នៅពាក់កណ្ដាលខែធ្នូ ឆ្នាំ២០២៥នេះ អតិថិជននៃធនាគារព្រីនស៍ បានទទួលការខលចូលពីបុគ្គលិក ប្រាប់ពួកគេឱ្យទៅបិទគណនីធនាគារ នៅតាមបណ្ដាសាខានានា។ តាមរយៈការខលចូលនេះ បុគ្គលិកធនាគារបានប្រាប់ទៅអតិថិជនថា ការបិទគណនី គឺធ្វើឡើងដើម្បីបង្ការហានិភ័យដែលអាចកើតមានជាយថាហេតុ។
វីអូឌី បានសាកសួរទៅកាន់បុគ្គលិកធនាគារព្រីនស៍ដោយផ្ទាល់ នៅថ្ងៃទី៣០ ខែធ្នូ ដោយពួកគេអះអាងថា ពិតជាមានការជូនដំណឹងតាមទូរស័ព្ទពិតមែន និងមានអតិថិជនទៅបិទគណនី ឬកុងធនាគារជារៀងរាល់ថ្ងៃ។ ពួកគេបន្តថា ការបិទគណនីនេះ គឺតម្រូវឱ្យអតិថិជនទៅសាខាដោយផ្ទាល់ដើម្បីចុះហត្ថលេខា និងទទួលការបង្វែរសាច់ប្រាក់ ប្រសិនបើមានសេសសល់ក្នុងគណនី។ បុគ្គលិកដដែល បញ្ជាក់ថា ការបិទគណនីនេះនឹងធ្វើឡើងរហូតដល់ស្ថានភាពធនាគារល្អប្រសើរឡើងវិញ។
យ៉ាងណា ពួកគេមិនបានប្រាប់បន្ថែមឡើយថានឹងមានរឿងអ្វីកើតឡើង ប្រសិនបើអតិថិជនមិនបានទៅបិទគណនី ឬកុងធនាគាររបស់ខ្លួន។
ប្រតិបត្តិការបិទគណនីអតិថិជននេះ កើតឡើងក្រោយធនាគារព្រីនស៍ (Prince Bank) ដែលជាបុត្រសម្ព័ន្ធរបស់ក្រុមហ៊ុន ព្រីនស៍ គ្រុប (Prince Group) មានរឿងអាស្រូវពាក់ព័ន្ធនឹងឧក្រិដ្ឋកម្មអនឡាញ និងលាងលុយកខ្វក់ ដែលមានមេក្លោងជាម្ចាស់ក្រុមហ៊ុនផ្ទាល់ គឺលោក ចេន ហ្ស៊ី។
បទឧក្រិដ្ឋនេះ បានផ្ទុះឡើងនៅខែតុលា ក្រោយបណ្ដាប្រទេសធំៗ ដូចជា សហរដ្ឋអាមេរិក ចក្រភពអង់គ្លេស ចិន តៃវ៉ាន់ សិង្ហបុរី កូរ៉េខាងត្បូង ថៃ និងហុងកុង បានសើរើរឹបអូស និងដកហូតទ្រព្យសម្បត្តិ ទាំងអចលនទ្រព្យ និងរូបិយបណ្ណឌីជីថល របស់លោក ចេន ហ្ស៊ី រាប់រយពាន់លានដុល្លារ។ លើសពីនេះ បណ្ដាប្រទេសខាងលើ ក៏បានចេញដីកា ឬនិវេទក្រហមតាមចាប់អ្នកជំនួញរូបនេះផងដែរ។
យោងតាមការចុះផ្សាយរបស់កាសែត ដឹ ស្ត្រេត ថាមស៍ (The Strait Times) នៅថ្ងៃទី២៩ ខែធ្នូ បានឱ្យដឹងថា នាយកដ្ឋានកិច្ចការពារពាណិជ្ជកម្មរបស់សិង្ហបុរី [Commercial Affairs Department (CAD)] កំពុងស្វែងរករឹបអូសសែក(cheques) ឬមូលប្បទានប័ត្រដែលមានតម្លៃលើសពី ៣.៧លានដុល្លារ បណ្ណបំណុលមានតម្លៃលើសពី២សែនដុល្លារ និងប្រាក់បញ្ញើតម្លៃ ៣សែនជាងដុល្លារ ក្រោយតុលាការបានលាតត្រដាងក្នុងសវនាការ។
ភាពរង្គោះរង្គើនៃអាណាចក្រឧក្រិដ្ឋកម្មអនឡាញខុសច្បាប់ និងលាងលុយកខ្វក់របស់លោក ចេន ហ្ស៊ី បានធ្វើឱ្យបណ្ដាអ្នកមានអំណាច និងមន្ត្រីរដ្ឋាភិបាលកម្ពុជា ចាប់ផ្ដើមដកខ្លួនចេញជាបន្តបន្ទាប់។ ក្នុងនោះក្រុមហ៊ុនមួយចំនួន ដែលត្រូវបានគេស្គាល់ថាជាកម្មសិទ្ធិរបស់រដ្ឋមន្ត្រីក្រសួងមហាផ្ទៃ លោក ស សុខា ដែលធ្លាប់ប្រើប្រាស់សេវាធនាគារព្រីនស៍ សម្រាប់បើកប្រាក់ខែឱ្យបុគ្គលិក ក៏ត្រូវបានផ្លាស់ប្ដូរទៅប្រើសេវាធនាគារផ្សេង តាំងពីចុងខែតុលា។
ត្រកូល ស នេះហើយដែលបាននាំលោក ចេន ហ្ស៊ី ឱ្យមកស្គាល់កម្ពុជាកាលពីឆ្នាំ២០១៣ និងនាំទៅបង្កើតទំនាក់ទំនងជិតស្និទ្ធជាមួយថ្នាក់ដឹកនាំត្រកូលហ៊ុន រហូតធ្វើឱ្យបុរសជនជាតិចិនវ័យ៣៨ឆ្នាំរូបនេះ ទទួលបានសញ្ជាតិខ្មែរ ក្លាយជាអ្នកឧកញ៉ា និងជាទីប្រឹក្សានាយករដ្ឋមន្ត្រីទាំងពីរជំនាន់។
ទោះរឿងក្ដីមេឧក្រិដ្ឋជនរូបនេះ បានកក្រើកពាសពេញទ្វីបអាស៊ី រហូតដល់អ៊ឺរ៉ុប និងអាមេរិក ក៏គេមិនទាន់ឃើញមានចំណាត់ការណាមួយ ពីរដ្ឋាភិបាលកម្ពុជាទៅលើលោក ចេន ហ្ស៊ី ខណៈកម្ពុជាមានទាំងច្បាប់ដកសញ្ជាតិទៅហើយក្ដី៕
