ក្រសួងការពារជាតិកម្ពុជា បានឱ្យដឹងថា គិតត្រឹមម៉ោងជិត៣រសៀល ថ្ងៃព្រហស្បតិ៍នេះ យន្តហោះចម្បាំង F-16 ថៃបានទម្លាក់គ្រាប់បែកផ្ទួនៗយ៉ាងតិចចំនួន៣ ចូលក្រុងសេរីសោភ័ណ ខេត្តបន្ទាយមានជ័យ តែថាកងទ័ពកម្ពុជានៅបន្តឈរជើងយ៉ាងរឹងមាំដើម្បីការពារទឹកដី។
បើតាមក្រសួងការពារជាតិ ដែលបានធ្វើបច្ចុប្បន្នភាព ពីស្ថានការណ៍នៅតាមបន្ទាត់ព្រំដែនកម្ពុជា-ថៃ អំពី ករណីយោធាថៃបានបន្តធ្វើសកម្មភាពវាយប្រហារមកលើកម្ពុជា បានឱ្យដឹងថា នៅវេលាម៉ោង ១៤:៤៥នាទី យោធាថៃបានប្រើប្រាស់យន្តហោះ F16 បានទម្លាក់គ្រាប់ចំនួន ១គ្រាប់ទៀត នៅក្នុងភូមិសាស្ត្រក្រុងសេរីសោភ័ណ ខេត្តបន្ទាយមានជ័យ។
ដូចគ្នានេះដែរ នៅម៉ោង ១៤:៣២នាទី ថ្ងៃទី១៨ខែធ្នូនេះដែរ យោធាថៃបានប្រើប្រាស់យន្តហោះ F16 បានទម្លាក់គ្រាប់ចំនួន ២គ្រាប់ នៅក្រុងសេរីសោភ័ណ ខេត្តបន្ទាយមានជ័យ។
យ៉ាងណា កម្ពុជាគូសបញ្ជាក់ថា កងកម្លាំងកម្ពុជាបាននឹងបន្តតាមដានយ៉ាងយកចិត្តទុកដាក់ និងឈរជើងយ៉ាងរឹងមាំ តស៊ូប្រយុទ្ធយ៉ាងស្វិតស្វាញតតាំងជាមួយសត្រូវឈ្លានពាន ក្នុងការបំពេញតួនាទីរបស់ខ្លួន ដើម្បីការពារបូរណភាពទឹកដីរបស់កម្ពុជា ។
គិតត្រឹមថ្ងៃទី១៨ខែធ្នូនេះ យោធាថៃបានបើកការឈ្លានពានកម្ពុជា ទ្រង់ទ្រាយធំចំនួន១២ថ្ងៃហើយ ដែលក្រសួងថា យោធាថៃបានប្រើយន្តហោះចម្បាំងនេះ រួមទាំងអាវុធធុនធ្ងន់គ្រប់ប្រភេទ បាញ់ផ្លោងចូលដែនដីកម្ពុជា និងប្រើគ្រាប់បែកចង្កោម រួមទាំងបាញ់ផ្សែងពុល បង្កគ្រោះថ្នាក់ធ្ងន់ធ្ងរដល់កម្ពុជា។
ទង្វើឈ្លានពានរបស់យោធាថៃនេះ កម្ពុជាចាត់ទុកជាឧក្រិដ្ឋកម្មសង្គ្រាម រំលោភលើធម្មនុញ្ញអង្គការសហប្រជាជាតិ ធម្មនុញ្ញអាស៊ាន និងគោលការណ៍ជាមូលដ្ឋានគ្រឹះនៃច្បាប់អន្តរជាតិ ដែលថាទង្វើនេះ ធ្វើឱ្យជនស៊ីវិលកម្ពុជា ស្លាប់ និងរបួស មានការកើនឡើងខ្ពស់។
ការណ៍នេះ សម្រាប់កម្ពុជា ជាសកម្មភាពដែលគ្មានទំនួលខុសត្រូវ និងខុសច្បាប់របស់យោធាថៃ ដែលថាបានបង្កឱ្យគ្រោះថ្នាក់យ៉ាងធ្ងន់ធ្ងរ មិនត្រឹមតែសន្តិភាពនៅក្នុងតំបន់ប៉ុណ្ណោះទេ ថែមទាំងប៉ះពាល់ដល់មូលដ្ឋានគ្រឹះនៃសណ្តាប់់ធ្នាប់អន្តរជាតិទាំងមូលផងដែរ៕
