តុលាការកំពូល នៅព្រឹកថ្ងៃពុធនេះ បានបើកសវនការលើសំណុំរឿង លោក នី ណាក់ ជុំវិញការរិះគន់មន្ត្រីរដ្ឋាភិបាល ដែលការណ៍នេះ រងការរិះគន់ថា ខ្ជីខ្ជា ក្នុងការរកយុត្តិធម៌ឱ្យអ្នកជំនាញផ្នែកកសិកម្មរូបនេះ ដោយសារតែមិនមានវត្តមានជនជាប់ចោទអំឡុងពេលសវនការ។
អ្នកជំនាញផ្នែកកសិកម្ម លោក នី ណាក់ ត្រូវបានចាប់បញ្ជូនទៅឃុំខ្លួនបណ្តោះអាសន្ននៅពន្ធនាគារព្រៃស កាលពីថ្ងៃទី៥ ខែមករា ឆ្នាំ២០២៤ និងត្រូវបានសាលាដំបូងរាជធានីភ្នំពេញ បានផ្ដន្ទាទោសរូបលោក កាលពីថ្ងៃទី១១ ខែវិច្ឆិកា ឆ្នាំ២០២៤ ឱ្យជាប់ពន្ធនាគារ ២ឆ្នាំ និងពិន័យជាប្រាក់ចំនួន ២០០លានរៀល ឬស្មើប្រមាណ ៥ម៉ឺនដុល្លារ ឱ្យទៅដើមបណ្ដឹងដែលជារដ្ឋមន្ត្រីក្រសួងការងារ លោក ហេង សួរ ក្នុងសំណុំរឿងបរិហារកេរ្តិ៍ជាសាធារណៈ និងញុះញង់ឱ្យមានការរើសអើង។
យោងតាមលិខិតរបស់អគ្គព្រះរាជអាជ្ញាអមតុលាការកំពូល កាលពីថ្ងៃទី១៥ ខែធ្នូ ឆ្នាំ២០២៥បានអញ្ជើញលោក ជូង ជូងី មេធាវីការពារក្តីឱ្យលោក នី ណាក់ ទៅកាន់តុលាការកំពូល នៅព្រឹកថ្ងៃទី២៤ ខែធ្នូនេះ ដើម្បីចូលរួមសវនការ។
តែយ៉ាងណា វីអូឌី មិនអាចសុំការអត្ថាធិប្បាយជុំវិញដំណើរការសវនការនេះ ពីអ្នកនាំពាក្យតុលាការកំពូល អ្នកស្រី ម៉ៅ ធីតា និងលោកមេធាវី ជូង ជូងី ព្រមទាំងភរិយារបស់លោក នី ណាក់ គឺអ្នកស្រី សុខ ស៊ីណែត បានទេនៅរសៀលថ្ងៃទី២៤ ខែធ្នូនេះ។
យ៉ាងណា មន្ត្រីអង្កេតជាន់ខ្ពស់នៃសមាគមការពារសិទ្ធិមនុស្សអាដហុក លោក យី សុខសាន្ត ដែលតាមដានសវនាការនេះ សង្កេតឃើញថា ក្នុងសវនការ មេធាវីការពារក្តីឱ្យ លោក នី ណាក់ បានបញ្ជាក់ម្តងហើយម្តងទៀតតាំងពីសាលាដំបូងរាជធានីភ្នំពេញ រហូតដល់តុលាការកំពូលថា អ្វីដែលលោក នី ណាក់ បានបង្ហោះសារនៅលើបណ្តាញសង្គមរបស់លោក គឺជាការបញ្ចេញមតិ និងគ្មានចេតនាណាមួយចោទប្រកាន់ទៅលើឈ្មោះ ហេង សួរ នោះទេ។
លោកបន្តថា មេធាវីរបស់លោក នី ណាក់ ក៏បានបញ្ជាក់ដែរថា ឈ្មោះ ហេង សួរ នោះក៏មិនមែនជាឈ្មោះរបស់រដ្ឋមន្ត្រីក្រសួងការងារនោះដែរ ហើយការចោទគាត់ពីបទញុះញង់នោះ ក៏មិនមែនលោក នី ណាក់ ប្រព្រឹត្តនោះដែរ គឺជាខ្លឹមសារក្នុងខំមិន(comment)ក្នុងការផុសរបស់លោក នី ណាក់ ក្នុងបណ្តាញសង្គមដែរ ដូច្នេះលោកយល់ថា តុលាការ ក៏ដូចជាដើមបណ្តឹង ដែលជារដ្ឋមន្ត្រីក្រសួងការងារ លោក ហេង សួរ គួរតែទម្លាក់ការចោទប្រកាន់ទៅលើលោក នី ណាក់ និងដោះលែងឱ្យគាត់មានសេរីភាពវិញ។
លោកថា៖ «យើងស្នើសុំយ៉ាងទទូចដែរ ទៅរដ្ឋាភិបាល ក៏ដូចជាអ្នកដើមបណ្តឹង ក៏ដូចជាតុលាការកំពូល មេត្តាទម្លាក់ចោលការចោទប្រកាន់មកលើពួកគាត់ទៅ ពីព្រោះអីនៅប្រទេសកម្ពុជា ចំណុចសំខាន់ដែលយើងចាត់ទុកថា កម្ពុជាជារបបប្រជាធិបតេយ្យ សេរីពហុបក្ស ចឹងសិទ្ធិបញ្ចេញមតិ ជាមូលដ្ឋានគ្រឹះនៃលទ្ធិប្រជាធិបតេយ្យ។ ក្នុងនាមអង្គការសង្គមស៊ីវិលដែលធ្វើការងារលើវិស័យសិទ្ធិមនុស្ស ចង់បានសង្គមមួយឱ្យមាន គេហៅថា គោរពសិទ្ធិមនុស្ស និងនិតិរដ្ឋ ស្នើសុំឱ្យទម្លាក់ការចោទប្រកាន់ទៅលើរូបគាត់ វាជាល្អសម្រាប់ជាតិសាសន៍យើងទេ»។
ជាមួយគ្នានេះដែរ លោក យី សុខសាន្ត ក៏បានរិះគន់ចំណាត់ការរបស់តុលាការផងដែរថា ជាការខ្ជីខ្ជាក្នុងការកាត់សេចក្តី និងរកយុត្តិធម៌ជូនជនជាប់ចោទ ដោយសារតែសវនការព្រឹកមិញនេះ មិនមានវត្តមានរបស់ លោក នី ណាក់ នោះទេ។
លោកថា៖ «អ្វីដែលយើងខកបំណងនេះ គឺធម្មតា តុលាការហាក់ដូចជាខ្ជីខ្ជាក្នុងការកាត់សេចក្តីរបស់ជនជាប់ចោទ ពីព្រោះអីសិទ្ធិស្មើភាពគ្នាចំពោះមុខច្បាប់ ទាល់តែយកជនដែលជាប់ចោទហ្នឹង យកមកតទល់គ្នាចំពោះមុខច្បាប់ ប៉ុន្តែលើកនេះ នៅពេលដែលមិនព្រមដោះលែងឱ្យគាត់នៅក្រៅឃុំ យកគាត់ទៅឃុំហ្នឹងទុកងាយស្រួលក្នុងការដឹកជញ្ជូនយកមកសវនការ ប៉ុន្តែនៅពេលសវនការ អត់បានដឹកគាត់មក មានន័យថា ជាការខ្ជះខ្ជាយមួយដែលធ្វើឱ្យប៉ះពាល់ដល់សិទ្ធិជនជាប់ចោទ»។
កាលពីថ្ងៃទី៧ ខែមករា ឆ្នាំ២០២៤ អង្គការឃ្លាំមើលសិទ្ធិមនុស្សអន្តរជាតិ (Human Rights Watch) បានចេញមុខសម្តែងប្រតិកម្មនឹងការចាប់ឃុំខ្លួន លោក នី ណាក់ ជាអ្នកជំនាញកសិកម្ម និងដែលត្រូវបានអង្គការអន្តរជាតិមួយនេះ ចាត់ទុកថា ជាសកម្មជននយោបាយនៅកម្ពុជា។ ការចាប់ខ្លួនដែលធ្វើឡើងទៅតាមបណ្តឹងរបស់ លោក ហេង សួរ រដ្ឋមន្ត្រីក្រសួងការងារនេះ ត្រូវបានលោក Phil Robertson នាយករងប្រចាំតំបន់អាស៊ីនៃអង្គការ Human Rights Watch ចាត់ទុកថា ជាការរំលោភសិទ្ធិបញ្ចេញមតិ និងមិនអាចទទួលយកបានឡើយ។
នៅក្នុងសេចក្តីថ្លែងការណ៍ចំថ្ងៃទី៧មករា លោក Phil Robertson បានគត់សំគាល់ថា ការចាប់ខ្លួនលោក នី ណាក់ គឺជាឧទាហរណ៍មួយទៀតនៃការធ្វើទុក្ខបុកម្នេញជាប្រព័ន្ធទៅលើអ្នករិះគន់របស់រដ្ឋាភិបាល ដែលកំពុងអនុវត្តសិទ្ធិសេរីភាពក្នុងការបញ្ចេញមតិដោយសន្តិវិធីតាមបណ្តាញសង្គម។
បើតាមអង្គការដដែលនេះ លោក នី ណាក់ មិនបានធ្វើអ្វីខុសច្បាប់ ដែលត្រូវចាប់ខ្លួននោះឡើយ។ លោក Phil Robertson បានទាមទារទម្លាក់ចោលការចោទប្រកាន់លើអ្នករិះគន់មិនសំចៃមាត់រូបនេះជាបន្ទាន់ និងដោះលែងឲ្យមានសេរីភាពវិញ។
តាមសេចក្តីថ្លែងការណ៍របស់អ្នកនាំពាក្យអយ្យការសាលាដំបូងរាជធានីភ្នំពេញ កាលពីថ្ងៃទី៦ ខែមករា ឆ្នាំ២០២៤ គឺលោក នី ណាក់ បានសរសេរសារលើហ្វេសប៊ុក កាលពីថ្ងៃទី១២ ខែធ្នូ ឆ្នាំ២០២៣ថា “កាត់ដីឲ្យ លោក ហេង សួរ ប្រហែលជាទុកសង់រោងចក្រ២០០០ និងធ្វើការរិយាល័យឲ្យមន្ត្រីក្រសួងការងារ ព្រោះឃើញថា គាត់ធ្វើការរហូតគ្មានថ្ងៃសៅរ៍ អាទិត្យ”។
ការបង្ហោះសារនេះ ត្រូវបានអ្នកនាំពាក្យក្រសួងការងារ ចាត់ទុកការបញ្ចេញមតិរបស់ លោក នី ណាក់ ថាប្រាស់ចាកពីអ្វីដែលមានចែងក្នុងច្បាប់។
លោក នី ណាក់ ដែលធ្លាប់ជាអតីតមន្ត្រីនៃក្រសួងកសិកម្មផងនោះ ក៏ធ្លាប់ជាប់ពន្ធនាគារម្តងរួចមកហើយ ក្រោមបណ្តឹងរបស់ក្រសួងកសិកម្ម រុក្ខាប្រមាញ់ និងនេសាទ ក្រោយលោកបង្ហោះសារតាមហ្វេសប៊ុករបស់លោកកាលពីចុងឆ្នាំ២០១៩ ដែលមានខ្លឹមសារថា «ទិញម៉ាស់ពាក់ឱ្យកូនមាន់ ក្នុងពេលដែលប្រទេសកម្ពុជាកំពុងជួបវិបត្តិជំងឺកូវីដខ្លាំង»។
កាលណោះ តុលាការក្រុងភ្នំពេញ បានផ្តន្ទាទោស លោក នី ណាក់ ឱ្យជាប់ពន្ធនាគារចំនួន ១៨ខែ និងពិន័យជាប្រាក់ចូលថវិការដ្ឋចំនួន ២លានរៀល កាលពីខែសីហា ឆ្នាំ២០២០ ក្រោមការចោទប្រកាន់ពីបទ ជេរប្រមាថជាសាធារណៈ និងញុះញង់ឱ្យមានការរើសអើង។ លោកត្រូវបានដោះលែងឱ្យមានសេរីភាពវិញ នៅថ្ងៃទី១០ ខែមិថុនា ឆ្នាំ២០២២ ក្រោយអនុវត្តទោសចប់តាមអំណាចសាលក្រមស្ថាព័ររបស់សាលាដំបូងរាជធានីភ្នំពេញ៕
