សាលាឧទ្ធរណ៍ភ្នំពេញ បានច្រានចោលបណ្តឹងសុំឱ្យដោះលែងឱ្យមានសេរីភាពរបស់សកម្មជនផ្សព្វផ្សាយកិច្ចព្រមព្រៀងសន្តិភាពទីក្រុងប៉ារីស លោក ស៊្រុន ស៊្រន និងសកម្មជនផ្សេងទៀត ខណៈសហមេធាវីរបស់ពួកគេនៅតែបន្តស្នើសុំឱ្យដោះលែង ដោយថា នីតិវិធីនៃការឃុំខ្លួនបានអូសបន្លាយជាង១ឆ្នាំទៅហើយ។
លោក សឺន ជុំជួន មេធាវីការពារក្តីឱ្យសកម្មជន២៣តុលា បានថ្លែងថា សាលាឧទ្ធរណ៍ភ្នំពេញ នៅថ្ងៃទី១៥ ខែធ្នូនេះ បានសវនាការលើបណ្តឹងស្នើសុំដោះលែងឱ្យមានសេរីភាពវិញរបស់សកម្មជន២៣តុលា រួមមាន លោក ស៊្រុន ស្រ៊ន កញ្ញា ភឹង សោភា លោក សាន សិទ្ធ។ លោកបន្តថា ក្រោយការសួរដេញដោល តុលាការបានសម្រេចបដិសេធបណ្តឹងសុំនៅក្រៅឃុំនេះ ដោយលើកផលថា បណ្តឹងនេះផ្ទុយនឹងទម្រង់ច្បាប់។
ទោះជាយ៉ាងណា លោកថា ក្នុងនាមជាសហមេធាវីការពារក្តីឱ្យសកម្មជន២៣តុលា លោកនៅតែស្នើសុំឱ្យតុលាការដោះលែងកូនក្តីរបស់ខ្លួន ដោយសារការឃុំខ្លួនបានធ្វើឡើងជាង១ឆ្នាំ ដែលស្មើប្រមាណ ១ភាគ៣ នៃទោសអតិប្បរមា ២ឆ្នាំ។
សកម្មជនផ្សព្វផ្សាយកិច្ចព្រមព្រៀងទីក្រុងបារីស២៣តុលា លោក ស៊្រុន ស៊្រន កញ្ញា ភឹង សោភា និងលោក សាន សិទ្ធ ត្រូវសមត្ថកិច្ចចាប់ខ្លួនកាលពីថ្ងៃទី២៣ ខែកក្កដា ឆ្នាំ២០២៤ ដោយចោទពីបទ ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម។ ការចាប់ខ្លួននេះ ធ្វើឡើងភ្លាមៗ បន្ទាប់ពីពួកគេបាននិយាយពីគុណសម្បត្តិ និងគុណវិបត្តិនៃការបញ្ចូលខេត្តចំនួន៤ របស់កម្ពុជា ទៅក្នុងកិច្ចសហប្រតិបត្តិការត្រីកោណអភិវឌ្ឍន៍ជាមួយប្រទេសវៀតណាម និងឡាវ (CLV)។
គួរបញ្ជាក់ថា មានមនុស្សប្រហែល ១០០នាក់ហើយ ត្រូវបានចាប់ខ្លួន ចាប់តាំងពីចុងខែកក្កដា ឆ្នាំ២០២៤ ហើយជាមួយគ្នានោះ មានមនុស្សជាង ៦០នាក់ ដែលត្រូវបានចោទប្រកាន់ និងដាក់ឱ្យឃុំខ្លួនបណ្តោះអាសន្ននៅពន្ធនាគារ សម្រាប់ការតវ៉ានៅលើប្រព័ន្ធផ្សព្វផ្សាយសង្គម ផែនការប្រមូលផ្តុំ ឬបង្ហាញពីអារម្មណ៍របស់ពួកគេ អំពីការជាប់ពាក់ព័ន្ធនៅក្នុងករណីតំបន់ត្រីកោណអភិវឌ្ឍន៍កម្ពុជា-ឡាវ-វៀតណាម CLV-DTA ។
ដីការបស់តុលាការ បានលើកឡើងថា ជនជាប់ចោទបានបង្កើតព័ត៌មាន«បំភ្លៃ»និង«ប្រឌិត» ដោយមានចេតនាទុច្ចរិត ញុះញង់ឱ្យមានការខឹងសម្បារប្រឆាំងនឹងថ្នាក់ដឹកនាំ ដែលបណ្តាលឱ្យខូចខាតយ៉ាងធ្ងន់ធ្ងរដល់សន្តិសុខជាតិ។
ជាមួយគ្នានេះ សកម្មជនផ្សព្វផ្សាយកិច្ចព្រមព្រៀងទីក្រុងបារីស២៣តុលា លោក ស៊្រុន ស៊្រន កញ្ញា ភឹង សោភា និងលោក សាន សិទ្ធ ត្រូវសមត្ថកិច្ចចាប់ខ្លួនកាលពីថ្ងៃទី២៣ ខែកក្កដា ឆ្នាំ២០២៤ ដោយចោទពីបទ ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម។ ការចាប់ខ្លួននេះ ធ្វើឡើងភ្លាមៗ បន្ទាប់ពីពួកគេបាននិយាយពីគុណសម្បត្តិ និងគុណវិបត្តិនៃការបញ្ចូលខេត្តចំនួន៤ របស់កម្ពុជា ទៅក្នុងកិច្ចសហប្រតិបត្តិការត្រីកោណអភិវឌ្ឍន៍ជាមួយប្រទេសវៀតណាម និងឡាវ (CLV)។
តែយ៉ាងណា ក្រោយមករដ្ឋាភិបាលបានប្រកាសដកខ្លួនចេញពី CLV-DTA រយៈពេល ២០ឆ្នាំ កាលពីថ្ងៃទី២០ ខែកញ្ញា ឆ្នាំ២០២៤ បន្ទាប់ពីការតវ៉ា និងការរិះគន់តាមបណ្តាញសង្គម៕
