ស្ថានទូតសាធារណៈរដ្ឋប្រជាមានិតចិនប្រចាំប្រទេសថៃ បានបង្ហោះនៅលើហ្វេសប៊ុកនៅថ្ងៃទី១៧ ខែធ្នូ ដោយបញ្ជាក់ថា អ្នកនាំពាក្យក្រសួងការបរទេសចិនបានថ្លែងនៅបណ្តាញសង្គម ដោយបង្ហាញអំពីភាពព្រួយបារម្ភជុំវិញការប៉ះទង្គិចគ្នាតាមព្រំដែន នាពេលបច្ចុប្បន្ននេះរវាងប្រទេសទាំងពីរ។
ប្រភពព័ត៌មាន ដឹស្តា(The Star)របស់ប្រទេសម៉ាឡេស៊ី បានចេញផ្សាយនៅថ្ងៃទី១៨ ខែធ្នូ ឆ្នាំ២០២៥នេះថា ក្នុងនាមជាអ្នកជិតខាងនិងជាមិត្តរបស់ប្រទេសថៃនិងកម្ពុជា ប្រទេសចិនបានចូលរួមយ៉ាងសកម្មក្នុងការលើកកម្ពស់កិច្ចសន្ទនាបន្ធូរបន្ថយភាពតានតឹង តាមរយៈកិច្ចខំប្រឹងសម្របសម្រួលដែលកំពុងបន្ត។ តួរនាទីបេសកជនពិតជាមានសារៈសំខាន់ណាស់ ក្នុងការជួយប្រទេសទាំងពីរ ដើម្បីដោះស្រាយស្ថានការណ៍ដោយការទូត។
ប្រភពបន្តថា បេសកជនពិសេសគ្រោងនឹងទៅបំពេញទស្សនៈកិច្ចនៅប្រទេសកម្ពុជា និងថៃ នៅថ្ងៃទី១៨ ខែធ្នូ ដើម្បីធ្វើការសម្របសម្រួលកិច្ចសន្ទនារវាងប្រទេសទាំងពីរ និងលើកទឹកចិត្តការចរចាសន្តិភាពក្នុងគោលបំណងស្តារស្ថិរភាព និងលើកកម្ពស់សន្តិភាពឱ្យបានឆាប់រហ័ស។
ជាមួយគ្នានេះដែរ ទំព័រហ្វេសប៊ុករបស់ឯកអគ្គរដ្ឋនៃសាធារណរដ្ឋប្រជាមានិតចិនប្រចាំកម្ពុជា លោក វ៉ាង វិនពីន(Wang Wenbin)ក៏បានបង្ហោះដូចគ្នាដែរថា មន្ត្រីបេសកជនពិសេសទទួលបន្ទុកកិច្ចការអាស៊ីនៃក្រសួងការបរទេសចិន នឹងធ្វើដំណើរមកកាន់ប្រទេសកម្ពុជា និងប្រទេសថៃ ដើម្បីសម្របសម្រួល ជំរុញភាគីទាំងពីរឱ្យរួមដំណើរជាមួយគ្នា ដើម្បីកសាងសន្តិភាពឡើងវិញឱ្យបានឆាប់រហ័ស។
អ្នកនាំពាក្យក្រសួងការបរទេសចិន លោក គ័រ ជែឃុន(Guo Jiakun) បាននិយាយនៅលើហ្វេសប៊ុកកាលពីថ្ងៃទី១៦ ខែធ្នូថា ប្រទេសចិនសង្ឃឹមថា ប្រទេសថៃ និងកម្ពុជា នឹងអត់ធ្មត់ជាអតិបរមា និងចាត់រាល់វិធានការដែលអំណោយផលដល់ការបញ្ឈប់ការប្រយុទ្ធ និងបន្ថយភាពតានតឹងតាមដែលអាចធ្វើទៅបាន។
យ៉ាងណាក្តី បើតាមក្រសួងការពារជាតិ កងកម្លាំងយោធាថៃនៅតែបន្តការបាញ់ប្រហារ និងឈ្លានពានមកលើដែនអធិបតេយ្យកម្ពុជា នៅទិសយោធភូមិភាគទី៤ និងយោធភូមិភាគទី៥ គិតមកដល់ថ្ងៃទី១៨ ខែធ្នូ ឆ្នាំ២០២៥ គឺមានរយៈពេល១២ថ្ងៃហើយ។ ភាគីថៃនៅតែបន្តរំលោភបំពានលើបទឈប់បាញ់ និង «សេចក្តីថ្លែងការណ៍រួមស្តីពីកិច្ចព្រមព្រៀងសន្តិភាព រវាងកម្ពុជានិងថៃ» ដែលភាគីកម្ពុជា និងភាគីថៃ បានចុះហត្ថលេខាកាលពីថ្ងៃទី២៦ ខែតុលា ឆ្នាំ២០២៥៕
