ក្រោយសភាពការណ៍ស្ងប់ស្ងាត់ ប្រជាពលរដ្ឋភូមិជោគជ័យ និងភូមិព្រៃចាន់ បានចាកចេញពីជំរុំភៀសសឹកវិលចូលលំនៅដ្ឋានវិញអស់ហើយ លើកលែងតែអ្នកភូមិព្រៃចាន់ប្រមាណ១០គ្រួសារ ដែលមានផ្ទះ តែមិនអាចចូលទៅនៅបាន។
ពលរដ្ឋភូមិព្រៃចាន់ លោក ស្រី ទាវ ប្រាប់វីអូឌីនៅថ្ងៃទី៣ ខែវិច្ឆិកាថា លំនៅដ្ឋានរបស់លោកនៅតែបន្តហ៊ុំព័ទ្ធដោយបន្លាលួស និងសំណាញ់ខ្មៅដែលយោធាថៃព័ទ្ធយកតាំងពីខែសីហា។
លោកបន្តថា អាកាសធាតុចុះត្រជាក់ ឯជីវភាពកាន់តែខ្សត់ខ្សោយ ធ្វើឱ្យការរស់នៅក្នុងតង់កៅស៊ូ កាន់តែលំបាក ខណៈពលរដ្ឋត្រូវប្រាប់ឱ្យរង់ចាំមើលដំណោះស្រាយរវាងរដ្ឋាភិបាលទាំងពីរតែប៉ុណ្ណោះ។
លោក ស្រី ទាវ និយាយថា៖ «ចង់ឱ្យតែបានសុខស្រួល បានផ្ទះបណ្ដោះអាសន្ន ក្នុងខែរងាត្រជាក់នេះ វារាងយ៉ាប់ដែរ។ តែរដ្ឋាភិបាលថាឱ្យចាំមើលសិនៗ ស្ងាត់ស្ងៀមសិន មិនដឹងយ៉ាងម៉េច ចាំមើលសិន»។
ពលរដ្ឋភូមិព្រៃចាន់ និងភូមិជោគជ័យ នៃឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ បានចាកចេញពីជំរុំភៀសសឹក ត្រឡប់ចូលលំនៅដ្ឋានវិញប្រមាណជាង១០ថ្ងៃមកហើយ ក្រោយស្ងប់ស្ងាត់ការយាយីពីភាគីថៃ ដែលបានបាញ់ប្រហារមកលើភូមិព្រៃចាន់ កាលពីថ្ងៃទី១២ ខែវិច្ឆិកា បណ្ដាលឱ្យពលរដ្ឋខ្មែរម្នាក់ស្លាប់ និងបីនាក់របួសធ្ងន់។
មេឃុំអូរបីជាន់ លោក តុល សារិន ឱ្យដឹងថា ពលរដ្ឋដែលត្រូវបានភាគីថៃព័ទ្ធយកផ្ទះ ត្រូវបានរៀបចំឱ្យស្នាក់នៅបណ្ដោះអាសន្នក្នុងបរិវេណសុវត្ថិភាព ដោយមានការឧបត្ថម្ភស្បៀងអាហារ និងសម្លៀកបំពាក់ការពារត្រជាក់ផងដែរ។ លោកបន្តថា ស្ថានភាពនេះ មានតែរង់ចាំការដោះស្រាយរបស់ថ្នាក់ជាតិប៉ុណ្ណោះ។
លោក តុល សារិន និយាយថា៖ «ចែកប៉ុន្មានសារហើយរឿងខោអាវរងាហ្នឹង ពីម្សិលម៉ិញក៏មានការចែកជាអង្ករអីដែរ។ ពីម្សិលម៉ិញក៏មានការចែកអង្ករអីដែរ។ [ថ្ងៃ]នេះក៏មានពួកអង្គការចែកជាអង្ករ ជាមីអីជូនពួកគាត់។ វានៅលើរាជរដ្ឋាភិបាល យើងទៅធ្វើតាមចិត្តយើងម៉េចបាន»។
តាមការបង្ហោះវីដេអូលើបណ្ដាញសង្គមពីស្ថានភាពអ្នកភូមិព្រៃចាន់ របស់គណនីហ្វេសប៊ុកឈ្មោះ នី ម៉ាយ បង្ហាញឱ្យឃើញពីសកម្មភាពសប្បុរសជនមកពីប្រទេសបារាំង បានចែកស្បៀង ដូចជា អង្ករ និងមី ទៅកាន់ពលរដ្ឋនៅក្នុងថ្ងៃទី៣ ខែវិច្ឆិកានេះ។
តាមវីដេអូបង្ហោះដោយគណនីដដែល កាលពីថ្ងៃទី២ ខែវិច្ឆិកា បានឱ្យដឹងថា មានពលរដ្ឋប្រមាណ ១៧គ្រួសារ កំពុងស្នាក់នៅបណ្ដោះអាសន្នក្នុងតង់កៅស៊ូ ក្នុងបរិវេណវត្តព្រៃចាន់ ដោយសារផ្ទះរបស់ពួកគាត់នៅជាប់បន្លាលួសដែលយោធាថៃព័ទ្ធយក។
ពលរដ្ឋម្នាក់និយាយក្នុងវីដេអូនោះថា អាជ្ញាធរមិនទាន់មានការបញ្ជាក់ពេលវេលាណាមួយ ឱ្យពលរដ្ឋត្រឡប់ទៅផ្ទះវិញឡើយ ដោយរង់ចាំការវាស់វែង និងបោះបង្គោលព្រំដែន។
កាលពីថ្ងៃទី២៦ ខែវិច្ឆិកា រដ្ឋលេខាធិការព្រំដែនគោកកម្ពុជា បានចេញសេចក្ដីប្រកាសព័ត៌មាន ដោយអះអាងថា ការចុះវាស់វែងបោះបង្គោលព្រំដែនបណ្ដោះអាសន្ន ដោយប្រើប្រាស់ដ្រូនថតពីលើអាកាស ក្នុងភូមិសាស្ត្រនៅភូមិព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ត្រង់បង្គោលលេខ៤២ ដល់៤៣ ប្រវែងប្រមាណ៧គីឡូម៉ែត្រ ត្រូវបានបញ្ចប់ទាំងស្រុង ហើយភាគីទាំងពីរនឹងបន្តចុះវាស់វែង និងបោះបង្គោលព្រំដែនបណ្ដោះអាសន្នលើដីជាក់ស្ដែងបន្ថែមទៀត។
គិតមកទល់ពេលនេះ មានរយៈពេលបីខែហើយ ដែលយោធាថៃព័ទ្ធផ្ទះពលរដ្ឋនៅភូមិព្រៃចាន់ ដោយប្រើបន្លាលួស និងសំណាញ់ខ្មៅ។ ក្នុងនោះផ្ទះមួយចំនួន ត្រូវបានយោធាថៃវាយកម្ទេចចោល និងបានធ្វើប្លង់កម្មសិទ្ធិប្រគល់ឱ្យពលរដ្ឋថៃផងដែរ។
ក្រៅពីនេះ ពួកគេបានបន្តធ្វើទុក្ខបុកម្នេញលើអ្នកភូមិព្រៃចាន់ជាបន្តបន្ទាប់ តាមរយៈការចាក់សំឡេងខ្លាំងៗរំខានដំណេក រហូតដល់បើកការបាញ់ប្រហារកាំភ្លើងពិតមកលើពលរដ្ឋ។
ទោះបីមានសេចក្ដីថ្លែងការរួមស្ដីពីសន្តិភាពរវាងកម្ពុជា-ថៃ ដែលមានការសម្របសម្រួលចុះហត្ថលេខាដោយប្រធានាធិបតីអាមេរិក លោក ដូណាល់ ត្រាំ និងនាយករដ្ឋមន្ត្រីម៉ាឡេស៊ី ដែលជាប្រធានអាស៊ានឆ្មាំ២០២៥ ក្ដី ប៉ុន្តែវិវាទព្រំដែនប្រទេសទាំងពីរ នៅតែគ្មានសញ្ញាបង្ហាញពីទីបញ្ចប់ ក្រោយភាគីថៃបន្តចោទប្រកាន់ និងទាមទារការទទួលខុសត្រូវពីកម្ពុជាលើបញ្ហាមីនតាមព្រំដែន រួមទាំងបញ្ហាមួយចំនួនទៀត៕
