មន្ត្រីរុស្ស៊ី កាលពីថ្ងៃ១ខែមករា បាននិយាយថា ការវាយប្រហារដោយដ្រូនរបស់អ៊ុយក្រែន បានសម្លាប់មនុស្ស ២៤ នាក់ និងរបួសយ៉ាងហោចណាស់ ៥០នាក់បន្ថែមទៀត ខណៈដែលពួកគេកំពុងប្រារព្ធពិធីបុណ្យចូលឆ្នាំថ្មី នៅក្នុងភូមិមួយដែលគ្រប់គ្រងដោយរុស្ស៊ី ក្នុងតំបន់ Kherson នៃប្រទេសអ៊ុយក្រែន ធ្វើឱ្យមានភាពតានតឹងរវាងប្រទេសទាំងពីរបន្តកើនឡើង ទោះបីជាក្រុមអ្នកការទូតបានសាទរចំពោះការចរចាសន្តិភាពប្រកបដោយផ្លែផ្កាក៏ដោយ។
លោក Vladimir Saldo មេដឹកនាំដែលតែងតាំងដោយទីក្រុងមូស្គូប្រចាំតំបន់នោះ បាននិយាយនៅក្នុងសេចក្តីថ្លែងការណ៍មួយលើតេឡេក្រាម (Telegram) ថា ដ្រូនចំនួន ៣គ្រឿង បានវាយប្រហារលើហាងកាហ្វេ និងសណ្ឋាគារមួយ ក្នុងទីក្រុងរមណីយដ្ឋាន Khorly ជាប់ឆ្នេរសមុទ្រខ្មៅ។ លោកបានបន្តថា ដ្រូនមួយក្នុងចំណោមនោះ បានដឹកនាំល្បាយដែលបង្កជាអគ្គិភ័យ ដែលបណ្តាលឱ្យមានការឆាបឆេះយ៉ាងសន្ធោសន្ធៅ។
មន្ត្រីអ៊ុយក្រែន មិនបានធ្វើអត្ថាធិប្បាយភ្លាមៗ ចំពោះការអះអាងអំពីការវាយប្រហារនេះទេ។ ការវាយប្រហារនេះមិនទាន់អាចត្រូវបានផ្ទៀងផ្ទាត់ដោយឯករាជ្យ ដោយទីភ្នាក់ងារសារព័ត៌មាន AP នៅឡើយទេ។
ការវាយប្រហារនេះ ត្រូវបានថ្កោលទោសដោយមន្ត្រីរុស្ស៊ីមួយចំនួន។ លោកស្រី Valentina Matviyenko ប្រធានសភាជាន់ខ្ពស់រុស្ស៊ី (ក្រុមប្រឹក្សាសហព័ន្ធ) បាននិយាយថា ការវាយប្រហារនេះបាន “ពង្រឹង” ការប្តេជ្ញាចិត្តរបស់រុស្ស៊ី ក្នុងការសម្រេចឱ្យបានឆាប់រហ័សនូវគោលដៅរបស់ខ្លួន នៅក្នុងការឈ្លានពានលើអ៊ុយក្រែន ដែលអូសបន្លាយជិត ៤ ឆ្នាំមកនេះ។
ការវាយប្រហារនេះ “បង្ហាញជាថ្មីម្តងទៀតនូវសុពលភាពនៃការទាមទារដំបូងរបស់យើង” នេះបើតាមសម្តីរបស់លោកស្រី Matviyenko។
សេចក្តីថ្លែងការណ៍នេះ បានកើតឡើងបន្ទាប់ពីការអះអាងពីទីក្រុងមូស្គូថា អ៊ុយក្រែនបានបើកការវាយប្រហារដោយដ្រូនរយៈចម្ងាយឆ្ងាយ ប្រឆាំងនឹងលំនៅដ្ឋានផ្លូវការមួយរបស់ប្រធានាធិបតីរុស្ស៊ី លោក Vladimir Putin នៅភាគពាយ័ព្យនៃប្រទេសរុស្ស៊ី កាលពីថ្ងៃ៣០ខែធ្នូ។ ទីក្រុងកៀវ បានថ្កោលទោសការអះអាងនេះថាជា “រឿងកុហក”។
ក្រសួងការពារជាតិរុស្ស៊ី បានបញ្ចេញវីដេអូមួយកាលពីថ្ងៃ៣១ខែធ្នូ អំពីដ្រូនដែលត្រូវបានបាញ់ទម្លាក់ ដែលខ្លួនបាននិយាយថា បានពាក់ព័ន្ធនៅក្នុងការវាយប្រហារនោះ។
ឃ្លីបវីដេអូនាពេលយប់នោះ បានបង្ហាញបុរសម្នាក់ស្លៀកសម្លៀកបំពាក់យោធា ពាក់មួកសុវត្ថិភាព និងអាវក្រោះការពារគ្រាប់ កំពុងឈរក្បែរដ្រូនដែលខូចខាតដែលដេកនៅលើព្រិល។ បុរសរូបនោះដែលបានបិទបាំងមុខ បាននិយាយរៀបរាប់អំពីដ្រូន។
វីដេអូ និងការអះអាងទាំងនេះ មិនទាន់អាចត្រូវបានផ្ទៀងផ្ទាត់ដោយឯករាជ្យនៅឡើយទេ។
នៅក្នុងសុន្ទរកថាចូលឆ្នាំថ្មីរបស់ប្រធានាធិបតីអ៊ុយក្រែន លោក Volodymyr Zelenskyy បានមានប្រសាសន៍ថា កិច្ចព្រមព្រៀងសន្តិភាព គឺ “រួចរាល់ ៩០%” ហើយ ប៉ុន្តែលោកបានព្រមានថា ១០% ដែលនៅសេសសល់ ដែលត្រូវបានគេជឿថា រួមមាន ចំណុចមិនចុះសម្រុងសំខាន់ៗ ដូចជា បញ្ហាទឹកដី នឹង “កំណត់ជោគវាសនានៃសន្តិភាព ជោគវាសនារបស់អ៊ុយក្រែន និងអឺរ៉ុប និងរបៀបដែលមនុស្សនឹងរស់នៅ”។
បេសកជនពិសេសរបស់ លោក Trump លោក Steve Witkoff បាននិយាយកាលពីថ្ងៃ៣១ខែធ្នូថា រដ្ឋមន្ត្រីការបរទេសលោក Marco Rubio និងកូនប្រសារ ព្រមទាំងជាទីប្រឹក្សារបស់លោក Trump គឺលោក Jared Kushner បានធ្វើ “ការសន្ទនាតាមទូរស័ព្ទប្រកបដោយផ្លែផ្កា” ជាមួយទីប្រឹក្សាសន្តិសុខជាតិរបស់ចក្រភពអង់គ្លេស បារាំង អាល្លឺម៉ង់ និងអ៊ុយក្រែន “ដើម្បីពិភាក្សាអំពីការជំរុញជំហានបន្ទាប់នៅក្នុងដំណើរការសន្តិភាពអឺរ៉ុប”។
លោក Witkoff បាននិយាយនៅក្នុងការបង្ហោះលើបណ្តាញសង្គម X ថា៖ «យើងបានផ្តោតលើរបៀបរុញច្រានការពិភាក្សាឱ្យទៅមុខតាមបែបជាក់ស្តែង ក្នុងនាមដំណើរការសន្តិភាពរបស់ លោក Trump រួមទាំងការពង្រឹងការធានាសន្តិសុខ និងការបង្កើតយន្តការដោះស្រាយជម្លោះប្រកបដោយប្រសិទ្ធភាព ដើម្បីជួយបញ្ចប់សង្រ្គាម និងធានាថាវាមិនចាប់ផ្តើមឡើងវិញ»។
ប្រធានក្រុមអ្នកចរចាអ៊ុយក្រែន លោក Rustem Umerov ក៏បានបញ្ជាក់ជាថ្មីថា មន្ត្រីអឺរ៉ុប និងអ៊ុយក្រែន គ្រោងនឹងជួបគ្នានៅថ្ងៃទី៣ខែមករា ខណៈដែលលោក Zelenskyy គ្រោងនឹងធ្វើការចរចានៅសប្តាហ៍ក្រោយ ជាមួយមេដឹកនាំអឺរ៉ុប៕
