អភិបាលនៃអាជ្ញាធរកីឡាថៃ (SAT) លោក គង់សាក់ យ៉តម៉ានេ (Kongsak Yodmanee) នៅថ្ងៃទី៩ ខែធ្នូ បានឱ្យដឹងថា អាជ្ញាធរនឹងបើកការស៊ើបអង្កេតជាបន្ទាន់មួយ ជាមួយរដ្ឋបាលខេត្ត ព្រមទាំងក្រសួងមហាផ្ទៃ ទៅលើអត្តពលិកកម្ពុជា ក្រោយសង្កេតឃើញថា ឯកសណ្ឋានក្រុមជម្រើសជាតិកម្ពុជា មានរូបសញ្ញាក្រុមហ៊ុនកាស៊ីណូដ៏ល្បីល្បាញមួយ នៅលើដើមទ្រូងខាងស្តាំ នៃឈុតកីឡាករជម្រើសជាតិសម្រាប់ព្រឹត្តិការណ៍ស៊ីហ្គេម។ នេះបើយោងតាមការចុះផ្សាយរបស់កាសែត ខៅសត អង់គ្លេស។
ផ្លាកកាស៊ីណូដែលគេលើកឡើងនោះ គឺជាផ្លាកក្រុមហ៊ុន ណាហ្គាវើលដ៍ ដែលរកស៊ីទៅលើវិស័យបដិសណ្ឋារកិច្ច និងកាស៊ីណូ។ អាជ្ញាធរកីឡាថៃ បញ្ជាក់ថា ពួកគេត្រូវពិនិត្យដើម្បីកំណត់ថា តើនេះជាការផ្សាយពាណិជ្ជកម្មឬយ៉ាងណា ដោយពិគ្រោះជាមួយអាជ្ញាធរផ្នែកច្បាប់ មុននឹងចាត់វិធានការបន្ត ដោយហេតុថា កាស៊ីណូ ត្រូវបានហាមឃាត់ទាំងស្រុងនៅក្នុងប្រទេសថៃ។
ប្រតិកម្មរបស់អាជ្ញាធរកីឡាថៃ ធ្វើឡើងក្នុងថ្ងៃតែមួយ ក្រោយការបើកព្រឹត្តិការណ៍កីឡាស៊ីហ្គេម លើកទី៣៣ ដែលខ្លួនធ្វើជាម្ចាស់ផ្ទះនៅឆ្នាំនេះ។
គួរបញ្ជាក់ថា គណៈកម្មាធិការជាតិអូឡាំពិកកម្ពុជា (NOCC) បានសម្រេចកាត់បន្ថយប្រភេទកីឡាពី២១ មកនៅត្រឹម ១៣ប្រភេទ ដោយបញ្ជូនអត្តពលិក និងមន្ត្រីកីឡាចំនួន ១៥០នាក់ ទៅចូលរួមព្រឹត្តិការណ៍ស៊ីហ្គេមនៅប្រទេសថៃ ដោយសារព្រួយបារម្ភពីសុវត្ថិភាពពួកគេ ខណៈប្រទេសទាំងពីរកំពុងមានវិវាទនៅតំបន់ព្រំដែន៕
