ក្រសួងការពារជាតិ ឱ្យដឹងថា យោធាថៃ នៅព្រឹកថ្ងៃអាទិត្យនេះ កំពុងបើកការប្រយុទ្ធវាយបុកចូលប្រាសាទតាមាន់ធំ និងតំបន់ថ្មដូន ក្នុងខេត្តឧត្តរមានជ័យ ខណៈការឈ្លានពានរបស់ថៃ មកលើដែនអធិបតេយ្យកម្ពុជា មានចំនួន១៥ថ្ងៃ បើគិតត្រឹមថ្ងៃទី២១ ខែធ្នូ ឆ្នាំ២០២៥នេះ។
អ្នកនាំពាក្យក្រសួងការពារជាតិកម្ពុជា អ្នកស្រី ម៉ាលី សុជាតា បាននិយាយថា គិតមកដល់ថ្ងៃទី២១ខែធ្នូនេះ មានចំនួន១៥ថ្ងៃហើយ ដែលយោធាថៃបានឈ្លានពានកម្ពុជាទាំងកំរោល រំលោភលើបទឈប់បាញ់ និងសេចក្តីថ្លែងការណ៍រួម ស្តីពីកិច្ចព្រមព្រៀងសន្តិភាព ដែលភាគីទាំងពីរបានចុះហត្ថលេខារួចហើយកាលពីថ្ងៃទី២៦ ខែតុលា ឆ្នាំ២០៥។
បើតាមប្រភពនោះ ចាប់ពីម៉ោងជាង៥ល្ងាចថ្ងៃទី២០ខែធ្នូ រហូតដល់ព្រឹកម៉ោង៦ ថ្ងៃអាទិត្យនេះ យោធាថៃនៅបន្តប្រើអាវុធគាំទ្រ វាយបុកចូលប្រាសាទតាមាន់ធំ និងថ្មដូន នៅស្ថិតក្នុងខេត្តឧត្តរមានជ័យ។
អ្នកស្រីថា៖ «នៅវេលាម៉ោង៦និង១៥នាទី(ព្រឹកថ្ងៃអាទិត្យនេះ) យោធាថៃបានចាប់ផ្តើមបាញ់ផ្លោងកាំភ្លើងធំ រថក្រោះ បាញ់បុកចូលភូមិសាស្ត្រថ្មដូន និងប្រាសាទតាមាន់បន្ថែម។ នៅវេលាម៉ោង៦និង២៥នាទី យោធាថៃបានបាញ់កាំភ្លើងធំ កាំភ្លើងគាំទ្រចូលភូមិសាស្ត្រប្រាសាទតាមាន់បន្ថែមទៀត»។
សម្រាប់យោធភូមិភាគ៥វិញ ថៃបន្តបាញ់ផ្លោងចូលភូមិព្រៃចាន់ និងបឹងត្រកួនជាដើម ដោយក្រសួងចាត់ទុកទង្វើឈ្លានពានរបស់យោធាថៃមកលើកម្ពុជានេះ ថាជាទង្វើឃោរឃៅ រួមទាំងការប្រើប្រាស់អាវុធយុទ្ធោបករធុនធ្ងន់ និងមានកម្រិតបំផ្លាញខ្ពស់ ដូចជា យន្តហោះចម្បាំងF-16 នាវាចម្បាំង កាំភ្លើងធំគ្រប់ប្រភេទ គ្រាប់បែកចង្កោម ផ្សែងពុល និងដ្រូនគ្រប់ប្រភេទ និងអាវុធធុនធ្ងន់ជាច្រើនទៀត មកវាយប្រហារកម្ពុជា និងជនស៊ីវិលរំលោភលើធម្មនុញ្ញអង្គការសហប្រជាជាតិ ធម្មនុញ្ញអាស៊ាន និងច្បាប់អន្តរជាតិមួយចំនួនទៀត។
ការណ៍នេះ កម្ពុជាទាមទារឱ្យសហគមន៍អន្តរជាតិចាត់វិធានការ ដើម្បីឱ្យថៃទទួលខុសត្រូវ ចំពោះការរំលោភបំពានដែនអធិបតេយ្យកម្ពុជាទាំងកំរោលនេះ។
យ៉ាងនេះក្តី ក្រសួងសាមីមួយនេះ អះអាងថា មកទល់ពេលនេះ កងកម្លាំងកម្ពុជានៅតែបន្តប្រយុទ្ធយ៉ាងស្វិតស្វាញ ប្រឆាំងនឹងសត្រូវឈ្លានពាន ដើម្បីការពារទឹកដី។ ហើយរដ្ឋាភិបាលបន្តប្រើសិទ្ធិស្វ័យការពារខ្លួនតបតាមច្បាប់អន្តរជាតិ។
យ៉ាងណា បើតាមក្រសួងការពារជាតិ នៅថ្ងៃទី២០ ខែធ្នូម្សិលមិញនេះ ខេត្តមួយចំនួនជាប់ព្រំដែន ដូចជា ខេត្តកោះកុង ពោធិ៍សាត់ បន្ទាយមានជ័យ ឧត្តរមានជ័យ និងខេត្តព្រះវិហារ ទីតាំងរាប់សិបកន្លែង រងការបំផ្លាញយ៉ាងធ្ងន់ធ្ងរ ពីការបាញ់ផ្លោង និងទម្លាក់គ្រាប់បែកដោយយន្តហោះចម្បាំង F-16 ថៃ ។
បើតាមប្រភពនោះ ខេត្តកោះកុង យោធាថៃបានបាញ់កាំភ្លើងធំ ចេញពីនាវាចម្បាំងធ្លាក់ចូលក្នុងទឹកប្រមាណជា២០គ្រាប់ ក្រោយសណ្ឋាគារជាប់ច្រកព្រំដែនចាំយាម ស្រុកមណ្ឌលសីមា។
ខេត្តពោធិ៍សាត់ យោធាថៃ ប្រើ DK ៧៥ម.ម បំពាក់លើរថពាសដែកបាញ់បំបុកនៅភូមិសាស្ត្រអូរភ្លុកដំរី ប្រើដ្រូនខ្នាតធំ ហោះរំលោភចូលជ្រៅទៅក្នុងស្រុកវាលវែង រហូតដល់ជើងភ្នំ១៥០០។
យន្តហោះចម្បាំង F-16 ទម្លាក់គ្រាប់បែកចំនួន៥គ្រាប់ ក្នុងនោះ ៣គ្រាប់លើទីតាំងអគារពាណិជ្ជកម្មឯកជន ជាប់ច្រកព្រំដែនជ័យជំនះ និង២គ្រាប់ទៀត ចូលសាលាបឋមសិក្សាឃុំថ្មដា ។
ក្រោយទម្លាក់គ្រាប់បែករួច កម្លាំងថ្មើរជើងរបស់យោធាថៃ អមដោយរថពាសដែកប្រមាណ ៥គ្រឿង បានរំលោភឈ្លានពានដីខ្មែរនៅច្រកជ័យជំនះ ឃុំថ្មដា ស្រុកវាលវែង។
នៅខេត្តឧត្តរមានជ័យ និងខេត្តព្រះវិហារវិញ ថៃបន្តប្រើប្រាស់កាំភ្លើងធំ រថក្រោះ អមដោយកម្លាំងថ្មើរជើង វាយប្រហារចូលភូមិសាស្ត្រភ្នំខ្មោច បុស្សស្បូវ-ជាំតែ និងប្រាសាទព្រះវិហារ។
លើសពីនេះ យន្តហោះចម្បាំង F-16 ថៃ ទម្លាក់គ្រាប់បែកចំនួន២គ្រាប់ ផ្តាច់ស្ពានអូរជីក ស្ថិតក្នុងភូមិសាស្ត្រ រវាងស្រុកចុងកាល់ ខេត្តឧត្តរមានជ័យ និងព្រំប្រទល់ស្រុកស្រីស្នំ ខេត្តសៀមរាប ដែលជាហេដ្ឋារចនាសម្ព័ន្ធស៊ីវិល និងមានប្រជាជនស៊ីវិលរស់នៅ និងទីតាំងមួយចំនួនទៀត។
គិតជាផលប៉ះពាល់ ដែលកើតចេញពីប្រតិបត្តិការឈ្លានពានរបស់ថៃ ចំនួន១៤ថ្ងៃគិតត្រឹមថ្ងៃទី២០ ខែធ្នូ ឆ្នាំ២០២៥ ជនស៊ីវិលខ្មែរ ស្លាប់កើនឡើងដល់១៩នាក់ របួស៧៩នាក់ ខូចខាតផ្ទះសំបែងចំនួន៧៦ខ្នង សាលារៀន មណ្ឌលសុខភាព ប្រាសាទបុរាណ និងហេដ្ឋារចនាសម្ព័ន្ធមួយចំនួនទៀត។
ចំណែក ជនភៀសសឹកខ្មែរ កើនដល់ជិត៥២ម៉ឺននាក់ (៥១៨ ៦១១នាក់) ក្នុងនោះស្ត្រីជាង២៧ម៉ឺននាក់ (២៧០ ០៦៩នាក់) និងកុមារជាង១៦ម៉ឺននាក់(១៦៥ ៣៨៥នាក់)៕
