ថៃបានប្រកាសពន្យាពេលជាថ្មីទៀត ក្នុងការបញ្ជូនទាហានខ្មែរ ១៨រូប ឱ្យមកកម្ពុជាវិញ ទោះបានសន្យាក្នុងកិច្ចព្រមព្រៀងបទឈប់បាញ់ថ្មី កាលពីថ្ងៃទី២៧ ខែធ្នូ ឆ្នាំ២០២៥ ដែលបានតម្រូវឱ្យកម្ពុជាអនុវត្តបទឈប់បាញ់រយៈពេល៧២ម៉ោង ឬបីថ្ងៃ ថៃនឹងពិចារណាដោះលែង។ នេះបើតាមប្រភពពីកាសែតក្នុងស្រុករបស់ថៃ រួមទាំង ខាវសុត ដែលបានចុះថ្ងៃទី៣០ខែធ្នូនេះ។
បើតាមប្រភពនោះ រដ្ឋមន្ដ្រីការបរទេសថៃ លោក សីហាសាក់ ភុងកេតកែវ នៅថ្ងៃទី៣០ ខែធ្នូនេះ ប្រកាសថា ការដោះលែងទាហានខ្មែរ១៨នាក់ សុំពន្យាពេលសិន។
លោកបន្តថា ក្រោយទាហានថៃ រកឃើញថា កម្ពុជាបំពានបទឈប់បាញ់រយៈពេល ៧២ម៉ោង ដោយកម្ពុជាបន្តធ្វើសកម្មភាពបង្ហោះដ្រូនជាង ២៥០គ្រឿង នៅតំបន់ព្រំដែនខេត្តស៊ីសាក់កេត និងបូរីរាំ។
លើសពីនេះ លោកបានចោទថា កម្ពុជា បន្តដាក់មីនធ្វើឱ្យទាហានថៃ ជាន់មីនដាច់ជើងស្តាំម្នាក់ទៀត លើកទី១១ ដែលកម្ពុជាត្រូវទទួលខុសត្រូវចំពោះរឿងនេះ។
លោកអះអាងថា ករណីសុំពន្យារពេលដោះលែងទាហានខ្មែរ ១៨នាក់នេះ លោកបានរាយការណ៍ទៅមហាអំណាចចិនហើយ ព្រោះកម្ពុជាជាអ្នកបំពានបទឈប់បាញ់មុន។
យ៉ាងណា លោកបញ្ជាក់ថា ការពន្យារពេលនេះ មិនបានកំណត់ថា នឹងត្រូវដោះលែងទាហានខ្មែរ១៨នាក់នោះ នៅពេលណាទៀតនោះទេ។
កម្ពុជា និងថៃ បានសម្រេចចុះហត្ថលេខាលើបទឈប់បាញ់បណ្ដោះអាសន្ន ក្នុងរយៈពេល ៧២ម៉ោង ចាប់ពីម៉ោង១២ថ្ងៃត្រង់ ថ្ងៃទី២៧ ខែធ្នូ ឆ្នាំ២០២៥ តទៅ ដែលកិច្ចព្រមព្រៀងនេះ បានបញ្ជាក់ថា ភាគីថៃនឹងពិចាររណាដោះលែងយោធិនខ្មែរចំនួន១៨នាក់វិញ ដែលថៃឃុំខ្លួនជាង៥ខែមកនេះ បើបទឈប់បាញ់នេះមានប្រសិទ្ធភាពតាមរយៈពេលកំណត់៧២ម៉ោង។
យ៉ាងណា គិតត្រឹមម៉ោងផ្សាយនេះ ទាំងក្រសួងការពារជាតិកម្ពុជា រួមទាំងនាយករដ្ឋមន្ត្រីខ្មែរមិនទាន់ឃើញបញ្ចេញប្រតិកម្មជុំវិញការដែលថៃប្រកាសពន្យាពេលជាថ្មីទៀត លើការសន្យាបញ្ជូនទាហានខ្មែរទាំង១៨រូបនោះឱ្យកម្ពុជានោះនៅឡើយទេ គិតត្រឹមថ្ងៃទី៣០ខែធ្នូនេះ។
សូមរំឭកថា កាលពីថ្ងៃទី២៩ ខែធ្នូ តាមរយៈរដ្ឋមន្ដ្រីការបរទេសកម្ពុជា លោក ប្រាក់ សុខុន បាននិយាយថា បើគ្មានអ្វីប្រែប្រួលទេ ថៃនឹងដោះលែងទាហានខ្មែរ ១៨នាក់ នៅថ្ងៃស្អែកម៉ោង ១២ថ្ងៃត្រង់ តាមការសន្យាគ្នា៕
