គិតមកទល់ពេលនេះ មានរយៈពេល ៦០៦ថ្ងៃហើយ ដែលអ្នកការពារសិទ្ធិមនុស្សលោក កើត សារ៉ាយ ជាប់ឃុំក្នុងពន្ធនាគារ ដោយសារសកម្មភាពការពារសិទ្ធិមនុស្ស និងការប្រើប្រាស់សិទ្ធិបញ្ចេញមតិរបស់លោក។
នៅថ្ងៃទី១ ខែធ្នូនេះ មជ្ឈមណ្ឌលសិទ្ធិមនុស្សកម្ពុជា បានបង្ហោះសារលើបណ្ដាញសង្គម ស្នើសុំសារជាថ្មីឱ្យមានការដោះលែង និងលើកលែងការចោទប្រកាន់លើ លោក កើត សារ៉ាយ ដូចដែលស្ថាប័ននេះ និងអង្គការសង្គមស៊ីវិលចំនួន៥៥ ផ្សេងទៀតធ្លាប់ធ្វើកន្លងមក។
បើតាមមជ្ឈមណ្ឌលសិទ្ធិមនុស្សកម្ពុជា ក្រុមអ្នកជំនាញសិទ្ធិមនុស្សនៃអង្គការសហប្រជាជាតិ បានសរសេរលិខិតទៅកាន់រដ្ឋាភិបាលចំនួនពីរដងមកហើយ ជុំវិញករណីនេះ ដោយលើកឡើងពីក្ដីកង្វល់របស់ពួកគេ ចំពោះការផ្ដន្ទាទោសលើលោក សារ៉ាយ។
ប្រធានសមាគមសម្ព័ន្ធនិស្សិតបញ្ញវន្តខ្មែរ (KSILA) លោក កើត សារ៉ាយ ត្រូវបានសាលាដំបូងរាជធានីភ្នំពេញ កាត់ទោសកាលពីខែវិច្ឆិកា ឆ្នាំ២០២៤ ឱ្យជាប់ពន្ធនាគាររយៈពេល ៤ឆ្នាំ និងពិន័យជាប្រាក់ ២លានរៀល បទចោទ «ញុះញង់» និង «ការមិនរាងចាលក្នុងបទមជ្ឈិមបន្ទាប់ពីការផ្ដន្ទាទោសបទមជ្ឈិម»។
ចំណាត់ការច្បាប់លើ លោក កើត សារ៉ាយ ធ្វើឡើងក្រោយលោកចុះទៅតាមដានបញ្ហាដីធ្លីពលរដ្ឋនៅខេត្តព្រះវិហារ និងបានផ្ដល់ការអត្ថាធិប្បាយបញ្ហានោះ ជាមួយប្រព័ន្ធផ្សព្វផ្សាយ ដែលគណៈវិនិច្ឆ័យយល់ថា ទង្វើនេះគឺជាការបញ្ឆេះកំហឹង ញុះញង់ ឱ្យប្រជាពលរដ្ឋមានការយល់ច្រឡំលើអាជ្ញាធរ និងរដ្ឋាភិបាល និងនាំឱ្យមានការបែកបាក់សង្គមជាតិ។
ម្ដាយលោក កើត សារ៉ាយ គឺអ្នកស្រី ចាប យ៉េន ប្រាប់វីអូឌីថា ស្ថានភាព លោក កើត សារ៉ាយ ក្នុងពន្ធនាគារបច្ចុប្បន្នពុំមានបញ្ហាអ្វីចោទធ្ងន់ធ្ងរឡើយ ទាំងផ្លូវកាយ និងផ្លូវចិត្ត ប៉ុន្តែត្រូវចំណាយប្រាក់កាសច្រើន ដើម្បីទៅសួរសុខទុក្ខ និងទិញម្ហូបអាហារក្នុងពន្ធនាគារ។ យ៉ាងណា អ្នកស្រីនៅតែបន្តទទូចស្នើសុំឱ្យតុលាការដោះលែងកូនប្រុសឱ្យមានសេរីភាពវិញ ដ្បិតអ្នកស្រីវ័យកាន់តែចាស់ ត្រូវការកូនមើលថែ។
អ្នកស្រី ចាប យ៉េន និយាយថា៖ «ចង់ឱ្យមានការដោះលែងគាត់ ឱ្យមានសិទ្ធិសេរីភាពវិញ។ ចង់និយាយថា គាត់មិនមានកំហុសអី នឹងត្រូវចាប់គាត់ដាក់ពន្ធនាគារ»។
សំណើសុំនៅក្រៅឃុំចុងក្រោយរបស់លោក កើត សារ៉ាយ ត្រូវបានតុលាការកំពូល បដិសេធកាលពីខែតុលា ឆ្នាំ២០២៥។ ជាមួយគ្នានោះ ក្រោយសាលាដំបូងប្រកាសសាលក្រមកាលពីឆ្នាំ២០២៤ លោក កើត សារ៉ាយ បានដាក់ពាក្យបណ្ដឹងឧទ្ធរណ៍ផងដែរ តែមកទល់ពេលនេះ សាលាឧទ្ធរណ៍ភ្នំពេញ នៅមិនទាន់កំណត់ពេលសម្រាប់សវនាការនៅឡើយទេ។
វីអូឌី មិនអាចទាក់ទងអ្នកនាំពាក្យសាលាឧទ្ធរណ៍រាជធានីភ្នំពេញ លោក ឃុន លាងម៉េង បានទេនៅថ្ងៃទី១ ខែធ្នូ។
ទាក់ទិនរឿងនេះ នាយកទទួលបន្ទុកកិច្ចការទូទៅនៃអង្គការលីកាដូ លោក អំ សំអាត យល់ឃើញថា ការពន្យារពេលបើកសវនាការបណ្ដឹងឧទ្ធរណ៍ នឹងធ្វើឱ្យប៉ះពាល់ដល់សិទ្ធិជនជាប់ចោទ ដោយសារពួកគេរង់ចាំនីតិវិធីនេះ ដើម្បីជំនុំជម្រះរកភាពស្អាតស្អំ។ លោកជំរុញឱ្យសាលាឧទ្ធរណ៍ពន្លឿនការដាក់កាលបរិច្ឆេទសវនាការជំនុំជម្រះករណីនេះឱ្យបានឆាប់។
លោក អំ សំអាត និយាយថា៖ «ព្រោះគាត់ប្ដឹងឧទ្ធរណ៍ គឺគាត់ចង់ដឹងអំពីរឿងរបស់គាត់ ព្រោះគាត់កើតទុក្ខមិនសុខចិត្តនឹងការសម្រេចរបស់សាលាដំបូង អ៊ីចឹងគាត់ផ្ដល់ក្ដីសង្ឃឹមថាសាលាឧទ្ធរណ៍នឹងផ្ដល់យុត្តិធម៌សម្រាប់គាត់។ អ៊ីចឹងការអូសបន្លាយ ទីមួយវាធ្វើឱ្យការរង់ចាំរបស់គាត់យូរ ទីពីរ សិទ្ធិរបស់គាត់ត្រូវបានប៉ះពាល់ ព្រោះនៅក្នុងពន្ធនាគារមិនមែនជាកន្លែងមួយស្រួលដូចនៅខាងក្រៅទេ»។
កាលពីឆ្នាំ២០២១ លោក កើត សារ៉ាយ ធ្លាប់ត្រូវបានតុលាការភ្នំពេញកាត់ទោសឱ្យជាប់ពន្ធនាគារ ២០ខែម្ដងរួចមកហើយ ពីបទញុះញង់ ចំពោះការចូលរួមក្នុងបាតុកម្មដោយសន្តិវិធីរបស់លោក ទាមទារឱ្យដោះលែង លោក រ៉ុង ឈុន អតីតមេដឹកនាំសហជីព។ ការចោទប្រកាន់លោកជាថ្មីនៅឆ្នាំ២០២៤ លើបទចោទ «ញុះញង់» និង «ការមិនរាងចាលក្នុងបទមជ្ឈិមបន្ទាប់ពីការផ្ដន្ទាទោសបទមជ្ឈិម» បានធ្វើឱ្យលោកត្រូវជាប់ទោសទ្វេដង តាមមាត្រា៨៨ នៃក្រមព្រហ្មទណ្ឌ៕
