នាយករដ្ឋមន្ត្រីម៉ាឡេស៊ី និងជាប្រធានអាស៊ានប្តូរវេន លោក អាន់វ៉ា អ៊ីប្រាហ៊ីម(Anwar Ibrahim) និយាយថា ភាគីប្រទេសកម្ពុជានិងថៃ ស្នើពន្យាពេលកិច្ចប្រជុំរដ្ឋមន្ត្រីការបរទេសអាស៊ាន ចំពោះការវាយតម្លៃការវិវត្តចុងក្រោយនៃភាពតានតឹងនៅតាមព្រំដែន ដែលបានគ្រោងទុក ដើម្បីរៀបចំស្ថានការណ៍ឱ្យមានសណ្តាប់ធ្នាប់។
ប្រភពព័ត៌មានដឹស្តា(The Star) និង ប៊រណាម៉ា(Bernama) របស់ប្រទេសម៉ាឡេស៊ី បានចេញផ្សាយនៅថ្ងៃទី១៥ ខែធ្នូ ឆ្នាំ២០២៥នេះដូចគ្នាថា លោកនាយករដ្ឋមន្ត្រីបាននិយាយថា ភាគីប្រទេសទាំងពីរបានស្នើពន្យាពេលកិច្ចប្រជុំរដ្ឋមន្ត្រីការបរទេសអាស៊ាន ដែលគ្រោងនឹងធ្វើនៅថ្ងៃស្អែក ថ្ងៃទី១៦ ខែធ្នូ ឆ្នាំ២០២៥នេះ ដើម្បីធានាស្ថានការណ៍ឱ្យមានសណ្តាប់ធ្នាប់។
លោកនាយករដ្ឋមន្ត្រី បានប្រាប់អ្នកសារព័ត៌មាន បន្ទាប់ពីចាប់ផ្តើមអានសៀវភៅនៅឯវិទ្យាស្ថានអន្តរជាតិនៃការសិក្សាអ៊ីស្លាមកម្រិតខ្ពស់ នៅថ្ងៃទី១៥នេះថា៖ ‘‘យើងនៅតែសម្របសម្រួល និងតាមដាននូវការខំប្រឹងប្រែង។ ពួកគេបានស្នើពន្យារពេលកិច្ចប្រជុំរដ្ឋមន្ត្រីការបរទេសដែលបានគ្រោងទុកនៅថ្ងៃអង្គារ។ ដូច្នេះពួកយើងពន្យារពេលរៀបចំឱ្យមានសណ្តាប់ធ្នាប់។ ប៉ុន្តែយើងនៅតែទទូចឱ្យបញ្ឈប់ការប្រយុទ្ធ នេះគឺជារឿងសំខាន់ណាស់។ ខ្ញុំកំពុងទាក់ទងពួកគេតាមប្រព័ន្ធអនឡាញជារៀងរាល់ថ្ងៃ»។
ប្រភពបន្តថា នៅថ្ងៃទី១៤ ខែធ្នូ យោធារបស់ប្រទេសថៃ បានប្រកាសថា ពួកគេនឹងពិចារណាលើការបិទរាំងខ្ទប់ចំពោះការនាំចេញឥន្ធនៈមកប្រទេសកម្ពុជា ខណៈដែលការប្រយុទ្ធរីករាលដាលដល់តំបន់ឆ្នេរនៃតំបន់ព្រំដែនដែលមានជម្លោះ២ថ្ងៃ បន្ទាប់ពីលោកប្រធានាធិបតីអាមេរិក ដូណាល់ ត្រាំ បាននិយាយថា ភាគីទាំងសងខាងបានយល់ព្រមលើបទឈប់បាញ់ថ្មីមួយ។
ទិន្នន័យ និងលទ្ធផលនៃការតាមដានផ្កាយរណប និងត្រូវបានចងក្រង នឹងបង្ហាញដល់កិច្ចប្រជុំរដ្ឋមន្ត្រីការបរទេសអាស៊ាននៅថ្ងៃទី១៦ ខែធ្នូ ដោយផ្តល់ឱ្យរដ្ឋសមាជិកនូវព័ត៌មានដែលផ្អែកលើភស្តុតាង និងអព្យាក្រឹតអំពីការអភិវឌ្ឍ។
ជុំវិញរឿងនេះ តាមប្រភពការសែតកម្ពុជាថ្មី ជាភាសាអង់គ្លេស បានចុះផ្សាយថា ភាគីប្រទេសបារាំងសម្តែងការគាំទ្រចំពោះការអំពាវនាវរបស់ លោក អាន់វ៉ា អ៊ីប្រាហ៊ីម នាយករដ្ឋមន្ត្រីប្រទេសម៉ាឡេស៊ី ឱ្យមានបទឈប់បាញ់រវាងប្រទេសកម្ពុជានិងថៃជាបន្ទាន់ ខណៈដែលមានការប៉ះទង្គិចគ្នាតាមព្រំដែនកាន់តែខ្លាំងឡើង។
ប្រភពដដែល បានបន្តថា នៅក្នុងសេចក្តីថ្លែងការណ៍មួយ បារាំងបានជំរុញឱ្យភាគីទាំង២ បញ្ចប់អារិភាពដោយវិលត្រឡប់ទៅរកការសន្ទនាស្របសេចក្តីប្រកាសទីក្រុងគូឡាឡាំពួរ។
ប្រភពនោះ បន្តថា នាយករដ្ឋមន្ត្រីប្រទេសកម្ពុជា លោក ហ៊ុន ម៉ាណែត បានស្វាគមន៍ចំពោះគំនិតផ្តួចផ្តើមនេះដោយបាននិយាយថា ប្រទេសកម្ពុជាគាំទ្រឱ្យមានបទឈប់បាញ់ និងការផ្ទៀងផ្ទាត់ដោយអ្នកអង្កេតការណ៍អាស៊ាន និងការតាមដានរបស់សហរដ្ឋអាមេរិក៕
