រដ្ឋសភា កាលពីថ្ងៃទី២៩ខែវិច្ឆិកា បានអនុម័តយល់ព្រមជាឯកច្ឆន្ទ តាមសំណើររបស់រដ្ឋាភិបាលគ្រួសារហ៊ុនដែលបង្កើនកញ្ចប់ថវិកាជាតិដល់ជាង ១០ពាន់លានដុល្លារក្នុងឆ្នាំ២០២៦ គឺមានការកើនឡើង៧,៦% បើធៀបនឹងឆ្នាំ២០២៥ ដែលមានទឹកប្រាក់ចំនួន ៩ពាន់៤រយលានដុល្លារ។
ក្នុងច្បាប់ហិរញ្ញវត្ថុនេះ ក៏បានអនុញ្ញាតឱ្យរដ្ឋាភិបាលអាចខ្ចីប្រាក់ជាង ៣ពាន់លានដុល្លារបន្ថែមទៀត យកមកបង្គ្រប់ការចាយ ខណៈរដ្ឋាភិបាលមិនកាត់បន្ថយក្រសួង និងបន្តឱបក្រសោបមន្ត្រីច្រើនសំពីងសំពោងដេកស៊ីប្រាក់ខែរដ្ឋ ស្របពេលពលរដ្ឋ ជាពិសេសពលករខ្មែរដែលទើបវិលត្រឡប់មកពីថៃ កំពុងជួបវិបត្តិបំណុលវ័ណ្ឌក។
គេកត់សម្គាល់ឃើញថា នៅក្នុងរយៈពេលជិត១០ឆ្នាំមកនេះ កម្ពុជាត្រូវបានអង្គការតម្លាភាពអន្តរជាតិ ចាត់ចំណាត់ថ្នាក់នៅបាតតារាងជារៀងរាល់ឆ្នាំ ជាប្រទេសដែលកើតមានអំពើពុករលួយជាប្រព័ន្ធច្រើនជាងគេនៅលើពិភពលោក ពោលគឺចាប់តាំងពីលោក ហ៊ុន សែន បានរំលាយប្រព័ន្ធដឹកនាំរដ្ឋតាមបែបប្រជាធិបតេយ្យ តាមរយៈការរំលាយគណបក្សសង្គ្រោះជាតិ ចាប់ប្រធានគណបក្ស លោក កឹម សុខា ឃុំខ្លួន ធ្វើឱ្យលោកហ៊ុន សែន អាចជិះសេះលែងដៃចង់ធ្វើអ្វីៗ បានតាមចិត្ត ដោយសារតែពុំមានគណបក្សប្រឆាំងជំទាស់។
អ្នកជំនាញ និងអ្នកឃ្លាំមើល លើកឡើងថា បច្ចុប្បន្នកម្ពុជាមានក្រសួងស្ថាប័នរដ្ឋ និងមានមន្ត្រីច្រើនលើសពី៤ទៅ៩ដង ដែលចាំបាច់ត្រូវធ្វើកំណែទម្រង់កាត់បន្ថយ ដើម្បីបង្កើនប្រសិទ្ធភាពការងារនិងសន្សំសំចៃថវិកាជាតិ។
លោក អ៊ូ ច័ន្ទរ័ត្ន សហស្ថាបនិកគណបក្សកែទម្រង់កម្ពុជា បានប្រាប់វីអូឌីនៅថ្ងៃទី១ខែធ្នូនេះ ដោយសម្តែងការព្រួយបារម្ភ ខណៈកម្ពុជាជារៀងរាល់ឆ្នាំតែងតែបង្កើនការចាយថវិកាជាតិ ហើយនៅតែបន្តខ្ចីប្រាក់ពីបរទេសជារៀងរាល់ឆ្នាំ ដើម្បីយកមកបង្គ្រប់ការចាយដែលបានធ្វើឱ្យបំណុលកើនកាន់តែច្រើនទៅៗ។ យ៉ាងណាក្តី លោកថា ចំនួនថវិកាជាតិជាង១០លានដុល្លារក្នុងមួយឆ្នាំនេះ វាមិនច្រើនហួសហេតុពេកនោះទេ ក៏ប៉ុន្តែរដ្ឋាភិបាលកម្ពុជាក៏គួរតែសន្សំសំចៃដែរ ដើម្បីកុំឱ្យខ្ចីគេយកមកបង្រ្គប់ការចាយរាល់ឆ្នាំ ពីព្រោះការងារខ្លះ សេវាខ្លះ បូករួមទាំងការធ្វើកំណែទម្រង់ ដូចមិនឃើញមានអ្វីប្រែប្រួលបានល្អប្រសើរជាដុំកំភួនគួរឱ្យកត់សម្គាល់នោះទេ។ លោកបន្តថា ថវិកាជាតិទាំងនោះ បើសិនជាបង្កើនការចំណាយទៅលើវិស័យដែលអាទិភាពចាំបាច់ ដូចជា វិស័យអប់រំ វិស័យសុខាភិបាល និងវិស័យសង្គមកិច្ចជាដើម គឺជារឿងប្រសើរ ប៉ុន្តែត្រូវធ្វើយ៉ាងណាឱ្យមានតម្លាភាពនិងប្រសិទ្ធភាព។
លោកថា៖ «ជាការពិតយើងចំណាយទៅលើប្រាក់ខែ មន្រ្តីតាមស្ថាប័នទាំងស្ថាប័ននយោបាយទាំងស្ថាប័នរដ្ឋបាលអីជាដើម ហើយខ្ញុំមើលឃើញស្ថាប័ននយោបាយខ្លះ ហាក់ដូចជាមិនមានប្រសិទ្ធភាព ហើយជាពិសេសក្បាលម៉ាស៊ីននៅក្នុងស្ថាប័នមួយៗហ្នឹង ហាក់ដូចជាគរជើងគ្នាច្រើនពេកធ្វើឱ្យការប្រើប្រាស់ថវិកាជាតិហ្នឹងខ្ជះខ្ជាយច្រើនណាស់ មិនមានប្រសិទ្ធភាពអីទេ។ ដូច្នេះគួរតែកាត់បន្ថយមន្ត្រីដែលមិនចាំបាច់ទាំងឡាយហ្នឹង គួរតែកាត់បន្ថយទៅ»។
វីអូឌី មិនអាចទាក់ទងលោក មាស សុខសេនសាន អ្នកនាំពាក្យក្រសួងសេដ្ឋកិច្ច និងហិរញ្ញវត្ថុ ដើម្បីស្នើសុំធ្វើអត្ថាធិប្បាយលើបញ្ហានេះបានទេ នៅថ្ងៃទី២ ខែធ្នូ ឆ្នាំ២០២៥នេះ។
ប៉ុន្តែលោកឧបនាយករដ្ឋមន្រ្តី អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានឱ្យដឹងថា សេចក្ដីព្រាងច្បាប់ស្ដីពីហិរញ្ញវត្ថុសម្រាប់ការគ្រប់គ្រងឆ្នាំ២០២៦ ត្រូវបានរៀបចំឡើងក្នុងបរិការណ៍ដែលសេដ្ឋកិច្ចកម្ពុជា បន្តហ៊ុមព័ទ្ធដោយអន្តរកាលនៃពហុវិបត្តិ ដែលមិនចំណុះនឹងការគ្រប់គ្រងរបស់កម្ពុជានោះឡើយមានជាអាទិ៍ដូចជា ការប្រែប្រួលយ៉ាងរហ័សនៃរបត់គោលនយោបាយពាណិជ្ជកម្មសកល ដែលកាន់តែមានទំនោរទៅរកចរន្តគាំពារនិយម និងឯកតោនិយម តាមរយៈគោលនយោបាយពន្ធគយបដិការ ការបន្តបិទខ្ទប់ព្រំដែនគោក រវាងកម្ពុជា-ថៃ។
បើតាម លោក អូន ព័ន្ធមុនីរ័ត្ន សេចក្តីព្រាងច្បាប់នេះ ក៏ត្រូវបានរៀបចំឡើងដោយផ្តល់អាទិភាព លើការពង្រឹងសមត្ថភាពការពារអធិបតេយ្យជាតិ និងបូរណភាពទឹកដី ការទ្រទ្រង់និរន្តរភាពនៃកិច្ចប្រតិបត្តិការរបស់ស្ថាប័នរដ្ឋ ការគាំទ្រការអនុវត្តជាអាទិភាពនូវគោលនយោបាយសំខាន់ៗ ព្រមទាំងវិធានការកែទម្រង់គន្លឹះ និងជាក់ស្តែងនានា ដែលត្រូវបន្តអនុវត្តនៅក្នុងឆ្នាំ២០២៦។ នេះបើយោងតាមក្រសួងព័ត៌មាន។
គួររំឭកថា លោក ហ៊ុន ម៉ាណែត ដែលត្រូវបានលើកបន្តុបឱ្យឡើងស្នងតំណែងជានាយករដ្ឋមន្ត្រី កាលពីថ្ងៃទី២២ ខែសីហា ឆ្នាំ២០២៣ ជំនួសឪពុករបស់លោក គឺជាបញ្ញវ័ន្តដែលបានទៅសិក្សានៅបស្ចឹមប្រទេសក្នុងនោះក្នុងឆ្នាំ១៩៩៩ ទទួលបានសញ្ញាបត្រពីបណ្ឌិតសភាយោធាអាមេរិក ឆ្នាំ២០០២បញ្ចប់ម៉ាស្ទ័រពីសាកលវិទ្យាល័យញូយ៉កផ្នែកសេដ្ឋកិច្ច និងក្នុងឆ្នាំ២០០៩ ទទួលបានសញ្ញាបត្រថ្នាក់បណ្ឌិតពីសាកលវិទ្យាល័យប្រីស្តុលនៃចក្រភពអង់គ្លេស។ ប៉ុន្តែចាប់តាំងពីលោកឡើងធ្វើជានាយករដ្ឋមន្ត្រី ក្នុងរយៈពេលជាង២ឆ្នាំមកនេះ មិនត្រឹមតែមិនឃើញមានភាពរីកចម្រើនលេចធ្លោលើវិស័យណាមួយនោះទេ ថែមទាំងទន់ខ្សោយធ្វើឱ្យកើតមានវិបត្តិសង្គមចាក់ស្រែះស្ទើរគ្រប់វិស័យ រាប់ចាប់តាំងពីវិស័យការពារជាតិបូរណភាពទឹកដី អំពើពុករលួយបក្ខពួកនិយម អំពើអយុត្តិធម៌សង្គម អំពើឆបោកចាប់ជម្រិត និងការជួញដូរគ្រឿងញៀនជាដើមបានរីករាលដាលចាក់ស្រែះ សូម្បីតែតម្លៃកសិផលរបស់កសិករក៏ធា្លក់ចុះយ៉ាងសម្បើមផងដែរ។ នេះបើតាមក្រុមអ្នកឃ្លាំមើល។
កម្ពុជាដែលមានប្រជាជនត្រឹមតែប្រមាណ ១៧លាននាក់ ត្រូវបានគេមើលឃើញថា ជាប្រទេសដែលមានក្បាលម៉ាស៊ីនដឹកនាំរដ្ឋធំសំពីងសំពោងលើសគេ នៅលើពិភពលោក ក្នុងនោះគ្រាន់តែទីស្តីការគណៈរដ្ឋមន្ត្រីមានរដ្ឋលេខាធិការ និងអនុរដ្ឋលេខាធិការចំនួន១១៣នាក់។
បច្ចុប្បន្នកម្ពុជាមាន ២៨ក្រសួង រដ្ឋលេខាធិការដ្ឋាន១ និងមានអាជ្ញាធរជាតិ យ៉ាងហោចណាស់ចំនួន១៧ស្ថាប័នផ្សេងទៀត រួមទាំងមានតំណែងរដ្ឋមន្ត្រីប្រតិភូអមនាយករដ្ឋមន្ត្រី ទីប្រឹក្សា និងជំនួយការប្រមាណជាង ៥ពាន់នាក់ថែមទៀត។
បើនិយាយពីថ្នាក់ក្រោមជាតិវិញ គ្រាន់តែខេត្តកែប ដែលជាខេត្តតូចជាងគេបំផុតមួយរបស់កម្ពុជា មាន ប្រជាជនត្រឹមតែជាង ៤ម៉ឺន១ពាន់នាក់ គឺមានអភិបាលរងខេត្តរហូតដល់១០នាក់ឯណោះ។ នេះបើយោងតាមមន្ត្រី និងសារព័ត៌មានក្នុងស្រុក។
ក្រសួងមុខងារសាធារណៈ បានបង្ហាញទិន្នន័យមន្ត្រីរាជការស៊ីវិលនៅទូទាំងប្រទេស ឱ្យដឹងថា គិតត្រឹមខែមករាឆ្នាំ២០២៥ មានមន្ត្រីរាជការសរុបចំនួន ២៣២ ០៣៤នាក់។ ក្នុងនោះថ្នាក់ជាតិមានចំនួន ៥៤ ៥៨៥នាក់ស្មើ ២៣,៥២% និងថ្នាក់ក្រោមជាតិមានចំនួន ១៧៧ ៤៤៩នាក់ ស្មើនឹង៧៦,៥៣%។
ប្រទេសវៀតណាមនៅក្នុងឆ្នាំ២០២៥ បានកាត់បន្ថយក្រសួងពី២០មកត្រឹម១៤ក្រសួង តិចជាកម្ពុជាពាក់កណ្តាល បើទោះពីពលរដ្ឋគេមានប្រជាជន១០០លាននាក់លើសពលរដ្ឋកម្ពុជាជិត៦ដង។ រីឯទីភ្នាក់ងារចំនួន៣បង្រួមខេត្តក្រុងពី៦៣ឱ្យមកនៅ៣៤ និងក៏បានកាត់បន្ថយមន្ត្រីរដ្ឋប្រមាណ៨ម៉ឺននាក់ផងដែរ។ ចំណែកប្រទេសថៃមានប្រជាជន៧១លាននាក់ មានក្រសួងចំនួន២០ សហរដ្ឋអាមេរិកមានប្រជាជនជាង៣៤០លាននាក់ គឺមានមន្រ្តីជាន់ខ្ពស់រដ្ឋាភិបាល ទីប្រឹក្សានិងជំនួយការមិនដល់១០០នាក់ផងទេ ខណៈដែលប្រទេសសឹង្ហបុរីមានប្រជាជន៦លាននាក់ មានសមាជិកគណៈរដ្ឋមន្ត្រីតែ១៧នាក់ប៉ុណ្ណោះ។ នេះបើយោងតាមការចុះផ្សាយរបស់សារព័ត៌មានបរទេស។
លោក ឱក សេរីសោភក្តិ៍ អ្នកឯកទេសអភិបាលកិច្ច បានពន្យល់នៅពេលធ្វើបាឋកថា ស្តីពីកំណែទម្រង់រដ្ឋបាលសាធារណៈកម្ពុជា កាលពីពេលថ្មីៗនេះ ដោយលោកបានកំណត់ពីអាទិភាពសំខាន់ៗ និងជំហានជាក់ស្តែងដែលត្រូវការ ដើម្បីធ្វើកំណែទម្រង់វិស័យសាធារណៈរបស់កម្ពុជាដែលមានប្រសិទ្ធភាព តម្លាភាព និងពិតជាបម្រើប្រជាពលរដ្ឋ។
លោកបញ្ជាក់ថា រដ្ឋបាលសាធារណៈជាឆ្អឹងខ្នងនៃការអភិវឌ្ឍជាតិ ដែលប៉ះពាល់ដល់គ្រប់វិស័យ តាំងពីការអប់រំ រហូតដល់ការវិនិយោគ និងហេដ្ឋារចនាសម្ព័ន្ធ។ អ្នកជំនាញរូបនេះចោទសួរថាតើការចាយលុយ ចំនួននៃការចាយលុយរបស់រដ្ឋ និងរបស់ពលរដ្ឋ វាខុសគ្នាប៉ុណ្ណា? ប៉ុន្តែលោកថា មិនមែនបានសេចក្តីថា ទៅមុខទៀតកម្ពុជានៅតែត្រូវធ្វើអ៊ីចឹងទៀតនោះទេ ពីព្រោះវាធ្វើឱ្យរដ្ឋបាលសាធារណៈនឹងចុះខ្សោយ។ នេះបើយោងតាមវេទិកាអនាគតនៃកម្ពុជា។
លោក អ៊ូ ច័ន្ទរ័ត្ន លើកឡើងថា ការកាត់បន្ថយចំនួនមន្ត្រី គឺជាការការកាត់បន្ថយបន្ទុកយ៉ាងធ្ងន់របស់ប្រជាពលរដ្ឋ ពីព្រោះការចំណាយទាំងអស់របស់រដ្ឋាភិបាល គឺសុទ្ធតែជាលុយដែលប្រជាពលរដ្ឋបានបង់ពន្ធមិនមែនបានប្រាក់មកពីណានោះទេ។
បន្ថែមពីនេះ លោកជំរុញឱ្យមានការធ្វើកំណែទម្រង់ក្នុងវិស័យយុតិ្តធម៌ឱ្យបានស៊ីជម្រៅ និងមានប្រសិទ្ធភាពដោយកម្ចាត់អំពើពុករលួយ ហើយលោកក៏បានជំរុញឱ្យរដ្ឋាភិបាលបញ្ចប់តួនាទីរបស់មន្ត្រីទាំងឡាយណាដែលចាំស៊ីតែប្រាក់ខែរដ្ឋ ប៉ុន្តែមិនបានធ្វើការងារទៀងទាត់ ពីព្រោះបើនៅតែបន្តទុកបែបនេះ វាខាតទាំងថវិកាជាតិ និងធ្វើឱ្យគ្រោះថ្នាក់ដល់ជាតិ។
លោកថា៖ «ពីព្រោះយើងអាងថាមានអ្នកធ្វើការប៉ុន្តែជាក់ស្តែងវាអត់។ ធ្វើឱ្យមានគ្រោះថ្នាក់ខ្លាំងណាស់អាហ្នឹងខាតទាំងថវិកាខាតទាំងអីហ្នឹង ហើយវាជារឿងមួយដែលយើងហៅថាជាអំពើពុករលួយនោះ។ ស៊ីប្រាក់ខែរាស្ត្រ ស៊ីប្រាក់ខែរដ្ឋ ក៏ប៉ុន្តែអត់បំពេញតួនាទីអត់មានការងារអីធ្វើជាដើម អាហ្នឹងគួរតែលុបបំបាត់ទៅ។ ខ្លះថាដាក់ឈ្មោះស៊ីប្រាក់ខែហ្នឹង ហើយខ្ញុំមិនដឹងថានៅមានឈ្មោះខ្មោចបន្តមកដល់ថ្ងៃនេះទៀតឬអត់ ខ្ញុំមិនដឹងមិនហ៊ានថាទេ ប៉ុន្តែបើសិនជាមានគួរតែបញ្ចប់ទៅមកដល់សម័យនេះហើយ យើងធ្វើម៉េចឱ្យការងារវាមានប្រសិទ្ធភាពឡើង។ ហើយបើនៅតែបន្តបែបនេះ យើងគួរតែខ្មាស់ប្រជាពលរដ្ឋខ្មែរសាមញ្ញអ្នកក្រីអ្នកក្រអីជាដើមហ្នឹង ខំបំពេញកិច្ចការហើយទទួលបន្ទុកត្រូវបង់ប្រាក់ខែទៅមន្ត្រីអស់ហ្នុងទៀត»។
ជាមួយគ្នានះ លោក សុខ សុគន្ធ ហៅ ជែម សុខ អ្នកអត្ថាធិប្បាយលើបណ្តាញសង្គម បានថ្លែងថា រដ្ឋាភិបាលកម្ពុជា គួរបង្រួមក្រសួងនិងកាត់បន្ថយចំនួនមន្ត្រីរាជការ ដូចប្រទេសដទៃទៀត ដើម្បីបង្កើនប្រសិទ្ធភាពការងារ និងកាត់បន្ថយការចំណាយរបស់រដ្ឋដែលកំពុងតែខ្វះខាត។ លោកលើកឡើងថា បច្ចុប្បន្នមន្ត្រីរាជការនៅតាមក្រសួងនានាមានចំនួនច្រើន លើសពីសេចក្តីត្រូវការរហូតដល់ពី៤ទៅ៩ដង។
លោកថា៖ «ឥឡូវខ្ញុំឱ្យឧទាហរណ៍ម្តេចចាំមានឧបនាយករដ្ឋមន្ត្រីក្រសួងយុត្តិធម៌ នៅពេលដែលតុលាការរលួយហើយអយុត្តិធម៌? ម៉េចចាំបាច់មានឧបនាយករដ្ឋមន្ត្រីហើយជារដ្ឋមន្ត្រីក្រសួងការបរទេស? អត់ប្រយោជន៍។ ម៉េចចាំបាច់មានឧបនាយករដ្ឋមន្ត្រី ហ៊ុន ម៉ានី? តែកិច្ចការរដ្ឋមន្ត្រីគាត់ធ្វើមិនកើតផង។ ចុះម៉េចបានត្រូវមានឧបនាយករដ្ឋមន្ត្រីក្រសួងសេដ្ឋកិច្ចទៀត មិនឱ្យគាត់ធ្វើសេដ្ឋកិច្ចទៅ? ម៉េចក៏ចាំបាច់មានឧបនាយករដ្ឋមន្ត្រី នេត សាវឿន មិនឱ្យគាត់កាន់សន្តិសុខជាតិបណ្តោយទៅ? អ្វីដែលគេបង្កើតហ្នឹង គឺគេចែកការងារគ្នាធ្វើ ពីព្រោះគេច្របាច់បញ្ចូលក្រសួងអត់បាន ដូច្នេះគេបង្កើតក្រសួងឱ្យច្រើនចែកការងារគ្នាធ្វើ»។
សម្រាប់ លោក ជែម សុខ រដ្ឋាភិបាលកម្ពុជាគួរមានត្រឹមឧបនាយករដ្ឋមន្ត្រី២នាក់ រដ្ឋមន្ត្រី១៥នាក់ហើយក្នុងក្រសួងមួយមានអនុរដ្ឋមន្ត្រីម្នាក់ និងថែមរដ្ឋលេខាធិការម្នាក់ គឺគ្រប់គ្រាន់ទៅហើយ មិនចាំបាច់មានតំណែងច្រើនសំពីងសំពោងដូចបច្ចុប្បន្ននោះទេ ពីព្រោះកម្ពុជាមានប្រជាជនតិចរដ្ឋ មិនមានការងារត្រូវធ្វើច្រើននោះទេ។
គិតត្រឹមដំណាច់ត្រីមាសទី១ឆ្នាំ២០២៥ កម្ពុជាមានសន្និធិបំណុលសាធារណៈសរុបចំនួន ១២,១៨ ពាន់លានដុល្លារ។ ចំនួននេះ បានកើនឡើង១,២៤% បើធៀបនឹងចុងឆ្នាំ២០២៤ ដែលមានទំហំសន្និធិបំណុលសាធារណៈចំនួន ១២,០៣ពាន់លានដុល្លារ។ នេះបើតាមព្រឹត្តិបត្រស្ថិតិបំណុលសាធារណៈកម្ពុជា ចេញផ្សាយនាថ្ងៃទី៣០ ខែឧសភា ឆ្នាំ២០២៥ ។
គិតត្រឹមដំណាច់ឆ្នាំ២០២៣ ប្រជាពលរដ្ឋកម្ពុជាចំនួន ៤,៩៨លាននាក់ បានខ្ចីប្រាក់ពីប្រព័ន្ធធនាគារដែលមានទំហំទឹកប្រាក់ប្រមាណ ៥៧,៦ពាន់លានដុល្លារ។ នេះបើយោងតាមCBC ចេញនាចុងខែមីនា ឆ្នាំ២០២៤។
មន្ត្រីអង្គការសង់ត្រាល់ បានឱ្យដឹងថា ក្នុងចំណោមពលករចំណាកស្រុកកម្ពុជា ដែលទើបវិលត្រឡប់មកពីថៃជាង ៩០ម៉ឺននាក់ ភាគច្រើនជំពាក់បំណុលធនាគារ ហើយក្នុងចំណោមពួកគេបច្ចុប្បន្នមួយចំនួន មិនមានលទ្ធភាពរកប្រាក់បង់សងធនាគារនោះទេ ដោយសារតែពុំទាន់អាចរកការងារបានធ្វើនៅក្នុងប្រទេស ខណៈអ្នកខ្លះរកបានការងារធ្វើតែទទួលបានប្រាក់ឈ្នួលទាប គឺធ្លាក់ចុះពី៤០ទៅ៦០ភាគរយ បើប្រៀបធៀបទៅនឹងប្រាក់ឈ្នួលដែលពួកគេទទួលបានកាលពីធ្វើការនៅប្រទេសថៃ។ ក្រសួងការងារ បានឱ្យដឹងថា រហូតមកដល់ពេលនេះ ក្រសួងបានជួយសម្របសម្រួលរកការងារឱ្យអតីតពលករមកពីថៃធ្វើ នៅក្នុងប្រទេសបានប្រមាណជិត២៩ម៉ឺននាក់៕
