ក្រសួងមហាផ្ទៃ ឱ្យដឹងថា ក្រោយមានបទឈប់បាញ់ ជនភៀសសឹកខ្មែរជិត៦០នាក់ មិនទាន់អាចវិលទៅផ្ទះបាននៅឡើយ ខណៈសេចក្តីរាយការណ៍នានាឱ្យដឹងថា យោធាសៀមកំពុងប្រើគ្រឿងចក្រឈូសកម្ទេចផ្ទះអ្នកភូមិមួយចំនួនតាមព្រំដែន ដែលពួកគេដណ្តើមបាន ក្រោយធ្វើសង្គ្រាមឈ្លានពានចំនួន២១ថ្ងៃមកនេះ។
ក្រសួងមហាផ្ទៃ និយាយក្នុងសេចក្តីថ្លែងការណ៍ ចុះថ្ងៃទី២៩ខែធ្នូនេះ ស្តីពី ស្ថានភាពក្រោយបទឈប់បាញ់ គិតពីម៉ោង១រសៀល ដល់ម៉ោង៦ល្ងាច ថ្ងៃទី២៩ ខែធ្នូ ឆ្នាំ២០២៥នេះថា វីរយុទ្ធជនកម្ពុជា និងយោធាថៃ បានអនុវត្តបទឈប់បាញ់ ធ្វើឱ្យស្ថានភាពស្ងប់ស្ងាត់ ស្របតាមសេចក្តីប្រកាសរួម នៃកិច្ចប្រជុំពិសេសលើកទី៣ គណៈកម្មាធិការព្រំដែនទូទៅកម្ពុជា-ថៃ (GBC) នៅច្រកព្រំដែនអន្តរជាតិព្រំ ខេត្តប៉ៃលិន នាថ្ងៃទី២៧ ខែធ្នូ ឆ្នាំ២០២៥។
ក្រសួងថា ស្ថានភាពនេះ ជនភៀសសឹកខ្មែរជិត១៥ម៉ឺននាក់ (១៤ ៩៦៣នាក់) បានបន្តវិលត្រឡប់ទៅលំនៅឋានវិញ ដែលធ្វើឱ្យជនភៀសសឹកនៅសល់សរុបមានចំនួនជិត៦០ម៉ឺននាក់ (៥៩៦ ៩២៦នាក់) ក្នុងនោះស្ត្រី ជាង៣១ម៉ឺននាក់ (៣១១ ៥៩៩នាក់) និងកុមារជាង១៨ម៉ឺននាក់ (១៨៧ ៥៩៧នាក់)។
សម្រាប់ក្រសួង ស្ថានភាពនេះ សេវាសាធារណៈជាមូលដ្ឋាន មានសាលារៀន មន្ទីរពេទ្យ មណ្ឌលសុខភាព មួយចំនួននៅរដ្ឋបាលថ្នាក់ស្រុក និងឃុំ សង្កាត់ ខ្លះបានដំណើរការឡើងវិញ ដូចជានៅខេត្តឧត្តរមានជ័យ ព្រះវិហារ បាត់ដំបង និងកោះកុង ជាដើម។
ដោយឡែក ពលរដ្ឋមួយចំនួន នៅភូមិជោគជ័យ ភូមិព្រៃចាន់ ច្រកបឹងត្រកួន ក្នុងស្រុកអូរជ្រៅ ខេត្តបន្ទាយមានជ័យ បានបង្ហោះវីដេអូបង្ហាញថា ពួកគេមិនអាចចូលទៅផ្ទះពួកគេបាន ដោយសារក្រុមយោធាសៀមឈ្លានពាន បានប្រើគ្រឿងចក្រឈូសកម្ទេចផ្ទះពួកគេ និងកន្លែងខ្លះទៀត សៀមព័ទ្ធបន្លាលួស។
ដូចគ្នានេះដែរ ទង្វើឈ្លានពានរបស់សៀម បានធ្វើឡើងនៅឃុំថ្មដា ស្រុកវាលវែង ខេត្តពោធិ៍សាត់ និងតំបន់មួយចំនួនទៀត ដែលគេជឿថា យោធាសៀមដណ្តើមបានក្នុងសង្គ្រាមឈ្លានពានចំនួន២១ថ្ងៃមកនេះ។
លើសពីនេះ តំណាងរាស្ត្រគណបក្សប្រឆាំង លោក អ៊ុំ សំអាន ដែលសកម្មតាមដានបញ្ហាព្រំដែន បាននិយាយលើហ្វេសប៊ុករបស់លោក ដោយភ្ជាប់ជាមួយភស្តុតាងជាវីដេអូថា ថ្ងៃទី៣០ ខែធ្នូ ឆ្នាំ២០២៥នេះ ទាហានថៃកំពុងបន្តឈូសកម្ទេចផ្ទះរបស់ពលរដ្ឋខ្មែរនៅភូមិជោគជ័យ និងភូមិព្រៃចាន់ ក្រៅពីនេះពួកគេកំពុងព័ទ្ធបន្លាលួសលើភូមិខ្មែរនៅឃុំថ្មដា ស្រុកវាលវែង ខេត្តពោធិ៍សាត់។
បន្ថែមនេះ លោកថា យោធាថៃឈ្លានពានកំពុងប្រើគ្រឿងចក្រពន្លឿនសម្អាតទីតាំងភ្នំ៣៥០ ដែលនៅជាប់ប្រាសាទតាក្របី ដើម្បីសាងសង់លេណដ្ឋាន ដើម្បីគ្រប់គ្រងទីតាំងភ្នំ៣៥០ និងប្រាសាទតាក្របី។
ជុំវិញការឈ្លានពានរបស់សៀម រយៈពេល២១ថ្ងៃ រហូតមានកិច្ចព្រមព្រៀងបទឈប់បាញ់ថ្ងៃទី២៧ ខែធ្នូ ឆ្នាំ២០២៥ ក្រសួងមហាផ្ទៃ អះអាងថាផលប៉ះពាល់ដោយសារគ្រាប់ផ្លោង និងយន្តហោះចម្បាំងថៃ បានបង្កការខូចខាតផ្ទះពលរដ្ឋខ្មែរចំនួន ១៦០ខ្នង សម្លាប់ជនស៊ីវិលខ្មែរចំនួន៣២នាក់ និង៩៥នាក់រងរបួស រីឯហេដ្ឋារចនាសម្ព័ន្ធជាច្រើន ត្រូវបានបំផ្លាញ រួមទាំងសាលារៀន មន្ទីរពេទ្យ និងប្រាសាទបូរាណជាដើម។
ប៉ុន្តែក្រសួងមិនបានទម្លាយឱ្យថា មានភូមិចំនួនប៉ុន្មាន ឬផ្ទះពលរដ្ឋចំនួនប៉ុន្មានខ្នង ដែលត្រូវបានយោធាថៃ ដណ្តើមគ្រប់គ្រងបាន និងប៉ុន្មានខ្នងផ្ទះ កំពុងប្រឈមនឹងការឈូសបំផ្លាញចោល ពីសំណាក់យោធាថៃឈ្លានពាននោះដែរ គិតត្រឹមថ្ងៃទី៣០ខែធ្នូនេះ។
យ៉ាងណា ក្រសួងថា កិច្ចអន្តរាគមន៍រៀបចំផ្ទះសំបែង និងភូមិករពលរដ្ឋភៀសសឹក ក្រសួងមហាផ្ទៃ នៃរាជរដ្ឋាភិបាលកម្ពុជា និងស្ថាប័នពាក់ព័ន្ធ កំពុងបន្តយកចិត្តទុកដាក់ពិនិត្យ និងដោះស្រាយកិច្ចការអាទិភាពជាច្រើនទៀត ដើម្បីធានាការវិលមករកប្រក្រតីភាព នៃសេវាសាធារណៈជាមូលដ្ឋាននៅតាមបណ្តាក្រុង ស្រុក និងឃុំ-សង្កាត់ ជាពិសេសក្នុងខេត្តជាប់ព្រំដែនដែលបានបិទផ្អាកក្នុងរយៈកាលកន្លងមក៕
