ប្រទេសកម្ពុជា បានចោទប្រកាន់ថៃ នៅថ្ងៃទី១៥ ខែធ្នូ ចំពោះការវាយប្រហារខិតចូលជ្រៅទៅក្នុងដែនដីរបស់ពួកគេ ដែលទម្លាក់គ្រាប់បែកលើខេត្តជាកន្លែងនៃប្រាសាទអង្គរមានអាយុកាលរាប់សតវត្សរ៍ ហើយក៏ជាកន្លែងដែលទាក់ទាញភ្ញៀវទេសចរដ៏លើសលប់របស់ប្រទេសកម្ពុជា ជាលើកដំបូង ក្នុងជម្លោះព្រំដែនដែលបានកើតឡើង។
ប្រភពសារព័ត៌មាន ឆាន់ណែល ញូអេស៊ា(channelnewsasia) បានរាយការណ៍នៅថ្ងៃទី១៥ ខែធ្នូ ឆ្នាំ២០២៥នេះថា មនុស្សរាប់សិបនាក់ ត្រូវបានស្លាប់ ក្នុងរយៈពេល៥ថ្ងៃនៃការប្រយុទ្ធគ្នានៅក្នុងខែកក្កដា មុនពេលការសម្របសម្រួលបទឈប់បាញ់ បន្ទាប់មកបទឈប់បាញ់ក៏បានខូចខាតក្នុងរយៈពេលប៉ុន្មានខែបន្ទាប់ នេះជាផ្នែកមួយនៃជម្លោះដ៏រ៉ាំរ៉ៃដែលចាក់ឫស នៅក្នុងការកំណត់ព្រំដែនសម័យអាណានិគមនៃព្រំដែន ៨០០ គីឡូម៉ែត្ររបស់ប្រទេស។
ក្រុមមន្ត្រី បាននិយាយថា ការប្រយុទ្ធគ្នាជាថ្មីរវាងប្រទេសជិតខាងអាស៊ីអាគ្នេយ៍ទាំងពីរ នៅក្នុងខែនេះ បានសម្លាប់មនុស្សយ៉ាងហោចណាស់ចំនួន ៣១នាក់ រួមទាំងទាហាន និងជនស៊ីវិល និងមនុស្សប្រមាណ ៨សែននាក់(៨០០០០០)បានផ្លាស់ទីលំនៅ។
ប្រភពបន្តថា ប្រទេសកម្ពុជាដែលយោធាថៃ បានប្រើប្រាស់អាវុធហួសហេតុមកលើនោះ បាននិយាយថា កងកម្លាំងថៃបានពង្រីកការវាយប្រហារ‘‘ដ៏ជ្រៅ’’ ចូលទៅក្នុងដែនដីប្រទេសកម្ពុជានាពេលព្រឹកថ្ងៃចន្ទ។
មន្ត្រីក្រសួងការពារជាតិ និយាយនៅក្នុងសេចក្តីថ្លែងការណ៍មួយថា យន្តហោះចម្បាំងថៃមួយគ្រឿងបានទម្លាក់គ្រាប់បែក ‘‘នៅជិតជំរុំជនស៊ីវិលដែលត្រូវបានផ្លាស់ទីលំនៅ ក្នុងស្រុកស្រីស្នំ ខេត្តសៀមរាប’’។
រដ្ឋមន្រ្តីក្រសួងព័ត៌មានកម្ពុជា លោក នេត្រ ភក្រ្តា បានប្រាប់សារព័ត៌មានអាអេហ្វប៉េ(AFP)ថា នេះគឺជាការ‘‘វាយប្រហារដែលកងទ័ពថៃ បានជ្រៀតចូលជ្រៅបំផុតមកក្នុងទឹកដីប្រទេសកម្ពុជា’’ ក្នុងកំឡុងនៃការប៉ះទង្គិចគ្នាឡើងវិញដោយស្ថិតនៅចម្ងាយជាង ៧០គីឡូម៉ែត្រ ពីព្រំដែនហើយនៅឆ្ងាយពីតំបន់ដែលមានជម្លោះ។
មន្ត្រីរូបនេះ បានបន្តថា នេះគឺជាការវាយប្រហារដំបូងរបស់យោធាថៃ ដែលបានទម្លាក់គ្រាប់បែកលើតំបន់នានាក្នុងខេត្តសៀមរាប។
លោកបានបន្ថែមទៀតថា ការបំផ្ទុះគ្រាប់បែកបានបង្ខំឱ្យក្រុមគ្រួសារដែលបានផ្លាស់ទីលំនៅរួចជាច្រើនរយនាក់ ត្រូវភៀសខ្លួនចេញពីកន្លែងជម្លៀស។
បន្ថែមពីនេះ ប្រភពថា យោងតាមទិន្នន័យពីប្រតិបត្តិករ អង្គរអ៊ីនធើប្រាយ បានឱ្យដឹងថា ការកក់សំបុត្រ ចូលទស្សនាឧទ្យានអង្គរប្រចាំខែ បានធ្លាក់ចុះ ដែលយ៉ាងហោចណាស់ចំនួន ១៧% ចាប់ពីខែមិថុនាដល់ខែវិច្ឆិកា។
អ្នកស្រី ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជា បានប្រាប់អាអេហ្វប៉េ (AFP) ថា ភ្ញៀវទេសចរមួយចំនួន ដែលគ្រោងមកទស្សនាប្រទេសកម្ពុជា តាមរយៈច្រកព្រំដែនថៃ បានលុបចោលគម្រោងឬផ្លាស់ប្តូរផ្លូវឆ្លងកាត់តាមប្រទេសជិតខាងវៀតណាម ឬឡាវ។
អ្នកស្រីបាននិយាយទៀតថា របាយការណ៍នៃការបំផ្ទុះគ្រាប់បែកនៅខេត្តសៀមរាប បានធ្វើឱ្យ‘‘ភ្ញៀវទេសចរមួយចំនួន ដែលបានកក់ដំណើរកម្សាន្តរួចហើយមានការព្រួយបារម្ភជាពន់ពេក»។ អ្នកស្រីបន្តថា ភ្ញៀវមួយចំនួនទៀត បានលុបចោលគម្រោងធ្វើដំណើរ អំឡុងពេលអ្នកដទៃទៀត ស្នើពន្យាពេលនៃការធ្វើដំណើររបស់ពួកគេ។
ជាមួយគ្នានេះ សារព័ត៌មានអេភី(AP) បានចេញផ្សាយនៅថ្ងៃទី១៥ ខែធ្នូនេះដែរថា ការប្រយុទ្ធគ្នាដ៏ខ្លាំងក្លារវាងភាគីប្រទេសថៃ និងកម្ពុជា ដែលឈានចូលសប្តាហ៍ទី២ នៅថ្ងៃចន្ទនេះ ដោយទីក្រុងភ្នំពេញ អះអាងថា ការទម្លាក់គ្រាប់បែករបស់ថៃ បានវាយប្រហារចូលកាន់តែជ្រៅចូលទៅក្នុងដែនដីរបស់ពួកគេ ខិតចូលជិតជម្រកប្រជាពលរដ្ឋដែលបានភៀសខ្លួន ចេញពីតំបន់គ្រោះថ្នាក់នៅតាមព្រំដែន។
បើតាមប្រភពដដែល យោងតាមក្រសួងការពារជាតិ និងក្រសួងព័ត៌មានរបស់ប្រទេសកម្ពុជា យន្តហោះចម្បាំង អេហ្វ ១៦(F-16)របស់ថៃ បានទម្លាក់គ្រាប់បែកចំនួន ២គ្រាប់ ភ្លាមៗបន្ទាប់ពីម៉ោង ១០ ព្រឹក នៅជិតជំរុំជនភៀសខ្លួនក្នុងខេត្តឧត្តរមានជ័យ និងខេត្តសៀមរាប៕
