ប៉ូលីសថៃមកពីនាយកដ្ឋានបង្រ្កាបឧក្រិដ្ឋកម្មបច្ចេកវិទ្យាធីស៊ីអេសឌី(TCSD) បានចាប់ខ្លួនបុរសជនជាតិកូរ៉េចំនួន១៥នាក់ និងបុរសជនជាតិចិនចំនួន ២នាក់ ក្នុងប្រតិបត្តិការវាយឆ្មក់មួយនៅប៉ាតាយ៉ា និងក្រុងបាងកក ពាក់ព័ន្ធប្រតិបត្តិការបោកប្រាស់ ដែលមានទំហំទឹកប្រាក់ប្រហែល ៥០០លានបាត។
សារព័ត៌មាន ដឹ ស្រ្តេតថាមស៍ បានរាយការណ៍នៅថ្ងៃទី០៩ ខែធ្នូ ឆ្នាំ២០២៥នេះថា ការិយាល័យស៊ើបអង្កេតកណ្តាល ស៊ីអាយប៊ី(CIB) បាននិយាយថា ប្រតិបត្តិការនេះ បានចាប់ផ្តើមបន្ទាប់ពីមន្ត្រីទំនាក់ទំនងប៉ូលីសនៅឯស្ថានទូតកូរ៉េខាងត្បូង បានជូនដំណឹងដល់អាជ្ញាធរថៃថា ក្រុមជនខិលខូចដែលមានគោលដៅលើជនជាតិកូរ៉េខាងត្បូងបានប្រតិបត្តិការចេញពីប្រទេសថៃ។
ប្រភពបន្តថា ដោយប្រើព័ត៌មានពីស្ថានទូត មន្ត្រីនាយកដ្ឋានបង្រ្កាបឧក្រិដ្ឋកម្មបច្ចេកវិទ្យា(TCSD) បានវាយឆ្មក់ក្នុងផ្ទះមួយ នៅប៉ាតាយ៉ា ជាកន្លែងដែលពួកគេបានចាប់ខ្លួនបុរសជនជាតិកូរ៉េចំនួន ៤នាក់។
ប៉ូលីស បាននិយាយថា ជនសង្ស័យទាំង៤នាក់ បានសារភាពថាជាសមាជិកនៃក្រុមខិលខូចមជ្ឈមណ្ឌលហៅទូរសព្ទដែលពីមុនប្រតិបត្តិការនៅប្រទេសកម្ពុជា មុនផ្លាស់ទីតាំងទៅប្រទេសថៃ បន្ទាប់ពីមានការបង្រ្កាបនៅទីនោះ។
បុរសទាំង៤នាក់ ដែលត្រូវបានចាប់ខ្លួននៅប៉ាតាយ៉ា(Pattaya) គឺជាមនុស្សដែលអាំងទែប៉ូលចេញការជូនដំណឹងក្រហម ឬនិវេទន៍ក្រហម តាមចាប់ខ្លួន។ ពួកគេត្រូវបានសង្ស័យថា ល្បួងជនរងគ្រោះឱ្យចូលទៅក្នុងការវិនិយោគនៅក្នុងគម្រោងរមណីយដ្ឋានមួយឈ្មោះថា ជែនធីង ម៉ាឡេស៊រ(Genting Malaysia)។
ប្រភពបន្ថែមថា ព័ត៌មានពីជនសង្ស័យនៅប៉ាតាយ៉ា បាននាំមន្ត្រីទៅកាន់ខុនដូចំនួន២ នៅតំបន់ផ្រារ៉ាម៣ និងឡុមពីនី ទីក្រុងបាងកក។
ប៉ូលីស បាននិយាយថា ពួកគេបានចាប់ខ្លួនបុរសជនជាតិកូរ៉េខាងត្បូងចំនួន ១១នាក់បន្ថែមទៀត និងបុរសជនជាតិចិនចំនួន ២នាក់ នៅទីតាំងទាំងពីរ។
លោកវរសេនីយ៍ឯក ផានុផាត់ គិតធីផាន (Panupat Kittipan) មេបញ្ជាការរងនៃធីស៊ីអេសឌី បាននិយាយថាខុនដូត្រូវបានបំប្លែងទៅជាមជ្ឈមណ្ឌលប្រតិបត្តិការ ដែលបំពាក់ដោយឧបករណ៍ និងការតភ្ជាប់អ៊ីនធើណែត។ ប៉ូលីសក៏បានរកឃើញឯកសារ(scripts) ដែលសង្ស័យថា បានប្រើប្រាស់ដោយសមាជិកនៃជនខិលខូច ដើម្បីបោកបញ្ជោតជនរងគ្រោះ។
លោកវរសេនីយ៍ឯក ផានុផាត់ គិតធីផាន(Panupat Kittipan) បាននិយាយទៀតថា ជនខិលខូចត្រូវបានសង្ស័យថា បានបោកប្រាស់ជនរងគ្រោះចំនួន ២០ពាន់លានវ៉ុន(១៧.៦លានសិង្ហបុរី)។
ប៉ូលីសបានរឹបអូសកុំព្យូទ័រជាច្រើនគ្រឿង ទូរសព្ទចំនួន ៣៥គ្រឿង និង វុល(VoIP(Voice over Internet Protocol)) ជាបច្ចេកវិទ្យាហៅទូរសព្ទតាមអ៊ីនធើណែតលើ ហ្វជីអែលធីអ៊ី(4GLTE) ជំនួសការហៅតាមបណ្តាញទូរសព្ទធម្មតាចំនួន៥០ជាភស្តុតាង។
លោកវរសេនីយ៍ឯក ផានុផាត់ គិតធីផាន(Panupat Kittipan) បានបន្ថែមទៀតថា តំណាងស្ថានទូតកូរ៉េខាងត្បូងបានជូនដំណឹងទៅប៉ូលីសថៃថា ក្រុមជនខិលខូចបានបោកប្រាស់ជនជាតិកូរ៉េពីថ្ងៃទី១៧ ខែតុលា ឆ្នាំ២០២៤ ដល់ថ្ងៃទី២៨ ខែឧសភា ឆ្នាំ២០២៥ ភាគច្រើនដោយការបញ្ចុះបញ្ចូលពួកគេឱ្យវិនិយោគនៅក្នុងគម្រោងរចនាពីរ៉ាមីត។
លោកបានបន្ថែមថា ក្រុមជនខិលខូចដំបូងឡើយ ប្រតិបត្តិការនៅក្នុងប្រទេសកម្ពុជា ប៉ុន្តែបានផ្លាស់ប្តូរមូលដ្ឋានប្រតិបត្តិការរបស់ខ្លួនទៅប្រទេសថៃ បន្ទាប់ពីមានភាពតានតឹងជាថ្មីតាមបណ្តោយព្រំដែនកម្ពុជា-ថៃ៕
