ច្រើនទសវត្សរ៍មកនេះ សង្គ្រាមពាក្យសម្តី ដែលអ្នកនយោបាយខ្មែរ ចោទគ្នាទៅវិញទៅមក ពីទង្វើក្បត់ជាតិ និងកាត់ដីឱ្យប្រទេសជិតខាង មានថៃ និងវៀតណាម ជាដើម ដើម្បីរក្សាអំណាច ឬដោះដូរសន្តិភាពនោះ នៅតែបន្តរហូតបច្ចុប្បន្ននាសម័យទំនើបនេះ ខណៈកម្ពុជាបានឯកភាពបោះបង្គោលព្រំដែនបណ្តោះអាសន្នជាមួយថៃ ក្រោយប៉ះទង្គិចគ្នាដោយអាវុធរយៈពេល៥ថ្ងៃរួចមក។
បញ្ហាទាំងនេះ ជាសំណួរចោទសួរថាតើបញ្ហាអ្វីនៅពីក្រោយការចោទគ្នាកាត់ដីឱ្យបរទេស ដើម្បីអំណាច?
មូលហេតុចម្បងមួយចំនួន ក្នុងចំណោមបញ្ហាជាច្រើន ដែលគួបផ្សំគ្នា ផ្តើមឱ្យលេចឡើងនូវវោហាសាសន៍ចោទគ្នាទៅវិញទៅមក រវាងរដ្ឋាភិបាលគ្រួសារហ៊ុន និងអ្នកជំនាញកិច្ចការព្រំដែនពីគណបក្សប្រឆាំងនោះ គឺត្រូវបានគេសំអាងថា កើតឡើងពីកត្តាធំពីរ។
កត្តាទី១ ការបោះបង្គោលព្រំដែនបណ្តោះអាសន្នជាមួយថៃ នាពេលបច្ចុប្បន្ន ធ្វើឡើងចំពេលដែលយោធាថៃ ហាក់មានប្រៀប បង្កើនការដាក់សម្ពាធ និងចោទប្រកាន់កម្ពុជា ក្រោមលេសផ្ទុះមីនតាមព្រំដែន ធ្វើឱ្យទាហានខ្លួនរងរបួសជាបន្តបន្ទាប់។
លើសពីនេះ ការបោះបង្គោលបានធ្វើឡើងក្រោយថៃប្រកាសដកខ្លួនពីបទឈប់បាញ់ ដោយឯកតោភាគី គំរាមប្រើកម្លាំង វាយយកទីតាំងដែលខ្លួនចង់បាន ចំពេលកម្ពុជាប្រកាសឈប់តបតដោយកម្លាំងប្រដាប់អាវុធ ក្រោមហេតុផលចង់នាំត្រឡប់មកវិញនូវសន្តិភាពនៃប្រទេសទាំងពីរ ក្រោយមានការប៉ះទង្គិចគ្នាដោយអាវុធទ្រង់ទ្រាយធំ ជាមួយថៃ រយៈពេល៥ថ្ងៃ ។
បញ្ហាចម្បងទី២ គឺក្នុងកាលៈទេសៈ ដែលកម្ពុជាប្តូរជំហរមិនប្រើកម្លាំងយោធា ដើម្បីដោះស្រាយបញ្ហាជម្លោះព្រំដែន យោធាថៃ បានបន្តចល័តទ័ពចូលដីខ្មែរ រាយបន្លាលួសព័ទ្ធយកដីខ្មែរនិងភូមិខ្មែរនៅប្រាសាទតាមាន់ធំ តំបន់អានសេះ ព័ទ្ធយកភូមិជោគជ័យ និងភូមិព្រៃចាន់ រហូតទាហានថៃ បើកការបាញ់ពលរដ្ឋខ្មែរនៅភូមិព្រៃចាន់ បណ្តាលឱ្យម្នាក់ស្លាប់ និង៣នាក់រងរបួស កាលពីថ្ងៃទី១២ ខែវិច្ឆិកា ឆ្នាំ២០២៥ ក៏រដ្ឋាភិបាលកម្ពុជា មិនប្រើសិទ្ធិស្វ័យការពារខ្លួន ក៏ដូចជាមិនប្តឹងឱ្យថៃដកបន្លាលួសទំាំងនោះត្រឡប់ទៅវិញដែរ ជំនួសមកវិញដោយការព្រមព្រៀងបោះបង្គោលបណ្តោះអាសន្ន នៅលើទីតាំងមួយចំនួន ដែលថៃកំពុងទន្ទ្រានច្បាមយក ដូចជាភូមិជោគជ័យនេះជាដើម។
បញ្ហាចម្បងមួយទៀត គឺប្រធានគណបក្សកាន់អំណាច លោក ហ៊ុន សែន ដែលបច្ចុប្បន្នត្រូវគេមើលឃើញថា មានអំណាចកំពូលនៅកម្ពុជានោះ មានប្រវត្តិ ការឡើងកាន់អំណាចដំបូងនៅកម្ពុជា មានការជ្រោមជ្រែងពីមេដឹកនាំវៀតណាម ចាប់តាំងពីឆ្នាំ១៩៧៩មក។
លោក ហ៊ុន សែន ធ្លាប់អះអាងថា លោកជាអ្នករៀបចំផែនការជាមួយ លោក សាយ ភូថង ដើម្បីចាប់ខ្លួនអតីតនាយករដ្ឋមន្ត្រីសម័យសាធារណរដ្ឋប្រជាមានិតកម្ពុជា លោក ប៉ែន សុវណ្ណ អំឡុងឆ្នាំ១៩៨១ បញ្ជូនទៅឃុំខ្លួននៅវៀតណាមអស់រយៈពេលជាង១០ឆ្នាំ ក្រោយពីមានភ្លើងខៀវពីវៀតណាម។
លោកថា៖ «បងសាយ ភូថង បានប្រាប់ខ្ញុំថា ប៉ែន សុវណ្ណ ក្បត់ហើយ ដូច្នេះយើងមិនអាចទុកប៉ែន សុវណ្ណ បានទេ ដូច្នេះខ្ញុំក៏បានបញ្ជាក់ថាពិតប្រាកដណាស់បង មិនអាចទុកបានតទៅទៀតទេ។ យើងត្រូវតែដោះស្រាយបញ្ហារបស់យើងហើយ ប៉ុន្តែតើត្រូវធ្វើយ៉ាងម៉េច បើ ប៉ែន សុវណ្ណ គឺជាមនុស្សដែលមកពីវៀតណាម អ៊ីចឹងតើយើងយកទៅណា? យើងត្រូវតែហ៊ាននិយាយជាមួយទាំងខាងវៀតណាម ដើម្បីប្រគល់ជូនទៅឲ្យវៀតណាមជួយ»។
លោក ហ៊ុន សែន ចោទថា លោក ប៉ែន សុវណ្ណ ជាមនុស្សស្អប់វៀតណាម បើទោះបីគាត់បានរត់ទៅនៅវៀតណាមតាំងពីអាយុ១៥ឆ្នាំ និងយកប្រពន្ធវៀតណាមក៏ដោយ។ នេះបើតាមការថ្លែងរបស់លោកនៅអំឡុងខែមករា ឆ្នាំ២០២២។
លោក ប៉ែន សុវណ្ណ កាន់តំណែងជានាយករដ្ឋមន្ដ្រីបានតែប្រមាណ៦ខែប៉ុណ្ណោះ ពោលគឺចាប់ពីថ្ងៃទី២៧ ខែមិថុនា ដល់ថ្ងៃទី២ ខែធ្នូ ឆ្នាំ១៩៨១។
លោកត្រូវបានចាប់ខ្លួនដោយជំនាញការវៀតណាម នៅថ្ងៃទី២ ខែធ្នូ ឆ្នាំ១៩៨១ និងបញ្ជូនទៅឃុំខ្លួននៅប្រទេសវៀតណាមអស់រយៈពេល១០ឆ្នាំនិង៥២ថ្ងៃ។
ក្នុងសៀវភៅ សុបិននិងការពិត របស់លោក វ៉ាន់ឌី កាអុន ដែលបាននិយាយពីបញ្ហាកម្ពុជា ចន្លោះឆ្នាំ១៨៦៣ ដល់ឆ្នាំ១៩៩២ ពីសម័យអាណានិគមចាស់ មកសម័យអាណានិគមថ្មី បានសរសេរថា ការដកហូតដំណែង លោក ប៉ែន សុវណ្ណ គឺបណ្ដាលមកពីលោក ប៉ែន សុវណ្ណ ប្រមាថទីក្រុងហាណូយយ៉ាងខ្លាំង ដោយចង់មានទំនាក់ទំនងដោយផ្ទាល់ជាមួយទីក្រុងមូស្គូ រំលងទីក្រុងហាណូយ។
មួយវិញទៀត បណ្ដាលមកពី លោក ប៉ែន សុវណ្ណ ប៉ុនប៉ងរំដោះកម្ពុជា ពីការគាបសង្កត់របស់វៀតណាម ហើយប្រឆាំងនឹងនយោបាយអន្តោប្រវេសន៍វៀតណាមនៅកម្ពុជា។
ប៉ុន្តែសំខាន់ជាងនេះ លោកប៉ែន សុវណ្ណ របូតពីតំណែង ហើយត្រូវគេចាប់ដាក់គុក ក៏ព្រោះតែលោក ដែលជាអតីតខ្មែរវៀតមិញ ដណ្ដើមតួនាទីដឹកនាំរបស់ក្រុមខ្មែរក្រហមភូមិភាគបូព៌ាប្រឆាំងនឹងប៉ុលពត ដែលគេស្គាល់ថា ជាក្រុមលោក ហ៊ុន សែន។ គឺទំនាស់ប្រជែងអំណាចរវាងចរន្តទាំងពីរនេះហើយ ដែលធ្វើឲ្យវៀតណាមបារម្ភ ហើយបង្ខំចិត្តកម្ចាត់ចោលមួយ។
បើគេវិភាគទៅលើសៀវភៅ សុបិននិងការពិត របស់លោក វ៉ាន់ ឌីកាអុន ហាក់ស៊ីនឹងការអះអាងរបស់លោក ប៉ែន សុវណ្ណ ក្រោយលោករួចពីការឃុំខ្លួននៅប្រទេសវៀតណាម។
លោក ប៉ែន សុវណ្ណ អះអាងថា មូលដែលលោក ហ៊ុន សែន ចាប់ខ្លួនលោក ដោយសារលោកប្រឆាំងនឹងបំណងវៀតណាម ដែលចង់ឱ្យលោកកាត់ដីតាមព្រំដែនឱ្យ និងបង្ហូរជនជាតិវៀតណាមចូលមករស់នៅក្នុងដែនដីកម្ពុជា។
លោកថា៖ «គេសុំខ្ញុំ៣ចំណុច! ទី១សុំកាត់ដីឱ្យស្រុកគេ! ទី២ គេសុំខ្ញុំបញ្ចូលនិគមគេ១ខេត្ត៣ពាន់គ្រួសារ! ខ្ញុំអត់ឱ្យ។ ទី៣សុំបង្កើតក៥! ខ្ញុំអត់ឱ្យទៀត! ទាំងអស់ហ្នឹងសុទ្ធតែយកដីខ្មែរ!សម្លាប់ប្រជាជនខ្មែរ។ បញ្ជូលនិគមគេមក ខ្ញុំដាច់ខាតមិនឱ្យ ហើយដល់ លោក ហ៊ុន សែន គេថាខ្ញុំមានគំនិតចង្អៀត ជាតិនិយម ប្រឆាំងវៀតណាមមកតាំងនៅស្រុកខ្មែរ។ គេប្រឆាំងខ្ញុំរហូត! ហ៊ុន សែន ហេង សំរិន»។
ចាប់ពីមានការចាប់ខ្លួនលោក ប៉ែន សុវណ្ណ នៅឆ្នាំ១៩៨១ ប៉ុន្មានឆ្នាំបន្ទាប់ តំណែងលោក ប៉ែន សុវណ្ណ ធា្លក់លើ លោក ហ៊ុន សែន។
ក្នុងតំណែងដែល លោក ហ៊ុន សែន ធ្វើជានាយករដ្ឋមន្ត្រី ទាំងបញ្ហាព្រំដែន និងលំហូរអន្តោប្រវេសន៍ខុសច្បាប់របស់ជនជាតិវៀតណាម ត្រូវបានគណបក្សប្រឆាំង អះអាងថាបានកើនឡើងយ៉ាងកំហុក ក្នុងនោះមានការលេចឡើងពីការព្រមានរំលាយរបបរាជានិយម អាស្រ័យធម្មនុញ្ញ បើព្រះអង្គបង្កការលំបាកដល់ការចុះហត្ថលេខាលើសន្ធិសញ្ញាព្រំដែនបំពេញបន្ថែមឆ្នាំ២០០៥ ។
លោកថា៖ «ខ្ញុំនិយាយជាមួយសម្តេចក្រុមព្រះហើយ ខ្ញុំថាព្រះអង្គ និយាយប្រាប់ឯកឧត្តម ស៊ុន ចាន់ថុល កុល ផែង ស៊ីសុវត្ថិ សន្ថារ៉ា នៅលើយន្តហោះ ហើយខ្ញុំប្រាប់សម្តេចក្រុមព្រះ ពេលដែលជួបតាមទូរសព្ទថា ព្រះអង្គបើលើកនេះវាពិបាកស៊ីញ៉េ ត្រូវពិនិត្យឡើងវិញ យើងគួរទុករាជានិយម ឬធ្វើសាធារណរដ្ឋឱ្យវាមានប្រធានាធិបតី»។
សន្ធិសញ្ញាព្រំដែននេះ អ្នកឃ្លាំមើលព្រំដែនដែលមិនចំណុះឱ្យរដ្ឋាភិបាលចោទថា លោក ហ៊ុន សែន បានធ្វើឱ្យសន្ធិសញ្ញាព្រំដែនខុសច្បាប់ឆ្នាំ១៩៨២ ១៩៨៣ និង១៩៨៥ ជាដើមរស់ឡើងវិញ តាមការចង់បានរបស់វៀតណាម ដែលធ្វើឱ្យទឹកដីកម្ពុជាមួយផ្នែកទៀត ទាំងដែនដីគោក និងសមុទ្រ រួមទាំងប្រជុំកោះធ្លាក់ក្នុងដៃវៀតណាមរហូតបច្ចុប្បន្ន។
ងាកមកបញ្ហាជាមួយថៃវិញ នៅថ្ងៃទី២ ខែមិថុនា ឆ្នាំ២០២៥ ពោលគឺមុនការផ្ទុះអាវុធជាមួយថៃ លោក ហ៊ុន សែន បានប្រកាសប្រាប់សមាជិកសភា និងព្រឹទ្ធសភា ពីគម្រោងប្តឹងថៃទៅតុលាការយុត្តិធម៌អន្តរជាតិ (ICJ) លើទីតាំងយ៉ាងតិច៤ចំនុច។
ក្នុងនោះមាន ប្រាសាទតាមាន់ធំ ស្ថិតក្នុងខេត្តឧត្តរមានជ័យ ប្រាសាទតាមាន់តូច ប្រាសាទតាក្របី និងតំបន់មុំ៣ ស្ថិតក្នុងខេត្តព្រះវិហារ ដោយសំអាងថា ការចរចាទ្វេភាគីជាមួយថៃ២០០ឆ្នាំទៀត ក៏មិនអាចដោះស្រាយបានដែរ ដោយសារថៃចង់ឱ្យកម្ពុជាទទួលយកការកំណត់ខ្សែបន្ទាប់ព្រំដែនថ្មី តាមផែនទី១លើ៥០ពាន់ ដែលថាថៃគូរដោយខ្លួនឯង ដែលលោកហៅថា ជាផែនទីចោរ។
លោកថា៖ «ផែនទីចោដែលធ្លាប់ឈ្លានពានយើងកាលពីឆ្នាំ២០០៨ គឺមិនគប្បីត្រូវបានប្រើប្រាស់ទៀតទេ យើងសូមប្រាប់អ្នកឲ្យបានដឹង»។
ប៉ុន្តែមកដល់បច្ចុប្បន្ននេះ ក្រុមអ្នកតាមដានថា រដ្ឋាភិបាលមិនបានរុញសំណុំរឿងព្រំដែននេះ ដើម្បីប្តឹងថៃទៅកាន់តុលាការអន្តរជាតិនៅឡើយទេ ក្រោយផ្ទុះអាវុធជាមួយថៃ និងថៃប្រកាសដកខ្លួនពីកិច្ចព្រមព្រៀងបទឈប់បាញ់ផងនោះ។
បរិបទនេះ ក្រោយពីមេដឹកនាំកម្ពុជាអះអាងថា ខ្លួនស្រឡាញ់សន្តិភាព មិនប្រើកម្លាំងដើម្បីដោះស្រាយបញ្ហាព្រំដែនទេ ហើយក៏បានលេចចេញកិច្ចព្រមព្រៀង បោះបង្គោលព្រំដែនបណ្តោះអាសន្នជាមួយថៃតាមយន្តការទ្វេភាគី ដែលថៃតែងតែចង់បាន។
នេះជាបញ្ហាចម្បងមួយទៀត ដែលផ្តើមចេញពីការពិតនៃការចោទប្រកាន់ថា រដ្ឋាភិបាលអាចនឹងកាត់ដី ដើម្បីការពារអំណាច ឬដោះដូរនឹងសន្តិភាព។
ប៉ុន្តែការពិតមួយទៀត លោក ហ៊ុន សែន បានចេញមកព្រមានចាត់វិធានការ ដកសញ្ជាតិពលរដ្ឋខ្មែរទាំងឡាយណា ដែលហ៊ាននិយាយថា រដ្ឋាភិបាលដោះដូរដី ដើម្បីការពារអំណាចឬដោះដូរយកសន្តិភាពនេះ។
ក្រៅពីការព្រមានពីលោក ហ៊ុន សែន គេក៏ឃើញទូរទស្សន៍ជាតិ បង្ហាញមុខមន្ត្រីជំនាញកិច្ចការព្រំដែន យ៉ាងតិច៣រូប ចេញមកការពារភាពស្អាតស្អំរបស់រដ្ឋាភិបាល ជុំវិញការបោះបង្គោលព្រំដែនបណ្តោះអាសន្នជាមួយថៃនេះ ។
ប៉ុន្តែបើគេប្រៀបធៀបកាអះអាងរបស់លោក ហ៊ុន សែន មុនផ្ទុះអាវុធជាមួយថៃ និងការបកស្រាយរបស់មន្ត្រីជំនាញកិច្ចការព្រំដែន ក្រោយកម្ពុជាព្រមព្រៀងបោះបង្គោលបណ្តោះអាសន្ននេះ នៅតែមានការបញ្ចេញមតិយោបល់ពីចម្ងល់ដដែលលើបណ្តាញសង្គម ជុំវិញបញ្ហានេះ។
មន្ត្រីជំនាញនៃរដ្ឋលេខាធិការដ្ឋានកិច្ចការព្រំដែន លោក អ៊ិត សុត្ថា លើកឡើងថា ការកំណត់ខណ្ឌសីមាកម្ពុជា និងថៃ រដ្ឋាភិបាលក៏មិនបានលាក់បាំងព័ត៌មានដូចការចោទប្រកាន់ និងកាត់ដីដើម្បីដូរយកសន្តិភាពនោះទេ។
លោកថា៖ «គាត់ថាយើងគេធ្វើឲ្យបាត់ដី ឬក៏ការវាស់វែងរបស់យើងហ្នឹង ធ្វើឲ្យបាត់ដី អាហ្នឹងដូចជាគាត់ហ្នឹងវ៉ៃប្រហារមកលើអ្នកបច្ចេកទេសរបស់យើង! ហើយមិនទុកចិត្តលើអ្នកបច្ចេកទេសរបស់យើង។ ហើយបើនិយាយឲ្យចំទៅ បើសិនជារាជរដ្ឋាភិបាលទាំងសម័យសម្ដេចតេជោ ក៏ដូចជាសម័យសម្ដេចធិបតីនាពេលបច្ចុប្បន្ននេះ កាត់ដីដើម្បីដូរយកសន្តិភាពមែននោះ! អ៊ីចឹងវាមិននឹងមិនមានហេតុការណ៍ផ្ទុះសង្គ្រាមនៅឆ្នាំ២០០៨ ២០១១»។
ដោយឡែក មន្ត្រីជំនាញនៃរដ្ឋលេខាធិការដ្ឋានកិច្ចការព្រំដែនម្នាក់ទៀត លោក ស្រ៊ឺ បូរ៉ា និយាយថា ការបោះបង្គោលព្រំដែនកម្ពុជា-ថៃ ធ្វើឡើងតាមការយន្តការចរចាទ្វេភាគី។
លោកថា៖ «ខ្ញុំសូមរំឭកបន្តិចថា ចាប់ពីឆ្នាំ២០០៦មក ក្រុមវាស់វែងចម្រុះព្រំដែនភាគីទាំងពីរកម្ពុជា–ថៃ បានចាប់ផ្តើមចុះរុករកបង្គោលព្រំដែនជំនាន់បារាំងទាំង៧៤ ក្នុងហ្នឹងយើងបានឯកភាពគ្នាជាង៤០បង្គោលរួចហើយដែរ ជាង៤០បង្គោលក្នុងចំណោមបង្គោលដែលឯកភាពហ្នឹង! គឺមានបង្គោលព្រំដែនចំនួន២៤ដែលយើង! មានន័យថា យើងកំណត់វាយ៉ាងច្បាស់លាស់ថា គឺជាបង្គោលព្រំដែនជំនាន់បារាំង ហើយវានៅសល់រូបរាងគ្រាន់តែវាមានបាក់បែក វារិចរិលអីតិចតួចទេ»។
យ៉ាងណា លោក ហ៊ុន សែន ធ្លាប់ថ្លែងថា ការចរចាជាមួយថៃ២៥ឆ្នាំគ្មានបានធ្វើអ្វីក្រៅពីរកបង្គោលព្រំដែន។
លោកថា៖ «កម្ពុជាបានធ្វើការចរចាជាមួយវៀតណាមបោះបង្គោលរួចជាស្រេចចំនួន ៨៤ភាគរយរួចស្រេចទៅហើយ នៅសល់១៦ភាគរយទៀត កំពុងតែធ្វើការចរចាជាមួយឡាវបានចរចាបោះបង្គោលព្រំដែនចំនួន៨៦ភាគរយហើយ នៅសល់១៤ភាគរយទៀត កំពុងបន្តការចរចា ដោយមានការគោរពគ្នា ក៏ប៉ុន្តែព្រំដែនកម្ពុជា-ថៃបាន២៥ឆ្នាំ គឺអត់ទាន់បានធ្វើអី! ក្រៅតែពីដើររកបង្គោលប៉ុន្មាននោះតែប៉ុណ្ណោះ»។
លើសពីនេះ សាក្សីរស់ដែលជាអ្នកអតីតមេទ័ពតស៊ូតាមខ្សែក្រវ៉ាត់ព្រំដែនថៃ ពីគណក្សហ្វ៊ុនស៊ិនប៉ិច លោក ញឹក ប៊ុនឆៃ ធ្លាប់អះអាងពីការចងចាំ ពីការពង្រីកការឈ្លានពានកម្ពុជាពីសំណាក់ប្រទេសថៃ រួមទាំងភូមិព្រៃចាន់ ដែលលោកថា លោកជួយធ្វើជាសាក្សីបំភ្លឺរឿងនេះបានបើរដ្ឋាភិបាលត្រូវការលោក។
លោកថា៖ «តាមតែសេចក្ដីត្រូវការរបស់គណៈកម្មាធិការកិច្ចការព្រំដែនកម្ពុជា-ថៃហ្នឹង គាត់ត្រូវការខ្ញុំរបៀបម៉េច! ខ្ញុំចូលរួមរីករាយនឹងចូលរួមជួយជាភ័ស្តុតាងជាអី ដើម្បីតតាំងជាមួយខាងភាគីថៃ! ហើយដោយសារសព្វថ្ងៃដែលមានបញ្ហា ដោយសារភាគីថៃទី១អត់គោរពMOU ឆ្នាំ២០០០នោះទេ! ព្រោះក្នុងMOUឆ្នាំ២០០០ រវាងកម្ពុជានិងថៃដែលចុះហត្ថលេខាជាមួយគ្នាហ្នឹង! បានឯកភាពគ្នាប្រើប្រាស់ផែនទីសន្ធិសញ្ញាបារាំងសៀមឆ្នាំ១៩៩៤ ហើយ១៩៩៧» ។
លើសពីនេះ លោក ហ៊ុន សែន ថា កម្ពុជា-ថៃមានព្រំប្រទល់ដីគោកជាប់គ្នាជាង ៨០០គីឡូម៉ែត្រ ប៉ុន្តែចំនុច៤ដែលកម្ពុជាគ្រោងប្តឹងថៃមានត្រឹមប្រមាណជា៥០គីឡូប៉ុណ្ណោះ ហើយថា ជាង៧០០គីឡូម៉ែត្រទៀតទុចចរចាទ្វេភាគី ត្រង់នេះក៏ជាចម្ងល់ដែរ បើដឹងថាថៃប្រើផែនទីចោរដើម្បីដាក់សម្ពាធឱ្យកម្ពុជាទទួលយក ហើយកម្ពុជាដាក់ខាតត្រូវការពារបូរណភាពទឹកដីតាមផែនទីបារាំងសៀមឆ្នាំ១៩០៤និង១៩០៧ ហេតុអ្វីកម្ពុជាមិនព្រមប្តឹងថៃទៅតុលាការយុត្តិធម៌អន្តរជាតិ (ICJ) និងបន្តចរចាលើដីជាក់ស្តែងលើខ្សែរបន្ទាត់ព្រំដែនជាង៧០០គីឡូម៉ែត្រ តាមយន្តការទ្វេភាគី បើដឹងថាយន្តការទ្វេភាគីជាដើមចមផ្ទុះសង្គ្រាម ហើយកម្ពុជាមិនចង់ឱ្យមានសង្គ្រាម។
ត្រង់ចំនុចនេះវីអូឌី ទុកឱ្យបងប្អូនពិចារណាដោយខ្លួនឯងលើការបកស្រាយ៕
