ពលរដ្ឋខ្មែររស់នៅប្រទេសកូរ៉េ បានធ្វើការតវ៉ារិះគន់រដ្ឋាភិបាលសាធារណៈរដ្ឋកូរ៉េ ដោយលើកឡើងថា យន្តហោះហ្វឹកហាត់ល្បឿនលឿនប្រភេទធីហាសិប(T-50TH) ដែលកូរ៉េបាននាំចេញទៅឱ្យប្រទេសថៃ ប្រើប្រាស់ក្នុងការទម្លាក់គ្រាប់បែកឈ្លានពានមកលើប្រទេសកម្ពុជា។
សារព័ត៌មានដឹឆូសាន់ដេលី(The Chosun Daily) របស់កូរ៉េខាងត្បូងបានចេញផ្សាយនៅថ្ងៃទី២៩ ខែធ្នូ ឆ្នាំ២០២៥នេះថា ពលរដ្ឋខ្មែរនៅប្រទេសកូរ៉េបានជួបជុំគ្នានៅថ្ងៃទី២៨ នៅខាងមុខវិមានអនុស្សាវរីយ៍សង្រ្គាមកូរ៉េនៅយ៉ុងសានគូ (Yongsan-gu) ទីក្រុងសេអ៊ូល ហើយបានដាក់ញត្តិទៅកាន់ក្រសួងការពារជាតិ។
ពួកគេបានអះអាងថា ដំណើរការដែលថៃឈ្លានពានដែនដីប្រទេសកម្ពុជានៅថ្ងៃទី២៤ ថៃបានប្រើយន្តហោះ T-50TH ដែលផលិតដោយក្រុមហ៊ុនខូរៀ អេរ៉ូស្ពេស អ៊ីនដាស់ស្រ្ទី(Korea Aerospace Industries (KAI))សម្រាប់វាយប្រហារ និងសម្លាប់ជនស៊ីវិល។
អ្នកចូលរួមប្រមូលផ្តុំក្នុងការតវ៉ា បាននិយាយថា រដ្ឋាភិបាលកូរ៉េ និងសភាជាតិគួរតែថ្កោលទោសប្រទេសថៃចំពោះការប្រើប្រាស់ឧបករណ៍ការពារជាតិខុសគោលដៅ ដែលនាំចេញសម្រាប់ការហ្វឹកហាត់ តែបែរជាប្រើអាវុធជាការវាយប្រហារ។ ពួកគេបាននិយាយថា ‘‘អាវុធដែលកូរ៉េបានលក់ត្រូវបានប្រើដើម្បីឈ្លានពានប្រទេសកម្ពុជា’’ ហើយ ‘‘កម្ពុជាចង់បានសន្តិភាព’’។
ជាពិសេសនៅថ្ងៃទី២៤ដែលជាថ្ងៃបុណ្យគ្រិះស្មាស កងទ័ពថៃត្រូវបានគេរាយការណ៍ថា បានទម្លាក់គ្រាប់បែកចំនួន ៤គ្រាប់លើឃ្លាំងផ្ទុកអាវុធ និងគ្រាប់រំសេវក្នុងខេត្តបាត់ដំបង ប្រទេសកម្ពុជា ដោយប្រើយន្តហោះធីហាសិប(T-50TH)។
សារព័ត៌មានបរទេស ដោយយោងតាមមន្ត្រីជាន់ខ្ពស់ថៃ បាយរាយការណ៍ថា យន្តហោះម៉ូដែលនេះ ត្រូវបានបម្លែងពី‘‘សម្រាប់ហ្វឹកហាត់’’ទៅជា‘‘សម្រាប់ការប្រយុទ្ធពិតប្រាកដ’’ ហើយត្រូវបានដាក់ពង្រាយក្នុងការប្រើប្រាស់។
ភាគីប្រទេសទាំងពីរ បានយល់ព្រមលើបទឈប់បាញ់នៅថ្ងៃទី២៧ ដែលជាថ្ងៃទី២០ នៃការប្រយុទ្ធគ្នា និងហើយបានឯកភាពគ្នាលើការផ្អាកដាក់ពង្រាយទ័ព និងបញ្ឈប់ការបង្កភាពតានតឹង។ ទោះជាយ៉ាងណា ក៏ដោយយោធាថៃបានទុកសារព្រមានថា នឹងឆ្លើយតបភ្លាមៗ ប្រសិនបើកម្ពុជារំលោភលើលក្ខខណ្ឌទាំងនេះដែលធ្វើឱ្យស្ថានការណ៍នៅតែមានភាពតានតឹងខ្លាំង៕
