គណៈកម្មាធិការសិទ្ធិមនុស្សកម្ពុជា នឹងដាក់ញត្តិបន្ទាន់ទៅឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្ស នៅទីក្រុងហ្សឺណែវ និងភាគីពាក់ព័ន្ធផ្សេងទៀត ដោយប្តឹងមេទាហានថៃចំនួន ២រូប ដែលបានវាយប្រហារលើជនស៊ីវិលកម្ពុជា និងតំបន់ប្រាសាទ ដោយមិនរើសគោលដៅ ដែលជាអំពើឧក្រិដ្ឋកម្មសង្គ្រាម និងរំលោភសិទ្ធិមនុស្សយ៉ាងធ្ងន់ធ្ងរ។
ក្នុងសេចក្តីថ្លែងការណ៍របស់គណៈកម្មាធិការសិទ្ធិមនុស្សកម្ពុជា (គ.ស.ម.ក.) ចេញផ្សាយនៅថ្ងៃទី១១ ខែធ្នូ បានលើកឡើងថា គណៈកម្មាធិការនេះ មានក្តីបារម្ភយ៉ាងខ្លាំង និងធ្វើការថ្កោលទោសចំពោះការវាយប្រហារយ៉ាងព្រៃផ្សៃរបស់យោធាថៃ ក្រោមការដឹកនាំរបស់លោក Weerayuth Raksil មេបញ្ជាការភូមិភាគ២ថៃ និងលោក Worayos Luangsuwan មេបញ្ជាការភូមិភាគ១ថៃ ដែលបានប្រើប្រាស់អាវុធគ្រប់ប្រភេទ រួមទាំងផ្សែងពុល មកលើទីតាំងភូមិសាស្ត្ររបស់ជនស៊ីវិលនៅខេត្តចំនួន៥ជាប់ព្រំដែន ព្រមទាំងការបំផ្លិចបំផ្លាញប្រាសាទបុរាណដែលជាសម្បត្តិបេតិកភណ្ឌពិភពលោក។
សេចក្តីថ្លែងការណ៍នោះ បានគូសបញ្ជាក់ថា៖ «ទង្វើអមនុស្សធម៌ និងយង់ឃ្នងទាំងនេះ គឺជាការរំលោភបំពានយ៉ាងធ្ងន់ធ្ងរលើច្បាប់សិទ្ធិមនុស្ស និងច្បាប់មនុស្សធម៌អន្តរជាតិ ព្រមទាំងជាបទល្មើសឧក្រិដ្ឋកម្មសង្គ្រាមផងដែរ»។
ការណ៍នេះ គណៈកម្មាធិការសិទ្ធិមនុស្សកម្ពុជា នឹងដាក់ញត្តិបន្ទាន់បន្ថែមទៀត លើករណីអំពើព្រៃផ្សៃនិងយង់ឃ្នងរបស់យោធាថៃ លោក Weerayuth Raksil និងលោក Worayos Luangsuwan ប្តឹងទៅឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្ស នៅទីក្រុងហ្សឺណែវ ប្រទេសស្វីស និងភាគីពាក់ព័ន្ធដទៃទៀត ឱ្យបើកការស៊ើបអង្កេតដោយឯករាជ្យ ចាត់វិធានការជាបន្ទាន់និងម៉ឹងម៉ាត់ ព្រមទាំងទាមទារឱ្យមានការទទួលខុសត្រូវចំពោះមុខច្បាប់។
គណៈកម្មាធិការសិទ្ធិមនុស្សកម្ពុជា ក៏បានទទូចស្នើសុំដល់សហគមន៍អន្តរជាតិ និងតំបន់ដាក់សម្ពាធលើប្រទេសថៃ ឱ្យបញ្ឈប់សកម្មភាពបំពានច្បាប់ទាំងនេះជាបន្ទាន់ និងថ្កោលទោសមេទាហានថៃទាំង២នាក់នេះ ព្រមទាំងបុគ្គលពាក់ព័ន្ធទាំងអស់ ឱ្យទទួលខុសត្រូវទាំងស្រុង ស្របតាមច្បាប់អន្តរជាតិចំពោះផលប៉ះពាល់ទាំងឡាយ ដែលបង្កឡើងដោយការឈ្លានពានរបស់ប្រទេសថៃ។
តាមរបាយការណ៍របស់ក្រសួងមហាផ្ទៃ និងក្រសួងការពារជាតិ គិតមកដល់ថ្ងៃទី១១ ខែធ្នូ ឆ្នាំ២០២៥ ដែលជាថ្ងៃទី៥ នៃការវាយប្រហាររបស់យោធាថៃ មកលើដែនអធិបតេយ្យកម្ពុជា បានបណ្តាលឱ្យជនស៊ីវិលចំនួន ១១នាក់បានស្លាប់ ក្នុងនោះមានទារកម្នាក់ និងជាង ៧០នាក់ទៀតរងរបួស និងមានជនភៀសសឹកជិត ២០ម៉ឺននាក់៕
