វិធានការបង្កកការទ្រព្យសម្បត្តិ ឧកញ៉ា កុក អាន និង លោក ចេន ហ្ស៊ី ជាង១១លានដុល្លារ ដោយចោទថាពាក់ព័ន្ធនឹងបទឧក្រិដ្ឋលាងលុយ និងឧក្រិដ្ឋឆបោកនោះ ត្រូវបានគេទាញភ្ជាប់ទៅនឹងជម្លោះព្រំដែន ដោយថាវិធាននេះ ថៃកំពុងសង្កត់គ្រួសារហ៊ុនឱ្យចុះចាញ់ ដើម្បីសម្រេចមហិច្ឆិតាលេបទឹកដីខ្មែរ ក្រោមយុទ្ធសាស្ត្រព្រួញមួយបាញ់បានសត្វពីរ។
កាលពីថ្ងៃទី៣ខែធ្នូនេះ សារព័ត៌មានថៃជាច្រើន មានទាំងខាវសុត និង The Nation បានចុះផ្សាយថា នាយករដ្ឋមន្រ្តីថៃ លោក អនុធិន ចាន់វីរៈគុណ និងការិយាល័យប្រឆាំងការលាងលុយកខ្វក់ AMLO បានប្រកាសរឹបអូស និងបង្កកទ្រព្យសម្បត្តិ របស់លោក ចេន ហ្ស៊ី និងឧកញ៉ា កុក អាន ជាសមាជិកព្រឹទ្ធសភាកម្ពុជា ដោយសំអាងពីការរកឃើញថា ពួកគេមានជាប់ពាក់ព័ន្ធឧក្រិដ្ឋកម្មឆបោកឆ្លងដែន និងបទឧកក្រិដ្ឋលាងលុយកខ្វក់។
ប្រភពបន្តថា AMLO បានរកឃើញប្រតិបត្តិការក្លែងបន្លំតាមអ៊ីនធឺណិត ការជួញដូរមនុស្ស និងការលាងលុយឌីជីថល ដោយបានរឹបអូសទ្រព្យសម្បត្តិ មាន១0២មុខទំនិញ រួមទាំងដីធ្លី សាច់ប្រាក់រាប់លានបាត រថយន្តទំនើបៗ និងគ្រឿងអលង្ការប្រណីតៗ ដែលមានតម្លៃប្រហែល ៣៧៣ លានបាត ឬប្រមាណជាង ១១លានដុល្លារអាមេរិក។
ប្រភពនិយាយថា លោក កុក អាន និងសាច់ញាតិរបស់គាត់ ៤នាក់ទៀត បានប្រើប្រាស់គណនីបោកប្រាស់ដែលមានការផ្ទៀងផ្ទាត់ស្កេនមុខ និងលាងលុយកខ្វក់ប្រតិបត្តិការចូលទៅក្នុងអចលនទ្រព្យថៃ។
ប្រភពបញ្ជាក់ថា លោក កុក អាន ម្ចាស់ក្រុមហ៊ុន Crown Casino បានយកអគារ Crown Casinoប្រព្រឹត្តិអំពើឆបោកតាមប្រព័ន្ធអនឡាញ (Call Centre) ដើម្បីឆបោកជនបរទេស រួមទាំងជនជាតិថៃ។
ជុំវិញបញ្ហានេះ តំណាងរាស្រ្តបក្សប្រឆាំងលោក អ៊ុំ សំអាន ចាត់ទុកវិធានការបស់ថៃនេះ ជាយុទ្ធសាស្រ្តសង្កត់កមេដឹកនាំគ្រួសារហ៊ុនឱ្យចុះចាញ់រឿងព្រំដែន ដើម្បីបានលេសបន្តលេបទឹកដីខ្មែរតាមព្រំដែន។
លោកថា ថៃបន្តអនុវត្តយុទ្ធសាស្រ្តព្រួញមួយបាញ់បានសត្វពីរ ព្រួញទី១ រួមសហការជាមួយអន្តរជាតិ រួមមានសហរដ្ឋអាមេរិក និងចក្រភពអង់គ្លេស បង្រ្កាបឧក្រិដ្ឋកម្មឆបោកជុំវិញពិភពលោក ដើម្បីមុខមាត់។
ព្រួញទី២ បាញ់គំរាមមេដឹកនាំគ្រួសារហ៊ុន កុំឱ្យហ៊ានប្រឆាំងមហិច្ចតាថៃឈ្លានពាន បើមិនដូច្នោះទេ ថៃនឹងបន្តរឹបអូស បង្កក់ទ្រព្យសម្បត្តិវាល់លានដុល្លារបន្ថែមទៀតលើមេឧក្រិដ្ឋជនឆបោកស្និទ្នគ្រួសារហ៊ុន។
លោកថា៖ «ដែលថៃកាត់ចរន្តហិរញ្ញវត្ថុរបស់គណបក្សប្រជាជន ឬត្រកូលហ៊ុននេះ ជាពិសេសលើមនុស្សដែលជំនិតនឹង លោក ហ៊ុន សែន តាមរយៈការបង្កកទ្រព្យសម្បត្តិចេញដីកាចាប់ខ្លួននេះ គឺដើម្បីដាក់សម្ពាធទៅដល់មេដឹកនាំកម្ពុជា ព្រមទាំងកាត់ដីឲ្យថៃទៅដូរយកសន្តិភាព និងអំណាច ហើយនៅពេលដែលកាត់ដីឱ្យថៃ ហើយថៃគេអាចបន្ធូរបន្ថយរឿងបង្កកទ្រព្យសម្បត្តិ ឬក៏ចេញដីកាចាប់ខ្លួនអ្នកឧកញ៉ាលី យ៉ុងផាត់ ចេន ហ្ស៊ី និងឧកញ៉ា កុក អាន ជាដើម ហេតុដូច្នេះគេព្យាយាមធ្វើម៉េចកាត់ផ្ដាច់ហោប៉ៅលុយ លុយរបស់ត្រកូលហ៊ុន ដើម្បីឱ្យត្រកូលហ៊ុនហ្នឹង ព្រមកាត់ដីទៅឲ្យថៃ»។
សម្រាប់ លោក សំអាន ស្តីបន្ទោសថា ការដឹកនាំក្រាញ់អំណាច ចិញ្ចឹមពួកក្រុមឧក្រិដ្ឋជនឆបោក ចាប់ជំរិត និងលាងលុយកខ្វក់របស់គ្រួសារហ៊ុននេះ បានទាញទម្លាក់កម្ពុជាចូលគ្រោះមហន្តរាយធ្ងន់ធ្ងរ។
ក្នុងន័យនេះ លោកពន្យល់ថា គ្រោះមហន្តរាយ ដូចជា ការបន្តបាត់បង់ទឹកដីខ្មែរ បាត់បង់អាយុជីវិតទាហានខ្មែរ ពលរដ្ឋខ្មែរ និងធ្វើឱ្យកម្ពុជាបន្តស្អុយឈ្មោះអាក្រក់លើឆាកអន្តរជាតិ រឿងឧក្រិដ្ឋកម្មឆបោក ចាប់ជំរិត លាងលុយកខ្វក់ ជួញដូរមនុស្ស គ្រឿងញៀន និងអំពើពុករលួយជាដើម។
លោកថា៖ «យើងឃើញជាក់ស្ដែងហើយ នៅពេលដែលថៃគេដាក់ទណ្ឌកម្មបង្កកទ្រព្យសម្បត្តិទៅលើឧកញ៉ា ដែលនៅស្និទ្ធនឹងត្រកូលហ៊ុនហ្នឹង វានឹងធ្វើឲ្យប៉ះពាល់ដល់បូរណភាពទឹកដីកម្ពុជា ឥឡូវនេះឃើញលោក ហ៊ុន ម៉ាណែត តាមបញ្ជា ហ៊ុន សែន ហ្នឹងបានកាត់ដីខ្មែរយើងចន្លោះពីពីរគីឡូម៉ែត្រទៅបីគីឡូម៉ែត្រ នៅភូមិជោគជ័យ និងភូមិព្រៃចាន់ ទៅឲ្យថៃចន្លោះបង្គោលលេខ៤២ ដល់៤៧ តាមរយៈការបោះបង្គោលបណ្ដោះអាសន្ននៅទីនោះ ហើយនឹងកាត់ដីខ្មែរយើងរាប់រយគីឡូម៉ែត្រការ៉េទៀត នៅចន្លោះបង្គោលលេខ៥២ ដល់៥៩នៅស្រុកកំរៀង ខេត្តបាត់ដំបង»។
ប្រហែលគ្នានេះដែរ នាយកកម្មវិធីតស៊ូមតិរបស់អង្គការប្រជាធិបតេយ្យខ្មែរមានមូលដ្ឋាននៅអូស្ត្រាលី លោក សេង វណ្ណលី យល់ថា ការបន្តរឹបអូសទ្រព្យសម្បត្តិមនុស្សជំនិតមេដឹកនាំកម្ពុជានេះ ឆ្លុះបញ្ចាំងថា ថៃបានដឹងពីចំនុចខ្សោយរបស់មេដឹកនាំគ្រួសារហ៊ុន ដែលស្រឡាញ់អំណាច ជាជាងបូរណភាពទឹកដី។
លោកសង្កត់ធ្ងន់ថា ការដឹកនាំប្រទេសដែលពោរពេញទៅដោយអំពើពុករលួយ និងក្រុមឧក្រិដ្ឋកម្មឆបោកដូចបច្ចុប្បន្ន ជៀសមិនផុតពីការបង្កគ្រោះថ្នាក់ដល់សង្គមជាតិ បូរណភាពទឹកដី និងប្រជារាស្រ្ត។
លោកថា៖ «ចំណាត់ការរបស់ថៃកាលពីថ្មីៗនេះ ពង្រឹងបន្ថែមទៅលើចំណុចការកន្លងហើយ ដែលខ្លួនបានធ្វើ ជាពិសេសការរឹបអូសទ្រព្យសម្បត្តិរបស់ លោក កុក អាន លោក លី យ៉ុងផាត់ ហើយនិងការផ្តាច់សញ្ជាតិអីជាដើមហ្នឹង គឺសុទ្ធតែធ្វើឡើងក្នុងគោលដៅដាក់សម្ពាធរដ្ឋាភិបាលកម្ពុជា ដើម្បីឲ្យចុះញ៉ម ឬបន្ទន់ជំហរ ជាពិសេសជុំវិញបញ្ហាព្រំដែននិយាយរួមទៅ គឺនឹងធ្វើឲ្យជំហររបស់រដ្ឋាភិបាលបច្ចុប្បន្នមានភាពទន់ភ្លន់ភាពស្ងៀមស្ងាត់ខ្លាំងជាងមុន មិនឆ្លើយតបត មិនប្រតិកម្មទៅនឹងការឈ្លានពានរបស់ថៃ»។
ជុំវិញបញ្ហានេះ អ្នកនាំពាក្យគណបក្សប្រជាជនកម្ពុជា លោក ជា ធារិទ្ធិ បញ្ជាក់ថា រដ្ឋាភិបាលដឹកនាំដោយគណបក្សប្រជាជនកម្ពុជា មិនខ្វល់នឹងការបង្កក ឬរឹបអូសទ្រព្យសម្បត្តិ ពីសំណាក់ភាគីថៃនោះទេ។
ម្យ៉ាងវិញទៀត លោកថា ថៃគ្មានដែនសមត្ថកិច្ចណា មកហ៊ានចាប់មន្រ្តីរបស់រដ្ឋាភិបាលកម្ពុជានោះដែរ។
លោកថា៖ «ថៃចង់ប្រកាសធ្វើអីធ្វើអីស្រេចតែចិត្តគេទៅ យើងកុំខ្វល់ទេ ព្រោះអីវាគ្មានអីពាក់ព័ន្ធ ឬក៏គ្មានដែនសមត្ថកិច្ចអីមកលើតុលាការ ឬក៏យុទ្ធធិកាអីនៅក្នុងប្រទេសកម្ពុជា ឬក៏ពាក់ព័ន្ធនឹងប្រទេសកម្ពុជារបស់យើងទេ ព្រោះអាហ្នឹងជាល្បែងរបស់គេទេ យើងទៅខ្វល់អី»។
អ្នកច្បាប់ និងជាអ្នកវិភាគឯករាជ្យ លោក វ៉ន ចាន់ឡូត យល់ថា ការរឹបអូសទ្រព្យសម្បត្តិមន្រ្តីជំនិតមេដឹកនាំ ហើយសុទ្ធជាអ្នករកលុយឱ្យបក្សកាន់អំណាចផង ច្បាស់ណាស់ មេដឹកនាំកម្ពុជាអាចរងសម្ពាធដ៏ធំមួយនេះ ព្រមចុះញ៉មជាមួយថៃ មិនហ៊ានប្រឆាំងនឹងមហិច្ចតាថៃឈ្លានពាន។
លោកទាញជាឧទាហរណ៍ថា ក្រោយថៃប្រកាសរឹបអូសទ្រព្យសម្បត្តិ និងតាមចាប់ខ្លួនមន្រ្តីរដ្ឋាភិបាលកម្ពុជា ដូចជា លោក លី យ៉ុងផាត់ និងលោក កុក អាន ភាគីកម្ពុជាហាក់បន្ទន់ឥរិយាទមិនហ៊ានតវ៉ានឹងថៃ បើទោះបីយោធាថៃបើកការវាយប្រហារបាញ់សម្លាប់ពលរដ្ឋខ្មែរ ក៏មេដឹកនាំកម្ពុជាមិនតបត សូម្បីតែប្រើសិទ្ធស្វ័យការពារខ្លួន។
លោកថា៖ «ភាគីថៃបានមើលឃើញពីចំណុចខ្សោយត្រង់នេះ របស់ក្រុមអ្នកកាន់អំណាចកម្ពុជាធ្វើឲ្យភាគីថៃបានប្រើប្រាស់នូវបញ្ហាការបង្ក្រាបអំពើឆបោកតាមអនឡាញនេះ ដាក់នៅក្នុងរបៀបវារៈជាមួយទៅនឹងអំពើនៃការឈ្លានពានរបស់ខ្លួន ដែលមានន័យថា ទាំងក្នុងលក្ខខណ្ឌនៃកិច្ចព្រមព្រៀងនៃបទឈប់បាញ់ទាំងក្នុងលក្ខខណ្ឌនៃកិច្ចព្រមព្រៀងសន្តិភាពកូឡាឡាំពួរ ភាគីថៃបានបញ្ចូលនិងលក្ខខណ្ឌនៃការបង្ក្រាបឧក្រិដ្ឋកម្មអនឡាញនេះ ដូច្នេះភាគីថៃហាក់មានប្រៀប ទីមួយគឺទទួលបាននូវការសាទរពីសហគមន៍អន្តរជាតិ ក្នុងនោះក៏មានប្រទេសចិនផងដែរ ដែលកំពុងតែធ្វើកិច្ចសហប្រតិបត្តិការជាមួយនឹងអាជ្ញាធរថៃ ដើម្បីឈានទៅដល់ការបោសសម្អាតនៅក្រុមឧក្រិដ្ឋជនទាំងអស់នេះ»។
កាលពីថ្ងៃទី១៤ ខែតុលា ឆ្នាំ២០២៥នេះ សហរដ្ឋអាមរិក និងចក្រភពអង់គ្លេស រួមគ្នាដាក់ទណ្ឌកម្មបង្កកទ្រព្យសម្បត្តិក្រុមហ៊ុនព្រីនស៍ឧកញ៉ា ចេន ហ្ស៊ី ទីប្រឹក្សា លោក ហ៊ុន សែន ក្រោយរកឃើញថា ជាបណ្តាញឧក្រិដ្ឋកម្មឆបោកខ្នាតអន្តរជាតិ លួចលុយរាប់ពាន់លានដុល្លារពីជនរងគ្រោះជុំវិញពិភពលោក។
ជាមួយគ្នានោះ ក្រសួងយុត្តិធម៌អាមេរិក ប្រកាសថា អាមេរិកបានបង្កកទ្រព្យសម្បត្តិ ១៥ពាន់លានដុល្លាររបស់ឧកញ៉ា ចេន ហ្ស៊ី ព្រមទាំងចេញដីកាចោទប្រកាន់ ជុំវិញការបើកមជ្ឈមណ្ឌលឆបោកតាមអនឡាញ លាងលុយកខ្វក់ និងបង្ខាំងមនុស្សខុសច្បាប់។
បើតាមក្រសួងយុត្តិធម៌អាមេរិក រដ្ឋអាជ្ញាតុលាការសហព័ន្ធសហរដ្ឋអាមេរិកក្រុងញ៉ូវយ៉ក បានចោទប្រកាន់លោក ចេន ហ្ស៊ី ជុំវិញបទឧក្រិដ្ឋឆបោក និងលាងលុយ ដែលអាចប្រឈមជាប់ពន្ធនាគារ៤០ឆ្នាំ។
កាលពីថ្ងៃទី២៧ ខែវិច្ឆិកា ២០២៥ សារព័ត៌មានកូរ៉េខាងត្បូង ឈ្មោះថា The Korea herald បានឱ្យដឹងថា រដ្ឋាភិបាលកូរ៉េខាងត្បូង បានប្រកាសដាក់ទណ្ឌកម្មលើក្រុមហ៊ុន Prince Group របស់ឧកញ៉ា ចេន ហ្ស៊ី និងក្រុមហ៊ុន Huione Group របស់ឧកញ៉ា ហ៊ុន តូ និងបុគ្គលចំនួន ១៥រូបទៀត នៅកម្ពុជា រួមទាំងបណ្តាញទីផ្សារងងឹតពាក់ព័ន្ធឧស្សាហកម្មឆបោកអនឡាញជាច្រើនទៀត។
លើសពីនេះ កាលពីថ្ងៃទី៩ ខែវិច្ឆិកា ឆ្នាំ២០២៥ តុលាការព្រហ្មទណ្ឌថៃ បានចេញដីកាចាប់ខ្លួនសមាជិកព្រឹទ្ធសភាគណបក្សប្រជាជនកម្ពុជាចំនួនពីររូប គឺលោក លី យ៉ុងផាត់ និងលោក កុក អាន។
តាមសារព័ត៌មាន ខ៉ាវសុត ឱ្យដឹងថា តុលាការព្រហ្មទណ្ឌថៃ បានរកឃើញថា លោក លី យ៉ុងផាត់ និងលោក កុក អាន រួមទាំងបក្ខពួកជាច្រើនទៀត បានគប់គិតគ្នាជាប្រព័ន្ធប្រព្រឹត្តិអំពើឧក្រិដ្ឋកម្មឆបោក។
ប្រភពបញ្ជាក់ថា ទាំងលោក លី យ៉ុងផាត់ លោក កុក អាន សុទ្ធសឹងជាមនុស្សជំនិតមេដឹកនាំកម្ពុជាគ្រួសារហ៊ុន ដែលពួកគេមានតំណែង តួនាទីខ្ពស់ៗក្នុងជួររដ្ឋាភិបាល និងមានងារជាឧកញ៉ាថែមទៀត។
តាមរបាយការណ៍នានា បង្ហាញថា មនុស្សជំនិតៗមួយចំនួន នៅជុំវិញប្រធានគណបក្សកាន់អំណាច លោក ហ៊ុន សែន ត្រូវបានអន្តរជាតិរកឃើញជាបន្តបន្ទាប់ថា ជាមេឧក្រិដ្ឋជនឆបោក និងលាងលុយកខ្វក់ ឬលុយខុសច្បាប់ មានអ្នកឧកញ៉ា ហ៊ុន តូ ឧកញ៉ា លី យ៉ុងផាត់ ឧកញ៉ា កុក អាន និងឧកញ៉ា ទ្រី ភាព និងងប្រធាននាគារព្រីនស៍ លោក ចេន ហ្ស៊ី ជាដើម។
ក្រុមឧកញ៉ានោះ ជាប់ឈ្មោះក្នុងទណ្ឌកម្ម ឬបញ្ជីខ្មៅអាមេរិក ជុំវិញបទឧក្រិដ្ឋឆបោក និងការរំលោភសិទ្ធិមនុស្ស និងបទឧក្រិដ្ឋលាងលុយ។
ទាំងអស់នេះត្រូវបានអ្នកឃ្លាំមើលគិតថា ថៃកំពុងប្រើយុទ្ធសាស្ត្រព្រួញមួយបាញ់បានសត្វពីរ ដើម្បីដាក់សម្ពាធឱ្យគ្រួសារហ៊ុនចុះចាញ់ ដើម្បីសម្រេចមហិច្ឆតាលេបទឹកដី។ ហើយយុទ្ធសាស្ត្រនេះ ក៏ថៃមានលេសទាញការគាំទ្រពី សហគមន៍ អន្តរជាតិឱ្យគាំទ្រខ្លួន លើការប្តេជ្ញាចិត្តកាត់ផ្តាច់បណ្តាញឧក្រិដ្ឋកម្មឆ្លងដែន ដែលពិភពលោកកំពុងព្រួយបារម្ភពីការបង្កអសន្តិសុខទាំងក្នុងតំបន់ និងពិភពលោក ខណៈប្រព័ន្ធច្បាប់នៅកម្ពុជា រក្សាភាពស្ងៀមស្ងាត់ច្រើនឆ្នាំមកនេះ ពីចំណាត់ការលើមេឧក្រិដ្ឋជន ដែលអន្តរជាតិចង្អុលបង្ហាញ៕
