គិតមកទល់ពេលនេះ ប្រជាពលរដ្ឋខ្មែរមិនតិចជាង ៥ម៉ឺននាក់ឡើយ កំពុងស្វែងរកជំរុំសុវត្ថិភាពភៀសចេញពីគ្រាប់កាំភ្លើង និងគ្រាប់ផ្លោងរបស់ប្រទេសថៃ ក្រោយការវាយប្រហារមកលើកម្ពុជាបន្តកើនឡើងកម្ដៅ។
អ្នកនៅតាមតំបន់គោលដៅវាយប្រហាររបស់ថៃ នៅក្នុងតំបន់ថ្មដា ខេត្តពោធិ៍សាត់ ស្រុកកំរៀង និងសំពៅលូន ខេត្តបាត់ដំបង និងក្រុងប៉ោយប៉ែត ខេត្តបន្ទាយមានជ័យ ត្រូវបានអាជ្ញាធរខេត្តប្រកាសឱ្យជម្លៀសខ្លួនជាបន្តបន្ទាប់ នៅថ្ងៃទី៩ ខែធ្នូ ខណៈពលរដ្ឋនៅតំបន់ផ្សេងទៀតក្នុងភូមិព្រៃចាន់ ខេត្តបន្ទាយមានជ័យ ខេត្តឧត្តរមានជ័យ និងព្រះវិហារ ត្រូវបានជម្លៀសតាំងពីម្សិលម៉ិញ។ ចំណែកខេត្តប៉ៃលិន និងកោះកុង មិនមានការប្រកាសណាមួយចេញពីរដ្ឋបាលខេត្តនៅឡើយទេ។
តាមរបាយការណ៍ក្រសួងការពារជាតិ គិតត្រឹមម៉ោង១១ថ្ងៃត្រង់ ថ្ងៃទី៩ ខែធ្នូ កម្ពុជាមានជនភៀសសឹកចំនួន ៥ម៉ឺន ៤ពាន់ ៥៥០នាក់ (៥៤ ៥៥០នាក់) ស្មើនឹងជាង ១ម៉ឺន ៦ពាន់គ្រួសារ (១៦ ៥៦៨គ្រួសារ) មកពីខេត្តចំនួនបី គឺព្រះវិហារ ឧត្តរមានជ័យ និងបន្ទាយមានជ័យ ខណៈពលរដ្ឋចំនួនពីរខេត្តទៀត គឺបាត់ដំបង និងពោធិ៍សាត់ ពុំទាន់មានតួលេខនៅឡើយ។
ការវាយប្រហាររបស់ថៃមកលើកម្ពុជានៅពេលនេះ មានទំហំធំជាងការវាយប្រហារកាលពីខែកក្កដា កន្លងទៅ ដែលធ្វើឱ្យកំណើនអ្នកភៀសខ្លួនកើនឡើង ណែនណាន់តាន់តាប់ពេញជំរុំ រហូតមិនអាចរកកន្លែងសម្រាកបាន។
ពលរដ្ឋភូមិព្រៃចាន់ លោក ស្រី ទាវ ប្រាប់វីអូឌីថា យប់ម៉ិញលោកក្រាលតង់ដេកលើដីមុខវត្តចាន់ស៊ី ព្រោះជំរុំមួយនេះពេញទទួលមនុស្សទៀតលែងបាន។ អមជាមួយស្នូរគោយន្តសន្ធឹក លោកប្រាប់ថា កំពុងធ្វើដំណើរឆ្ពោះទៅស្រុកមង្គលបុរី ដែលមានចម្ងាយជាង៣០គីឡូម៉ែត្រទៀត ដើម្បីស្វែងរកជំរុំថ្មី។
លោក ស្រី ទាវ និយាយថា៖ «រត់ចេញអស់ហើយ ខ្ញុំរត់ធ្លាយដល់ស្វាយ។ វត្តចាន់ស៊ីក៏ពេញអស់ ឥឡូវគេឱ្យមង្គលបុរីទៀត។ វា (ថៃ) ផ្លោងខ្ទេចខ្ទីទៀតអស់ហើយ បាញ់ខ្ទេចខ្ទីអស់ហើយ»។
លោក ស្រី ទាវ ជាពលរដ្ឋម្នាក់ ក្នុងចំណោមពលរដ្ឋភូមិព្រៃចាន់រាប់រយនាក់ផ្សេងទៀត ដែលភៀសខ្លួនជាលើកទីពីរ ក្រោយយោធាថៃបើកការវាយប្រហារកាលពីខែវិច្ឆិកាម្ដង និងនៅល្ងាចថ្ងៃទី៨ ខែធ្នូ នេះម្ដងទៀត។ លោកនៅភ័យមិនទាន់បាត់ នូវទិដ្ឋភាពថៃយករថក្រោះបាញ់ចូលភូមិកាលពីថ្ងៃម្សិលម៉ិញ ដែលធ្វើឱ្យលោកជញ្ជូនចានឆ្នាំងមិនទាន់ រត់មកត្រឹមខោអាវពីរបីកំភ្លេប៉ុណ្ណោះ។
ចំណែក ជំរុំភៀសខ្លួនខេត្តព្រះវិហារ ក៏ត្រូវបានរាយការណ៍ថាពេញដូចគ្នា ដែលធ្វើឱ្យពលរដ្ឋនៅតំបន់ជាំតែ ស្រុកជាំក្សាន្ត អ្នកស្រី ហ៊ុន ភឿត ត្រូវភៀសទៅស្រុកស្រីស្នំ ខេត្តសៀមរាប។ អ្នកស្រីឱ្យដឹងថា ព្រឹកនេះមានការចែកអង្ករ និងម្ហូប តែគ្រួសារអ្នកស្រីខ្វះតង់សម្រាក។
អ្នកស្រី ហ៊ុន ភឿត និយាយថា៖ «តង់ទិញគេ សុំគេព្រឹកម៉ិញបានមួយតែគេមិនទាន់បានចែក»។
នេះជាថ្ងៃទី៣ នៃការវាយប្រហាររបស់យោធាថៃមកលើប្រទេសកម្ពុជា គិតចាប់តាំងពីរសៀលថ្ងៃទី៧ ខែធ្នូ ដោយថៃបានបង្កើនគោលដៅ និងទំហំវាយប្រហារកាន់តែធំទៅៗ តាមរយៈការប្រើប្រាស់សព្វាវុធធុនធំទំនើបៗ ដូចជាយន្តហោះចម្បាំង F-16 កាំភ្លើងត្បាល់៦០ កាំភ្លើងធំ១០៥មម ១០៦មម ១៥៥មម រថគ្រោះបាញ់បុក និងដ្រូន។
លើសពីការភៀសខ្លួនជាង៥ម៉ឺននាក់ ការវាយប្រហាររបស់ថៃ គិតត្រឹមម៉ោង១១ ថ្ងៃអង្គារនេះ បានសម្លាប់ពលរដ្ឋខ្មែរ ៧នាក់ និងរបួស២០នាក់។ សាលារៀនក្នុងក្រុងស្រុកចំនួន១៣ នៃខេត្តចំនួន៥ ត្រូវបានប្រកាសឱ្យបិទទ្វារជាបន្តបន្ទាប់ ធ្វើឱ្យសិស្សជិត ១៣ម៉ឺននាក់ (១២៩ ១០៦) មិនបានរៀនសូត្រ។
ទោះយ៉ាងណា ទំហំជនភៀសសឹកត្រូវបានសង្គមស៊ីវិល ប៉ាន់ស្មានថា អាចនឹងមានការកើនឡើងបន្តទៀត ក្រោយនាយករដ្ឋមន្ត្រីថៃ លោក អានុធីន ឆាន់វីរៈគូន បានបញ្ជាក់ជំហរប្រាប់អ្នកសារព័ត៌មាននៅរសៀលថ្ងៃទី៩ ខែធ្នូនេះថា នឹងកម្ទេចកម្ពុជា ឱ្យដល់ទីចុងក្រោយបំផុត និងអស់លទ្ធភាព ព្រោះសង្គ្រាមនេះ បញ្ឈប់លែងបានហើយ។
មន្ត្រីសិទ្ធិមនុស្សនៃអង្គការការពារសិទ្ធិមនុស្សលីកាដូប្រចាំខេត្តបន្ទាយមានជ័យ លោក អ៊ិន គង់ជិត សង្កេតឃើញសភាពការណ៍ប្រែប្រួលឆាប់រហ័ស ខណៈមកទល់ពេលនេះ ជំរុំភៀសសឹកជាច្រើនពេញណែន ហៀរទៅដល់ស្រុកមង្គលបុរី។ លោកអំពាវនាវអាជ្ញាធរបង្កើនការជូនដំណឹងឱ្យបានរហ័សទៅកាន់ពលរដ្ឋ និងរៀបចំជំរុំភៀសសឹកឱ្យបានច្រើន ពិសេសតំបន់ដែលមានប្រភពទឹកប្រើប្រាស់ ត្រៀមទទួលសង្គ្រោះពួកគាត់។
លោក អ៊ិន គង់ជិត ថ្លែងថា៖ «មួយទៀត គឺបើកចំហឲ្យមានសប្បុរសជនចូលទៅផ្ដល់ជំនួយឲ្យបានទាន់ពេលវេលា ហើយត្រូវផ្សព្វផ្សាយផ្ដល់ដំណឹងដល់សប្បុរសជននានា ដើម្បីឲ្យគាត់ដឹង ឲ្យគាត់ចូលរួមដើម្បីជួយគាំពារ ជួយឧបត្ថម្ភនៅក្នុងកិច្ចការងារហ្នឹង»។
ក្នុងលក្ខខណ្ឌអាកាសធាតុកំពុងចុះត្រជាក់ តម្រូវការសម្លៀកបំពាក់ និងភួយមុង គឺសំខាន់បន្ទាប់ពីតម្រូវការស្បៀងអាហារ ខណៈមនុស្សចាស់ កុមារ ទារក និងស្ត្រីមានផ្ទៃពោះ ក៏មានចំនួនច្រើន ទាមទារឱ្យមានការផ្គត់ផ្គង់ថ្នាំសង្កូវ ម្សៅទឹកដោះគោ និងទីសម្រាកឱ្យបានសមរម្យ និងមានអនាម័យ៕
