អ្នកជំនួញជនជាតិម៉ាឡេស៊ីម្នាក់ ដែលអះអាងថា បានរត់គេចខ្លួនពីការគ្រប់គ្រងនៃក្រុមឧក្រិដ្ឋជនឆបោក ក្នុងប្រទេសកម្ពុជា បានដាក់ពាក្យបណ្តឹងទៅប៉ូលីស ម៉ាឡេស៊ី និងអះអាងថា នៅមានមនុស្សចំនួន ៧០០នាក់ផ្សេងទៀត កំពុងស្ថិតក្នុងដៃពួកគេឧក្រិដ្ឋជននៅឡើយ ។
សារព័ត៌មាន ដឹស្ត្រេតថាមស៍ បានចេញផ្សាយនៅថ្ងៃទី០៤ ខែធ្នូ ឆ្នាំ២០២៥នេះថា លោក មហាម៉ាត់ យ្យ៉ាហ្វីក ភូបាឡាន់ (Muhammad Syafiq Pubalan) មានអាយុ ៤០ឆ្នាំ និយាយថា មនុស្សជាច្រើនកំពុងប្រឈមនឹងការធ្វើទារុណកម្មនៅក្នុងការបង្ខាំង។ លោកបន្ថែមថា ជនរងគ្រោះមានអាយុចាប់ពី ១៧ឆ្នាំទៅ ៣៥ឆ្នាំ ត្រូវបានគេវាយដុំជាញឹកញាប់ ហើយលោកក៏ត្រូវបានគេវាយធ្វើបាបជារៀងរាល់ថ្ងៃ អំឡុងពេលសប្តាហ៍ដំបូងដែលលោកនៅទីនោះ។
លោកបន្តថា៖ «ពួកគេនឹងវាយស្រ្តីជាមួយនឹងខ្សែក្រវ៉ាត់។ ខ្ញុំបានឮទៀតថា នារីជនរងគ្រោះត្រូវបានមនុស្ស ១១នាក់ ចាប់រំលោភ បន្ទាប់ពីម្តាយរបស់នាងបានរាយការណ៍ទៅប៉ូលីស។ ខ្ញុំក៏ត្រូវបានគេបង្ខំឱ្យហូបសាច់ជ្រូក២ទៅ៣ដងដែរ ហើយប្រសិនបើខ្ញុំមិនធ្វើតាមទេ ពួកគេនឹងវាយធ្វើបាបយើង»។
លោកបានបន្ថែមទៀតថា៖ «ពួកគេបានឱ្យទូរសព្ទមកខ្ញុំអំឡុងពេលខ្លី ហើយខ្ញុំបានប្រើដើម្បីខលទៅប្រពន្ធខ្ញុំ។ ទោះជាការខលរបស់ខ្ញុំ ត្រូវបានត្រួតពិនិត្យក៏ដោយ»។
លោកបន្តថា លោកស្នាក់នៅសណ្ឋាគារជាមួយមិត្តរួមបន្ទប់ដែលជាជនជាតិម៉ាឡេស៊ីចំនួន ៨នាក់។
លោក មហាម៉ាត់ យ្យ៉ាហ្វីក(Muhammad Syafiq) បាននិយាយថា មិត្តម្នាក់ដែលលោកបានស្គាល់រយៈពេល១២ឆ្នាំ បានជំរុញឱ្យលោកបើកហាងម៉ាឡេស៊ីមួយ នៅប្រទេសកម្ពុជា ដោយសារនៅទីនោះមិនមាន។
លោកបានប្រាប់សន្និសីទសារព័ត៌មាន ដែលរៀបចំដោយសមាគមមូស្លីមម៉ាឡេស៊ី (PPIM)ថា ដោយការជឿជាក់លើ‘‘មិត្ត’’ លោកបានធ្វើដំណើរពីអាឡូ សេតា(Alor Setar) ទៅបាងកក ជាកន្លែងដែលអ្នកបើកបរនាំលោកមកប្រទេសកម្ពុជា។
លោកថា៖ «ពួកគេបានវៀងផ្លូវធម្មតា ដូច្នេះខ្ញុំមិនដឹងថាត្រូវត្រឡប់ទៅវិញដោយរបៀបណានោះទេ។ ប៉ូលីសថៃក៏បានពាក់ព័ន្ធផងដែរ នៅក្នុងទីក្រុងភ្នំពេញ ខ្ញុំបានឃើញក្រុងតូចៗ ហើយនឹងកាស៊ីណូ ដោយមានទាហានបានយាមកាមកន្លែងការងាររបស់ខ្ញុំ»។
លោកនិយាយទៀតថា ពួកគេប្រាប់យើងឱ្យបោកប្រាស់មនុស្ស តាមរយៈការហៅទូរសព្ទ ហើយលោកបានឃើញជនជាតិម៉ាឡេស៊ីចំនួនប្រហែល ៧០០នាក់នៅទីនោះ។
ការគេចខ្លួនរបស់ លោក មហាម៉ាត់ យ្យ៉ាហ្វីក (Muhammad Syafiq) កើតឡើងបន្ទាប់ពីភរិយារបស់លោក បានបង្ហោះវីដេអូអំពីទុក្ខលំបាករបស់លោក និងបកអាក្រាតអំពីមិត្តរបស់លោកផងដែរ។ តាមរយៈការគ្រប់គ្រងការខលទូរសព្ទ លោកស្រីបានស្នើឱ្យមិត្តរបស់ប្តីលោកស្រីនាំប្តីរបស់លោកស្រីមកវិញ ដោយពួកគេឱ្យលោកស្រីបង់លុយចំនួន ៦០០០ រីងហ្គីត ដែលលោកស្រីមិនអាចបង់បាន។
លោកស្រីបានប្រាប់ទៅកាន់ទីភ្នាក់ងារថា លោកស្រីបានដាក់របាយការណ៍ទៅប៉ូលីស ២ថ្ងៃ ក្រោយពួកគេបានដោះលែងប្តីលោកស្រីឱ្យត្រឡប់វិញ។
សន្និសីទសារព័ត៌មានដែលរៀបចំដោយសមាគមមូស្លីមម៉ាឡេស៊ី បានជំរុញឱ្យអាជ្ញាធរចាប់ខ្លួនទីភ្នាក់ងារនេះ និងធានាឱ្យមានការដោះលែងជនជាតិម៉ាឡេស៊ីចំនួនប្រហែល ៧០០នាក់នោះ៕
