តៃវ៉ាន់បង្ហាញការអរគុណ ខណៈចិនមិនសូវសប្បាយចិត្ត កាលពីថ្ងៃពុធ បន្ទាប់ពីលោកប្រធានាធិបតី ដូណាល់ ត្រាំ បានចុះហត្ថលេខាលើច្បាប់ដែលតម្រូវឱ្យក្រសួងការបរទេសអាមេរិក ត្រួតពិនិត្យជាប្រចាំ និងធ្វើបច្ចុប្បន្នភាពលើគោលការណ៍ណែនាំ អំពីទំនាក់ទំនងសហរដ្ឋអាមេរិកជាផ្លូវការជាមួយទីក្រុងតៃប៉ិ។
ទីភ្នាក់ងារសារព័ត៌រ៉យទ័រ(Reuters) បានរាយការណ៍នៅថ្ងៃ០៣ ខែធ្នូ ឆ្នាំ២០២៥នេះថា សហរដ្ឋអាមេរិក គឺជាអ្នកគាំទ្រអន្តរជាតិដ៏សំខាន់បំផុតរបស់តៃវ៉ាន់ បើទោះបីជាមិនមានទំនាក់ទំនងការទូតផ្លូវការក៏ដោយ ហើយបញ្ហានេះ គឺជាប្រភពតានតឹងនៅក្នុងទំនាក់ទំនងរវាងចិននិងអាមេរិក ដោយទីក្រុងប៉េកាំងចាត់ទុកកោះដែលមាននិន្នាការប្រជាធិបតេយ្យជារបស់ខ្លួន។
នៅក្នុងឆ្នាំ២០២១ ក្រោមរដ្ឋបាលដំបូង លោក ត្រាំ បន្ទាប់មក លោករដ្ឋមន្ត្រីការបរទេស មៃក ផំភីអូ (Mike Pompeo) បានដកការរឹតបណ្តឹងលើទំនាក់ទំនងរវាងមន្ត្រីអាមេរិក និងសមភាគីតៃវ៉ាន់របស់ពួកគេ ដែលដាក់ចេញ បន្ទាប់ពីទីក្រុងវ៉ាស៊ីនតោនបានទទួលស្គាល់ទីក្រុងប៉េកាំងក្នុងឆ្នាំ១៩៧៩។
ច្បាប់អនុវត្តការធានាតៃវ៉ាន់ ដែលលោក ត្រាំ បានចុះហត្ថលេខាកាលពីថ្ងៃអង្គារដោយនិយាយថា ក្រសួងការបរទេសអាមេរិក គួរតែពិនិត្យឡើងវិញនៃទំនាក់ទំនងជាមួយតៃវ៉ាន់ មិនតិចជាងមួយដង ក្នុងរយៈពេល៥ឆ្នាំម្តង។
អ្នកនាំពាក្យការិយាល័យប្រធានាធិបតីតៃវ៉ាន់ លោកស្រី ខារិន គួ (Karen Kuo) បាននិយាយនៅក្នុងសេចក្តីថ្លែងការណ៍មួយថា ច្បាប់នេះ‘‘បញ្ជាក់អំពីតម្លៃនៃទំនាក់ទំនងរវាងគ្នានឹងគ្នាជាមួយតៃវ៉ាន់ ដែលគាំទ្រទំនាក់ទំនងតៃវ៉ាន់ និងអាមេរិក កាន់តែជិតស្និទ្ធ ហើយក៏ជានិមិត្តសញ្ញាដ៏រឹងមាំតម្លៃរួមនៃលទ្ធិប្រជាធិបតេយ្យ សេរីភាព និងការគោរពសិទ្ធិមនុស្ស”។
នៅទីក្រុងប៉េកាំង អ្នកនាំពាក្យក្រសួងការបរទេសចិន លោក លីន ជាន(Lin Jian) បាននិយាយថា ‘‘ប្រទេសចិនប្រឆាំងដាច់ខាតរាល់ទម្រង់នៃទំនាក់ទំនងផ្លូវការរវាងសហរដ្ឋអាមេរិក និង “តំបន់តៃវ៉ាន់របស់ចិន”។
លោក លីន បាននិយាយថា សហរដ្ឋអាមេរិក គួរតែអនុវត្ត‘‘ដោយប្រុងប្រយ័ត្នជាទីបំផុតក្នុងការដោះស្រាយបញ្ហាតៃវ៉ាន់ ហើយបញ្ឈប់រាល់ទំនាក់ទំនងផ្លូវការរវាងអាមេរិកនិងតៃវ៉ាន់ និងមិនត្រូវបញ្ជូនសញ្ញាខុសណាមួយទៅកាន់កងកម្លាំងផ្តាច់ខ្លួន‘‘ឯករាជ្យតៃវ៉ាន់’’៕
