គិតមកត្រឹមដើមខែធ្នូ ឆ្នាំ២០២៥នេះ ថៃបានក្លាយជាប្រទេសទី៧ នៅលើពិភពលោក និងទី៥នៅតំបន់អាស៊ី ដែលបានចាត់វិធានការលើមេក្លោងឧក្រិដ្ឋកម្មតាមប្រព័ន្ធអ៊ីនធឺណិត និងបច្ចេកវិទ្យា គឺលោក ចេន ហ្ស៊ី។
យោងតាមការចុះផ្សាយរបស់កាសែត CNA ការិយាល័យប្រឆាំងការលាងលុយកខ្វក់របស់ប្រទេសថៃ បាននិយាយថា ចំណាត់ការនេះ បានធ្វើឡើងកាលពីថ្ងៃទី២ ខែធ្នូ ដោយរឹបអូសវត្ថុមានតម្លៃចំនួន ១០២ រួមមាន ដីធ្លី សាច់ប្រាក់ ទំនិញប្រណិតៗ និងគ្រឿងអលង្ការដែលជាកម្មសិទ្ធិរបស់ លោក ចេន ហ្ស៊ី សរុបទាំងអស់មានតម្លៃ ៣៧៣ លានបាត ឬស្មើនឹង ១១.៧ លានដុល្លារអាមេរិក។
លោក ចេន ហ្ស៊ី មហាសេដ្ឋីវ័យ៣៧ឆ្នាំ ដើមកំណើតចិន សញ្ជាតិជាតិខ្មែរ និងអង់គ្លេស មានតួនាទីជាទីប្រឹក្សាមេដឹកនាំត្រកូលហ៊ុនទាំងពីរជំនាន់ និងជាម្ចាស់ក្រុមហ៊ុនព្រីនស៍ គ្រុប ត្រូវបានប៉ូលីសអាំងទែប៉ូលអន្តរជាតិចេញដីកាតាមចាប់ខ្លួន ក្រោយត្រូវបានកំណត់មុខសញ្ញាថាជាមេគំនិត នៅក្នុងឧក្រិដ្ឋកម្មបច្ចេកវិទ្យា ដែលបានធ្វើប្រតិបត្តិការបោកប្រាស់ជនរងគ្រោះតាមប្រព័ន្ធអ៊ីធឺណិត ជួញដូរមនុស្ស លាងលុយកខ្វក់ និងបង្ខំមនុស្សឱ្យធ្វើការក្នុងឧស្សាហកម្មឆបោក ក្រោមឆ័ត្របុត្រសម្ព័ន្ធ ព្រីនស៍ ហូលឌីង គ្រុប (Prince Holding Group)។
ចាប់តាំងពីខែតុលា ឆ្នាំ២០២៥ ពោលគឺក្នុងរយៈពេលជាងពីរខែមកនេះ តាមទិន្នន័យដែលត្រូវបានផ្សាយជាសាធារណៈ លោក ចេន ហ្ស៊ី បានរងទណ្ឌកម្មដោយការរឹបអូសទ្រព្យសម្បត្តិពីប្រទេសចំនួន ៧ រួមមាន សហរដ្ឋអាមេរិក ចក្រភពអង់គ្លេស ប្រទេសសិង្ហបុរី តៃវ៉ាន់ កូរ៉េខាងត្បូង ថៃ និងហុងកុង ដែលជាតំបន់ស្វយ័តរបស់ប្រទេសចិន សរុបជាទឹកប្រាក់ក្នុងទំហំប៉ាន់ស្មានប្រមាណ ១៥.៨២ ពាន់លានដុល្លារ។
ការបង្កកទ្រព្យ និងរឹបអូសសម្បត្តិធ្វើឡើងតាមរយៈអចលនទ្រព្យ ដូចជា ដី ផ្ទះលំហែ គ្រឿងអលង្ការ រូបគំនូរ ទំនិញប្រណីតៗ យន្តហោះឯកជន នាវាទេសចរណ៍ឯកជន ហិរញ្ញវត្ថុធនាគារ និងរូបិយបណ្ណឌីជីថល។
ត្រឹមអាមេរិកម្នាក់ឯង បានបង្កករូបិយបណ្ណគ្រីបតូ លោក ចេន ហ្ស៊ី ដែលមានតម្លៃ ១៥ពាន់លានដុល្លារ ចក្រភពអង់គ្លេសបង្កកទ្រព្យសម្បត្តិ ១៣៣លានដុល្លារ ហុងកុងបង្កកលុយ ៣៥៣លានដុល្លារ តៃវ៉ាន់រឹបអូសលុយ ១៤៦លានដុល្លារ សិង្ហបុរី រឹបអូសលុយ ១១៤លានដុល្លារ កូរ៉េខាងត្បូងបង្កកហិរញ្ញវត្ថុធនាគារ ៦៤លានដុល្លារ និងចុងក្រោយគឺថៃរឹបអូសទ្រព្យសម្បត្តិ ១១.៧លានដុល្លារ។
លោកនាយករដ្ឋមន្ត្រីថៃ អានុធីន ឆានវីរៈគូន បានបញ្ជាក់បន្ថែមទៅកាន់សារព័ត៌មាននេះ អាជ្ញាធរថៃបានរឹបអូសទ្រព្យសម្បត្តិសរុបមានតម្លៃជាង ៣០០លានដុល្លារ ពីបុគ្គល ៤រូប ក្នុងនោះ ១១.៧លានដុល្លារពីលោក ចេន ហ្ស៊ី, ១៥លានដុល្លារ ពីសមាជិកព្រឹទ្ធសភាកម្ពុជា លោក កុក អាន និង២៩០លានដុល្លារ ពីជនជាតិថៃពីរនាក់ទៀត ដែលជាប់សង្ស័យក្នុងបណ្ដាញឧក្រិដ្ឋកម្មបច្ចេកវិទ្យានេះ។
ប៉ុន្តែ លោក អានុធីន មិនបានបញ្ជាក់ថា ប្រតិបត្តិការរឹបអូសនេះកើតឡើងនៅពេលណានោះទេ។
យ៉ាងណា ប្រទេសថៃ នាពេលថ្មីៗនេះ ត្រូវបានអ្នកឃ្លាំមើលសង្កេតឃើញថា ហាក់មានភាពសកម្មក្នុងការបោសសម្អាតឧក្រិដ្ឋកម្មតាមប្រព័ន្ធអ៊ីនធឺណិត ស្របគ្នានឹងចំណាត់ការរបស់អន្តរជាតិលើលោក ចេន ហ្ស៊ី ខណៈដែលកម្ពុជាកំពុងរងឥទ្ធិពលខ្លាំងក្លាពីចំណាត់ការនេះ ក្រោមរូបភាពរង្គោះរង្គើ ឈានដល់បិទធនាគារមួយចំនួន ដែលគេជឿថាបម្រើឱ្យឧក្រិដ្ឋកម្មទាំងនោះ ក្នុងនោះរួមមានធនាគារ ហួយវ័ន ផេ និងធនាគារ ផេនដា របស់លោក ហ៊ុន តូ ដែលជាដៃគូរកស៊ីជាមួយ លោក ចេន ហ្ស៊ី និងធនាគារព្រីនស៍ ដែលកំពុងមានពាក្យចចាមអារ៉ាមថា រំសាយបុគ្គលិក និងបិទធនាគារដែរ។
ប្រធានអង្គការប្រជាធិបតេយ្យខ្មែរ លោក ស៊ឹង សែនករុណា មើលឃើញថា ប្រទេសថៃកំពុងបង្ហាញមុខមាត់ទៅកាន់ពិភពលោកថា ខ្លួនមានឆន្ទៈបោសសម្អាតឧក្រិដ្ឋកម្មអនឡាញ ខណៈកម្ពុជាបែរជាមានសកម្មភាពតិចតួច មិនទាន់អាចឱ្យសហគមន៍អន្តរជាតិទុកចិត្តបាននៅឡើយ។ លោកបន្តថា ស្របពេលដែលកម្ពុជាកំពុងមានវិវាទព្រំដែនជាមួយថៃ ហើយក៏កំពុងត្រូវបានអន្តរជាតិមើលមកថា ជាមជ្ឈមណ្ឌលឆបោក រដ្ឋាភិបាលកម្ពុជាត្រូវបង្កើនការបោសសម្អាតឧក្រិដ្ឋកម្មអនឡាញឱ្យបានខ្លាំងក្លាជាងនេះ។
លោក ស៊ឹង សែនករុណា ថ្លែងថា៖ «ចង់មិនចង់ សង្គមអន្តរជាតិនៅតែដាក់គោលដៅមកកម្ពុជា នៅតែចាត់ទុកកម្ពុជាជាប្រទេសមួយដែលគ្រោះថ្នាក់សម្រាប់ប្រជាពលរដ្ឋគេ សម្រាប់ការធ្វើទំនាក់ទំនងការបរទេស ឬក៏នយោបាយសេដ្ឋកិច្ចពាណិជ្ជកម្មជាដើម។ អ៊ីចឹងផលប៉ះពាល់របស់ប្រទេសកម្ពុជាយើងហ្នឹង គឺនឹងបន្តនៅរយៈពេលវែង បើសិនជាចំណាត់ការណាមួយពីថ្នាក់ដឹកនាំស្ថាប័នពាក់ព័ន្ធនានា ទៅលើក្រុមឧក្រិដ្ឋជនហ្នឹង គេនៅតែមិនអាចទុកចិត្តបាន»។
ឧក្រិដ្ឋកម្មតាមប្រព័ន្ធអ៊ីនធឺណិត និងបច្ចេកវិទ្យា បានរីកដុះដាលពាសពេញអាស៊ីអាគ្នេយ៍ ដែលជារឿយៗមានប្រភពចេញពីប្លុកការិយាល័យ ឬឃ្លាំង ដែលក្រុមឧក្រិដ្ឋជនប្រើប្រាស់ដើម្បីធ្វើជាទីតាំង កំណត់គោលដៅលើអ្នកប្រើប្រាស់អ៊ីនធឺណិតនៅជុំវិញពិភពលោក។ ក្រុមឧក្រិដ្ឋជន បានជ្រើសរើសយកប្រទេសដែលមាននីតិរដ្ឋខ្សោយ និងអំពើពុករលួយ ដើម្បីតាំងទីធ្វើជាមូលដ្ឋានឆបោក ជាក់ស្ដែងកម្ពុជា ដែលអន្តរជាតិ កំពុងសម្លឹងមើលមកថាជាមជ្ឈមណ្ឌលឆបោកធំមួយនៅអាស៊ីអាគ្នេយ៍៕
