ប្រធានអាស៊ានប្តូរវេន នាយករដ្ឋមន្ត្រីម៉ាឡេស៊ី លោក អាន់វ៉ា អ៊ីប្រាហ៊ីម បង្ហាញជំហរ ចង់ឱ្យកម្ពុជា-ថៃ គោរពបទឈប់បាញ់ត្រឹមម៉ោង១២យប់នេះ តាមការផ្តល់ភ្លើងខៀវពីប្រធានាធិបតីសហរដ្ឋអាមេរិក ខណៈថៃបើកការឈ្លានពានកម្ពុជា ជាថ្មីទៀតចូលដល់ថ្ងៃទី៧។
លោក អាន់វ៉ា អ៊ីប្រាហ៊ីម បានឱ្យដឹងតាមសេចក្តីប្រកាសថ្មីមួយនៅថ្ងៃទី១៣ ខែធ្នូ ២០១៥ នេះ ថាបន្ទាប់ពី ពិភាក្សា ជាមួយប្រធានាធិបតីអាមេរិក លោក ដូណាល់ ត្រាំ និងដោយមើលឃើញភាពតានតឹង ដែលនៅបន្តកើតមានតាមបណ្តោយព្រំដែនកម្ពុជា-ថៃ លោកបានជួបសន្ទនាតាមទូរស័ព្ទដាច់ដោយឡែក ពីគ្នាជាមួយ នាយករដ្ឋមន្ត្រីថៃ លោក អនុទីន ឆានវីរៈគុល និងនាយករដ្ឋមន្ត្រីកម្ពុជា លោក ហ៊ុន ម៉ាណែត។
លោកថា៖ «ម៉ាឡេស៊ីជំរុញឱ្យភាគីទាំងសងខាងប្រកាន់យកនូវភាពអត់ធ្មត់ខ្ពស់បំផុត បញ្ឈប់រាល់ទម្រង់នៃអរិភាព និងផ្អាករាល់សកម្មភាពយោធាបន្ថែមទៀត រួមទាំងការប្រើប្រាស់កម្លាំង ឬការចល័តទ័ពបន្ថែម ដោយចាប់អនុវត្តនៅ ថ្ងៃទី១៣ ខែធ្នូ ឆ្នាំ២០២៥ វេលាម៉ោង ២២:០០ នាទី »។
ចំណែក លោក ហ៊ុន ម៉ាណែត បានបញ្ជាក់ជំហរថា៖ «កម្ពុជាស្វាគមន៍ និងគាំទ្រគំនិតផ្តួចផ្តើម របស់ឯ.ឧ អាន់វ៉ា អ៊ីប្រាហ៊ីម នាយករដ្ឋមន្ត្រីម៉ាឡេស៊ី សម្រាប់ការឈប់បាញ់នាយប់នេះ ដោយមានការតាមដានត្រួតពិនិត្យដោយ ក្រុមអ្នកសង្កេតការអាស៊ាន (AOT) និងចូលរួមដោយសហរដ្ឋអាមេរិក»។
ដោយឡែក រដ្ឋមន្ត្រីក្រសួងការពារជាតិថៃ លោក ណាត់ថាពល ណាក់ផានិត ថ្លែងប្រាប់សារព័ត៌ថៃ នៅថ្ងៃទី១៣ ខែធ្នូនេះថា នឹងមិនមានបទឈប់បាញ់ណាមួយកើតឡើងទេ រហូតដល់កម្ពុជាបញ្ចប់សកម្មភាពអរិភាពរបស់ខ្លួនយ៉ាងច្បាស់លាស់។ នេះបើយោងតាមការចុះផ្សាយរបស់កាសែត khaosod។ យ៉ាងណាបើតាម លោក អាន់វ៉ា អ៊ីប្រាហ៊ីម នៅតែប្តេជ្ញាចិត្តធ្វើការយ៉ាងជិតស្និទ្ធជាមួយដៃគូអាស៊ាន និងសហគមន៍អន្តរជាតិ ដើម្បីធានាថា កិច្ចសន្ទនា ភាពអត់ធ្មត់ និងការទូត នឹងមានជ័យជម្នះ៕
