ប្រទេសបារាំង អូស្ត្រាលី និងកូរ៉េខាងត្បូងបង្ហាញអំពីការព្រួយបារម្ភ ដោយបានជំរុញឱ្យប្រទេសថៃ និងកម្ពុជា អនុវត្តបទឈប់បាញ់ជាបន្ទាន់ ក្នុងការស្វែងរកដំណោះស្រាយដោយសន្តិវិធី ជុំវិញជម្លោះតាមតំបន់ព្រំដែន ដើម្បីទប់ស្កាត់ការបង្កគ្រោះថ្នាក់ដល់ជនស៊ីវិល។
ក្រសួងអឺរ៉ុប និងការបរទេសបារាំង បានចេញសេចក្តីថ្លែងការណ៍នៅលើហ្វេសប៊ុកថ្ងៃទី២៤ ខែធ្នូ ឆ្នាំ២០២៥នេះថា លោក ហ្សង់-ណូអែល បារ៉ូ រដ្ឋមន្ត្រីអឺរ៉ុប និងការបរទេសបារាំង បានជំរុញឱ្យមានបទឈប់បាញ់ជាបន្ទាន់ ជុំវិញជម្លោះរវាងប្រទេសកម្ពុជានិងថៃ ដែលបានបង្កឱ្យមានការជម្លៀសប្រជាពលរដ្ឋប្រមាណ ១លាននាក់។
លើសពីនេះ រដ្ឋាភិបាលអូស្ត្រាលី នៅតែមានការព្រួយបារម្ភយ៉ាងខ្លាំង ចំពោះការប៉ះទង្គិចយោធារវាងកម្ពុជានិងថៃ ដែលកំពុងបន្តកើតឡើង រួមទាំងការកើនឡើងយ៉ាងឆាប់រហ័សនៃទំហំ និងភាពតានតឹងនៃជម្លោះ ការប្រើប្រាស់អាវុធបំផ្លិចបំផ្លាញធុនធ្ងន់ និងផលប៉ះពាល់ផ្នែកមនុស្សធម៌ដែលកំពុងកើនឡើងចំពោះភាគីទាំងពីរ។
រដ្ឋាភិបាលអូស្រ្តាលី ក៏បានចូលរួមរំលែកទុក្ខយ៉ាងក្រៀមក្រំ ចំពោះក្រុមគ្រួសារដែលបានបាត់បង់សមាជិកគ្រួសារ ក៏ដូចជាមនុស្សជាទីស្រឡាញ់របស់ខ្លួន ហើយអំពាវនាវឱ្យភាគីទាំងពីរធានាឲ្យបាននូវការការពារសុវត្ថិភាពដល់ជនស៊ីវិល ហេដ្ឋារចនាសម្ព័ន្ធស៊ីវិល និងបេតិកភណ្ឌវប្បធម៌។
រដ្ឋាភិបាលអូស្រ្តាលី ជំរុញឱ្យភាគីទាំងពីរគោរពយ៉ាងម៉ឺងម៉ាត់នូវកាតព្វកិច្ចរបស់ខ្លួន ស្របតាមច្បាប់អន្តរជាតិ កាត់បន្ថយភាពតានតឹង ចាត់វិធានការឱ្យបានឆាប់រហ័ស និងមានប្រសិទ្ធភាព ដើម្បីបញ្ឈប់អរិភាព រួមទាំងអនុវត្តសេចក្តីថ្លែងការណ៍រួមទីក្រុងគូឡាឡាំពួរ។
អូស្ត្រាលី បាននិយាយថា៖ «យើងសូមលើកទឹកចិត្តឱ្យភាគីទាំងពីរ ចូលរួមក្នុងការចរចាដោយស្មារតីស្មោះត្រង់ក្នុងកិច្ចប្រជុំគណៈកម្មាធិការព្រំដែនទូទៅ ដើម្បីសម្រេចបាននូវដំណោះស្រាយយូរអង្វែង និងសន្តិភាព។ ហើយយើងសូមស្វាគមន៍ចំពោះកិច្ចខិតខំប្រឹងប្រែងបន្តរបស់អាស៊ាន ម៉ាឡេស៊ី និងសហរដ្ឋអាមេរិក ក្នុងការគាំទ្រដល់ការបញ្ចប់ជម្លោះនេះ»។
ចំណែក កូរ៉េខាងត្បូងវិញ តាមប្រភព ដឹ កូរៀ ថាមស៍(The Korea Times) បានរាយការណ៍កាលពីថ្ងៃអង្គារម្សិលមិញនេះថា ប្រទេសកូរ៉េខាងត្បូង បានជំរុញឱ្យភាគីប្រទេសកម្ពុជា និងថៃជួបពិភាក្សាគ្នា ដើម្បីដោះស្រាយការប៉ះទង្គិចគ្នាតាមព្រំដែនដែលបានកើនឡើង និងសម្តែងការអបអរសាទរចំពោះកិច្ចខិតខំប្រឹងប្រែងរបស់ប្រទេសជិតខាង ដើម្បីបន្ធូរបន្ថយភាពតានតឹង។
ប្រភព ដឹ កូរៀថាមស៍(The Korea Times) បន្តថា អ្នកនាំពាក្យក្រសួងការបរទេសកូរ៉េខាងត្បូងលោក ផាក អ៊ីល(Park Il) បាននិយាយនៅក្នុងអត្ថបទអត្ថាធិប្បាយមួយថា ‘‘យើងកោតសរសើរចំពោះការខំប្រឹងរបស់អាស៊ាន ក្នុងការកាត់បន្ថយភាពតានតឹង និងស្វែងរកដំណោះស្រាយដោយសន្តិវិធីចំពោះស្ថានការណ៍នេះ’’។
លោកបន្តថា៖ «រដ្ឋាភិបាលប្រទេសកូរ៉េខាងត្បូង ជំរុញឱ្យប្រទេសថៃនិងកម្ពុជា ដោះស្រាយស្ថានការណ៍ដោយសន្តិវិធី តាមរយៈការសន្ទនាក្នុងពេលឆាប់ៗតាមដែលអាចធ្វើទៅបាន»។
ប្រភពគ្លូបលថាមស៍ (Global times) បានឱ្យដឹងនៅថ្ងៃទី២៣ ខែធ្នូនេះថា យោងតាមសេចក្តីប្រកាសព័ត៌មានពីក្រសួងការបរទេសចិន លោក តឹង(Deng) បាននិយាយថា ប្រទេសចិនមានការព្រួយបារម្ភយ៉ាងមុតមាំអំពីស្ថានភាពនាពេលបច្ចុប្បន្ន តាមបណ្តោយព្រំដែនរវាងកម្ពុជា-ថៃ និងមានការសោកស្តាយយ៉ាងខ្លាំង ចំពោះការបាត់បង់ជីវិត និងការផ្លាស់ទីលំនៅដែលបង្កឡើងដោយជម្លោះ ដែលវាបង្ហាញពីការអាណិតអាសូរជាពន់ពេក។
លោកបន្តទៀតថា ជាអាទិភាពចំបង គឺការសម្រេចបទឈប់បាញ់ជាបន្ទាន់ បញ្ឈប់ការប្រយុទ្ធគ្នា និងបន្តការសន្ទនា ដើម្បីដោះស្រាយជម្លោះព្រំដែនតាមមធ្យោបាយសន្តិវិធី។
យ៉ាងណាក្តី យោងតាមសេចក្តីប្រកាសព័ត៌មានពីក្រសួងការពារជាតិ អំពីស្ថានការណ៍នៅតាមបន្ទាត់ព្រំដែនកម្ពុជា-ថៃ បានឱ្យដឹងថា យោធាថៃនៅតែបន្តធ្វើសកម្មភាពបាញ់ប្រហារចូលទីតាំងប្រជាជនស៊ីវិលកម្ពុជា និងហេដ្ឋារចនាសម្ព័ន្ធស៊ីវិល នៅយោធភូមិភាគទី៥ ក្នុងភូមិសាស្រ្តស្រុកបាណន់ ខេត្តបាត់ដំបង នាថ្ងៃទី២៤ ខែធ្នូ ឆ្នាំ២០២៥។
សកម្មភាពខាងលើនេះ ប្រទេសកម្ពុជា ចាត់ទុកថា ជាការវាយប្រហារដ៏កំរោល ដោយមិនរើសគោលដៅរបស់យោធាថៃ ជាការរំលោភបំពានច្បាប់មនុស្សធម៌អន្តរជាតិ៕
