ថៃនិងកម្ពុជាបានព្រមព្រៀងគ្នាកាលពីចន្ទ ដើម្បីរៀបចំកិច្ចប្រជុំថ្នាក់រដ្ឋមន្ត្រីការពារជាតិ នៅថ្ងៃទី២៤ខែធ្នូឆ្ពោះទៅរកការបន្តអនុវត្តបទឈប់បាញ់ដែលមានរយៈពេលជាច្រើនខែ ខណៈការប្រយុទ្ធគ្នានៅព្រំដែនកាន់តែខ្លាំងក្លារវាងពួកគេទាំងពីរ បានឈានចូលដល់សប្តាហ៍ទី៣ ដែលបណ្តាលឱ្យមានអ្នកស្លាប់ និងរបួសមានការកើនឡើង។
ទីភ្នាក់ងារសារព័ត៌មានរ៉យទ័រ(Reuters) បានរាយការណ៍នៅថ្ងៃទី២៣ ខែធ្នូ ឆ្នាំ២០២៥នេះថា ការសម្រេចនេះបានកើតឡើងកាលពីថ្ងៃចន្ទ អំឡុងកិច្ចប្រជុំពិសេសនៅទីក្រុងគូឡាឡាំពួរបស់មន្ត្រីការបរទេសអាស៊ីអាគ្នេយ៍ ដែលកំពុងព្យាយាមស្រោចស្រង់បទឈប់បាញ់ ដែលសម្របសម្រួលដោយប្រធានអាស៊ានម៉ាឡេស៊ី និងប្រធានាធិបតីសហរដ្ឋអាមេរិក លោក ដូណាល់ ត្រាំ បន្ទាប់ពីការប៉ះទង្គិចគ្នាកាលពីខែកក្កដា។
អ្នកការទូតកំពូលនៃសមាគមប្រជាជាតិអាស៊ីអាគ្នេយ៍ដែលមានសមាជិកចំនួន ១១រូប បានជំរុញឱ្យភាគីប្រទេសទាំងពីរ អនុវត្តការអត់ធ្មត់ជាអតិបរមា និងចាត់វិធានការជាបន្ទាន់ ដើម្បីបញ្ឈប់ការប្រយុទ្ធ ខណៈការស្វាគមន៍នៃកិច្ចប្រជុំដែលបានគ្រោងទុកនៅថ្ងៃពុធ នៃគណៈកម្មាធិការព្រំដែនទូទៅ ជាយន្តការដែលបានបង្កើតឡើងជាយូរមកហើយសម្រាប់កិច្ចចរចាទ្វេភាគី។
ប្រភពបន្តថា ‘‘រដ្ឋមន្ត្រីការបរទេសអាស៊ាន បានបង្ហាញក្តីសង្ឃឹមចំពោះការបន្ធូរភាពតានតឹងនៃភាពស្អប់ខ្ពើម និងភាពជាសត្រូវដែលអាចធ្វើទៅបាន’’ នេះបើយោងតាមសេចក្តីថ្លែងការណ៍ពីប្រធានអាស៊ានម៉ាឡេស៊ី ដោយបន្ថែមថា ការពិភាក្សានឹងរួមបញ្ចូលការអនុវត្តបទឈប់បាញ់និងការផ្ទៀងផ្ទាត់។
ថ្លែងទៅកាន់សារព័ត៌មាននៅអចលនទ្រព្យម៉ាអេឡាហ្គោ (Mar-a-Lago estate) នៅហ្វ្ល័ររីដា(Florida) លោក ត្រាំ បានលើកឡើងអំពីជម្លោះរវាងថៃនិងកម្ពុជាម្តងទៀតថា វាជាជម្លោះមួយក្នុងចំណោមសង្រ្គាមទាំង៨ ដែលលោកបានបញ្ឈប់នៅជុំវិញពិភពលោក។
លោកបន្ថែមថា៖ «ប្រទេសថៃបានចាប់ផ្តើមធ្វើឱ្យចេញជារូបរាងឡើងវិញ។ អ្នកដឹងហើយ ពួកគេបានចាប់ផ្តើមជាមួយប្រទេសកម្ពុជា។ ពួកគេចាប់ផ្តើមឡើងវិញ ប៉ុន្តែខ្ញុំគិតថា…យើងបានធ្វើឱ្យស្ថានការណ៍ល្អមួយកម្រិតហើយ»។
ប្រភពថា ការសម្រេចរៀបចំការចរចា គឺជាជំហ៊ានមួយដ៏សំខាន់បំផុត ចាប់តាំងពីការប្រយុទ្ធគ្នាចាប់ផ្តើមឡើងជាថ្មី ដែលទាំងនាយករដ្ឋមន្ត្រីប្រទេសម៉ាឡេស៊ី លោក អាន់វ៉ា អ៊ីប្រាហ៊ីម និងលោក ត្រាំ មិនអាចនាំប្រទេសទាំងពីរមកតុចរចាលើកនេះបាន បន្ទាប់ពីហៅតាមទូរស័ព្ទដាច់ដោយឡែកទៅមេដឹកនាំទាំងពីរ។
រយៈពេល៥ថ្ងៃនៅក្នុងជម្លោះ លោក ត្រាំ បាននិយាយថា នាយករដ្ឋមន្ត្រីថៃ និងកម្ពុជា បានយល់ព្រម‘‘បញ្ឈប់រាល់ការបាញ់ប្រហារ’’ ប៉ុន្តែការប៉ះទង្គិចនៅតែបន្តនៅថ្ងៃបន្ទាប់ទៀត ដោយទីក្រុងបាងកកបានបើកការវាយប្រហារតាមផ្លូវអាកាសបន្ថែមទៀត និងប្តេជ្ញាបន្តការប្រយុទ្ធគ្នា។
ប្រទេសចិន ក៏បានជំរុញឱ្យភាគីទាំងពីរធ្វើការដកថយផងដែរ ដោយបេសកជនពិសេសរបស់ខ្លួនទទួលបន្ទុកកិច្ចការអាស៊ី លោក តឹង ស៊ីជីន បានជួបពិភាក្សានៅទីក្រុងបាងកក និងទីក្រុងភ្នំពេញ ក្នុងប៉ុន្មានថ្ងៃថ្មីៗនេះ៕
