បញ្ញវ័ន្តខ្មែរ បន្តជំរុញឱ្យខ្មែរគ្រប់និន្នាការនយោបាយ ទាំងព្រះសង្ឃ និងគ្រហស្ថរួបរួមសាមគ្គី ស្រាក់ដៃគ្នាជួយកងទ័ពជួរមុខ និងជួយជនភៀសសឹក ដែលកំពុងជួបការលំបាកយ៉ាងខ្លាំង ខណៈលោកនាយករដ្ឋមន្ត្រីហ៊ុន ម៉ាណែត បានបង្ហាញពីមោទកភាពនៅពេលឃើញខ្មែរនៅគ្រប់ទិសទីរួបរួមសាមគ្គីគ្នា។
ការបង្ហាញពីការរួបរួមសាមគ្គីគ្នាកាន់តែខ្លាំងរបស់ប្រជាជាតិខ្មែរនេះ គឺខណៈដែលថៃមិនគោរពបទឈប់បាញ់ជាថ្មីទៀត ដែលបានដាក់ឱសានវាទនៅត្រឹមម៉ោង១០យប់ ថ្ងៃទី១៣ ខែធ្នូ ដោយលោក អាន់វ៉ា អ៊ីប្រាហ៊ីម នាយករដ្ឋមន្ត្រីម៉ាឡេស៊ី ដែលជាប្រធានអាស៊ាន បន្ទាប់ពីលោក ដូណាល់ ត្រាំ ប្រធានាធិបតីសហរដ្ឋអាមេរិក បានជួបសន្ទនាតាមទូរសព្ទជាមួយលោកនាយករដ្ឋមន្ត្រី ហ៊ុន ម៉ាណែត និងនាយករដ្ឋមន្ត្រីចាំផ្ទះថៃ លោកអនុទីន ឆាន់វីរៈគុល ដោយបានស្នើឱ្យប្រទេសទាំងពីរ គោរពបទឈប់បាញ់ដែលបានចុះកិច្ចព្រមព្រៀងជាមួយគ្នា ក្នុងសេចក្តីថ្លែងការណ៍រួមនៅទីក្រុងកូឡាឡំពួរ កាលពីថ្ងៃទី២៦ខែតុលា។
លោក ហ៊ុន ម៉ាណែត បានសរសេរនៅលើបណ្តាញសង្គមរបស់លោក នៅថ្ងៃទី១៤ធ្នូនេះថា លោកមានមោទកភាព ដែលបានឃើញនូវកម្លាំងដ៏រឹងមាំនៃមហាសាមគ្គីជាតិខ្មែរ ក្នុងកាលៈទេសៈដែលប្រទេសជាតិ កំពុងជួបប្រទះនឹងការលំបាក ដោយសារការឈ្លានពានពីប្រទេសជិតខាង។
លោកនាយករដ្ឋមន្ត្រីលើកឡើងថា ព្រះមហាក្សត្រ ថ្នាក់ដឹកនាំ មន្ត្រីរាជការគ្រប់ជាន់ថ្នាក់ ប្រជាពលរដ្ឋខ្មែរគ្រប់និន្នាការ សាសនា ទាំងក្នុងនិងក្រៅប្រទេស បានបង្ហាញនូវស្មារតីសាមគ្គីជាតិជាធ្លុងមួយ នៅពីក្រោយវីរៈកងទ័ព វីរៈនគរបាលជាតិគ្រប់រូប ដែលកំពុងឈរជើងបំពេញបេសកកម្មយ៉ាងអង់អាចក្លាហាន ការពារដែនអធិបតេយ្យភាព និងបូរណភាពទឹកដីរបស់កម្ពុជា។
លោកនាយករដ្ឋមន្ត្រី សូមឱ្យកម្លាំងមហាសាមគ្គីជាតិខ្មែរ នៅបន្តជាថាមពលដ៏រឹងមាំ សម្រាប់គាំទ្រនិងផ្ដល់កម្លាំងចិត្តដល់វីរៈកងទ័ព វីរៈនគរបាលជាតិរបស់កម្ពុជា បន្តបេសកកម្មការពារទឹកដី និងថារាជរដ្ឋាភិបាលស្ថិតនៅជាមួយប្រជាពលរដ្ឋ ក៏ដូចជាវីរៈកងទ័ព វីរៈនគរបាលជាតិខ្មែរគ្រប់ពេលវេលា។
ជាមួយគ្នានេះ សម្ដេចព្រះមហាអរិយវង្ស យ៉ន សេងយៀត ព្រះចៅអធិការវត្តឧណ្ណាលោម មានថេរដីកានៅក្នុងពិធីសច្ចកិរិយានៅរាត្រីថ្ងៃទី១៣ ខែធ្នូ ឆ្នាំ២០២៥ថា ពេលនេះទឹកដីយើងកំពុងរងការវាយប្រហារយ៉ាងខ្លាំងពីប្រទេសថៃ ដូច្នេះសូមព្រះតេជគុណគ្រប់ព្រះអង្គ និមន្តចេញពីវត្តហើយ ទៅជួយបរិស័ទ្ធរបស់យើងដែលកំពុងរងទុក្ខ។
ព្រះអង្គមានសង្សដីកាថា៖«ទាំងព្រះសង្ឃ ទាំងគ្រហស្ថ ព្រះករុណាគ្រប់ព្រះអង្គទូទាំងប្រទេស ពេលនេះទឹកដីរបស់យើងកំពុងរងនូការវាយប្រហារយ៉ាងខ្លាំងអំពីប្រទេសថៃ។ ព្រះសង្ឃគ្រប់ព្រះអង្គទូទាំងប្រទេស សូមព្រះតេជគុណនិមន្តចាកចេញពីវត្ត ហើយចូលទៅជួយបរិស័ទរបស់យើងដែលកំពុងតែរងទុក្ខ និងជម្លៀសនៅតាមទល់ដែន។ អ្វីគ្រប់យ៉ាង ដែលព្រះអង្គអាចធ្វើបានព្រះអង្គត្រូវតែធ្វើ ពីព្រោះញោមកំពុងតែរងទុក្ខវេទនា។ មួយវិញទៀត ពលរដ្ឋខ្មែរជាទីស្រឡាញ់ សូមអស់លោកទាំងអស់មេត្តាចូលរួមជួយអ្វីដែលអាចធ្វើបាន ដល់បងប្អូនរបស់យើងដែលកំពុងតែជម្លៀស»។
លោក មាជ សុវណ្ណារ៉ា ប្រធានគណបក្សជំនាន់ថ្មី ដែលក្នុងរយៈពេលជាច្រើនថ្ងៃមកនេះ បានធ្វើដំណើរចេញពីខេត្តមួយទៅខេត្តមួយ នៅតាមបណ្តោយព្រំដែនកម្ពុជាថៃ បានប្រាប់វីអូឌីនៅថ្ងៃទី១៤ខែធ្នូនេះថា តាំងពីមានការផ្ទុះសង្គ្រាមជាលើកទី២ កាលពីថ្ងៃទី៧ខែធ្នូមក នៅតាមវត្តនិងសាលារៀនរាប់រយ ចាប់តាំងពីខេត្តពោធិ៍សាត់ បាត់តំបង ប៉ៃលិន បន្ទាយមានជ័យ ឧត្តរមានជ័យ និងខេត្តព្រះវិហារ គឺពេញណែនទៅដោយជនភៀសសឹក។
លោកថា បើទោះបីជាជនភៀសសឹកទាំងនោះ អ្នកខ្លះមានរថយន្ត មានគោយន្ត មានម៉ូតូឬមានរ៉ឺម៉កក៏ដោយ ក៏ពួកគាត់បានរត់ភៀសខ្លួនគេចចេញពីគ្រាប់ផ្លោងរបស់កងទ័ពសៀមជ្រុលនិយម មិនបានយកអ្វីជាប់តាមខ្លួនបានច្រើនទេ ជាពិសេសគ្រឿងហូបចុក ខោអាវស្លៀកពាក់ ទឹកប្រើប្រាស់ និងកន្លែងស្នាក់នៅជាដើម ដែលនៅពេលនេះ កំពុងជួបការលំបាកដែលត្រូវការជួយជាបន្ទាន់។
លោកថា៖«ខ្វះខាតបំផុត គឺអាហារហូបចុកប្រចាំថ្ងៃ ទឹកប្រើប្រាស់ ថ្នាំសង្កូវអីៗវាអាចមានជំងឺឆ្លង ដោយសារតែមនុស្សច្រើនខ្វះអនាម័យអីជាដើម។ ចឹងទោះបីយ៉ាងណា យើងឃើញថា ទឹកចិត្តខ្មែរយើងបង្កើតនូវក្រុមសប្បុរសធម៌ ទាំងយុវជន ទាំងមន្ត្រីរាជការ កងកម្លាំងប្រដាប់អាវុធខ្លួនឯង ក៏ដូចជាខ្មែរក្រៅស្រុកក្នុងស្រុក គឺថាបានសម្រុកពីរាជធានីភ្នំពេញ ពីតាមបណ្តាខេត្ត ទាំងព្រះសង្ឃ ទាំងពលរដ្ឋ បានយកស្បៀង សម្លៀកបំពាក់ទៅចែកជនភៀសសឹកច្រើនណាស់ ប៉ុន្តែវានៅតែមិនគ្រប់គ្រាន់ទេ ពីព្រោះជនភៀសសឹកនៅពេលនេះច្រើនណាស់ដល់លាននាក់ទៅហើយ»។
ជាមួយគ្នានេះ លោក សុវណ្ណារ៉ា លើកឡើងថា នៅក្នុងកាលៈទេសៈដ៏លំបាកនេះ មិនមែនជាពេលដែលខ្មែរត្រូវប្រកាន់និន្នាការនយោបាយ នៅបន្តឈ្លោះគ្នានោះទេ ប៉ុន្តែគឺជាពេលវេលាដែលខ្មែរត្រូវរួបរួមសាមគ្គីគ្នាជួយខ្មែរដើម្បីការពារខ្មែរ។
លោកថា៖ «ចឹងពេលនេះ មិនមែនជាពេលដែលយើងប្រកាន់និន្នាការគណបក្សនយោបាយទេ ខ្មែរតែមួយ ខ្មែរជួយខ្មែរ ខ្មែរការពារខ្មែរ ខ្មែរបម្រើខ្មែរ ខ្មែរស្រឡាញ់ខ្មែរ អាហ្នឹងហើយដែលជាការសាមគ្គីភាពរឹងមាំ ដើម្បីបង្ហាញឱ្យសត្រូវបរទេសឈ្លានពានហ្នឹង មើលឃើញថា ខ្មែរពេលនេះដែលខ្មែរត្រូវតែការពារ ត្រូវតែងើបឡើងឈររឹងមាំក្លាហាន ដើម្បីប្រយុទ្ធទប់ទល់ ហើយនឹងលើកទឹកចិត្តដល់វីរៈកងទ័ព ខ្ញុំឃើញគ្រប់ច្រកល្ហក។ យើងទម្លាក់និន្នាការនយោបាយ យើងរើសអើង ឬក៏យើងមានគំនុំនយោបាយបុគ្គលណា គឺថាយើងដាក់ចោល ហើយយើងចាប់ដៃគ្នាទាញចងជាព្រ័ត្ររុំ ដើម្បីទប់នឹងសត្រូវបរទេសឈ្លានពាន»។
លោក មុត ចន្ថា អតីតនាយខុទ្ទកាល័យលោក កឹម សុខា អតីតប្រធានគណបក្សសង្គ្រោះជាតិបានសរសេរលើបណ្តាញសង្គមថា លោករីករាយបំផុតនៅពេលស្តាប់ឮមេដឹកនាំខ្មែរ អំពាវនាវឱ្យខ្មែររួបរួម ដើម្បីប្រឆាំងចំពោះសត្រូវឈ្លានពានទឹកដី។
ប៉ុន្តែលោកក៏សូមឱ្យមានការឯកភាពជាតិខ្មែរទាំងមូល ដោយមិនគិតពីនិន្នាការនយោបាយ។ អតីតមន្ត្រីគណបក្សសង្គ្រោះជាតិរូបនេះលើកឡើងក្នុងសំណេរដើមថា៖ «ឯកឧត្តម កឹម សុខា ក៏ជាតួអង្គនយោបាយសំខាន់ម្នាក់ ក្នុងការធ្វើឱ្យខ្មែរឯកភាពជាតិ ដូច្នេះគួរដល់ពេលវេលាសមស្របបំផុត ដើម្បីបញ្ចប់រឿងក្តីរបស់លោក សំដៅធ្វើឱ្យខ្មែរយើងខ្លាំង តទល់នឹងសត្រូវឈ្លានពាន»។
ទាក់ទងនឹងលំនៅដ្ឋាននិងទ្រព្យសម្បត្តិរបស់ជនភៀសសឹក នៅតាមព្រំដែន លោកបណ្ឌិត មាស នី អ្នកសិក្សាស្រាវជ្រាវពីការអភិវឌ្ឍសង្គម និងជាអ្នកវិភាគនយោបាយ បានសរសេរលើបណ្តាញសង្គមរបស់លោកថា អាជ្ញាធរមូលដ្ឋាន និងប្រជាការពារភូមិ មានកាតព្វកិច្ចសំខាន់ក្នុងការថែរក្សាទ្រព្យសម្បត្តិរដ្ឋ និងទ្រព្យសម្បត្តិរបស់ប្រជាពលរដ្ឋក្នុងភូមិ ដែលប្រជាពលរដ្ឋបានភៀសខ្លួនចេញ។
លោកបណ្ឌិត មាស នី លើកឡើងថា លោកមានមោទកភាព នៅពេលឃើញខ្មែរបានស្គាល់សត្រូវរួមទាំងអស់គ្នា គឺបរទេសឈ្លានពាន។
ជាមួយគ្នានេះ បញ្ញវ័ន្តខ្មែរដែលមានវ័យចំណាស់ម្នាក់ទៀត គឺលោកបណ្ឌិត ឡៅ ម៉ុងហៃ បានចូលមកសរសេរបន្ទរថា អាជ្ញាធរត្រូវប្រកាសដាក់តំបន់ភូមិឃុំ ស្រុក ដែលអ្នកស្រុកបានភៀសសឹកចាកចេញពីផ្ទះជាតំបន់មានភាពអាសន្ន និងត្រូវដាក់កម្លាំងនគរបាល ឲ្យយាមល្បាតរក្សាការពារទ្រព្យសម្បត្តិ និងសត្វពាហន:របស់អ្នកស្រុក។
ជាមួយគ្នានេះ លោកបណ្ឌិត ឡៅ ម៉ុងហៃ បានសរសេរក្រើនរំឭកលើបណ្តាញសង្គមរបស់លោកថា កម្ពុជាត្រូវស្គាល់សៀមឱ្យបានច្រើន ដោយបញ្ជាក់ថា សៀមជាសម្ព័ន្ធមិត្តក្រៅអង្គការណាតូដ៏សំខាន់មួយរបស់អាមេរិក។
ឆ្លើតតបទៅនឹងការលើកឡើងពីការខ្វះខាតទឹកស្អាត នៅតាមជំរុំជនភៀសសឹកនានា ហើយមានការស្នើឱ្យក្រសួងមហាផ្ទៃ ប្រមូលរថយន្តពន្លត់អគ្គីភ័យពីតាមបណ្តាខេត្តនានា ដើម្បីទៅប្រចាំការដឹកទឹកជូនជនភៀសសឹកប្រើប្រាស់នោះ លោក ទូច សុខៈ អ្នកនាំពាក្យរងក្រសួងមហាផ្ទៃ បានឆ្លើយតបនៅថ្ងៃទី១៤ខែធ្នូនេះ តាមបណ្តាញសង្គមរបស់លោកថា លោកឧបនាយករដ្ឋមន្ត្រី ស សុខា កំពុងរៀបចំចាត់ចែងករណីនេះ និងការងារផ្សេងៗច្រើនទៀត ដើម្បីជួយសម្រួលដល់ទុក្ខលំបាករបស់ជនភៀសសឹក។
នាយករដ្ឋមន្ត្រីចាំផ្ទះរបស់ថៃ លោក អនុទីន ឆានវីរៈគុល បានច្រានចោលសេចក្ដីរាយការណ៍ អំពីកិច្ចព្រមព្រៀងឈប់បាញ់ បន្ទាប់ពីនាយករដ្ឋមន្ត្រីម៉ាឡេស៊ី អាន់វ៉ា អ៊ីប្រាហ៊ីម បានបង្ហោះសារលើបណ្ដាញសង្គម អំពាវនាវឱ្យប្រទេសថៃ និងកម្ពុជាបញ្ឈប់ការប្រយុទ្ធគ្នាត្រឹមម៉ោង ១០ យប់ថ្ងៃទី១៣ ខែធ្នូ។
លោក អនុទីន បាននិយាយថា មិនមានកិច្ចព្រមព្រៀងណាមួយឡើយ ហើយបានជំរុញឱ្យសាធារណជនថៃ ជឿជាក់លើការណែនាំជាផ្លូវការរបស់យោធាថៃ។ នាយករដ្ឋមន្ត្រីចាំផ្ទះរូបនេះ សង្កត់ធ្ងន់ថា សំណើរឈប់បាញ់ណាមួយ ត្រូវតែស្នើឡើងដោយផ្ទាល់ពីប្រទេសកម្ពុជា តាមរយៈបណ្តាញត្រឹមត្រូវ មិនមែនតាមរយៈសម្ពាធពីមេដឹកនាំប្រទេសដទៃ ឬសេចក្តីថ្លែងការណ៍ ដែលធ្វើឡើងនៅលើប្រព័ន្ធផ្សព្វផ្សាយសង្គមនោះទេ។ នេះបើយោងតាមកាសែតថៃ The Nation។
ក្រសួងការពារជាតិកម្ពុជា បានចេញសេចក្តីសង្ខេបស្ថានការណ៍នៅតាមបន្ទាត់ព្រំដែនកម្ពុជា-ថៃថា គិតចាប់ពីម៉ោង ៨:ព្រឹក រហូតដល់ម៉ោង ១៣:០០នាទីរសៀលថ្ងៃទី១៤ ខែធ្នូ ឆ្នាំ២០២៥នេះ កងយោធាថៃនៅតែបន្តបាញ់ប្រហារ មកលើកងកម្លាំងកម្ពុជានៅយោធភូមិភាគទី៥ ក្នុងនោះនៅម៉ោង ៩:៥២នាទី យោធាថៃបានបាញ់ផ្លោងចូលភូមិសាស្ត្រភូមិព្រៃចាន់។
ម៉ោង ១០:៣៦នាទី យន្តហោះចម្បាំង F-16 របស់ថៃទម្លាក់ចំនួន ២គ្រាប់ នៅភូមិសាស្ត្រភូមិថ្មសិន ឃុំនិមិត្ត ស្រុកអូរជ្រៅ។ ម៉ោង ១០:៣៨នាទី F-16 ហោះលើភូមិសាស្ត្រឃុំ អូរបីជាន់។ ម៉ោង ១០:៥៨នាទី យោធាថៃបានប្រើដ្រូនស៊ើបការណ៍ ហោះក្តាប់សភាពការណ៍នៅភូមិសាស្ត្រឃុំអូរបីជាន់។ ម៉ោង ១១:២០នាទី កម្លាំងថ្មើរជើងរបស់យោធាថៃ បានព្យាយាមរុលចូលមកខាងមុខភូមិសាស្ត្របឹងត្រកួន។ ម៉ោង ១១:៥៥នាទី យោធាថៃបានបាញ់ផ្លោងចូលភូមិសាស្ត្រភូមិព្រៃចាន់ និងម៉ោង ១២:២៥នាទី យោធាថៃបានបាញ់ផ្លោងចូលភូមិសាស្ត្រភូមិបឹងត្រកួនជាដើម។
លោកបណ្ឌិត គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិតសភាកម្ពុជា បានសរសេរលើបណ្តាញសង្គមរបស់លោក នៅថ្ងៃទី១៤ខែធ្នូនេះថា គ្មានការឈឺចាប់ណាខ្លាំងជាងការឈឺចាប់ដែលប្រទេសជាតិ ត្រូវសត្រូវឈ្លានពាននិងប្រមាថនោះទេ។
លោកបានសម្តែងនូវការដឹងគុណដ៏ជ្រាលជ្រៅ និងជំពាក់គុណដ៏សែនធ្ងន់ ចំពោះបងប្អូនវីរកងទ័ពដ៏អង់អាចក្លាហាន ដែលបានលះបង់សាច់ស្រស់ឈាមស្រស់ និងពលីជីវិត ដើម្បីការពារទឹកដី និងប្រាសាទបុរាណដែលជាមរតកដូនតាខ្មែរយើង។
លោកលើកឡើងថា តាមរយៈការតស៊ូប្រយុទ្ធនឹងសត្រូវឈ្លានពាន រយៈពេលជាច្រើនថ្ងៃកន្លងមកនេះ យើងបានមើលឃើញយ៉ាងប្រត្យក្សនូវមហាសាមគ្គីជាតិ និងឯកភាពជាតិនៃមហាគ្រួសារខ្មែរ ទាំងនៅសមរភូមិមុខ និងសមរភូមិក្រោយ និងទាំងក្នុងប្រទេស និងក្រៅប្រទេស ដែលមិនធ្លាប់មានរាប់សតវត្សរ៍មកហើយ។
បញ្ញវ័ន្តរូបនេះ បញ្ជាក់ទៀតថា ខ្មែរម្នាក់ៗសុទ្ធតែមានការឈឺឆ្អាលចំពោះប្រទេសជាតិ និងការឈឺចាប់ចំពោះសត្រូវឈ្លានពាន ហើយបានប្រែក្លាយការឈឺឆ្អាល និងការឈឺចាប់ទាំងនោះទៅជាសកម្មភាពជាក់ស្ដែង តាមរយៈការគាំទ្រជាស្មារតី សម្ភារៈ ថវិកា និងបញ្ញាញាណទៅតាមសមត្ថភាព និងលទ្ធភាពរៀងៗខ្លួន។ ចំណែកបងប្អូនខ្មែរនៅឯនាយសមុទ្រ បានចេញតវ៉ាប្រឆាំងអំពើឈ្លានពានរបស់សត្រូវ ស្ទើរពាសពេញពិភពលោក ក្នុងស្មារតីខ្មែរតែមួយ។
ឈរលើស្មារតីនៃមហាសាមគ្គីជាតិ និងឯកភាពជាតិ ដែលខ្មែរមាននាពេលនេះ លោកបណ្ឌិត គិន ភា ជំរុញឱ្យខ្មែរគ្រប់និន្នាការនយោបាយ ត្រូវប្រែក្លាយមេរៀនសោកនាដកម្ម និងការឈឺចាប់ដែលបង្កឡើងដោយសត្រូវបរទេសឈ្លានពាននេះ ទៅជាការខិតខំប្រឹងប្រែងបន្ថែមទៀតក្នុងការពង្រឹងស្មារតីសាមគ្គីជាតិ និងឯកភាពជាតិយូរអង្វែង និងមានលក្ខណៈជាប្រព័ន្ធ និងខិតខំប្រឹងប្រែងពង្រឹងសមត្ថភាពជាតិខ្មែរ លើគ្រប់វិស័យទៅថ្ងៃអនាគត។
លោកថា៖ «ខ្មែររួម៖ រស់ ខ្លាំង អភិវឌ្ឍ»៕
