ស្នូរគ្រាប់ផ្លោង លាយឡំនឹងសំឡេងយានយន្តកំពុងលាន់ឮសន្ធឹកជាថ្មីម្ដងទៀត នៅតាមបណ្ដោយព្រំដែន ក្រោយយោធាថៃបើកការបាញ់ប្រហារជាថ្មីម្ដងទៀត មកលើដែនអធិបតេយ្យកម្ពុជា។
ពលរដ្ឋជាច្រើនពាន់គ្រួសារ នៅខេត្តព្រះវិហារ បន្ទាយមានជ័យ និងឧត្តរមានជ័យ នៅព្រឹកថ្ងៃទី៨ ខែធ្នូ កំពុងវេចកូនជញ្ជូនចៅចាកចេញពីលំនៅឋាន ធ្វើដំណើរឆ្ពោះទៅជំរុំភៀសសឹក ដោយភាពតក់ស្លុត។
ពលរដ្ឋនៅតំបន់ជាំតែ ស្រុកជាំក្សាន្ត ខេត្តព្រះវិហារ អ្នកស្រី ហ៊ុន ភឿត ចាកចេញពីផ្ទះតាំងពីម៉ោង៤ទៀបភ្លឺ ក្រោយស្នូរកាំភ្លើងផ្ទុះចេញពីទឹកដីថៃឥតស្រាកស្រាន្តតាំងពីយប់។ អ្នកស្រីប្រាប់វីអូឌីថា ការភៀសខ្លួនលើកនេះ អ្នកស្រីគ្មានពេលសូម្បីតែវេចខោអាវចង្ក្រានចានឆ្នាំង ពោលគឺធ្វើយ៉ាងណាឱ្យរួចរស់ជីវិតសិនតែប៉ុណ្ណោះ។
អ្នកស្រី ហ៊ុន ភឿត និយាយថា៖ «ថ្ងៃនេះ មិនបានយកអីតែម្ដង ថ្ងៃនេះខ្ញុំរត់ឱ្យរួចខ្លួន បើកឡានរត់»។
នេះជាការភៀសខ្លួនទ្រង់ទ្រាយធំ ជាលើកទីពីរ របស់ពលរដ្ឋនៅតាមបណ្ដោយព្រំដែនកម្ពុជា-ថៃ ខណៈការភៀសខ្លួនតូចៗផ្សេងទៀត មានជាច្រើនលើកច្រើនសារ គិតចាប់ពីពេលដែលភាគីថៃបើកការបាញ់ប្រហារមកលើកម្ពុជា កាលពីចុងខែកក្កដា ឆ្នាំ២០២៥។ ពលរដ្ឋនៅក្បែរសមរភូមិក្ដៅ ដូចជាតំបន់ជាំតែ ភ្នំទ្រព្យ អានសេះ ប្រាសាទតាមាន់ ប្រាសាទតាក្របី បន្ទាយអំពិល មុំបី ប្រាសាទខ្នារ បានសម្រុកធ្វើដំណើរតាមឡាន ម៉ូតូ គោយន្តកន្ត្រៃ រ៉ឺម៉កកង់បី សំដៅទៅជំរុំភៀសសឹក តាំងពីយប់ថ្ងៃទី៧ ខែធ្នូ បន្ទាប់ពីយោធាថៃបាញ់ផ្លោងកាំភ្លើងត្បាល់ជាច្រើនលើក ចាប់តាំងពីម៉ោង ២រសៀល។
សេចក្ដីរាយការណ៍បន្តបន្ទាប់របស់ក្រសួងអប់រំ នៅថ្ងៃទី៨ ខែធ្នូនេះ បានប្រកាសពីផ្អាកការបិទសាលារៀនជាង៣០០ ដែលនៅជិតសមរភូមិបណ្ដោះអាសន្ន ក្នុងខេត្តចំនួន៤ គឺព្រះវិហារ បន្ទាយមានជ័យ ឧត្តរមានជ័យ និងពោធិ៍សាត់ ដែលធ្វើឱ្យប៉ះពាល់សិស្សជាង ៧ម៉ឺននាក់។
យោងតាមគណៈបញ្ជាការឯកភាពរដ្ឋបាលខេត្តឧត្តរមានជ័យ គិតត្រឹមម៉ោង១១ថ្ងៃត្រង់ មានពលរដ្ឋជាង១ពាន់គ្រួសារ បានភៀសខ្លួនទៅជំរុំសុវត្ថិភាព។ ចំណែកពលរដ្ឋនៅភូមិព្រៃចាន់ និងភូមិជោគជ័យ ខេត្តបន្ទាយមានជ័យ ឯណោះវិញ ក៏មានការជម្លៀសពលរដ្ឋផងដែរ ដោយយោធាថៃបានបើកការវាយប្រហារនៅតំបន់នេះនៅម៉ោង ១៖៣០នាទីរសៀល។
អ្នកសម្របសម្រួលសមាគមការពារសិទ្ធិមនុស្សអាដហុក (ADHOC) ខេត្តព្រះវិហារ លោក ឡោ ចាន់ ឱ្យដឹងថា ពលរដ្ឋខ្លះភៀសចេញពីភូមិឃុំទាំងយប់ ខណៈមួយចំនួនសម្ងំនៅក្នុងត្រង់សេ រង់ចាំដល់ពេលព្រឹកទើបមានអ្នកភៀសចេញបន្តបន្ទាប់។ ជាមួយគ្នានេះ ស្នាក់ការអាដហុកនៅខេត្តព្រះវិហារ បានទទួលជនភៀសសឹក ៤គ្រួសារ។
ក្រសួងការពារជាតិកម្ពុជា បានរាយការណ៍ត្រឹមម៉ោង១០ព្រឹកថា ទាហានថៃបានបើកការវាយប្រហារចំនួន១៤លើកជាប់ៗគ្នា គិតចាប់ពីម៉ោង៥ទៀបភ្លឺ ដោយប្រើប្រាស់អាវុធធុនធ្ងន់ ដូចជា កាំភ្លើងត្បាល់ កាំភ្លើងយន្ត កាំភ្លើង MT60 ការវាយប្រហារតាមអាកាសដោយដ្រូន និងយន្តហោះចម្បាំង F-16 រួមទាំងការបាញ់ផ្សែងពុលយ៉ាងច្រើនចូលតំបន់ភ្នំខ្មោច និងប្រាសាទព្រះវិហារ។
ការវាយប្រហាររបស់យោធាថៃ មកលើកម្ពុជាជាថ្មីម្ដងទៀតនេះ កើតឡើងក្រោយភាគីថៃបានចោទប្រកាន់ និងទាមទារឱ្យកម្ពុជាទទួលខុសត្រូវករណីទាហានខ្លួនដើរជាន់មីននៅតាមតំបន់ព្រំដែន។ តែអ្នកឃ្លាំមើល និងតាមដានស្ថានការណ៍ថា នេះគ្រាន់តែជាលេសរបស់ថៃ ដើម្បីបំពានកិច្ចព្រមព្រៀងសន្តិភាពទីក្រុងកូឡាឡាំពួរ តែប៉ុណ្ណោះ។
នាយករដ្ឋមន្ត្រីម៉ាឡេស៊ី និងជាប្រធានអាស៊ានប្ដូរវេន លោក អាន់វ៉ា អ៊ីប្រាហ៊ីម ជំរុញឱ្យភាគីទាំងពីរអនុវត្តការអត់ធ្មត់ជាអតិបរមា និងប្រើប្រាស់យន្តការទំនាក់ទំនងឱ្យបានពេញលេញ។ លោកអះអាងថា ម៉ាឡេស៊ីត្រៀមខ្លួនរួចជាស្រេច ដើម្បីគាំទ្រជំហានដែលអាចជួយស្តារភាពស្ងប់ស្ងាត់ និងទប់ស្កាត់បានផ្ទុះអាវុធជាបន្តបន្ទាប់ទៀត។
មកទល់ពេលនេះ ក្រសួងការពារជាតិកម្ពុជា នៅតែរក្សាជំហរគោរពតាមកិច្ចព្រមព្រៀងបទឈប់បាញ់ និងសេចក្ដីថ្លែងការណ៍រួម ស្ដីពីសន្តិភាពរវាងកម្ពុជា-ថៃ ដែលចុះហត្ថលេខាដោយប្រធានាធិបតីអាមេរិក លោក ដូណាល់ ត្រាំ និងប្រធានអាស៊ានប្ដូរវេន លោក អាន់វ៉ា អ៊ីប្រាហ៊ីម ប្រព្រឹត្តិទៅកាលពីខែតុលា។ ប៉ុន្តែភាគីថៃ តាមរយៈនាយករដ្ឋមន្ត្រី លោក អានុធីន ឆាន់វីរៈគូន បានប្រកាសពីការត្រៀមកម្លាំង រួចជាស្រេច ដែលលោកហៅថាជាការទប់ទល់កម្ពុជា ឯបក្សប្រឆាំងនៅថៃបានផ្ដល់នូវយុទ្ធសាស្ត្រផ្សេងៗក្នុងការវាយប្រហារមកលើកម្ពុជា ដោយមិនដកដៃ៕
