មេដឹកនាំបក្សកាន់អំណាចកម្ពុជា លោក ហ៊ុន សែន បានផ្តល់យោបល់ទៅកាន់នាយករដ្ឋមន្ត្រី និងរដ្ឋាភិបាលឱ្យពិចារណាលើការផ្អាក រាល់ការធ្វើដំណើររបស់ប្រជាពលរដ្ឋខ្មែរ និងថៃឆ្លងកាត់ព្រំដែន រហូតបទឈប់បាញ់ត្រូវបានអនុវត្តពេញលេញ ដើម្បីរក្សាសុវត្ថិភាព ដោយសំអាងថា ប៉ុន្មានថ្ងៃមកនេះ កងទ័ពថៃបានឈ្លានពាន វាយប្រហារ និងសម្លាប់ពលរដ្ឋខ្មែរ ដោយគ្មានការរើសមុខ សូម្បីតែស្ពាន ថ្នល់សាលារៀន និងវត្តអារាមជាដើម។
លោក ហ៊ុន សែន បានទម្លាយសារ នៅថ្ងៃទី១៣ ខែធ្នូ ឆ្នាំ២០២៥នេះថា ប៉ុន្មានថ្ងៃមកនេះ កងទ័ពថៃបានឈ្លានពានវាយប្រហារ និងសម្លាប់ប្រជាជនកម្ពុជាដោយគ្មានការរើសមុខ និងរើសទីកន្លែង សូម្បីតែស្ពាន ថ្នល់សាលារៀន វត្តអារាម ក៏ពួកគេប្រើ កាំភ្លើងធំ និងយន្តហោះវាយបំផ្លាញ
ចោល បាញ់ផ្សែងពុល គ្រាប់បែកចង្កោម ត្រូវបានប្រើប្រាស់ជាច្រើនកន្លែង រាប់ទាំងកន្លែងដែលមានពលរដ្ឋថៃរស់នៅ និងធ្វើការនៅក្នុងទឹកដីកម្ពុជាផងដែរ។
លោកគូសបញ្ជាក់ថា ក្នុងសភាពការណ៍បែបនេះ ក្នុងនាមលោកជាប្រធានព្រឹទ្ធសភា ប្រធានក្រុមឧត្តមប្រឹក្សាផ្ទាល់ព្រះមហាក្សត្រ និងជាប្រធានគណបក្សកាន់អំណាច លោកជូនយោបល់ទៅកាន់នាយករដ្ឋមន្ត្រី និងរាជរដ្ឋាភិបាលពិចារណាលើការផ្អាករាល់ការធ្វើដំណើររបស់ប្រជាជនខ្មែរ និងប្រជាជនថៃឆ្លងកាត់ព្រំដែន។
លើសពីនេះលោកបានសង្កត់ធ្ងន់ថា ពលរដ្ឋខ្មែរ ដែលកំពុងស្ថិតក្នុងប្រទេសថៃ ត្រូវបន្តរស់នៅ និងធ្វើការនៅក្នុងប្រទេសថៃ និងពលរដ្ឋថៃ ដែលកំពុងរស់នៅ និងធ្វើការនៅកម្ពុជា ត្រូវបន្តស្ថិតនៅកម្ពុជា រហូតបទឈប់បាញ់ត្រូវបានអនុវត្តពេញលេញ។
លោកសំអាងថា វិធានការនេះ គឺដើម្បីធានាសុវត្ថិភាពប្រជាពលរដ្ឋខ្មែរ និងប្រជាជនថៃ កុំឲ្យមានគ្រោះថ្នាក់ពេលធ្វើដំណើរ ពិសេសពេលធ្វើដំណើរឆ្លងកាត់ព្រំដែន។
ពលរដ្ឋខ្មែរដែលកំពុងរស់នៅប្រទេសថៃ និងប្រជាជនថៃមេត្តាយោគយល់។ ហើយថារដ្ឋាភិបាលកម្ពុជាជួយការពារសុវត្ថិភាពប្រជាជនថៃ ដែលកំពុងរស់នៅកម្ពុជា កុំឲ្យពួកគេរងគ្រោះដោយសារគ្រាប់កាំភ្លើង ឬគ្រាប់បែក ឬផ្សែងពុលរបស់ថៃ។
ជុំវិញរឿងនេះ នៅព្រឹកថ្ងៃទី១៣ ខែធ្នូនេះ ក្រសួងការពាជាតិកម្ពុជាបានអះអាងថា យោធាថៃនៅថ្ងៃនេះ បានប្រើនាវាចម្បាំងបាញ់ផ្លោងមកលើខេត្តកោះកុង ប្រើយន្តហោះចម្បាំងF-16 ទម្លាក់គ្រាប់បែក ផ្តាច់ស្ពានមេទឹក នៅឃុំថ្មដា ស្រុកវាលវែង ខេត្តពោធិ៍សាត់ និងប្រើអាវុធធុនធ្ងន់បាញ់កម្ទេចអគារ និងកាស៊ីណូ មួយចំនួនក្នុងខេត្តពោធិ៍សាត់។ លើសពីនេះយោថៃ ក៏បានប្រើអាវុធធុនធ្ងន់ បាញ់ផ្លោងទៅលើប្រសាទបូរាណខ្មែរ ដូចជាប្រាសាទតាក្របី និងប្រើយន្តហោះចម្បាំង F-16 នេះ ទម្លាក់គ្រាប់បែកលើប្រសាទព្រះវិហារ ដែលមានអាយុវកាលជាង១ពាន់ឆ្នាំ និងបាញ់ផ្សែងពុលចូលភូមិព្រៃចាន់ និងទីតាំងមួយចំនួនទៀតជាដើម ដែលបំពានលើច្បាប់អន្តរជាតិ និងកិច្ចព្រមព្រៀងនានាស្តីពីបទឈប់បាញ់។
