ថៃបានទម្លាយព័ត៌មានពីការពង្រីកការឈ្លានពានលើកម្ពុជា ទាំងផ្នែកជើងទឹក ជើងអាកាស និងជើងគោក ដើម្បីសម្រេចផែនការលេបទឹកដីកម្ពុជា ក្រោយកម្ពុជាប្រកាសប្រើសិទ្ធតបត ដើម្បីការពារបូរណភាពទឹកដី។
នៅថ្ងៃទី១០ ខែធ្នូនេះ សារព័ត៌មានថៃជាច្រើន រួមទាំង ខាវសុត និងថៃរដ្ឋ បានឱ្យដឹងថា កងទ័ពជើងអាកាសថៃ បានព្រមានប្រើយន្តហោះចម្បាំង F-16 ដើម្បីបាញ់កម្ចេចស្ពានស្ទឹងមេទឹករបស់កម្ពុជានៅស្រុកថ្មដា ខេត្តពោធិ៍សាត់។
លើសពីនេះ ប្រភពសារព័ត៌មាន ខាវសុត និងថៃរដ្ឋ ចុះផ្សាយថា កងទ័ពជើងទឹករបស់ថៃដែលប្រចាំការនៅខេត្តត្រាច ប្រកាសត្រៀមខ្លួន ពង្រាយកងកម្លាំង ដើម្បីវាយតបតឈ្លានពានកម្ពុជាតាមផ្លូវទឹក។
ប្រភពនិយាយថា ទ័ពថ្មើរជើង រថគ្រោះ និងទ័ពអាកាសថៃ បាននឹងកំពុងវាយសម្រុកចូលទឹកដីកម្ពុជា នៅតំបន់ធំៗ ដូចជា នៅច្រកអានសេះ ប្រាសាទតាមាន់ធំ អូរស្មាច់ មុំបី ព្រៃចាន់ និងប្រាសាទខ្នារ។
បើតាមសារព័ត៌មានថៃរដ្ឋ យោធាថៃ នឹងវាយសង្គ្រប់លើកម្ពុជា តាមផែនការដែលនាយករដ្ឋមន្រ្តី លោក អនុធិន ធ្លាប់ប្រកាសថា នឹងវាយកម្ទេចចូលមូលដ្ឋានរបស់កម្ពុជា ចំនួន១១ទីតាំង។
ការគំរាមរបស់ភាគីថៃនេះ ហាក់ស៊ីគ្នាទៅនឹងការអះអាងរបស់ក្រសួងការពារជាតិកម្ពុជាថា យោធាថៃបន្តពង្រីកការឈ្លានពានចូលដែនអធិបតេយ្យជាច្រើនកន្លែង ដូចជា តំបន់អានសេះ បុស្សស្បូវ-ជាំតែ មុំបី ភ្នំខ្មោច ច្រកវាលឥន្ទ្រី ចំការចេក ប្រាសាទតាក្របី តាមាន់ធំ និងប្រាសាទខ្នារ ជាដើម។
ក្រសួងថា កងទ័ពថ្មើរជើងរបស់ថៃជាច្រើន រួមទាំងរថគ្រោះបានវាយរុលសម្រុកចូលបាញ់មកលើដែនអធិបតេយ្យកម្ពុជានៅតំបន់បឹងត្រកួន ខេត្តបាត់ដំបង ឃុំថ្មដា ខេត្តពោធិ៍សាត់ និងភូមិព្រៃចាន់ ខេត្តបន្ទាយមានជ័យ។
ប្រភពបន្តថា ចំពោះស្ថានការណ៍នៅក្នុងភូមិសាស្រ្តយោធភូមិភាគទី៥ ខេត្តបន្ទាយមានជ័យ គឺចាប់ពី យោធាថៃបានប្រើប្រាស់យន្តហោះចម្បាំង F-16 ហោះលើភូមិសាស្រ្ត ឃុំអូរបីជាន់ និងភូមិសាស្រ្តប៉ោយប៉ែត និងបានហោះទម្លាក់គ្រាប់ចំនួន២គ្រាប់ ក្នុងទីតាំងភូមិសាស្រ្ត ភូមិស្លរក្រាម ឃុំស្លរក្រាម ស្រុកស្វាយចេក ខេត្តបន្ទាយមានជ័យ។
ជុំវិបញ្ហានេះ តំណាងរាងស្រ្តបក្សប្រឆាំង លោក អ៊ុំ សំអាន និយាយថា ដំណាក់កាលនេះ មេដឹកនាំកម្ពុជា គ្មានអ្វីត្រូវរារែកចិត្តទៀតទេ គឺត្រូវប្តឹងថៃទៅតុលាការយុត្តិធម៌អន្តរជាតិ ដើម្បីការពារទឹកដី និងអាយុជីវិតពលរដ្ឋខ្មែរ។
លោកអះអាងថា សកម្មភាពយ៉ាងគឃ្លើន និងឃោឃៅរបស់យោធាថៃប៉ុន្មានថ្ងៃនេះ សបញ្ជាក់ឱ្យឃើញថា ថៃមានចេតនាវាយសង្គ្រប់ឈ្លានពាន បំផ្លាញប្រាសាទខ្មែរ និងបាញ់សំដៅសម្លាប់ជនស៊ីវិលកម្ពុជា។
លោកថា៖ «នៅពេលដែលថៃវាយសង្គ្រប់មែនទែននេះ វាដល់ពេលហើយដែលកម្ពុជាត្រូវប្ដឹងថៃទៅកាន់តុលាការអន្តរជាតិ ដូចជា តុលាការយុត្តិធម៌អន្ដរជាតិអាយស៊ីជេ តុលាការព្រហ្មទណ្ឌអន្តរជាតិអាយស៊ីស៊ី ប្ដឹងទៅសហប្រធាននៃកិច្ចព្រមព្រៀងសន្តិភាពទីក្រុងប៉ារីសឆ្នាំ១៩៩១ ដែលមានបារាំងនិងប្រទេសឥណ្ឌូនេស៊ី ជាសហប្រធាន ហើយនិងប្ដឹងទៅក្រុមប្រឹក្សាសន្តិសុខអង្គការសហប្រជាជាតិផងដែរ»។
ចំណែក នាយកកម្មវិធីតស៊ូមតិរបស់អង្គការប្រជាធិបតេយ្យខ្មែរមានមូលដ្ឋាននៅអូស្ត្រាលី លោក សេង វណ្ណលី ប្រាប់VODនៅថ្ងៃទី១០ខែធ្នូនេះថា ក្នុងកាលៈទេសៈនេះ មេដឹកនាំកម្ពុជាត្រូវអនុវត្តបីចំនុច។
ទី១ មេដឹកនាំកម្ពុជាចាំបាច់ត្រូវប្រើកម្លាំងខ្លាំង ដើម្បីវាយទប់ទល់នឹងសត្រូវថៃឈ្លានពាន ដោយបន្ថែមកងកម្លាំង បន្ថែមសព្វាវុធទំនើបៗ រួមទាំងសំណាញ់មេឃ ដើម្បីព្រមានភាគីថៃ និងការពារទឹកដីខ្មែរ។
ទី២ មេដឹកនាំកម្ពុជា ត្រូវពង្រឹង និងពន្លឿនដើរយុទ្ធសាស្រ្តការទូតឱ្យលឿនបំផុត ដើម្បីបង្ហាញទៅសហគមន៍អន្តរជាតិ ប្រទេសលោកសេរី ជាពិសេស សហរដ្ឋអាមេរិក និងម៉ាឡេស៊ី ឱ្យដឹងថា ថៃជាជនល្មោភសង្រ្គាម បើកការវាយប្រហារឈ្លានពានទឹកដីកម្ពុជាមុន។
និងទី៣ ត្រូវប្រមូលភស្តតាង បញ្ជូនសំណុំរឿងព្រំដែនទាំងអស់ រួមទាំងករណីយោធាថៃបាញ់សម្លាប់ពលរដ្ឋ និងទាហានខ្មែរ ប្តឹងថៃទៅតុលាការឧក្រិដ្ឋកម្មសង្រ្គាម ICC និងតុលាការយុត្តិធម៌អន្តរជាតិ ICJ។
លោកថា៖ «កិច្ចការបន្ទាន់នៅពេលនេះ កម្ពុជាចាំបាច់ត្រូវតែធ្វើក្រៅតែអំពីការទប់ទល់ជាមួយនឹងទង្វើឈ្លានពានរបស់ថៃ គឺកម្ពុជាត្រូវតែដើរការទូតយ៉ាងសកម្មបំផុតតែម្ដង ទី១គឺត្រូវតែអំពាវនាវឲ្យសហគមន៍អន្តរជាតិ តែងថ្កោលទោសទៅលើទង្វើឈ្លានពានរបស់ថៃ ហើយក៏ដូចជាជំរុញឲ្យប្រធានសមាជិកអាស៊ាន ព្យាយាមសម្របសម្រួលដើម្បីធ្វើយ៉ាងម៉េចឲ្យភាគីថៃចូលមកតុចរចា ទី២អំពាវនាវឲ្យក្រុមប្រឹក្សាអង្គការសហប្រជាជាតិ ឬក៏មហាសន្និបាតអង្គការសហប្រជាជាតិ បើកឲ្យមានកិច្ចប្រជុំបន្ទាន់ ស្តីអំពីសកម្មភាពឈ្លានពានរបស់ថៃ ហើយដោយជំរុញឲ្យក្រុមប្រឹក្សាអង្គការសហប្រជាជាតិ ដូចជា មហាសន្និបាតអង្គការសហប្រជាតិ និងផ្ដល់យោបល់ប្រឹក្សាផ្លូវច្បាប់ ដើម្បីស្នើឲ្យតុលាការអន្តរជាតិ តុលាការយុត្តិធម៌អន្ដរជាតិអាយ.ស៊ី.ជេ ហ្នឹងដោះស្រាយបញ្ហាព្រំដែនដែលជាចំណុចទីតាំងរសើប ររវាងកម្ពុជាជាមួយថៃ ដើម្បីធ្វើយ៉ាងណាកាត់បន្ថយជម្លោះនាពេលអនាគត»។
យោធាថៃ បានបើកការបាញ់ប្រហារមកលើដែនអធិបតេយ្យកម្ពុជាជាថ្មីទៀត ចាប់តាំងពីថ្ងៃទី០៧ ខែធ្នូ ឆ្នាំ២០២៥ មកដល់ថ្ងៃទី១០ ខែធ្នូនេះ ហើយការវាយប្រហាររបស់ថៃមកលើកម្ពុជានៅពេលនេះ មានទំហំធំជាងការវាយប្រហារកាលពីខែកក្កដា កន្លងទៅ។
របាយការណ៍របស់ក្រសួងការពារជាតិ គិតត្រឹមម៉ោង ៥កន្លះល្ងាចថ្ងៃទី០៩ ខែធ្នូ ឆ្នាំ២០២៥ មានប្រជាពលរដ្ឋខ្មែរស្លូតត្រង់ចំនួន ៧នាក់ បានស្លាប់បាត់បង់ជីវិត និងមានពលរដ្ឋជិត ៣ម៉ឺនគ្រួសារ ឬស្មើជាង ១០ម៉ឺននាក់ រស់នៅខេត្តឧត្តរមានជ័យ ព្រះវិហារ បន្ទាយមានជ័យ ពោធិ៍សាត់ និងសៀមរាប បានភៀសសឹកទៅកាន់កន្លែងសុវត្ថិភាព៕
