ពលរដ្ឋមួយក្រុមដែលរងគ្រោះចាញ់បោកក្រុមហ៊ុនពិភពដីមាស ដែលអះអាងថាតំណាងឱ្យពលរដ្ឋជាង ៦ពាន់គ្រួសារ នៅព្រឹកថ្ងៃចន្ទនេះ បាននាំគ្នាប្រមូលផ្តុំតវ៉ានៅសាលាដំបូងរាជធានីភ្នំពេញ ដោយទាមទារកុំឱ្យមានការចាប់ខ្លួនម្ចាស់ក្រុមហ៊ុន លោក ហ៊ី គឹមហុង និងកុំបង្កកទ្រព្យរបស់ក្រុមហ៊ុន ដើម្បីឱ្យក្រុមហ៊ុនដោះស្រាយសំណងជូនពលរដ្ឋដោយផ្ទាល់ទៅតាមការសន្យាកន្លងមក។
លោក កាន់ ទី ជាជនរងគ្រោះចាញ់បោកក្រុមហ៊ុនពិភពដីមាស បានថ្លែងអំឡុងពេលតវ៉ានៅមុខតុលាការក្រុងភ្នំពេញ នៅថ្ងៃទី០១ ខែធ្នូ ឆ្នាំ២០២៥នេះថា ការដែលរូបលោក ក៏ដូចជាពលរដ្ឋផ្សេងទៀត ដែលទិញដីខ្យល់ពីក្រុមហ៊ុនពិភពដីមាស ធ្វើការតវ៉ានេះ គឺសុំឱ្យតុលាការកុំចាប់ខ្លួន លោក ហ៊ី គឹមហុង និងកុំបង្កទ្រព្យសម្បត្តិ ដោយទុកឱ្យក្រុមហ៊ុនយកទ្រព្យនោះ មកដោះស្រាយសំណងជូនពួកគាត់ដោយផ្ទាល់វិញ ខណៈលោកថា ខាងក្រុមហ៊ុនមានទ្រព្យសម្បត្តិ អចលនទ្រព្យ និងមានឆន្ទៈក្នុងការដោះស្រាយជាមួយពួកគាត់។
លោកថា៖ «ទាមទារតវ៉ាអត់ឱ្យបង្កកទ្រព្យក្រុមហ៊ុនពិភពដីមាសទេ ដោយសារពួកខ្ញុំសុខចិត្តទុកពេលឱ្យក្រុមហ៊ុននេះ គឺដោយសារតែក្រុមហ៊ុនអត់ទាន់មានលុយដោះស្រាយឱ្យខ្ញុំ ហើយខ្ញុំទិញដីក្រុមហ៊ុនពិតប្រាកដ ចឹងគឺអត់ឱ្យបង្កកទ្រព្យសម្រាប់អ្នកដែលប្តឹងក្រុមហ៊ុន ២ពាន់នាក់ជាង អត់ឱ្យបង្កកទ្រព្យទុកទេ គឺទ្រព្យហ្នឹងត្រូវតែតម្កល់ទុកឱ្យដោះស្រាយអតិថិជន ៨ពាន់នាក់រួម ដែលទិញដីទាំងអស់គ្នាហ្នឹង ចឹងខ្ញុំចង់និយាយថា អ្នកប្តឹងបង្កកទ្រព្យតែ ២ពាន់នាក់ជាងទេ តែអ្នកទុកពេលឱ្យក្រុមហ៊ុនដោះស្រាយ ៦ពាន់នាកជាង តើយុត្តិធម៌សម្រាប់ពួកខ្ញុំដែលរងចាំពេលនេះទេ»។
អតីតឧកញ៉ា ហ៊ី គឹមហុង ដែលបោកប្រាស់ពលរដ្ឋ៨ពាន់គ្រួសារនោះ កាលពីថ្ងៃទី៣០ ខែមិថុនា ឆ្នាំ២០២៥ បានសន្យាឱ្យលុយជនរងគ្រោះម្នាក់ ១០ដុល្លារអាមេរិក តាមកិច្ចព្រមព្រៀងនីមួយៗ ចំពោះអតិថិជនដែលមិនបានដាក់ពាក្យប្ដឹងក្រុមហ៊ុន និងអតិថិជនដែលព្រមទុកពេល ៣៦ខែទៀត ឱ្យក្រុមហ៊ុនរកលុយសងពួកគេ។
ដោយឡែក បើអតិថិជនដាក់ពាក្យប្ដឹងក្រុមហ៊ុនរួច ត្រូវដកពាក្យបណ្តឹងវិញ និងត្រូវមកធ្វើកិច្ចព្រមព្រៀងថ្មីទុកពេលវេលា ៣៦ខែ ទើបទទួលបានលុយចំនួន ១០ដុល្លារអាមេរិកនេះ។ យ៉ាងណា ក្នុងលិខិតនោះ មិនបានបញ្ជាក់ថា នឹងផ្តល់ឱ្យ១០ដុល្លារក្នុងមួយខែឬយ៉ាងណានោះទេ ដោយគ្រាន់តែថាឱ្យ១០ដុល្លារដល់អ្នកដកពាក្យបណ្តឹងប៉ុណ្ណោះ។
ប្រជាពលរដ្ឋម្នាក់ទៀតដែលមិនបានបញ្ជាក់ឈ្មោះ និងអះអាងថាចាញ់បោកក្រុមហ៊ុនពិភពដីមាស នូវទឹកប្រាក់ជាង ១៨ម៉ឺនដុល្លារ បាននិយាយថា សម្រាប់រូបគាត់ដែលបានធ្វើកិច្ចព្រមព្រៀងថ្មីច្រើនកុងត្រាជាមួយក្រុមហ៊ុននោះ គឺបានទទួលលុយពីក្រុមហ៊ុន ៤០ដុល្លារក្នុងមួយខែពិតប្រាកដមែន (១០ដុល្លារក្នុងមួយកិច្ចព្រមព្រៀង) ដែលក្នុងរយៈពេលប៉ុន្មានខែចុងក្រោយនៃ ការរងចាំការដោះស្រាយនេះ រូបគាត់ទទួលបានលុយជាង ២០០ដុល្លារ។
ការណ៍នេះ អ្នកស្រីថា ពួកគាត់មិនព្រមឱ្យតុលាការចាប់ខ្លួនអតីតឧកញ៉ា ហ៊ី គឹមហុងនោះទេ ដោយសុំទុកពេលឱ្យម្ចាស់ក្រុមហ៊ុនរូបនេះ រកលុយដោះស្រាយសំណងជូនពួកគាត់ ទៅតាមការសន្យា ខណៈពេលវេលា ៣៦ខែដែលខាងក្រុមហ៊ុនសន្យានោះ នៅមិនទាន់ដល់នៅឡើយ។
អ្នកស្រីថា៖ «តែពួកខ្ញុំមក ៦៥០០នាក់នេះ គឺអត់ព្រមទេ ព្រោះអីខាងខ្ញុំនៅគ្នាច្រើន ហើយគឺសុំទុកពេលឱ្យខាងម្ចាស់ក្រុមហ៊ុនគាត់ដោះស្រាយឱ្យពួកខ្ញុំ គឺអត់ព្រមឱ្យគាត់ចូលគុកទេ ព្រោះគាត់សន្យាអត់ទាន់គ្រប់ពេលវេលាទេ ចឹងយើងត្រូវទុកពេលវេលាឱ្យគាត់ដោះស្រាយ អត់តាមអ្នកមួយក្តាប់តូច ប៉ុន្មានថ្ងៃមុនដែលគាត់ចង់ឱ្យចាប់ម្ចាស់ក្រុមហ៊ុនដាក់គុក ខ្ញុំអត់ព្រមទេ ព្រោះអីលុយពួកខ្ញុំក៏មានច្រើនដែរ»។
បើតាមពលរដ្ឋដែលតវ៉ានោះ មានពលរដ្ឋខ្លះ អះអាងថាជំពាក់បំណុលធនាគារដែរ ប៉ុន្តែមិនបានបញ្ជាក់ថា ចំនួនការប្រាក់ដែលពួកគាត់ត្រូវបង់ក្នុងមួយខែៗនោះប៉ុន្មាននោះទេ ខណៈខាងក្រុមហ៊ុនផ្តល់ប្រាក់សម្រាប់អ្នកដែលព្រមចុះកិច្ចសន្យានោះចំនួន ១០ដុល្លារ។
ការតវ៉ានេះ បានធ្វើឡើងក្រោយពីមានជនរងគ្រោះមួយក្រុមទៀត ដែលតំណាងឱ្យជាង២ពាន់គ្រួសារ កាលពីថ្ងៃទី២៤ ខែវិច្ឆិកា បានប្រមូលផ្តុំតវ៉ានៅមុខតុលាការក្រុងភ្នំពេញដូចគ្នានេះ ទាមទារឱ្យប្រព័ន្ធយុត្តិធម៌ ចាត់វិធានការដាក់សម្ពាធក្រុមហ៊ុនពិភពដីមាស ដោយចាប់ខ្លួនម្ចាស់ក្រុមហ៊ុន លោក ហ៊ី គឹមហុង ដាក់ពន្ធនាគារ និងរឹងអូសទ្រព្យទាំងអស់ ដើម្បីយកមកដោះស្រាយសងជនរងគ្រោះ ខណៈពួកគាត់កំពុងជាប់បំណុលវ័ណ្ឌក និងមានមនុស្សស្លាប់ដោយសារវិបត្តិបំណុលកើនដល់ ៣២នាក់។
តំណាងរាស្រ្តគណបក្សសង្រ្គោះជាតិ លោក ម៉ែន សុថាវរិន្រ្ទ យល់ថា ក្នុងកាលៈទេសៈនេះ ប្រជាពលរដ្ឋគួរតែរួបរួមគ្នាជាធ្លុងមួយ ក្នុងការទាមទារនិងជំរុញឱ្យប្រព័ន្ធយុត្តិធម៌ ដាក់សម្ពាធ ឬចាប់ក្រុមឧកញ៉ាដែលឆបោកទាំងនោះ សងសំណងទៅពួកគាត់ដែលជាជនរងគ្រោះវិញ នោះទើបអាចទទួលបានជោគជ័យ ជាជាងចែកគ្នាជា២ក្រុមក្នុងការតវ៉ា។
លោកបន្តថា៖ «ចំពោះបញ្ហាលោកឧកញ៉ា គឹមហុង នេះចង់មិនចង់ ត្រូវតែចាប់គាត់ទុកដាក់ពន្ធនាគារសិន ដើម្បីឱ្យគាត់សងថវិកា ដើម្បីយើងធ្វើ យើងធ្វើហ្នឹងគឺជំរុញឱ្យគាត់ ចាប់ជំរិតឱ្យគាត់សង បើមិនចឹងទេគាត់មិនសងទេ ហើយគាត់ធ្វើមិនដឹងមិនលឺ ដោយសារជាបក្សពួករបស់អ្នកកាន់អំណាច[] រឿងនេះមានពីរ ខ្ញុំមើលទៅមាន២ ចង់ចាប់ដាក់គុកឬមិនចង់ដាក់គុក រឿងជំពាក់ថវិកាប្រជាពលរដ្ឋ រឿងផ្ទះសម្បែងដីធ្លីអីហ្នឹង តុលាការត្រូវចាត់ចែងរឿងហ្នឹង តុលាការត្រូវតែអារកាត់រឿងហ្នឹង បើតុលាការធ្វើមិនកើតទេ នាំគ្នាទៅធ្វើបាតុកម្មទាំងអស់គ្នា បើតុលាការអត់ដោះស្រាយរឿងហ្នឹងទេ»។
វីអូឌី មិនអាចសុំការឆ្លើយតបជុំវិញរឿងនេះ ពីអ្នកនាំពាក្យសាលាដំបូងរាជធានីភ្នំពេញ លោក ប្លង់ សុផល និងម្ចាស់ក្រុមហ៊ុនពិភពដីមាស លោក ហ៊ី គឹមហុង បានទេនៅថ្ងៃចន្ទនេះ។
យ៉ាងណា ក្រោយពីមានការតវ៉ាពីប្រជាពលរដ្ឋមួយក្រុមដែលមានគ្នារាប់សិបនាក់ ទាមទារឱ្យតុលាការមានចំណាត់ការចាប់លោក ហ៊ី គឹមហុង ដាក់ពន្ធនាគារ និងដាក់សម្ពាធឱ្យម្ចាស់ក្រុមហ៊ុនពិភពដីមាសរូបនេះ សងបំណុលនោះ ខាងសាលាដំបូងរាជធានីភ្នំពេញ បានចេញសេចក្តីប្រកាសព័ត៌មានមួយ កាលពីថ្ងៃទី២៨ ខែវិច្ឆិកា ឆ្នាំ២០២៥ ជុំវិញចំណាត់ការសំណុំរឿងពាក់ព័ន្ធនឹងក្រុមហ៊ុនពិភពដីមាសនេះ។
ក្នុងសេចក្តីប្រកាសព័ត៌មាននោះ ប្រធានសាលាដំបូងរាជធានីភ្នំពេញ លោក ងួន ណារ៉ា និងព្រះរាជអាជ្ញានៃអយ្យការអមសាលាដំបូង លោក ច្រឹង ខ្មៅ បានបែងចែកសំណុំរឿងជា២ធំៗ ក្នុងនោះមានសំណុំរឿងព្រហ្មទណ្ឌចំនួន ៥រឿង ដែលសវនាការនឹងធ្វើឡើងនៅថ្ងៃទី១២ ខែមករា ឆ្នាំ២០២៦ ខណៈចំណាត់ការលើសំណុំរឿងស៊ើបសួរចំនួន ២០រឿង ចៅក្រមស៊ើបសួរនឹងពិនិត្យឱ្យបានឆាប់ក្នុងរយៈពេលដ៏ខ្លីខាងមុខ ហើយសំណុំរឿងជំនុំជម្រះចំនួន ២ផ្សេងទៀត នឹងបើកសវនាការនៅថ្ងៃទី១៧ ខែធ្នូ និងថ្ងៃទី៩ ខែមករា និងសំណុំរឿងមួយទៀត បញ្ជូនទៅសាលាឧទ្ធរណ៍ដើម្បីមានចំណាត់ការ។
សម្រាប់ សំណុំរឿងរដ្ឋប្បវេណី មាន៣រឿង នឹងមានចំណាត់ការទាញផ្ទាល់មាត់នៅអំឡុងខែធ្នូ ខណៈសំណុំរឿងរក្សារការពារមានចំនួន ៥រឿង ដែលមានដើមបណ្តឹងសរុបចំនួន ២ ៣២១នាក់ តុលាការបានចេញដីការសម្រេចរឹបអូស និងឃាត់ទុកដីមួយចំនួន តាមការស្នើសុំរបស់ដើមបណ្តឹងរដ្ឋប្បវេណី ដែលជាប្រជាពលរដ្ឋ ដើម្បីធានាក្នុងការអនុវត្តសំណងជូនជនរងគ្រោះនៅពេលក្រោយ។
បើតាមសេចក្តីប្រកាសព័ត៌មាន អ្នកនាំពាក្យសាលាដំបូងបានគូសបញ្ជាក់ថា៖ «នៅក្នុងចំណាត់ការសំណុំរឿងខាងលើនេះ តុលាការត្រូវការពេលវេលាសមរម្យ ដោយសារសំណុំរឿងមានចំនួនច្រើន និងមានលក្ខណៈស្មុគស្មាញ ជាពិសេសជនរងគ្រោះជាដើមបណ្តឹងរដ្ឋប្បវេណីមានច្រើនរយនាក់ តុលាការកំពុងពិនិត្យផ្ទៀងផ្ទាត់អត្តសញ្ញាណជនរងគ្រោះ ដែលជាដើមបណ្តឹងរដ្ឋប្បវេណីឱ្យបានត្រឹមត្រូវ ហើយក៏ដូចជាការពិនិត្យផ្ទៀងផ្ទាត់ឯកសារបញ្ជាក់ការទាមទារសំណងរបស់ដើមបណ្តឹងម្នាក់ផងដែរ។ ចំពោះសំណូមពរផ្សេងទៀតរបស់ប្រជាពលរដ្ឋដែលជាដើមបណ្តឹងរដ្ឋប្បវេណី ក៏ដូចជាចំណាត់ការបន្តសំណុំរឿងទាំងនេះ តុលាការនឹងបន្តធ្វើការពិនិត្យចាត់ការឱ្យបានលឿន ត្រឹមត្រូវ និងយុត្តិធម៌ជូនភាគី»។
យ៉ាងណា សម្រាប់ លោក ម៉ែន សុថាវរិន្រ្ទ ជឿថា តុលាការនឹងមិនចាត់វិធានការលើអតីតឧកញ៉ា ហ៊ី គឹមហុង នោះទេ ព្រោះតែគាត់ជាបក្ខពួករបស់ថ្នាក់ដឹកនាំរបស់រដ្ឋាភិបាល។
លោកថា៖ «ខ្ញុំជឿជាក់ថា តុលាការមិនចាត់វិធានការលើលោក ហ៊ី គឹមហុង ហ្នឹងទេ ព្រោះសុទ្ធតែជាបក្ខពួករបស់រដ្ឋាភិបាលលោក ហ៊ុន ម៉ាណែត ចឹងគាត់មិនគិតគូររឿងហ្នឹងទេ គឺសុទ្ធតែបក្ខពួកគាត់ទាំងអស់ មានតែប្រជាពលរដ្ឋទាំងអស់គ្នាទេ រួបរួមគ្នាឡើងជាធ្លុងមួយ ដើម្បីទម្លាក់រដ្ឋាភិបាលហ្នឹង បើមិនចឹងទេ សុទ្ធតែបក្ខពួកថ្នាក់ដឹកនាំទាំងអស់ហ្នឹង គឺមិនអាចចាត់វិធានការបានទេ តវ៉ាយ៉ាងណាក៏ទៅមិនរួចទេ»។
សម្រាប់ នាយកទទួលបន្ទុកកិច្ចការទូទៅនៃអង្គការការពារសិទ្ធិមនុស្សលីកាដូ លោក អំ សំអាត ធ្លាប់បានជំរុញឱ្យតុលាការពន្លឿនបើកការស៊ើបអង្កេត លើករណីបោកប្រាស់នេះឡើងវិញ ដើម្បីកាត់ទោសឧក្រិដ្ឋជន និងរឹបអូសទ្រព្យមកសងជនរងគ្រោះវិញផងដែរ។
លោកថា៖ «ក្រៅតែអំពីរងគ្រោះក្រុមហ៊ុនពិភពដីមាសហ្នឹងហើយ គាត់[ជនរងគ្រោះ]មានការជំពាក់បំណុលច្រើនដែលធ្វើឱ្យបំណុលហ្នឹងក្លាយជាវ័ណ្ឌក ហើយប៉ះពាល់រហូតទៅដល់សេដ្ឋកិច្ចគាត់ទៅទៀត អ្នកខ្លះអាចនឹងបាត់បង់ដីធ្លី ផ្ទះសំបែង ឬក៏ទ្រព្យជាបន្តទៅទៀត ហើយអ្នកខ្លះក៏អាចសម្រេចចិត្តគិតខ្លី ផ្សេងៗ ដែលអាចប៉ះពាល់ទៅដល់ រាងកាយ ឬក៏អ្នកខ្លះ ធ្លាក់ខ្លួនមានជំងឺអីជាដើម ការប៉ះពាល់ ប៉ះទង្គិចផ្លូវចិត្តធ្ងន់ធ្ងរអីជាដើម។ អ៊ីចឹង វាដល់ពេលដែលតុលាការលោកត្រូវតែអនុវត្តវិធានការផ្លូវច្បាប់ ដើម្បីរកយុត្តិធម៌ឱ្យជនរងគ្រោះ»។
អគ្គនាយកក្រុមហ៊ុនពិភពដីមាស អតីតឧកញ៉ា ហ៊ី គឹមហុង ត្រូវបានចាប់ខ្លួនកាលពីខែសីហា ឆ្នាំ២០២៣ ពីបទ ឆបោកពលរដ្ឋ តែប្រមាណ ៤ខែក្រោយមក ពោលគឺនៅខែវិច្ឆិកា ឆ្នាំ២០២៣ តុលាការដោះលែងវិញ ក្រោយសន្យារកលុយសងជនរងគ្រោះវិញ តែពេលបាននៅក្រៅឃុំ លោកបានគេចវេសមិនគោរពសន្យានោះទេ។
ចំពេលយុត្តិធម៌ជាប់គាំង ជនរងគ្រោះក៏ធ្លាប់បានទម្លាយលិខិត២ច្បាប់ បង្ហាញថា គណៈអចិន្ត្រៃយ៍គណៈកម្មាធិការគណបក្សប្រជាជនកម្ពុជារាជធានីភ្នំពេញ ដែលមាន លោក ឃួង ស្រេង ជាប្រធាន បានបង្កើតសាខាបក្សនៅក្រុមហ៊ុនពិភពដីមាស ក្នុងរាជធានីភ្នំពេញ នៅឆ្នាំ២០២៣ ជ្រើសតាំង លោក ហ៊ី គឹមហុង ជាមេដឹកនាំ។
យ៉ាងណា ក្នុងរយៈពេលប៉ុន្មានខែចុងក្រោយនេះ ប្រជាពលរដ្ឋបានងើបតវ៉ាជាបន្តបន្ទាប់ មានដូចជា អតិថិជនទិញផ្ទះនៅបុរីឡេង ណាវ៉ាត្រា អតិថិជនទិញបុរី ម៉ន ដានី និងអ្នកចាញ់បោកអតីតឧកញ៉ា ឡេង ចាន់ណា ជាដើម។
អំពើឆបោកធំៗក្រោមការដឹកនាំរបស់រដ្ឋាភិបាល លោក ហ៊ុន ម៉ាណែត នេះ មានដូចជា អតីតឧកញ៉ា ឡេង ចាន់ណា ជា សារ៉ន ហ៊ី គឹមហុង ក្រុមហ៊ុនCIC ក្រុមហ៊ុនភូមិខ្មែរគ្រុប ឧកញ៉ា ឡេង ណាវ៉ាត្រា និងក្រុមហ៊ុនមួយចំនួនទៀត ដែលយុត្តិធម៌ពួកគេត្រូវបានកប់ចោល៕
