យន្តហោះចម្បាំងរបស់ថៃ បានទម្លាក់គ្រាប់ចូលទៅទីតាំងអូរស្មាច់ ក្នុងខេត្តឧត្តរមានជ័យ កាន់តែខ្លាំង កាលពីថ្ងៃទី៨ ខែធ្នូ ឆ្នាំ២០២៥ ជាពិសេសក្នុងតំបន់ដែលសម្បូរដោយអគារក្រុមឆបោកតាមអនឡាញ ឬហៅថា Scam។ ការវាយប្រហារទម្លាក់គ្រាប់បែកពីលើមេឃ បង្កភាពវឹកវរ ហើយបណ្តាលឲ្យមនុស្សជាច្រើននាក់ភៀសខ្លួនគេច។
កម្មករខ្មែរមួយចំនួន ដែលធ្វើការនៅអគារScam ក្នុងតំបន់អូរស្មាច់ បានលើកឡើងថា ទាហានថៃបានទម្លាក់គ្រាប់ចូលក្នុងបរិវេណអគារScam ហើយកម្មករខ្មែរចាប់ផ្តើមសម្រុករត់ចេញ។ ប៉ុន្តែជនបរទេសដែលជាអ្នកធ្វើការនៅទីនោះ មានជនជាតិចិន នេប៉ាល់ ឥណ្ឌា ឥណ្ឌូនេស៊ី និងជនបរទេសផ្សេងទៀត យ៉ាងតិច២ពាន់នាក់ មិនត្រូវបានអនុញ្ញាតឲ្យគេចចេញភ្លាមៗឡើយ។
សុភាព ជាឈ្មោះដែលវីអូឌីដាក់ឲ្យកម្មករម្នាក់ដែលធ្វើការងារជាអ្នកដឹកម្ហូបក្នុងអគារScam នៅអូរស្មាច់ ដោយសារកម្មកររូបនោះ បារម្ភអំពីសុវត្ថិភាព ពេលនិយាយជាមួយអ្នកសារព័ត៌មានអំពីការធ្វើទារុណកម្មក្នុងអគារScam។ សុភាព ប្រាប់វីអូឌីថា កញ្ញាបានឃើញសន្តិសុខខ្មែរម្នាក់ស្លាប់ និង២នាក់រងរបួស ដោយសារការបាញ់ប្រហារនេះ នៅពេលកញ្ញារត់ចេញពីអគារ នៅថ្ងៃទី៨ ខែធ្នូ ឆ្នាំ២០២៥។ កម្មកររូបនេះធ្វើការនៅ«អគារចិន» ឬគេហៅថា «អគារ៩ជាន់» ដែលជាទីតាំងអនឡាញបោកបញ្ឆោតអនឡាញ និងមានការរំលោភសិទ្ធិមនុស្សធ្ងន់ធ្ងរ រួមមានការឃុំខ្លួនមនុស្ស និងការធ្វើទារុណកម្មរហូតដល់ស្លាប់។
ទីតាំងបោកបញ្ឆោតតាមអនឡាញនៅអូរស្មាច់ ត្រូវបានគេស្គាល់ថាជាកម្មសិទ្ធិរបស់លោកឧកញ៉ា លី យ៉ុងផាត់ ទីប្រឹក្សារបស់លោកនាយករដ្ឋមន្រ្តី ហ៊ុន ម៉ាណែត និងជាមហាសេដ្ឋីមានឥទ្ធិពលម្នាក់ ដែលត្រូវបានសហរដ្ឋអាមេរិកដាក់ទណ្ឌកម្ម រឿងបោកបញ្ឆោតតាមអនឡាញ កាលពីកន្លងទៅ។ ក្រៅពីអគាររបស់ លោក លី យ៉ុងផាត់ អគារកាស៊ីណូ និងអគារScamផ្សេងទៀតរបស់លោកឧកញ៉ា លឹម ហេង ទីប្រឹក្សារបស់លោកនាយករដ្ឋមន្រ្តី ហ៊ុន ម៉ាណែត ក៏រងការបំផ្លិចបំផ្លាញផងដែរ។
អ្នកសារព័ត៌មានវីអូឌី បានព្យាយាមសុំការអត្ថាធិប្បាយពីលោក លី យ៉ុងផាត់ កាលពីថ្ងៃទី២៣ ខែធ្នូ ប៉ុន្តែទូរសព្ទត្រូវចុចផ្តាច់ ខណៈសំណួរក៏ត្រូវបានផ្ញើទៅលោកតាមប្រព័ន្ធតេឡេក្រាមផងដែរ។ ទោះជាយ៉ាងណា មិនមានការឆ្លើយតបឡើយរហូតមកដល់ម៉ោងផ្សាយនេះ។ ចំណែក លោក លឹម ហេង ក៏មិនអាចទាក់ទងសុំការពន្យល់តាមប្រព័ន្ធទូរសព្ទ និងតេឡេក្រាមបានដែរ។
អូរស្មាច់ជាទីតាំងដែលសម្បូរទៅដោយក្រុមបោកបញ្ឆោត និងការរីកដុះដាលអគារជាច្រើនសម្រាប់ប្រតិបត្តិការបោកបញ្ឆោត។ ដោយសារអូរស្មាច់ស្ថិតនៅតំបន់ដាច់ស្រយាលជាប់ព្រំដែនថៃ ដូច្នេះការធ្វើទារុណកម្ម និងការឃុំខ្លួនត្រូវបានលាក់បាំង ហើយកម្មករខ្មែរមិនហ៊ាននិយាយអំពីបញ្ហានេះទៅខាងក្រៅ ជាពិសេសជាមួយអ្នកសារព័ត៌មាន។ ទីតាំងមួយនេះមិនត្រូវបានអាជ្ញាធរខ្មែរចុះទៅស៊ើបអង្កេត ឬបង្រ្កាបឡើយ បើទោះមានផ្សព្វផ្សាយឈ្មោះចំៗពីស្ថាប័នសារព័ត៌មានអន្តរជាតិ និងការលើកឡើងរបស់សហរដ្ឋអាមេរិកក៏ដោយ។
កម្មករខ្មែរមួយចំនួន លើកឡើងថា នៅក្នុងទីតាំងមួយដែលរឹតបន្តឹងយ៉ាងតឹងរ៉ឹង កម្មករបរទេសយ៉ាងតិច២ពាន់នាក់ ធ្វើការបោកបញ្ឆោតនៅទីនោះ ហើយពួកគេមិនត្រូវបានអនុញ្ញាតឲ្យចេញក្រៅឡើយ។ កម្មករដែលធ្វើការនៅទីនោះ រៀបរាប់អំពីការធ្វើទារុណកម្ម ដូចជា វាយដំដោយដំបងអគ្គិសនី រហូតដល់ស្លាប់ ការដាក់ទណ្ឌកម្មឲ្យឈរ រយៈពេលយូរ ក្រោមកម្តៅថ្ងៃ ការបង្ខំឲ្យលើកធុងទឹកលើខ្នងរយៈពេលជាច្រើនម៉ោង និងការបង្ខំស្រ្តីជនបរទេស ជាពិសេសជនជាតិចិនឲ្យបម្រើសេវាផ្លូវភេទ។
អ្នកធ្វើការលើផ្នែកសិទ្ធិមនុស្សដែលតាមដានការបោកបញ្ឆោតតាមអនឡាញ ក៏ធ្លាប់បានកត់ត្រាអំពើឧក្រិដ្ឋកម្មទាំងនេះផងដែរ។ កាលពីកន្លងទៅ ការិយាល័យឧត្ដមស្នងការទទួលបន្ទុកសិទ្ធិមនុស្ស (OHCHR) បានលើកឡើងថា មានមនុស្សយ៉ាងហោចណាស់ ១០ម៉ឺននាក់ ដែលជាជនបរទេស ត្រូវបានបង្ខំឲ្យចូលរួមក្នុងការបោកប្រាស់តាមអនឡាញនៅកម្ពុជា។
នៅពេលមានការវាយប្រហារយ៉ាងធ្ងន់ធ្ងរពីទាហានថៃ ក្រុមឧក្រិដ្ឋជនចិនមិនអនុញ្ញាតឲ្យកម្មករជាជនបរទេសរត់ចេញភ្លាមៗឡើយ។ រហូតដល់ថ្ងៃទី១០ ខែធ្នូ ឆ្នាំ២០២៥ ពួកគេត្រូវបានអនុញ្ញាតឲ្យភៀសខ្លួនចេញ ប៉ុន្តែពួកគេត្រូវបានតាមដានដោយក្រុមឧក្រិដ្ឋជនជាតិចិន។ ពួកគេត្រូវបានបញ្ជូនទៅកន្លែងផ្សេងៗទៀត គឺនៅរាជធានីភ្នំពេញ នៅតំបន់ជាប់ព្រំដែនវៀតណាម ដូចជា នៅបាវិត ជ្រៃធំ ត្រពាំងផ្លុង និងនៅខេត្តមណ្ឌលគិរីជាដើម។ នេះបើតាមអ្នករត់តាក់ស៊ីមួយចំនួនដែលបានដឹកជនបរទេសទាំងនោះ។
អូរស្មាច់ដែលជាតំបន់សម្បូរទៅដោយអគារScam និងកន្លែងឃុំខ្លួនមនុស្សផ្សេងទៀត ត្រូវបានកងទ័ពថៃចោទប្រកាន់ថាជាមជ្ឈមណ្ឌលយោធាសម្ងាត់ ដែលផ្ទុកយន្តហោះគ្មានមនុស្សបើក (ដ្រូន)។ ទាហានថៃ បានលើកឡើងថា បន្ទាប់ពីសង្គ្រាមតាមព្រំដែន កាលពីខែកក្កដា ឆ្នាំ២០២៥ ថៃបានទទួលព័ត៌មានសម្ងាត់ថាទីតាំងអគារScam នៅអូរស្មាច់ត្រូវបានប្រើសម្រាប់ផ្ទុកអាវុធ។
ទោះជាយ៉ាងណា អាជ្ញាធរកម្ពុជាបានច្រានចោលការចោទប្រកាន់របស់ថៃលើករណីនេះ។
មិនមែនតែទីតាំងអូស្មាច់ទេដែលថៃបានវាយប្រហារ ទីតាំងផ្សេងទៀតនៅតាមព្រំដែនដែលជាតំបន់កាស៊ីណូ និងត្រូវបានសង្ស័យថាជាតំបន់អគារScam ក៏ត្រូវបានថៃបំផ្លាញដោយគ្រាប់ទម្លាក់ពីយន្តហោះចម្បាំងថៃ។ ក្នុងនោះក៏មានទីតាំងនៅថ្មដា ក្នុងស្រុកវាលវែង ខេត្តពោធិ៍សាត់ ដែលគ្រប់គ្រងដោយលោកឧកញ៉ា ទ្រី ភាព ផងដែរ។ លោក ទ្រី ភាព ដែលជាទីប្រឹក្សារបស់លោក ហ៊ុន សែន ប្រធានព្រឹទ្ធសភា បានរងទណ្ឌកម្មរបស់អាមេរិក កាលពីចុងឆ្នាំ២០១៩ ក្រោមការចោទប្រកាន់ថារំលោភសិទ្ធិមនុស្សធ្ងន់ធ្ងរនិងប្រព្រឹត្តអំពើពុករលួយ។
អាជ្ញាធរកម្ពុជា បាននិយាយថា កាស៊ីណូចំនួន៤ ត្រូវបានថៃវាយប្រហារ ប៉ុន្តែមិនបានបញ្ចេញព័ត៌មានអំពីអ្នកស្លាប់ ឬអ្នករងរបួសឡើយ។
មុនពេលមានសង្រ្គាម ទីតាំងអូរស្មាច់ ត្រូវបានពង្រីកជាបន្តបន្ទាប់ ក្នុងនោះ មានអគារជាច្រើនដែលកំពុងត្រូវបានសាងសង់ ដើម្បីពង្រីកការរកស៊ី។ បើទោះមានការវាយប្រហារលើអគារScam នៅតាមព្រំដែនថៃ ក្រុមជនបរទេសទាំងនោះ នៅតែអាចបន្តប្រតិបត្តិការបោកបញ្ឆោតពីទីតាំងផ្សេងទៀតក្នុងប្រទេសកម្ពុជា ជាពិសេសពីទីតាំងជាប់ព្រំដែនវៀតណាម នៅពេលដែលតំបន់ជាប់ព្រំដែនថៃ លែងជាកន្លែងសុវត្ថិភាព សម្រាប់ពួកគេអាចឆបោកតាមអនឡាញបានយូរអង្វែងតទៅទៀត៕
