ស្ថានទូតកម្ពុជាប្រចាំប្រទេសបារាំង បាននិយាយថា អ្នកដំណើរមកពីអឺរ៉ុបខ្លះ ដែលឆ្លងកាត់ប្រទេសថៃ តាមជើងហោះហើរទីក្រុងបាងកកមកកម្ពុជានោះ ត្រូវបានសម្ភាសន៍ច្រើនម៉ោង ប្រឈមនឹងបញ្ហាធ្ងន់ធ្ងរ ដែលថា គួរប្រើជម្រើសផ្សេង ដើម្បីបញ្ចៀសបញ្ហាប្រឈម។
ឯកអគ្គរាជទូតកម្ពុជាប្រចាំប្រទេសបារាំង លោក លុយ ដាវីដ និយាយក្នុងលិខិតជូនដំណឹង ចុះថ្ងៃទី១៦ ខែធ្នូ ឆ្នាំ២០២៥នេះថា អ្នកដំណើរអឺរ៉ុបមួយចំនួន ដែលធ្វើដំណើរទៅប្រទេសកម្ពុជា បានជួបប្រទះបញ្ហាធ្ងន់ធ្ងរ ពេលពួកគេឆ្លងកាត់ (Transit) នៅអាកាសយានដ្ឋានក្នុងទីក្រុងបាងកកនៃប្រទេសថៃ។
បើតាមប្រភពនោះ បញ្ហាប្រឈម គឺការសួរសំណួរច្រើនម៉ោង ការទាមទារហួសហេតុឱ្យបង្ហាញឯកសារបញ្ជាក់ធនធានហិរញ្ញវត្ថុ ការត្រួតពិនិត្យលើឯកសារកក់សណ្ឋាគារនៅកម្ពុជា មានបរិយាកាសថប់បារម្ភ និងរងការសង្ស័យដោយមិនសមហេតុផល ហើយក្នុងករណីខ្លះ អ្នកដំណើរបានបាត់វ៉ាលីថែមទៀត ពេលទៅដល់ទីក្រុងភ្នំពេញនៃប្រទេសកម្ពុជា។
សេចក្ដីជូនដំណឹងដដែល បានឱ្យដឹងបន្ថែមថា ដើម្បីជាការប្រុងប្រយ័ត្ន សូមអ្នកដំណើរជៀសវាងការធ្វើដំណើរឆ្លងកាត់ប្រទេសថៃ និងការប្រើប្រាស់ក្រុមហ៊ុនអាកាសចរណ៍ថៃ នៅពេលធ្វើដំណើរទៅកម្ពុជា។
មានក្រុមហ៊ុនអាកាសចរណ៍ និងផ្លូវហោះហើរអន្តរជាតិផ្សេងទៀត ដែលផ្តល់សេវាកម្មល្អប្រសើរ និងការឆ្លងកាត់ (transit) ដោយពុំមានការរើសអើង និងគោរពដល់អ្នកដំណើរ។
ស្ថានទូតកម្ពុជាប្រចាំប្រទេសបារាំង សង្កត់ធ្ងន់ថា បញ្ហាទាំងនេះកើតឡើងនៅក្រៅទឹកដីរបស់កម្ពុជា ក៏ពិតមែន ប៉ុន្តែអាចប៉ះពាល់ដល់បទពិសោធន៍នៃការធ្វើដំណើរ។ ទោះបីជាយ៉ាងណា កម្ពុជានៅតែជាប្រទេសមានសុវត្ថិភាព និងផ្តល់ការស្វាគមន៍យ៉ាងរួសរាយរាក់ទាក់។
បញ្ហានេះ បានកើតឡើងខណៈយោធាថៃបានបន្តបើកការឈ្លានពានកម្ពុជាជាថ្មីទៀត ចាប់ពីថ្ងៃទី៧ខែធ្នូមក មានចំនួន១២ថ្ងៃហើយ ខណៈកងទ័ពកម្ពុជាកំពុងប្រយុទ្ធតបត៕
