ក្រសួងវប្បធម៌ និងវិចិត្រសិល្បៈកម្ពុជា ថ្កោលទោសទង្វើយោធាថៃ ដែលបានបាញ់ផ្លោងបំផ្លាញប្រាសាទខ្មែរថាជាឧក្រិដ្ឋកម្មបេតិកភណ្ឌ បំពានអនុសញ្ញានានានៃកិច្ចការពារបេតិកភណ្ឌ ដោយរួមទាំងអនុសញ្ញាឆ្នាំ១៩៥៤ និងឆ្នាំ១៩៧២ ដែលទាមទារឱ្យថៃត្រូវទទួលខុសត្រូវលើការបំពាននេះ ។
យោងតាមសេចក្តីថ្លែងការណ៍របស់ក្រសួងវប្បធម៌ និងវិចិត្រសិល្បៈ ចេញផ្សាយនៅថ្ងៃទី១១ ខែធ្នូ ឆ្នាំ២០២៥នេះ បានលើកឡើងថា ក្រោយពីប្រាសាទតាក្របី បានទទួលរងនូវការបាញ់បំផ្លាញយ៉ាងធ្ងន់ធ្ងរពីសំណាក់យោធាថៃ កាលពីថ្ងៃទី០៩ ខែធ្នូនោះ ប្រាសាទដែលជាទីសក្ការៈរបស់កម្ពុជា បន្តទទួលរងការបាញ់កម្ទេចជាថ្មីទៀត នៅថ្ងៃទី១០ ខែធ្នូនេះ បណ្តាលឱ្យរូបរាង និងរចនាសម្ព័ន្ធប្រាសាទ ត្រូវបានបំផ្លាញទាំងស្រុង។
ក្រសួងថា៖ «ប្រាសាទតាក្របី ជានិមិត្តរូបនៃវប្បធម៌ដ៏រុងរឿងរបស់ខ្មែរ ថែរក្សាការពារដោយខ្មែរ ស្ថិតនៅក្នុងព្រៃភ្នំដែលជាជម្រកដ៏សុខសាន្ត និងពុំទទួលរងការខូចខាតពីធម្មជាតិ ឬអាយុកាល ប៉ុន្តែត្រូវបានសម្លាប់តែមួយពព្រិចភ្នែកដោយយោធាថៃ»។
ករណីនេះ ក្រសួងវប្បធម៌ បានថ្កោលទោសចំពោះទង្វើអសីលធម៌ អគតិ និងគ្មានអរិយធម៌របស់យោធាថៃ មកលើវិស័យវប្បធម៌ខ្មែរ ហើយចាត់ទុកទង្វើបែបនេះថា ជាឧក្រិដ្ឋកម្មដ៏ធ្ងន់ធ្ងរមកលើបេតិកភណ្ឌ និងជាការមិនគោរពដល់អនុសញ្ញានានានៃកិច្ចការពារបេតិកភណ្ឌ ដោយរួមទាំងអនុសញ្ញាឆ្នាំ១៩៥៤ និងឆ្នាំ១៩៧២។
ជាមួយគ្នានេះ ក្រសួងបានអំពាវនាវដល់បណ្តាប្រទេសលើសកលលោក អង្គការជំនាញអន្តរជាតិ ប្រជាជាតិលើពិភពលោក ចូលរួមថ្កោលទោសទង្វើឧក្រិដ្ឋនេះ និងជំរុញឱ្យយោធាថៃបញ្ឈប់ជាបន្ទាន់នូវការបំផ្លិចបំផ្លាញវប្បធម៌ និងបញ្ឈប់ការឈ្លានពាន ដោយងាកមករកដំណោះស្រាយដោយសន្តិវិធី ជាពិសេសគោរពសេចក្តីប្រកាសរួមស្តីពីទីក្រុងកូឡាឡាំពួរ។
ប្រាសាទតាក្របី ត្រូវបានសាងសង់ឡើងក្នុងអំឡុងសតវត្សទី១២ គ.សក្នុងសម័យព្រះបាទសូរ្យវរ្ម័នទី១ និងព្រះបាទឧទ័យទិត្យវរ្ម័នទី២ ស្ថិតនៅភូមិសែនមនោរម្យ១ ឃុំគោកខ្ពស់ ស្រុកបន្ទាយអំពិល ខេត្តឧត្តរមានជ័យ ជាទីតាំងបុរាណអភិរក្សយ៉ាងខ្ជាប់ខ្ជួនដោយស្ថាប័នវប្បធម៌កម្ពុជា និងជាទីសក្ការៈទៅតាមជំនឿ ប្រពៃណី ទំនៀមទម្លាប់របស់ប្រជាជនកម្ពុជា។
គួរបញ្ជាក់ថា យោធាថៃ បានចាប់ផ្តើមប្រើប្រាស់សព្វាវុធ បាញ់ផ្លោងមកលើដែនអធិយតេយ្យកម្ពុជាជាច្រើនកន្លែង រួមទាំងតំបន់ប្រាសាទ ចាប់តាំងពីថ្ងៃទី០៧ ខែធ្នូ ឆ្នាំ២០២៥ រហូតមដល់ដល់ថ្ងៃទី១១ ខែធ្នូនេះ ដែលបានបណ្តាលឱ្យជនស៊ីវិលខ្មែរចំនួន ១០នាក់ស្លាប់បាត់បង់ជីវិត ប្រមាណ ៦០នាក់ រងរបួស និងមានពលរដ្ឋភៀសសឹកជាង ៥ម៉ឺនគ្រួសារ ស្មើនឹងមនុស្សជាង ១៩ម៉ឺន ៧ពាន់នាក់៕
