ក្រសួងការពារជាតិកម្ពុជា បានឱ្យដឹងប៉ុន្មានម៉ោងមុននេះថា យន្តហោះចម្បាំងថៃ F-16 បានទម្លាក់គ្រាប់បែកចំនួន២គ្រាប់ទៀត ចូលស្រុកស្វាយចេក ខេត្តបន្ទាយមានជ័យ ដែលធ្វើឱ្យខេត្តជាប់ព្រំដែនរបស់កម្ពុជាយ៉ាងតិច៤ រងការវាយប្រហារជាបន្តបន្ទាប់ពីយន្តហោះចម្បាំងនេះ ខណៈកម្ពុជាមិនប្រើអាវុធ ដើម្បីប្រឆាំងទៅនឹងសត្រូវឈ្លានពានតាមជើងអាកាស ។
ក្រសួងការពារជាតិកម្ពុជា និយាយថា នៅម៉ោង ១៣:០១នាទី ថ្ងៃទី២១ខែធ្នូនេះ យោធាថៃបានប្រើប្រាស់យន្តហោះចម្បាំង ទម្លាក់គ្រាប់បែកចំនួន២គ្រាប់ ចូលភូមិសាស្ត្រ ឃុំផ្គាំ ស្រុកស្វាយចេក ខេត្តបន្ទាយមានជ័យ។ យ៉ាងណា ក្រសួងមិនបានបញ្ជាក់ពីចំនួនអ្នករងគ្រោះពីការទម្លាក់គ្រាប់បែក នៅស្រុកស្វាយចេកនេះនៅឡើយទេ។
ប៉ុន្តែថា កងកម្លាំងកម្ពុជា កំពុងតាមដានយ៉ាងយកចិត្តទុកដាក់ និងឈរជើងយ៉ាងរឹងមាំ តស៊ូប្រយុទ្ធយ៉ាងស្វិតស្វាញ តតាំងជាមួយសត្រូវឈ្លានពាន ដើម្បីការពារបូរណភាពទឹកដីរបស់កម្ពុជាទោះក្នុងតម្លៃណាក៏ដោយ។
លើសពីនេះ នៅព្រឹកថ្ងៃអាទិត្យនេះដែរ អ្នកនាំពាក្យក្រសួងការពារជាតិ អ្នកស្រី ម៉ាលី សុជាតា បានឱ្យដឹងថា យោធាថៃកំពុងបើកការប្រយុទ្ធបុកចូលតំបន់ប្រាសាទតាមាន់ធំ និងថ្មដូន ក្នុងខេត្តឧត្តរមានជ័យ ដោយប្រើអាវុធធុនធ្ងន់ និងអាវុធបំពាក់លើរថក្រោះ ។
អ្នកស្រីសង្កត់ធ្ងន់ថា ទង្វើឈ្លានរបស់យោធាថៃមកលើកម្ពុជា ជាទង្វើឃោរឃៅ រួមទាំងការប្រើប្រាស់អាវុធយុទ្ធោបករណ៍ធុនធ្ងន់ និងមានកម្រិតបំផ្លាញខ្ពស់ ដូចជា យន្តហោះចម្បាំងF-16 នាវាចម្បាំង កាំភ្លើងធំគ្រប់ប្រភេទ គ្រាប់បែកចង្កោម ផ្សែងពុល មកវាយប្រហារកម្ពុជា និងជនស៊ីវិល រំលោភធម្មនុញ្ញអង្គការសហប្រជាជាតិ ធម្មនុញ្ញអាស៊ាន និងច្បាប់អន្តរជាតិមួយចំនួនទៀត។
ការណ៍នេះ កម្ពុជាទាមទារឱ្យសហគមន៍អន្តរជាតិចាត់វិធានការ ដើម្បីឱ្យថៃទទួលខុសត្រូវចំពោះការរំលោភបំពានដែនអធិបតេយ្យកម្ពុជាទាំងកំរោលនេះ ហើយកម្ពុជាបញ្ជាក់ឡើងវិញ នូវសិទ្ធិស្វ័យការពារដែនអធិបតេយ្យកម្ពុជា ដូចដែលមានចែងនៅក្នុងច្បាប់អន្តរជាតិ ដើម្បីការពារបូរណភាពទឹកដី និងប្រជាជនរបស់ខ្លួនទោះក្នុងតម្លៃណាក៏ដោយ។
អ្នកស្រីថា៖ «ទង្វើឈ្លានរបស់យោធាថៃមកលើកម្ពុជា បានបញ្ជាក់យ៉ាងច្បាប់ថា ថៃបានបំពានច្បាប់អន្តរជាតិ ជារដ្ឋដែលបំផ្លាញសន្តិភាពនិងសន្តិសុខ មិនត្រឹមតែជាមួយកម្ពុជាប៉ុណ្ណោះទេ ប៉ុន្តែតំបន់ទាំងមូល ដើម្បីមហិច្ឆតាឈ្លានពានរបស់ខ្លួន មិនចេះឆ្អែតឆ្អន់មកលើប្រទេសដែលតូចជាងនឹងខ្សោយជាងខ្លួនប៉ុណ្ណោះ»។
ប្រតិបត្តិការឈ្លានពាននេះ យោធាថៃ បានប្រើយន្តហោះចម្បាំង F-16 កម្ទេចហេដ្ឋារចនាសម្ព័ន្ធរបស់កម្ពុជារាប់សិបកន្លែងតាមទំនើងចិត្ត ខណៈកម្ពុជាមិនប្រើអាវុធប្រឆាំងយន្តហោះ ដើម្បីឆ្លើយតបទៅនឹងការឈ្លានពានតាមដែនអាកាសដ៏កំរោលនេះ។
ការណ៍នេះ ធ្វើឱ្យកងទ័ពជើងអាកាសថៃ ពង្រីកទីតាំងឈ្លានពានចូលកាន់តែជ្រៅក្នុងដែនដីកម្ពុជា ដូចជាថៃបានជាទម្លាក់គ្រាប់បែកចង្កោម និងបាញ់ផ្សែងពុល ចូលតំបន់ប្រាសាទព្រះវិហារ។
យោធាថៃទម្លាក់គ្រាប់ផ្តាច់ស្ពាន អូរជីក ព្រំប្រទល់ស្រុកចុងកាល់ ខេត្តឧត្តរមានជ័យ និងព្រំប្រទល់ស្រុកស្រីស្នំ ខេត្តសៀមរាប។ ទម្លាក់គ្រាប់ផ្តាច់ស្ពានមេទឹកមួយកន្លែងទៀត នៅខេត្តពោធិ៍សាត់ និងកាលពីថ្ងៃម្សិលមិញ យន្តហោះចម្បាំង F-16 ថៃបានទម្លាក់គ្រាប់ចំនួន៥គ្រាប់បន្ថែមទៀត នៅខេត្តពោធិ៍សាត់ កម្ទេចអគារពាណិជ្ជកម្មឯកជន និងសាលាបឋមសិក្សានៅឃុំថ្មដា ស្រុកវាលវែង។
ការឈ្លានពានជាប់គ្នា១៥ថ្ងៃមកនេះ បណ្តាលឱ្យជនស៊ីវិលខ្មែរ ស្លាប់កើនដល់១៩នាក់ របួស៧៩នាក់ ខូចខាតផ្ទះសំបែងចំនួន៧៦ខ្នង សាលារៀន មណ្ឌលសុខភាព ប្រាសាទបុរាណ និងហេដ្ឋារចនាសម្ព័ន្ធមួយចំនួនទៀត។
ចំណែក ជនភៀសសឹកខ្មែរ កើនដល់ជិត៥២ម៉ឺននាក់ (៥១៨ ៦១១នាក់) ក្នុងនោះស្ត្រី ជាង២៧ម៉ឺននាក់(២៧០ ០៦៩នាក់) និងកុមារជាង១៦ម៉ឺននាក់(១៦៥ ៣៨៥នាក់)៕
