ជនស៊ីវិលខ្មែរស្លាប់ និងរបួស បានកើនឡើងជិត១០០នាក់ ក្រោយយោធាថៃបើកការឈ្លានពានចំនួន១០ថ្ងៃមកនេះ និងហេដ្ឋារចនាសម្ព័ន្ធមួយចំនួន រួមទាំងប្រាសាទបូរាណ ត្រូវបានបំផ្លាញ ដោយគ្រាប់ផ្លោង និងយន្តហោះចម្បាំងថៃ។ នេះបើតាមការអះអាងរបស់ក្រសួងមហាផ្ទៃ។
ក្រសួងមហាផ្ទៃ បាននិយាយថា គិតត្រឹមម៉ោង៦ល្ងាចថ្ងៃទី១៦ខែធ្នូ ម្សិលមិញនេះ ពលរដ្ឋខ្មែរចំនួន២នាក់ទៀត នៅខេត្តកោះកុង បានស្លាប់ និង២នាក់ទៀតរបួស ដែលធ្វើឱ្យចំនួនពលរដ្ឋស៊ីវិលស្លាប់កើនឡើងដល់ ១៧នាក់ និងរបួស ៧៧នាក់ ខណៈជនភៀសសឹកកើនដល់ជិត ៤៤ម៉ឺននាក់ ដោយសារការរំលោភបទឈប់បាញ់ និងសង្គ្រាមឈ្លានពានរបស់យោធាថៃ មកលើបូរណភាពទឹកដីកម្ពុជា។
សេចក្តីប្រកាសព័ត៌មានរបស់ក្រសួងមហាផ្ទៃ ចេញផ្សព្វផ្សាយលើបណ្តាញសង្គមរបស់លោក ស សុខា រដ្ឋមន្ត្រីក្រសួងនេះ បានឱ្យដឹងថា គិតចាប់ពីម៉ោង១រសៀលដល់ម៉ោង៦ល្ងាចថ្ងៃទី១៦ខែធ្នូ មានពលរដ្ឋស្លាប់ចំនួន ២នាក់ នៅខេត្តកោះកុង ក្នុងមណ្ឌលសុវត្ថិភាព និងរបួសចំនួន២នាក់ នៅខេត្តបន្ទាយមានជ័យ និងឧត្តរមានជ័យ ដែលធ្វើឱ្យចំនួនពលរដ្ឋស្លាប់កើនដល់ ១៧នាក់ និងរបួស ៧៧នាក់។
ចំណែក ជនស៊ីវិលដែលភៀសសឹកវិញ ក្រសួងថា កើនដល់ ១៣១ ៦៧២គ្រួសារ ស្មើនឹងចំនួនមនុស្ស ៤៣៨ ៩៥៣នាក់ កំពុងនៅជំរុំសុវត្ថិភាពក្នុងខេត្តព្រះវិហារ ឧត្តរមានជ័យ បន្ទាយមានជ័យ បាត់ដំបង ពោធិ៍សាត់ កោះកុង សៀមរាប និងកំពត។
សម្រាប់ករណីបំផ្លិចបំផ្លាញហេដ្ឋារចនាសម្ព័ន្ធរូបវន្តជនស៊ីវិលវិញ គិតពីថ្ងៃទី៧ មកដល់ពេលនេះ ខូចខាតផ្ទះពលរដ្ឋ ៥១ខ្នង សាលារៀន១ទីតាំង មណ្ឌលសុខភាព១ទីតាំង ប្រាសាទបុរាណ១ វត្តអារាម៤ទីតាំង សាលាឆទាន១ទីតាំង កុដិព្រះសង្ឃ១ទីតាំង អគារការិយាល័យគយនិងរដ្ឋករ១អគារ អគារកាស៊ីណូ៤ទីតាំង សណ្ឋាគារ៣ទីតាំង អគារ៣ខ្នង មណ្ឌលកសិកម្មសហគមន៍១ទីតាំង ស្ពានថ្ម១ ក្បាលស្ពាន១កន្លែង ស្ពានដែក១ ស្ថានីយ៍ប្រេង១ទីតាំង មធ្យោបាយដឹកជញ្ជូន៥គ្រឿង និងស្ពានបុរាណមួយកន្លែង។
ក្រៅពីនោះ សេវាមូលដ្ឋាន ដូចជា សេវារដ្ឋបាល សុខាភិបាល និងអប់រំនៅតាមក្រុងស្រុកឃុំសង្កាត់ ត្រូវបានផ្អាកស្ទើរទាំងស្រុង ដោយសារតែភាគីថៃបង្កើនការវាយប្រហារដោយអាវុធគ្រប់ធុន និងគ្រប់ទម្រង់មកលើតំបន់ស៊ីវិល ទាំងតាមជើងគោក ជើងទឹក និងជើងអាកាស។
ចំណែក ក្រសួងអប់រំ យុវជន និងកីឡា ក៏បានធ្វើបច្ចុប្បន្នភាពនៅលើទំព័រហ្វេសប៊ុករបស់ខ្លួនដែរថា គិតត្រឹមថ្ងៃទី១៦ខែធ្នូ សាលារៀនក្នុងខេត្តជាប់បន្ទាត់ព្រំដែនចំនួន ៦ បានបិទទ្វារសរុបចំនួន ១ ០៤២សាលា ប៉ះពាល់ដល់គ្រូបង្រៀនជិត ១ម៉ឺននាក់ (៩ ៨៦៥នាក់) និងសិស្សជាង ២៤ម៉ឺននាក់ (២៤៥ ០០១នាក់)។
គិតពីថ្ងៃទី៧ ដល់ព្រឹកថ្ងៃទី១៧ ខែធ្នូនេះ មានចំនួន១១ថ្ងៃហើយ ដែលយោធាថៃ បានបើកការបាញ់ប្រហារមកលើកងកម្លាំងកម្ពុជានៅជួរមុខ តាមបន្ទាត់ព្រំដែន ដោយប្រើទាំងអាវុធធុនធ្ងន់ គាំទ្រថ្មើរជើង ប្រើយន្តហោះចម្បាំងF-16 ទម្លាក់គ្រាប់ និងបាញ់ផ្សែងពុល តាមទំនើងចិត្តលើដែនដីកម្ពុជា យ៉ាងតិច៥ខេត្តជាប់ព្រំដែន និងបានទម្លាក់គ្រាប់២គ្រាប់ ក្បែរជំរុំជនភៀសសឹក នៅភូមិសាស្ត្រស្ពានអូរជីក ព្រំប្រទេសស្រុកស្រីស្នំ ខេត្តសៀមរាប ដែលជាតំបន់អង្គរជាដើម៕
