ក្រសួងការពារជាតិកម្ពុជា និយាយថា នៅថ្ងៃសុក្រនេះ យោធាថៃ នៅតែបន្តប្រើអាវុធធុនធ្ងន់កម្រិតបំផ្លាញខ្ពស់ ដូចជា នាវាចម្បាំង យន្តហោះចម្បាំង គ្រាប់បែកចង្កោម ផ្សែងពុល ឈ្លានពានកម្ពុជា ចំនួន១៣ថ្ងៃមកនេះ រំលោភច្បាប់អន្តរជាតិ ហើយទម្លាក់កំហុសដាក់កម្ពុជា ដើម្បីបិទបាំងមហិច្ឆតាឈ្លានពាន។
អ្នកនាំពាក្យក្រសួងការពារជាតិ អ្នកស្រី ម៉ាលី សុជាតា ឱ្យដឹងថា គិតពីម៉ោង៥ល្ងាចថ្ងៃទី១៨ខែធ្នូ រហូតដល់ព្រឹកម៉ោង៧ថ្ងៃទី១៩ ខែធ្នូនេះ យោធាថៃ នៅតែប្រើអាវុធធុនធ្ងន់ កម្រិតបំផ្លាញខ្ពស់ បាញ់ស្រោចមកលើអធិបតេយ្យកម្ពុជា មកលើខេត្តមួយចំនួនជាប់ព្រំដែន ដូចជា ខេត្តឧត្តរមានជ័យ ព្រះវិហារ បន្ទាយមានជ័យ និងពោធិ៍សាត់ ជាដើម ។
អ្នកស្រីថា យោធាថៃ បានបាញ់កាំភ្លើងធំ ចេញពីនាវាចម្បាំង ផ្លោងចូលភូមិសាស្ត្រថ្មដា អូរភ្លុកដំរី ខេត្តពោធិ៍សាត់ និងបាញ់ផ្លោងចូលភូមិព្រៃចាន់ ខេត្តបន្ទាយមានជ័យ។ ក្រៅពីនេះ យោធាថៃបានបាញ់ផ្លោងចូលប្រាសាទតាមាន់ធំ និងដំណាក់ស្តេច ក្នុងខេត្តឧត្តរមានជ័យ និងទីតាំងមួយចំនួនទៀត។
សម្រាប់កម្ពុជា ទង្វើឈ្លានពានទាំងកំរោលនេះ ថៃបានរំលោភច្បាប់អន្តរជាតិ បង្កគ្រោះថ្នាក់ដល់ជនស៊ីវិលខ្មែរស្លាប់ និងរបួសកើតឡើងខ្ពស់ ដែលគិតត្រឹមថ្ងៃទី១៨ខែធ្នូនេះ ជនស៊ីវិលខ្មែរស្លាប់កើនឡើងដល់១៨នាក់ និងរបួសកើនដល់៧៩នាក់។
លើសពីនេះ កម្ពុជា ទាមទារឱ្យថៃបញ្ឈប់ការផ្សាយព័ត៌មានមិនពិត ក្នុងចេតនាបង្វែរការចាប់អារម្មណ៍ អំពីការរំលោភច្បាប់អន្តរជាតិ ទម្លាក់កំហុសមកលើកម្ពុជា ដើម្បីយកលេសបង្កើនភាពតានតឹង បិទបាំងមហិច្ឆតាឈ្លានពានកម្ពុជា។
អ្នកស្រីថា៖ «ទង្វើឈ្លានពានរបស់កម្ពុជាដ៏ឃោរឃៅ រួមទាំងប្រើប្រាស់អាវុធយុទ្ធោបរណ៍ និងមានកម្រិតបំផ្លាញខ្ពស់ ដូចជា យន្តហោះចម្បាំង នាវាចម្បាំង កាំភ្លើងធំគ្រប់ប្រភេទ គ្រាប់បែកចង្កោម ផ្សែងពុល ដ្រូន គ្រប់ប្រភេទ និងអាវុធធុនធ្ងន់ជាច្រើនទៀត វាយប្រហារមកលើកម្ពុជា ជាពិសេសលើជនស៊ីវិលស្លូតត្រង់ និងបេតិកភណ្ឌដែលជាសម្បត្តិមនុស្សជាតិ»។
កម្ពុជាសង្កត់ធ្ងន់ថា ទង្វើនេះ បញ្ជាក់យ៉ាងច្បាស់ថា ថៃគឺជារដ្ឋបំពានច្បាប់អន្តរជាតិ ថៃជារដ្ឋបំផ្លាញសន្តិភាព និងសន្តិសុខ ក្នុងតំបន់ទាំងមូល ដើម្បីលេបទឹកដីខ្មែរ ជាប្រទេសតូចជាងខ្លួន មិនចេះឆ្អែតឆ្អន់។
យ៉ាងនេះក្តី កម្ពុជាអះអាងថា មកទល់ពេលនេះ កងកម្លាំងរបស់កម្ពុជា នៅបន្តឈរជើងយ៉ាងរឹងមាំ គ្រប់សមរភូមិ និងប្រយុទ្ធយ៉ាងស្វិតស្វាញ ប្រឆំាំងនឹងសត្រូវឈ្លានពាន ដើម្បីការពារទឹកដី។
កាលពីថ្ងៃម្សិលមិញ ក្រសួងថា យោធាថៃបានបាញ់ស្រោចទៅលើភូមិសាស្ត្រប្រាសាទតាក្របី ប្រាសាទតាមាន់ធំ ប្រាសាទព្រះវិហារ ភូមិចម្ការចេក អូរភ្លុកដំរី និងទីតាំងផ្សេងទៀត។
យ៉ាងណា ក្រុមអ្នកតាមដានជម្លោះព្រំដែននេះ ផ្តល់យោបល់ថា ដើម្បីទប់ស្កាត់មហិច្ឆតាឈ្លានពានរបស់ថៃ និងទប់ស្កាត់ការបង្ហូរឈាមគ្នារយៈពេលយូរ ក្រៅពីប្រើសិទ្ធិការពារខ្លួន កម្ពុជាចាំបាច់ត្រូវប្តឹងថៃទៅតុលាការយុត្តិធម៌អន្តរជាតិ(ICJ) និងតុលាការព្រហ្មទណ្ឌអន្តរជាតិ(ICC) រួមទាំងប្តឹងទៅសហប្រធាននៃកិច្ចព្រមព្រៀងសន្តិភាពទីក្រុងប៉ារីសឱ្យកោះប្រជុំបន្ទាន់ ទើបអាចទប់ស្កាត់បាន។
ពួកគេសំអាងថា ប្រទេសថៃបានចិញ្ចឹមចិត្តឈ្លានពានដែលអធិបតេយ្យកម្ពុជា ច្រើនទសវត្សរ៍មកហើយ។ ហើយថាពួកគេនឹងមិនបញ្ជប់ត្រឹមនេះ បើកម្ពុជាមិនប្រើច្បាប់អន្តរជាតិដែលកម្ពុជាមាន ដើម្បីទប់ទល់នឹងមហិច្ឆតាឈ្លានពាននេះទេនោះ៕
