ក្រសួងការពារជាតិកម្ពុជា ឱ្យដឹងថា រហូតមកដល់ព្រឹកថ្ងៃព្រហស្បតិ៍នេះ យោធាថៃនៅបន្តប្រើអាវុធធុនធ្ងន់ និងរថក្រោះ រួមទាំងដ្រូនអត្តឃាត បាញ់សន្ធាប់យ៉ាងខ្លាំងបុករុលចូលប្រាសាទព្រះវិហារ និងទីតាំងមួយចំនួនទៀត តែថាកងកម្លាំងជួរមុខកម្ពុជាកំពុងប្រយុទ្ធយ៉ាងស្វិតស្វាញ ដើម្បីការពារទឹកដី។
នេះបើតាមអ្នកនាំពាក្យក្រសួងការពារជាតិ អ្នកស្រី ម៉ាលី សុជាតា និយាយនៅថ្ងៃទី២៥ខែធ្នូ ឆ្នាំ២០២៥នេះ ស្តីពីស្ថានការណ៍នៅតាមបន្ទាត់ព្រំដែន ចាប់ពីល្ងាចថ្ងៃទី២៤ រហូតដល់ព្រឹកថ្ងៃទី២៥ខែធ្នូនេះ។
អ្នកស្រីថា៖ «យោធាថៃបានប្រើកាំភ្លើងធំបាញ់សន្ធាប់ខ្លាំង និងកាំភ្លើងបំពាក់លើរថក្រោះ ដើម្បីបាញ់បំបុកបន្ថែមទៀត ព្រមទាំងប្រើប្រាស់ដ្រូនអត្តឃាត នៅក្នុងភូមិសាស្ត្រប្រាសាទព្រះវិហារ»។
បើតាមអ្នកនាំពាក្យរូបនេះ ការឈ្លានពានទាំងកំរោលរបស់យោធាថៃ មកលើដែនអធិបតេយ្យកម្ពុជា គិតត្រឹមថ្ងៃទី២៥ ខែធ្នូនេះ ចូលដល់ថ្ងៃទី១៩ហើយ។ ហើយថា ការឈ្លានពាននេះ បានគំរាមកំហែងយ៉ាងធ្ងន់ធ្ងរមកដល់ដែនអធិបតេយ្យកម្ពុជាច្រើនកន្លែង ដូចជា នៅបឹងត្រកួន ភូមិជោគជ័យ ព្រៃចាន់ ក្នុងខេត្តបន្ទាយមានជ័យ។
អ្នកស្រីថា៖ «នៅវេលាម៉ោង៥និង៣៥នាទីព្រឹកថ្ងៃទី២៥ ខែធ្នូនេះ យោធាថៃបន្តបាញ់ផ្លោងចំនួន១៥គ្រាប់ ចូលក្នុងភូមិសាស្ត្របឹងត្រកួន ដើម្បីបំផ្លិចបំផ្លាញ និងកម្ទេចលំនៅឋានរបស់ជនស៊ីវិលកម្ពុជា ចោលយ៉ាងកំរោលនិងអមនុស្សធម៌»។
បើតាមប្រភពនោះ ការឈ្លានពានរបស់យោធាថៃ ជិត២០ថ្ងៃមកនេះ ថៃបានរំលោភបទឈប់បាញ់ ដែលប្រទេសទាំងពីរបានចុះហត្ថលេខារួចហើយ នៅថ្ងៃទី២៦ ខែតុលា នៅទីក្រុងគូឡាឡាំពួរ ប្រទេសម៉ាឡេស៊ី ហើយថៃក៏រំលោភច្បាប់អន្តរជាតិផងដែរ ជុំវិញការប្រើគ្រាប់បែកចង្កោម និងបាញ់ផ្សែងពុល។
ក្នុងន័យនេះ កម្ពុជាអះអាងថា ការប្រើប្រាស់អាវុធធុនធ្ងន់គ្រប់ប្រភេទរបស់ថៃ ដែលមានសមត្ថភាពបំផ្លាញខ្ពស់ ដូចជា យន្តហោះទម្លាក់គ្រាប់បែក F-16 នាវាចម្បាំង កាំភ្លើងផ្លោង គ្រាប់បែកចង្កោម ដ្រូនគ្រប់ប្រភេទ និងការបាញ់ផ្សែងពុលមកលើកងទ័ពនិងប្រជាពលរដ្ឋស៊ីវិលកម្ពុជា គឺជាអំពើផ្គើននិងចំអកឡកឡឺយចំពោះសហគមន៍អន្តរជាតិ ដែលបានអំពាវនាវឱ្យបញ្ឈប់ការផ្ទុះអាវុធ ហើយងាកមកគោរពកិច្ចព្រមព្រៀងឈប់បាញ់ និងសេចក្តីថ្លែងការណ៍រួមស្តីពីសន្តិភាពទីក្រុងកូឡាឡាំពួរវិញ។
ការណ៍នេះ បង្កឱ្យជនស៊ីវិលខ្មែរស្លាប់កើនឡើងដល់៣០នាក់ របួស៨៧នាក់ និងជនភៀសសឹកកើនឡើងជាង៦០ម៉ឺននាក់ ហេដ្ឋារចនាសម្ព័ន្ធជាច្រើនត្រូវបានបំផ្លាញ រួមទំាងសាលារៀន វត្តអារាម និងប្រាសាទបូរាណខ្មែរដែលមានអាយុកាលជាង១០០០ឆ្នាំ។
យ៉ាងនេះក្តី ក្រុមអ្នកតាមដានជម្លោះព្រំដែន ផ្តល់យោបល់ថា ដើម្បីទប់ស្កាត់មហិច្ឆតាឈ្លានពានរបស់ថៃ និងទប់ស្កាត់ការបង្ហូរឈាមគ្នារយៈពេលយូរ ក្រៅពីប្រើសិទ្ធិការពារខ្លួន កម្ពុជាចាំបាច់ត្រូវប្តឹងថៃទៅតុលាការយុត្តិធម៌អន្តរជាតិ(ICJ) និងតុលាការព្រហ្មទណ្ឌអន្តរជាតិ(ICC) រួមទាំងប្តឹងទៅសហប្រធាននៃកិច្ចព្រមព្រៀងសន្តិភាពទីក្រុងប៉ារីសឱ្យកោះប្រជុំបន្ទាន់ ទើបអាចទប់ស្កាត់បាន។
ពួកគេសំអាងថា ប្រទេសថៃបានចិញ្ចឹមចិត្តឈ្លានពានដែនអធិបតេយ្យកម្ពុជា ច្រើនទសវត្សរ៍មកហើយ។ ហើយថាពួកគេនឹងមិនបញ្ចប់ត្រឹមនេះ បើកម្ពុជាមិនប្រើច្បាប់អន្តរជាតិដែលកម្ពុជាមាន ដើម្បីទប់ទល់នឹងមហិច្ឆតាឈ្លានពាននេះទេនោះ៕
