រដ្ឋាភិបាលថៃ ទម្លាយថា តុលាការព្រហ្មទណ្ឌរបស់ខ្លួន បានចេញដីកាតាមចាប់ឧក្រិដ្ឋជនពីរនាក់ ក្នុងនោះមានទាំង ឈ្មោះ យឹម លក្ខណ៍ ជាទីប្រឹក្សាលោក ហ៊ុន សែន ដោយចោទថា ជាប់ពាក់ព័ន្ធឧក្រិដ្ឋកម្មឆបោក និងលាងលុយកខ្វក់ ខណៈជាបន្តបន្ទាប់ថៃបានបង្ហាញពីចំណាត់ការដូចគ្នានេះ ក្រោយមានជម្លោះព្រំដែនជាមួយកម្ពុជា។
ការណ៍នេះ អ្នកតាមដានស្ថានការណ៍នយោបាយកម្ពុជា ទទូចឱ្យរដ្ឋាភិបាលប្រើកណ្តាប់ដៃដែក ចាត់វិធានការជាបន្ទាន់ ដើម្បីស្តារមុខមាត់កម្ពុជា និងសង្រ្គោះប្រជាជាតិកម្ពុជាពីបញ្ហាបទឧក្រិដ្ឋកម្មនេះ ដើម្បីកុំឱ្យភាគីថៃបន្តយកលេសនេះ ដាក់សម្ពាធពីបញ្ហាព្រំដែន ខណៈថៃចង់សម្រេចផែនការលេបទឹកដីខ្មែរ តាមផែនទីខ្នាត១លើ៥០ពាន់ ដែលថៃគូដោយខ្លួនឯង ដែលលោក ហ៊ុន សែន ហៅថៃផែនទីចោរ។
កាលពីថ្ងៃទី៤ ខែធ្នូ ឆ្នាំ២០២៥ សារព័ត៌មាន Thai PBS និង The Nation ចុះផ្សាយថា តុលាការថៃបានសហការជាមួយការិយាល័យប្រឆាំងការលាងលុយកខ្វក់ ចេញដីកាចាប់ខ្លួនមនុស្សបន្ថែមទៀតឈ្មោះ យឹម លក្ខណ៍ និងភរិយាជាជនជាតិថៃ បានគប់គិតជាមួយ លោក បេន ស្មីត រកស៊ីឆបោក និងលាងលុយកខ្វក់ ប្រតិបត្តិការឆ្លងដែនក្នុងប្រទេសថៃ។
ប្រភពនិយាយថា លោក យឹម លក្ខណ៍ ជាប្រធានក្រុមហ៊ុន B.I.C របស់កម្ពុជា និងជាទីប្រឹក្សាលោក ហ៊ុន សែន ជាមួយនឹងលោក បេន ស្មីត កាន់លិខិតឆ្លងដែនការទូតកម្ពុជា រកស៊ីឆបោក ទិញឡានទំនើបៗជាង ៤លានដុល្លារក្នុងប្រទេសថៃ។
ប្រភពបញ្ជាក់ថា លោក បេន ស្មីត គឺជាមេខ្លោងឧក្រិដ្ឋកម្មឆបោក បានបង្កើតមជ្ឈមណ្ឌល Call Centre (ឆបោកតាមអនឡាញ) ដែលមានសញ្ជាតិខ្មែរ អាហ្វ្រីកខាងត្បូង បានប្រព្រឹត្តិបទល្មើសឆបោក និងលាងលុយ បង្កផលប៉ះពាល់ដល់សន្តិសុខក្នុងតំបន់ និងពិភពលោកផងដែរ។
វិធានការរបស់ថៃនេះ មិនមែនលើកជាទី១ទេ ជាក់ស្តែងថ្មីៗកាលថ្ងៃទី៣ ខែធ្នូនេះ សារព័ត៌មានថៃជាច្រើន មានទាំង ខាវសុត និង The Nation បានចុះផ្សាយថា នាយករដ្ឋមន្រ្តីថៃ លោក អនុធិន ចាន់វីរៈគុណ និងការិយាល័យប្រឆាំងការលាងលុយកខ្វក់ AMLO បានប្រកាសរឹបអូស និងបង្កកទ្រព្យសម្បត្តិ របស់លោក ចេន ហ្ស៊ី និងឧកញ៉ា កុក អាន ជាសមាជិកព្រឹទ្ធសភាកម្ពុជា ដោយសំអាងពីការរកឃើញថា ពួកគេមានជាប់ពាក់ព័ន្ធឧក្រិដ្ឋកម្មឆបោកឆ្លងដែន និងបទឧកក្រិដ្ឋលាងលុយកខ្វក់។
ប្រភពបន្តថា AMLO បានរកឃើញប្រតិបត្តិការក្លែងបន្លំតាមអ៊ីនធឺណិត ការជួញដូរមនុស្ស និងការលាងលុយឌីជីថល ដោយបានរឹបអូសទ្រព្យសម្បត្តិ មាន១0២មុខទំនិញ រួមទាំងដីធ្លី សាច់ប្រាក់រាប់លានបាត រថយន្តទំនើបៗ និងគ្រឿងអលង្ការប្រណីតៗ ដែលមានតម្លៃប្រហែល ៣៧៣ លានបាត ឬប្រមាណជាង ១១លានដុល្លារអាមេរិក។
ប្រភពនិយាយថា លោក កុក អាន និងសាច់ញាតិរបស់គាត់ ៤នាក់ទៀត បានប្រើប្រាស់គណនីបោកប្រាស់ដែលមានការផ្ទៀងផ្ទាត់ស្កេនមុខ និងលាងលុយកខ្វក់ប្រតិបត្តិការចូលទៅក្នុងអចលនទ្រព្យថៃ។
ប្រភពបញ្ជាក់ថា លោក កុក អាន ម្ចាស់ក្រុមហ៊ុន Crown Casino បានយកអគារ Crown Casinoប្រព្រឹត្តិអំពើឆបោកតាមប្រព័ន្ធអនឡាញ (Call Centre) ដើម្បីឆបោកជនបរទេស រួមទាំងជនជាតិថៃ។
គួររំឭកថា កាលពីថ្ងៃទី៣០ ខែមេសា ឆ្នាំ២០២៤ ព្រះមហាក្សត្របានចេញព្រះរាជក្រឹត្យត្រាស់បង្គាប់ តែងតាំង លោក យឹម លក្ខណ៍ និងលោក បេន ស្មីត ជាទីប្រឹក្សាផ្ទាល់លោក ហ៊ុន សែន ប្រធានព្រឹទ្ធសភាកម្ពុជា។
ជុំវិញរឿងនេះ អ្នកនាំពាក្យគណបក្សប្រជាជនកម្ពុជា លោក ជា ធារិទ្ធ ធ្លាប់ប្រាប់VODថា រដ្ឋាភិបាលដឹកនាំដោយគណបក្សប្រជាជនកម្ពុជា មិនខ្វល់នឹងការបង្កកឬរឹបអូសទ្រព្យសម្បត្តិ ពីសំណាក់ភាគីថៃនោះទេ។
ម្យ៉ាងវិញទៀត លោកថា ថៃគ្មានដែនសមត្ថកិច្ចណា មកហ៊ានចាប់មន្រ្តីរបស់រដ្ឋាភិបាលកម្ពុជានោះដែរ។
លោកថា៖ «ថៃចង់ប្រកាសធ្វើអីធ្វើអីស្រេចតែចិត្តគេទៅ យើងកុំខ្វល់ទេ ព្រោះអីវាគ្មានអីពាក់ព័ន្ធ ឬក៏គ្មានដែនសមត្ថកិច្ចអីមកលើតុលាការ ឬក៏យុទ្ធធិកាអីនៅក្នុងប្រទេសកម្ពុជា ឬក៏ពាក់ព័ន្ធនឹងប្រទេសកម្ពុជារបស់យើងទេ ព្រោះអាហ្នឹងជាល្បែងរបស់គេទេ យើងទៅខ្វល់អី»។
ជុំវិបញ្ហានេះ អនុប្រធានគណបក្សឆន្ទៈខ្មែរ លោក សុន ឆៃ ប្រាប់VODនៅថ្ងៃទី៥ ខែធ្នូនេះថា វាល្មមដល់ពេលរដ្ឋាភិបាលគួរប្រើកណ្តាប់ដៃដែក បង្រ្កាបពួកឧក្រិដ្ឋជនធំៗ ដែលអន្តរជាតិរកឃើញបន្តបន្ទាប់នេះ។
លោកថា បញ្ហាឧក្រិដ្ឋកម្មនេះ សហរដ្ឋអាមេរិក អង់គ្លេស កូរ៉េខាងត្បូង រួមទាំងថៃ បានបង្ហាញភស្តុតាងច្បាស់ហើយ ដូច្នេះរដ្ឋាភិបាលគួរមានវិធានការចាប់ខ្លួន លោក ចេន ហ្ស៊ី លោក បេន ស្មីត និងបុគ្គលមួយចំនួនទៀត ដើម្បីស្តារមុខមាត់កម្ពុជា និងលាងជម្រះមន្ទិលសង្ស័យរបស់មហាជនផងដែរ។
លោកថា៖ «យើងដឹងហើយថាលោក ចេន ហ្ស៊ី លោក បេន ស្មីត គឺត្រូវបានសហគមន៍អន្តរជាតិនោះរកឃើញ និងមានភស្តុតាងគ្រប់គ្រាន់ពីការរកស៊ីខុសច្បាប់ ការលាងលុយកខ្វក់ និងការរកស៊ីឆបោកតាមប្រព័ន្ធអនឡាញអីជាដើម ដូច្នេះយើង កម្ពុជាហ្នឹងគឺមានការទទួលរងធ្ងន់ធ្ងរជាងគេ ដោយសារករណីលោក ចេន ហ្ស៊ី នេះគឺមានស្ថិតនៅក្នុងទីតាំងធំ បណ្ដាញធំ ចាត់ចែង រកស៊ីបោកប្រាស់តាមប្រព័ន្ធអនឡាញរបស់ ចេន ហ្ស៊ី នេះនៅភ្នំពេញ ប្រទេសកម្ពុជា ដូច្នេះការពាក់ព័ន្ធជាមួយមន្ត្រីតូចធំនៅក្នុងស្រុកខ្មែរប៉ុណ្ណានោះ ក៏ជាបញ្ហាមួយដែរ ដែលត្រូវបុគ្គលដែលត្រូវបានចោទប្រកាន់ ត្រូវបកស្រាយយ៉ាងដូចម្តេចឱ្យអន្តរជាតិគេទទួល»។
ចំណែក នាយកកម្មវិធីតស៊ូមតិរបស់អង្គការប្រជាធិបតេយ្យខ្មែរមានមូលដ្ឋាននៅអូស្ត្រាលី លោក សេង វណ្ណលី និយាយថា ការប្រកាសតាមចាប់ខ្លួនមនុស្សជំនិតលោក ហ៊ុន សែន មិនមែនជាលើកទី១ទេ។
លោកថា តុលាការថៃ និងអាជ្ញាធរថៃ ធ្លាប់ចេញដីកាតាមចាប់ខ្លួន និងរឹបអូសទ្រព្យសម្បត្តិរាប់លានដុល្លារ លោក លី យ៉ុងផាត់ និងលោក កុក អាន ជាប់ពាក់ព័ន្ធឧក្រិដ្ឋកម្មឆបោក និងលាងលុយកខ្វក់។
លោកបន្តថា ពួកឧក្រិដ្ឋជនឆបោក លាងលុយ ចាប់ជំរិត និងជួញដូរមនុស្ស ភាគច្រើនជាមនុស្សស្និទ្ធនឹងមេដឹកនាំកម្ពុជា ដូច្នេះរដ្ឋាភិបាលឯកបក្ស មិនហ៊ានចាប់វិធានការទេ ព្រោះវាប៉ះពាល់អំណាចខ្លួន។
លោកសង្កត់ធ្ងន់ថា បញ្ហាឧក្រិដ្ឋកម្មឆបោក ចាប់ជំរិត និងលាងលុយកខ្វក់នៅកម្ពុជា វាក្លាយជាជំងឺរ៉ាំរ៉ៃសង្គមយូរហើយ ក្រោមការដឹកនាំរបស់បក្សកាន់អំណាច ព្រោះកម្ពុជាគ្មានប្រព័ន្ធត្រួតពិនិត្យអំណាច។
លោកថា៖ «ដោយសាររបបភ្នំពេញការពារឧក្រិដ្ឋជនមកដល់ពេលនេះ អត់មានការស៊ើបអង្កេតចាប់ឧក្រិដ្ឋជន ដែលសហរដ្ឋអាមេរិក ក៏អង្គការប្រជាជាតិដាក់ក្នុងបញ្ជីខ្មៅទេ ដូចជា លោក ហ៊ុន តូ លោក លី យ៉ុងផាត់ លោក កុក អាន ព្រីនគ្រុប លោក ចេន ហ្ស៊ី ហើយឥឡូវនៅថៃគេចាប់ផ្តើមចាត់វិធានការបន្ថែមលើ លោក បេន ស្មីត ដែលកាន់សញ្ជាតិខ្មែរហើយកាន់ប៉ាស្ព័រការទូតខ្មែរទៀត»។
សម្រាប់ លោក វណ្ណលី ការដឹកនាំប្រទេសក្រាញអំណាច កម្ចាត់ដៃគូរប្រគួត សម្លាប់ប្រជាធិបតេយ្យ រំលោភសិទ្ធិមនុស្ស ចៀសមិនផុតពីនាំប្រទេសជាតិ ធ្លាក់ក្នុងរណ្តៅនៃពួកឧក្រិដ្ឋជន បង្កអស្ថេរភាពសង្គម គ្រោះថ្នាក់ដល់សង្គមជាតិប្រជារាស្រ្ត និងបង្កហានិភ័យដល់ប្រទេសក្នុងតំបន់និងពិភពលោក។
យ៉ាងនេះក្តី លោកនៅតែទទូចឱ្យរដ្ឋាភិបាលកម្ពុជា ក្រោមការដឹកនាំរបស់គ្រួសារហ៊ុន គួរភ្ញាក់រលឹកឡើងវិញស្តារមុខមាត់កម្ពុជា បង្រ្កាបឧក្រិដ្ឋជនទាំងនោះ ទុកថា ដើម្បីសង្គមជាតិ និងប្រជារាស្រ្តខ្មែរទៅចុះ។
លោកថា៖ «សំបុកឧក្រិដ្ឋជន គឺនៅផ្ទៃក្នុងតែម្ដងនៅតាមស្ថាប័នធំៗរបស់រដ្ឋ នៅក្នុងជួរគណបក្សនៅក្នុងជួរឥស្សរជននយោបាយរបស់គណបក្ស ដូច្នេះបើចាត់ការឲ្យមានប្រសិទ្ធភាព ទាល់តែចាត់ការឥស្សរជននយោបាយជាន់ខ្ពស់របស់ខ្លួន ហើយជារឿងដែលមជ្ឈដ្ឋានតំបន់ ជាពិសេសថៃនិងអន្តរជាតិមើលឃើញថាកម្ពុជាមិនអាចធ្វើបាន ហើយដរាបណាកម្ពុជាមិនអាចធ្វើបាន វាជាចំណុចខ្សោយដែលត្រូវបានគេយកមកប្រើប្រាស់ ជាពិសេសថៃក្នុងកាលៈទេសៈពេលនេះ ប្រទេសកម្ពុជានិងថៃលើបញ្ហាព្រំដែន»។
ជិត១០ឆ្នាំមកនេះ ពោលគឺក្រោយពីគណបក្សកាន់អំណាច បានបើកយុទ្ធនាការបំបែកកញ្ចាក់សង្គម ដែលគេមើលឃើញថា បានប្រឌិតរឿងរំលាយគណបក្សសង្គ្រោះជាតិ ចាប់ក្រុមអ្នកនយោបាយប្រឆាំងដាក់ពន្ធនាគារ កម្ចាត់សារព័ត៌មានឯករាជ្យ ធ្វើច្បាប់កំរិតសិទ្ធិអង្គការសង្គមស៊ីវិល ដើម្បីក្តោបអំណាចបែបគ្រួសារនិយមមកនេះ កម្ពុជាត្រូវបានគេរកឃើញថា ជាឋានសួគ៌ពូកឧក្រិដ្ឋជនបង្កការគំរាមកំហែងដល់ជីវភាពពលរដ្ឋ និងអន្តរជាតិ។
ជ្រុងមួយនៃបញ្ហានេះ កាលពីថ្ងៃទី១៤ ខែតុលា ឆ្នាំ២០២៥ សហរដ្ឋអាមរិក និងចក្រភពអង់គ្លេស រួមគ្នាដាក់ទណ្ឌកម្មបង្កកទ្រព្យសម្បត្តិក្រុមហ៊ុនព្រីនស៍ឧកញ៉ា ចេន ហ្ស៊ី ទីប្រឹក្សា លោក ហ៊ុន សែន ក្រោយរកឃើញថា ជាបណ្តាញឧក្រិដ្ឋកម្មឆបោកខ្នាតអន្តរជាតិ លួចលុយរាប់ពាន់លានដុល្លារពីជនរងគ្រោះជុំវិញពិភពលោក។
ជាមួយគ្នានោះ ក្រសួងយុត្តិធម៌អាមេរិក ប្រកាសថា អាមេរិកបានបង្កកទ្រព្យសម្បត្តិ ១៥ពាន់លានដុល្លាររបស់ឧកញ៉ា ចេន ហ្ស៊ី ព្រមទាំងចេញដីកាចោទប្រកាន់ ជុំវិញការបើកមជ្ឈមណ្ឌលឆបោកតាមអនឡាញ លាងលុយកខ្វក់ និងបង្ខាំងមនុស្សខុសច្បាប់។
បើតាមក្រសួងយុត្តិធម៌អាមេរិក រដ្ឋអាជ្ញាតុលាការសហព័ន្ធសហរដ្ឋអាមេរិកក្រុងញ៉ូវយ៉ក បានចោទប្រកាន់លោក ចេន ហ្ស៊ី ជុំវិញបទឧក្រិដ្ឋឆបោក និងលាងលុយ ដែលអាចប្រឈមជាប់ពន្ធនាគារ៤០ឆ្នាំ។
កាលពីថ្ងៃទី២៧ ខែវិច្ឆិកា ២០២៥ សារព័ត៌មានកូរ៉េខាងត្បូង ឈ្មោះថា The Korea herald បានឱ្យដឹងថា រដ្ឋាភិបាលកូរ៉េខាងត្បូង បានប្រកាសដាក់ទណ្ឌកម្មលើក្រុមហ៊ុន Prince Group របស់ឧកញ៉ា ចេន ហ្ស៊ី និងក្រុមហ៊ុន Huione Group របស់ឧកញ៉ា ហ៊ុន តូ និងបុគ្គលចំនួន ១៥រូបទៀត នៅកម្ពុជា រួមទាំងបណ្តាញទីផ្សារងងឹតពាក់ព័ន្ធឧស្សាហកម្មឆបោកអនឡាញជាច្រើនទៀត។
តាមរបាយការណ៍នានា បង្ហាញថា មនុស្សជំនិតៗមួយចំនួន នៅជុំវិញប្រធានគណបក្សកាន់អំណាច លោក ហ៊ុន សែន ត្រូវបានអន្តរជាតិរកឃើញជាបន្តបន្ទាប់ថា ជាមេឧក្រិដ្ឋជនឆបោក និងលាងលុយកខ្វក់ ឬលុយខុសច្បាប់ មានអ្នកឧកញ៉ា ហ៊ុន តូ ឧកញ៉ា លី យ៉ុងផាត់ ឧកញ៉ា កុក អាន និងឧកញ៉ា ទ្រី ភាព និងងប្រធាននាគារព្រីនស៍ លោក ចេន ហ្ស៊ី ជាដើម៕
