គ្រោះជាតិដែលតុលាការរំលាយ នឹងត្រូវសាលាឧទ្ធរណ៍ភ្នំពេញ លើកយកមកជម្រះឡើងវិញ នៅថ្ងៃទី១៨ ខែធ្នូ ឆ្នាំ២០២៥ ដែលមានលោក អ៊ឹម វណ្ណៈ ជាប្រធានក្រុមប្រឹក្សាជំនុំជម្រៈ។
នេះបើតាមដីកាកោះរបស់អគ្គព្រះរាជអាជ្ញារង លោក អ៊ឹម សុផាន ចុះថ្ងៃទី២៧ ខែវិច្ឆិកា ឆ្នាំ២០២៥នេះ។បើតាមដីកាកោះនោះ លោក អ៊ឹម សុផាន ជាអគ្គព្រះរាជអាជ្ញារងនៃមហាអយ្យការអមសាលាឧទ្ធរណ៍ភ្នំពេញ បានបង្គាប់មកឈ្មោះ កឹម សុខា ភេទប្រុស កើតឆ្នាំ១៩៥៣ សញ្ជាតិខ្មែរ មានអាសយដ្ឋានបច្ចុប្បន្នស្នាក់នៅផ្ទះលេខ៩៧ ផ្លូវលេខ៣១៣ ភូមិ៧ សង្កាត់បឹងកក់ទី២ ខណ្ឌទួលគោក រាជធានីភ្នំពេញ ឱ្យចូលមកកាន់សាលាឧទ្ធរណ៍ភ្នំពេញ នៅបន្ទប់សវនាការទី១ ជាកំណត់ នៅថ្ងៃទី១៨ ខែធ្នូ ឆ្នាំ២០២៥ វេលាម៉ោង ៨:៣០នាទីព្រឹក ដើម្បីជំនុំជម្រះលើសំណុំរឿង សន្និដ្ឋិភាពជាមួយបរទេស ប្រព្រឹត្តនៅប្រទេសកម្ពុជា និងទីកន្លែងផ្សេងទៀត កាលពីអំឡុងឆ្នាំ១៩៩៣ ដល់ថ្ងៃទី០៣ ខែកញ្ញា ឆ្នាំ២០១៧ ដែលជាបទល្មើសព្រហ្មទណ្ឌដែលមានចែងឱ្យផ្តន្ទាទោសតាមបញ្ញត្តិមាត្រា៤៤៣ នៃក្រមព្រហ្មទណ្ឌ។
សហមេធាវីការពារក្តីឱ្យ លោក កឹម សុខា គឺលោក ផែង ហេង បានប្រាប់វីអូឌីនៅថ្ងៃទី២៨ខែវិច្ឆិកានេះថា តុលាការបានបញ្ជូនលិខិតនោះដល់ផ្ទះកូនក្តីលោកហើយ។
លោក កឹម សុខា ប្រធានគណបក្សសង្រ្គោះជាតិ ត្រូវបានតុលាការទីក្រុងភ្នំពេញ ចេញសាលក្រមចុះថ្ងៃទី៣ ខែមិនា ឆ្នាំ២០២៣ ផ្តន្ទាទោស ដោយឃុំខ្លួននៅក្នុងផ្ទះចំនួន២៧ឆ្នាំ ខណៈសមត្ថកិច្ចចាប់ខ្លួនគាត់ទាំងពាក់កណ្តាលអាធ្រាត្រ ឆ្លងចូលថ្ងៃទី៣ ខែកញ្ញា ឆ្នាំ២០១៧។
លោកត្រូវបានតុលាការចោទប្រកាន់ ពីបទក្បត់ជាតិ ពាក់ព័ន្ធនឹងសំណុំរឿងដ៏ចម្រូងចម្រាស ដែលចោទថាគប់គិតជាមួយសហរដ្ឋអាមេរិក ចង់ផ្តួលរំលំរដ្ឋាភិបាលដែលដឹកនាំដោយ លោក ហ៊ុន សែន។
យ៉ាងណា សហរដ្ឋអាមេរិក តាមរយៈស្ថានទូតប្រចាំកម្ពុជា ច្រានចោលទៅនឹងសេចក្តីសម្រេចរបស់តុលាការនេះ ដោយចាត់ទុកថា ការផ្តន្ទាទោស និងដំណើរការច្រើនឆ្នាំ ដើម្បីបំបិទសំឡេង លោក កឹម សុខា ដោយផ្អែកលើបទសមគំនិត ប្រឌិត គឺជាបរាជ័យនៃប្រព័ន្ធយុត្តិធម៌កម្ពុជា។
អាមេរិក អំពាវនាវឲ្យអាជ្ញាធរអនុញ្ញាតឲ្យប្រជាជនកម្ពុជាទាំងអស់ ប្រើប្រាស់សិទ្ធិមនុស្សជាសាកលក្នុងការប្រមូលផ្តុំគ្នាដោយសន្តិវិធី និងសេរីភាពនៃការបញ្ចេញមតិ ព្រមទាំងការចូលរួមកសាងប្រព័ន្ធប្រជាធិបតេយ្យពិតប្រាកដមួយ។
យ៉ាងណា សំណុំរឿងចោទប្រកាន់នេះ លោក កឹម សុខា បានប្តឹងជំទាស់ទៅសាលាឧទ្ធរណ៍ ប្រឆាំងនឹងបទចោទប្រកាន់របស់សាលាដំបូង។ ប៉ុន្តែបើកសវនាការច្រើនដង សាលាឧទ្ធរណ៍បានលើកពេលសវនាការជាបន្តបន្ទាប់រហូតបច្ចុប្បន្ន ខណៈសិទ្ធិធ្វើនយោបាយរបស់មេបក្សប្រឆាំងរូបនេះ ត្រូវបានដកហូតជាង៨ឆ្នាំមកនេះ ក្រោមក្រសែភ្នែកជាតិនិងអន្តរជាតិដែលមើលឃើញថា ជាសំណុំរឿងនយោបាយ៕
