មកដល់ម៉ោង៨ព្រឹកថ្ងៃទី២៣ខែធ្នូនេះ យោធាថៃនៅតែបន្តបាញ់ផ្លោងចូលទីតាំងមួយចំនួន រួមទាំងក្រុងប៉ោយប៉ែត ដែលការឈ្លានពានឈានដល់ថ្ងៃទី១៧ បណ្តាលឱ្យជនស៊ីវិលខ្មែរស្លាប់កើនឡើងដល់២១នាក់ របួសជាង៨៣នាក់ ជនភៀសសឹកកើនដល់ជាង៥៤ម៉ឺននាក់ និងហេដ្ឋារចនាសម្ព័ន្ធជាច្រើន ត្រូវបានបំផ្លាញដោយគ្រាប់ផ្លោង និងយន្តហោះចម្បាំងថៃ។
នេះបើតាមការធ្វើបច្ចុប្បន្នភាពរបស់ក្រសួងការពារជាតិ ដោយគិតចាប់ពីថ្ងៃទី៧ ខែធ្នូ ឆ្នាំ២០២៥ ដែលយោធាថៃ បានបើកការឈ្លានពានមកលើកម្ពុជា ដោយប្រើអាវុធធុនធ្ងន់បាញ់ផ្លោង និងប្រើយន្តហោះចម្បាំង F-16 ទម្លាក់គ្រាប់បែកចង្កោម បាញ់ផ្សែងពុល ចូលទីតាំងកងទ័ពឈរជើងនៅជួរមុខ និងតំបន់ជនស៊ីវិល។
អ្នកនាំពាក្យក្រសួងការពារជាតិ អ្នកស្រី ម៉ាលី សុជាតា និយាយថា គិតមកដល់ថ្ងៃទី២៣ ខែធ្នូ ឆ្នាំ២០២៥មានចំនួន១៧ថ្ងៃហើយ ដែលយោធាថៃនៅតែបន្តឈ្លានពានកម្ពុជា រំលោភលើបទឈប់បាញ់ រំលោភសេចក្តីថ្លែងការណ៍រួម ស្តីពីសន្តិភាព រវាងកម្ពុជា-ថៃ ដែលភាគីទាំងពីរបាន ចុះថ្ងៃទី២៦ ខែតុលា ឆ្នាំ២០២៥។
ពាក់ព័ន្ធនឹងអំពើគំរាមកំហែងឈ្លានពានកម្ពុជា ពីសំណាក់យោធាថៃវិញ អ្នកស្រីថា តំបន់មួយចំនួនរបស់កម្ពុជា ដូចជា នៅខេត្តពោធិ៍សាត់ ខេត្តបាត់ដំបង បន្ទាយមានជ័យ ឧត្តរមានជ័យ និងខេត្តព្រះវិហារ យោធាថៃនៅតែបន្តបាញ់ផ្លោងចូលរហូតមកដល់ម៉ោង៨ព្រឹកថ្ងៃអង្គារនេះ នៅមិនទាន់ឈប់នៅឡើយ។
បើតាមប្រភពនោះ នៅយោធភូមិភាគ៤ មានខេត្តឧត្តរមានជ័យ ព្រះវិហារ និងសៀមរាបជាដើម ចាប់ពីម៉ោង១២រំលងអាធ្រាត រហូតដល់ម៉ោង៥ទៀបភ្លឺ យោធាថៃបានបាញ់កាំភ្លើងធំ រថក្រោះ ចូលក្នុងប្រាសាទតាមាន់ បាញ់ចូលប្រាសាទព្រះវិហារ តំបន់តាថាវ រហូតម៉ោង៨ព្រឹកនេះ ថៃនៅមិនទាន់ឈប់បាញ់ទេ។
ចំណែកស្ថានការណ៍ជួរមុខ នៅសមរភូមិយោធភូមិភាគទៅ៥ ក្នុងភូមិសាស្ត្រ ខេត្តបាត់ដំបង បន្ទាយមានជ័យ និងខេត្តពោធិ៍សាត់វិញ យោធាថៃបានបើកការបាញ់ផ្លោងចាប់ពីម៉ោង៥ល្ងាចថ្ងៃទី២២ខែធ្នូ រហូតមកដល់ព្រឹកថ្ងៃទី២៣ ខែធ្នូនេះ ដើម្បីឈ្លានពានកម្ពុជា។
អ្នកស្រីថា យោធាថៃ បានបន្តបាញ់ផ្លោងចូលទីប្រជុំជនស៊ីវិលរស់នៅក្នុងសង្កាត់អូរឫស្សី ក្រុងប៉ោយប៉ែត ខេត្តបន្ទាយមានជ័យ និងនៅម៉ោងជាង៨ព្រឹកនេះ យោធាថៃបានបន្តបាញ់ផ្លោងចំនួន២គ្រាប់ទៀត ដោយ១គ្រាប់ធ្លាក់នៅក្នុងសង្កាត់អូរឫស្សី និងមួយគ្រាប់ទៀត ធ្លាក់នៅសង្កាត់និមិត្ត ក្រុងប៉ោយប៉ែត។
រីឯនៅខេត្តបន្ទាយមានជ័យវិញ យោធាថៃបានបន្តបាញ់ផ្លោងចូលភូមិជោគជ័យ។ ចំណែកនៅខេត្តបាត់ដំបង នៅយប់មិញនេះ ថៃបានបាញ់ផ្លោងចំនួន១៣គ្រាប់ ចូលក្នុងភូមិសាស្ត្រស្រុកតាស្នា ស្រុកសំពៅលូនខេត្តបាត់ដំបង និងបន្តបាញ់ផ្លោងចូលតំបន់អូរភ្លុកដំរី ខេត្តពោធិ៍សាត់។
អ្នកស្រីថា៖ «គិតមកដល់ម៉ោងនេះ ទីតាំងមួយចំនួនយោធាថៃនៅបន្តធ្វើសកម្មភាពវាយប្រហារមកលើដែនអធិបតេយ្យកម្ពុជានៅឡើយទេ។ កងកម្លាំងរបស់យើងនៅបន្តតាមដានយ៉ាងយកចិត្តទុកដាក់ និងប្រយុទ្ធយ៉ាងស្វិតស្វាញជាមួយសត្រូវឈ្លានពាន»។
ជុំវិញការបាញ់ផ្លោងនេះ កម្ពុជាចាត់ទុកទង្វើឈ្លានរបស់យោធាថៃនេះថា ជាទង្វើឃោរឃៅ ព្រោះថៃបានប្រើប្រាស់អាវុធយុទ្ធោបករណ៍ធុនធ្ងន់ និងមានកម្រិតបំផ្លាញខ្ពស់ ដូចជា យន្តហោះចម្បាំងF-16 នាវាចម្បាំង គ្រាប់បែកចង្កោម ផ្សែងពុល មកវាយប្រហារកម្ពុជា និងជនស៊ីវិល ។
សម្រាប់កម្ពុជា ទង្វើឈ្លានពានរបស់ថៃនេះ បានរំលោភធម្មនុញ្ញអង្គការសហប្រជាជាតិ ធម្មនុញ្ញអាស៊ាន និងច្បាប់អន្តរជាតិមួយចំនួនទៀត ដែលកម្ពុជាទាមទារឱ្យសហគមន៍អន្តរជាតិចាត់វិធានការ ដើម្បីឱ្យថៃទទួលខុសត្រូវ ចំពោះការរំលោភបំពានដែនអធិបតេយ្យកម្ពុជាទាំងកំរោលនេះ។
យ៉ាងណា បើតាមសេចក្តីប្រកាសរបស់ប្រធានអាស៊ាន អំពីកិច្ចប្រជុំពិសេសរដ្ឋមន្ត្រីការបរទេសអាស៊ាន ស្តីពីស្ថានការណ៍បច្ចុប្បន្នរវាងកម្ពុជានិងថៃ ទីក្រុងគូឡាឡាំពួរ ថ្ងៃទី២២ ខែធ្នូ ឆ្នាំ២០២៥ ដែលមានសមាជិកចំនួន១១ប្រទេស រួមមានទាំងកម្ពុជា និងថៃផងនោះ អាស៊ានមិនបានថ្កោលទោសការឈ្លានរបស់ថៃទេ ក្រៅពីជំរុញឱ្យភាគីទាំងពីរវិលទៅជជែកដោះស្រាយបញ្ហានេះ ដោយទ្វេភាគី ។
ជាការកត់សម្គាល់ យន្តការទ្វេភាគីនេះ ភាគីថៃមិនដែលគោរពទេ ទោះមានកិច្ចព្រមព្រៀងបទឈប់បាញ់នៅថ្ងៃទី២៨ ខែកក្កដា ឆ្នាំ២០២៥ និងមានកិច្ចព្រមព្រៀងស្តីពីសន្តិភាព នៅថ្ងៃទី២៦ ខែតុលា ឆ្នាំ២០២៥ ដែលមានសហរដ្ឋអាមេរិក និងប្រធានអាស៊ានធ្វើជាសាក្សីក្តី រហូតថៃបើកការឈ្លានពានកម្ពុជា ជាទ្រង់ទ្រាយធំលើកទី២ ចាប់ពីថ្ងៃទី៧ខែធ្នូ រហូតបច្ចុប្បន្ន ធ្វើឱ្យជនស៊ីវិលខ្មែរស្លាប់ និងរបួសសរុបជាង១០០នាក់ ភៀសសឹកជាង៥៤ម៉ឺននាក់ រួមទាំងថៃទម្លាក់គ្រាប់កម្ទេចប្រាសាទបូរាណខ្មែរ ដែលមានអាយុកាលជាង ១០០០ឆ្នាំ និងកម្ទេចហេដ្ឋារចនាសម្ព័ន្ធរាប់សិបកន្លែងទៀត ត្រឹមរយៈពេលជាងកន្លះខែមកនេះ៕
