ក្រោយមានការរិះគន់ថា រដ្ឋាភិបាលបច្ចុប្បន្ន រក្សាទុកមន្ត្រីសំពីងសំពោង បង្កើនបន្ទុកដល់ពលរដ្ឋដែលកំពុងជួបវិបត្តិបំណុលនោះ អ្នកនាំពាក្យរដ្ឋាភិបាល លោក ប៉ែន បូណា បានចេញការពារ ដោយទាញការចាប់អារម្មណ៍ ពីការរីកចម្រើនក្រោមការដឹកនាំរបស់រដ្ឋាភិបាលក្បាលធំជាងខ្លួននេះ។
ក្នុងពិធីមួយនៅសកលវិទ្យាល័យមេគង្គកម្ពុជា នាព្រឹកថ្ងៃទី៤ ខែធ្នូ ឆ្នាំ២០២៥ ប្រធានអង្គភាពអ្នកនាំពាក្យ រដ្ឋាភិបាល លោក ប៉ែន បូណា និយាយថា ថ្មីៗមានការជជែកគ្នាលើបណ្តាញសង្គម ពីការកែទម្រង់រដ្ឋបាលសាធារណៈ ដែលនិយាយពីរដ្ឋាភិបាលកម្ពុជា ខ្លួនតូច ក្បាលធំ ។
លោកថា ការពិភាក្សានោះ បានលើកឡើងថា ប្រទេសកម្ពុជាតូច តែមានក្រសួងច្រើន មន្ត្រីច្រើន បើធៀបទៅនឹងប្រទេសជិតខាង។
សម្រាប់លោក ប៉ែន បូណា រដ្ឋាភិបាលពិតជាបានរក្សាទុកក្រសួង និងមន្ត្រីបែបនេះមែន ប៉ុន្តែថា សូមសម្លឹងមើលពីសមទ្ធិផលដ៏ច្រើន ដែលបានកសាងឡើងពីរដ្ឋាភិបាលក្បាលធំខ្លួនតូចនេះ បើធៀបនឹងការដែលកម្ពុជាងើបពីសង្គ្រាម។
ក្នុងន័យនេះ លោកថា សូមឱ្យសាធារណជនសម្លឹងមើលពីការលំបាករបស់រៀមច្បង ពិសេសមេដឹកនាំបក្សកាន់អំណាចដែលបានតស៊ូលំបាក រហូតពលរដ្ឋមានហូបចុកគ្រប់គ្រាន់ និងការរីកចម្រើនទាំងវិស័យសេដ្ឋកិច្ច និងនយោបាយ ដែលថាកើតចេញពីការលះបង់របស់ថ្នាក់ដឹកនាំ ដែលគេថាខ្លួនតូចក្បាលធំនេះ។
លោកថា៖ «ទម្រាប់យើងមានសាលារៀនល្អ យើងមានមធ្យោបាយធ្វើដំណើរ យើងមានអាហារហូបចុកគ្រប់គ្រាន់ ភ្នំពេញយើងជិះចម្អៀតរកកន្លែងធ្វើដំណើរសឹងមិនបានដូចសព្វថ្ងៃ អាហ្នឹងជាផ្លែផ្កា វាកើតចេញពីរាជរដ្ឋាភិបាលដែលយើងកំពុងគិតថាខ្លួនតូចក្បាលធំនេះ។ ហើយនរណាជាស្ថាបត្យករក្នុងការចាត់ចែងរឿងហ្នឹង គឺសម្តេចតេជោ ហ៊ុន សែន ។ អីចឹងអាហ្នឹងឱ្យឃើញបានយើងដឹងថា មានតម្លៃយ៉ាងម៉េច គឺមានតម្លៃមួយដែលមិនអាចកាត់ថ្លៃបាន»។
ទោះជា លោក ប៉ែន បូណា មិនបាននិយាយចំឈ្មោះថាភាគីណាពិតប្រាកដ ប៉ុន្តែគេឃើញលើបណ្តាញសង្គមប៉ុន្មានសប្តាហ៍មកនេះ ក្រុមអ្នកប្រើប្រាស់បណ្តាញសង្គមបានចែករំលែកតគ្នា ជុំវិញការចែករំលែករបស់លោក ឱក សេរីសោភក្តិ៍ អ្នកឯកទេសអភិបាលកិច្ច បានពន្យល់នៅពេលធ្វើបាឋកថា ស្តីពីកំណែទម្រង់រដ្ឋបាលសាធារណៈកម្ពុជា កាលពីពេលថ្មីៗនេះ។
បើយោងតាមវីដេអូចែករំលែកនោះ លោក ឱក សេរីសោភក្តិ៍ បានធ្វើការប្រៀបធៀបប្រទេសវៀតណាម និងប្រទេសថៃ មានពលរដ្ឋច្រើនជាងកម្ពុជា តែគេមានក្រសួងតិចជាងកម្ពុជា។ លោកថា ការរក្សាទុកក្រសួងច្រើននិងមន្ត្រីច្រើន ជាបន្ទុកចំណាយរបស់ពលរដ្ឋ រួមទាំងលោកដែលជាអ្នកធ្វើបាឋកថានេះផងដែរ។
លោកថា៖ «ហេតុអីបានជាយើងថ្លើមធំពាសមេឃម៉េះ បានជាហ៊ាននិយាយដល់រឿង ដែលគេចាត់ទុកថាអាហ្នឹងជារឿងរបស់រាជរដ្ឋាភិបាលទេ មិនអីចឹង។ ប៉ុន្តែខ្ញុំថាអត់ទេ មិនមែនរឿងរបស់រដ្ឋាភិបាលទេ គឺរឿងរបស់យើងទាំងអស់គ្នា ព្រោះយើងបង់លុយឱ្យរាជរដ្ឋាភិបាល ដើម្បីធ្វើរឿងទាំងអស់ហ្នឹង ទៅតាមពន្ធ ពន្ធខ្លះយើងមើលឃើញ ពន្ធខ្លះយើងមើលអត់ឃើញ ប៉ុន្តែគិតតែពីបង់ហើយមួយខែទៅមួយខែ»។
បើតាមបទបង្ហាញនោះ ប្រទេសវៀតណាម មានពលរដ្ឋ១០០លាននាក់ នៅក្នុងឆ្នាំ២០២៥នេះ បានកាត់បន្ថយក្រសួងពី២០មកត្រឹម១៤ក្រសួង ខណៈកម្ពុជាមានពលរដ្ឋជាង១៧លាននាក់ មានក្រសួងដល់ទៅ២៨ក្រសួង។ ចំណែកប្រទេសថៃមានប្រជាពលរដ្ឋ ៧១លាននាក់ មានក្រសួងចំនួន២០ ។
យ៉ាងណា លោក ឱក សេរីសោភក្តិ៍ ក៏បានកោតសរសើរពីការខិតខំប្រឹងប្រែងរបស់អតីតរដ្ឋមន្ត្រីក្រសួងមហាផ្ទៃ លោក ស ខេង ដែលថា ជិត៣០ឆ្នាំមកនេះបានប្រឹងជម្នះអនុវត្តកំណែទម្រង់រដ្ឋបាលសាធារណៈ ដែលគេហៅថា លើកកម្ពស់អភិបាលកិច្ចនៅថ្នាក់មូលដ្ឋាន រហូតបង្កើតបានច្រកចេញចូលតែមួយ។
លោកថា៖ «មួយទៀត ដែលខ្ញុំសរសើរហើយដែលខ្ញុំចូលរួមផ្ទាល់នៅក្នុងហ្នឹង គឺលំបាកលំបិនមែនទែន ប៉ុន្តែធ្វើបានបាទ គឺសម្តេចក្រឡាហោម ស ខេង ជម្នះ ប្រសិនគ្មានគាត់ធ្វើអត់បានទេ ឆន្ទៈនយោបាយខ្ពស់ខ្លាំងណាស់។ ប៉ុន្តែវេទនាដូចអូសឫស្សីបញ្ច្រាសចុងអីចឹង សឹងថា២០ជាងគើមៗ ប៉ុន្តែបានទៅរួច គឺច្រកចេញចូលតែមួយ»។
លើសពីនេះ ក៏មានការរិះគន់ផងដែរពីការដែលរដ្ឋសភាបានអនុម័តកញ្ចប់ថវិកាជាតិឆ្នាំ២០២៦ កើនឡើងជាង៧ដង ចំពេលដែលរដ្ឋាភិបាលអោបក្រសោបមន្ត្រីសំពីងសំពោង ខណៈពលរដ្ឋកំពុងតែជួបវិបត្តិគ្រួសារ ហើយរស់នៅញាំញីដោយវិបត្តិបំណុល។
លោក អ៊ូ ច័ន្ទរ័ត្ន អតីតតំណាងរាស្ត្រគណបក្សប្រឆាំង និងជាស្ថាបនិកកែទម្រង់កម្ពុជា ធ្លាប់ប្រាប់វីអូឌីថា ការកាត់បន្ថយចំនួនមន្ត្រី គឺជាការកាត់បន្ថយបន្ទុកយ៉ាងធ្ងន់របស់ប្រជាពលរដ្ឋ។ លោកថា ការចំណាយទាំងអស់របស់រដ្ឋាភិបាល គឺសុទ្ធតែជាលុយដែលប្រជាពលរដ្ឋបានបង់ពន្ធ ។
លោកថា៖ «បើនៅតែបន្តបែបនេះ យើងគួរតែខ្មាស់ប្រជាពលរដ្ឋខ្មែរសាមញ្ញ អ្នកក្រីអ្នកក្រអីជាដើមហ្នឹង ខំបំពេញកិច្ចការហើយទទួលបន្ទុកត្រូវបង់ប្រាក់ខែទៅមន្ត្រីអស់ហ្នុងទៀត»។
ប៉ុន្មានឆ្នាំចុងក្រោយនេះ ក្រោយគណបក្សកាន់អំណាចរំលាយគណបក្សប្រឆាំង ចេញពីឆាកនយោបាយ និងវាយបំបែកកញ្ចក់សង្គម តាមរយៈធ្វើច្បាប់កម្រិតសិទ្ធិអង្គការសង្គមស៊ីវិល បើកយុទ្ធនាការកម្ចាត់សារព័ត៌មានឯករាជ្យដែលជាតួអង្គជំរុញតម្លាភាពសង្គមដ៏ស្មោះត្រង់នោះ សមទ្ធិផលជាច្រើនរបស់គណបក្សកាន់អំណាច ត្រូវបានរកឃើញថា ប្រទាក់ក្រឡាគ្នាដោយអំពើពុករលួយ ហើយរុញកម្ពុជាឱ្យក្លាយជាជម្រកពួកឧក្រិដ្ឋជន ក្រោយរដ្ឋាភិបាលរក្សាទុកមន្ត្រីសំពីងសំពោងនេះ។
ឧកញ៉ា ហ៊ុន តូ ក៏ត្រូវបានក្រុមហ៊ុនវិភាគកាក់ឌីជីថល Elliptic ដែលមានមូលដ្ឋាននៅប្រទេសអង់គ្លេស បានរកឃើញថា កំពុងរកស៊ីខ្មៅងងឹត ក្រោមឈ្មោះក្រុមហ៊ុន ហួយ អាដេ គ្រុប ដោយប្រព្រឹត្តិអំពើលាងលុយកខ្វក់ និងចាប់ជំរិតតាមអនឡាញ។ ដោយឡែក កាស៊ីណូ WM នៅក្រុងព្រះសីហនុ ដែលមានបណ្តាញនឹងឧកញ៉ា ហ៊ុន តូ ក៏ត្រូវបាន វីអូឌី រកឃើញថា មានជាប់ពាក់ព័ន្ធប្រតិបត្តិការល្បែងអនឡាញខុសច្បាប់ផងដែរ។
បន្ថែមលើនេះ អាមរិក និងអង់គ្លេស កាលពីថ្ងៃទី១៤ ខែតុលា ឆ្នាំ២០២៥ រួមគ្នាដាក់ទណ្ឌកម្មបង្កកទ្រព្យសម្បត្តិក្រុមហ៊ុនព្រីនស៍ឧកញ៉ា ចេន ហ្ស៊ី ទីប្រឹក្សា លោក ហ៊ុន សែន ចំនួន ១៥ពាន់លានដុល្លារ ព្រមទាំងចេញដីកាចោទប្រកាន់ ជុំវិញការឆបោកតាមអនឡាញ លាងលុយកខ្វក់ និងបង្ខាំងមនុស្សខុសច្បាប់ ដែលប្រឈមជាប់ពន្ធនាគារ៤០ឆ្នាំ។
ជាងនេះទៀត មនុស្សជំនិតៗនៅជុំវិញលោក ហ៊ុន សែន រួមមាន ឧកញ៉ា លី យ៉ុងផាត់ ឧកញ៉ា កុក អាន និងឧកញ៉ា ទ្រី ភាព ជាដើម សុទ្ធតែជាប់ឈ្មោះក្នុងទណ្ឌកម្ម ឬបញ្ជីខ្មៅអាមេរិក ជុំវិញបទឧក្រិដ្ឋឆបោក និងការរំលោភសិទ្ធិមនុស្ស។
ជុំវិញបញ្ហានេះ ស្ថាប័នអន្តរជាតិជាច្រើន បានលើកឡើងថា រដ្ឋាភិបាលកម្ពុជា ទំនងជាមិនអាចកម្ទេច និងទប់ស្កាត់ឧស្សាហកម្មឆបោកតាមអ៊ីនធឺណិត ប្រកបដោយប្រសិទ្ធភាពបាននោះទេ ដោយសារតែឥស្សរជននយោបាយជាន់ខ្ពស់សំខាន់ៗរបស់រដ្ឋាភិបាល និងគណបក្សប្រជាជនជាប់ពាក់ព័ន្ធដោយត្រង់ និងដោយប្រយោលជាមួយឧស្សាហកម្មកខ្វក់នេះ៕
