ប្រជាជនថៃរាប់រយនាក់ កំពុងសម្រុកធ្វើដំណើរទៅប្រទេសកំណើតវិញ ទាំងតាមផ្លូវគោកនិងផ្លូវអាកាស តាំងពីយប់ថ្ងៃទី១០ ខែធ្នូ ក្រោយយោធាថៃបើកការបាញ់ផ្លោងមកលើទឹកដីខ្មែរនៅតាមបណ្ដោយព្រំដែន ខណៈជាយក្រុងប៉ោយប៉ែតក៏កំពុងតែរងការវាយប្រហារផងដែរ។
ពលរដ្ឋនៅក្រុងប៉ោយប៉ែត លោក ព្រួញ រតនា ប្រាប់វីអូឌីនៅថ្ងៃទី១១ ខែធ្នូថា ជនជាតិថៃបានសម្រុកនាំគ្នាធ្វើដំណើរតាមឡានក្រុងធំៗ ចេញពីតំបន់ស្តារហ្គោល ពេញមួយយប់ ក្នុងគោលដៅទៅឡើងយន្តហោះនៅរាជធានីភ្នំពេញ។
លោកថា៖ «ថៃចេញទៅច្រើនមែនទែន ហើយឥណ្ឌូនេស៊ី អត់សូវមានទេ។ គ្រាន់តែឡានក្រុងអាធំៗ ឃើញបីបួនហើយ ហើយនិងអាតូរីស ឡើងកំប៉ែសនៅស្ដារហ្គោល វាជិះ Passapp ទៅជិះ(ឡើងឡាន)នៅហ្នឹង។ ចូល១០ជាង ឡានតូរីស»។
មកទល់ពេលនេះ ប្រជាពលរដ្ឋថៃជាច្រើននាក់ផ្សេងទៀត កំពុងរង់ចាំកកកុញនៅច្រកទ្វារព្រំដែនអន្តរជាតិប៉ោយប៉ែត ដើម្បីឆ្លងទៅប្រទេសថៃ តាមម៉ោងកំណត់ដោយអាជ្ញាធរថៃនៅស្រុកអារញ្ញ ខេត្តស្រះកែវ ចាប់ពីម៉ោង១០ព្រឹក។
ពលរដ្ឋនៅក្រុងប៉ោយប៉ែតម្នាក់ទៀត គឺលោក សាន ឧត្តម បង្ហាញក្ដីបារម្ភពីសុវត្ថិភាពក្រោយលែងមានវត្តមានជនជាតិថៃនៅទីនេះ។ លោកបារម្ភដោយហេតុថា យោធាថៃអាចបើកការប្រហារណាមួយមកលើតំបន់នេះ ដោយមិនចាំបាច់បារម្ភថានឹងប៉ះពាល់ដល់ពលរដ្ឋរបស់ខ្លួន។
លោកថា៖ «បើពលរដ្ឋសៀមវិលចូលទឹកដីសៀមគេវិញ ក្រុងប៉ោយប៉ែតយើងលែងមានសុវត្ថិភាពហើយ ទោះជាមានជាតិសាសន៍អីផ្សេង ច្រើនទៀតក៏អត់ប្រយោជន៍ដែរ។ យើងមានតែចែកជើងគ្នាហ្នឹងឯង។ តែជនជាតិសៀមលែងនៅប៉ោយប៉ែត គឺវាលែងខ្វល់ហើយ គឺវាអាចនឹងផ្លោងគ្រាប់ចូលពេលណាក៏បានដែរ គឺមានន័យអញ្ចឹង»។
លោកអំពាវនាវឱ្យអាជ្ញាធរក្រុង បង្កើនការតាមដាន និងផ្ដល់ដំណឹងដល់ពលរដ្ឋឱ្យបានឆាប់រហ័ស ប្រសិនបើសភាពការណ៍មិនប្រក្រតី ជាពិសេសត្រូវសម្របសម្រួលជាមួយថៅកែក្រុមហ៊ុនណា ដែលមិនអនុញ្ញាតឱ្យបុគ្គលិកខ្មែរភៀសសឹក។
វីអូឌី មិនអាចទាក់ទងអភិបាលក្រុងប៉ោយប៉ែត លោក គាត ហ៊ុល ដើម្បីសុំការអត្ថាធិប្បាយបន្ថែមបានទេជុំវិញករណីនេះ។ តាមរយៈការរាយការណ៍របស់កាសែត ខ្មែរថាមស៍ នៅថ្ងៃទី១០ ខែធ្នូ ក្រុងប៉ោយប៉ែត មានជនជាតិថៃប្រមាណ ២ម៉ឺន ៦ពាន់នាក់ស្នាក់នៅ។
ប៉ុន្តែសំឡេងគ្រាប់ផ្លោង និងវត្តមានដ្រូនស៊ើបការណ៍របស់យោធាថៃនៅក្រុងប៉ោយប៉ែតកាលពីថ្ងៃម្សិលម៉ិញ ក៏បានបង្កការភ័យខ្លាចដល់ជនជាតិថៃរបស់ខ្លួនផងដែរ ដោយពួកគេបានចេញមកអង្គុយអុជធូបបែរបន់តាមមុខផ្ទះព្រោងព្រាត រហូតដល់មានការជម្លៀសខ្លួនចេញកាលពីយប់ម៉ិញ។
របាយការណ៍ក្រសួងមហាផ្ទៃ នៅថ្ងៃទី១១ ខែធ្នូនេះ បានឱ្យដឹងថា កម្ពុជាមានជនភៀសសឹកកើនឡើងដល់ជាង ៥ម៉ឺន ៥ពាន់គ្រួសារ ឬប្រមាណជិត២០ម៉ឺននាក់។ ក្នុងរយៈពេលជិត៥ថ្ងៃនៃការវាយប្រហាររបស់ថៃនេះដែរ បានសម្លាប់ពលរដ្ឋស៊ីវិលខ្មែរ ១០នាក់ និងរបួស៦០នាក់។
គិតមកទល់ពេលនេះ តំបន់មួយចំនួននៅជាយក្រុងប៉ោយប៉ែត ដូចជា ព្រៃគប់ អូរនាង ទួលប្រាសាទ និងក៥ ត្រូវបានអាជ្ញាធរប្រកាសឱ្យពលរដ្ឋជម្លៀសខ្លួន កាលពីថ្ងៃទី៨ ចំណែកនៅថ្ងៃទី៩ រហូតមកដល់ពេលនេះ ប្រជាពលរដ្ឋនៅកណ្ដាលក្រុងប៉ោយប៉ែត បាននាំគ្នាជម្លៀសចេញជាបន្តបន្ទាប់។
ខណៈក្រុងប៉ោយប៉ែត នៅជាប់កៀកនឹងព្រំដែនថៃ ពលរដ្ឋបារម្ភថា ថៃទំនងអាចកំណត់តំបន់នេះជាគោលដៅវាយប្រហារបន្ទាប់ ដោយសារមានកាស៊ីណូ និងអគារប្រតិបត្តិការអនឡាញច្រើន ជាពិសេសកម្មសិទ្ធិរបស់សមាជិកព្រឹទ្ធសភា លោក កុក អាន៕
